1 Tesalonikatɔwo 1:1-10
1 Paulo kple Silvano kpakple Timoteo le esia ŋlɔm na Tesalonikatɔwo ƒe hame, si le ƒomedodo me kple Mawu Fofo la, kple Aƒetɔ Yesu Kristo:
Amenuveve kple ŋutifafa woana mi.
2 Míedaa akpe na Mawu ɣesiaɣi ne míeyɔ mi katã ŋkɔ le míaƒe gbedodoɖawo me,
3 elabena ɣesiaɣi la, míeɖoa ŋku miaƒe xɔse ƒe dɔwɔwɔ kple agbagba siwo miedzena le lɔlɔ̃ ta, kpakple miaƒe dzidodo le mɔkpɔkpɔ, si le mia si le Aƒetɔ Yesu Kristo me, la dzi le mía Mawu kple Fofo la ŋkume.
4 Elabena nɔviwo, Mawu ƒe lɔlɔ̃tɔwo, míenya eƒe mia tiatia la,
5 elabena nya nyui si míeɖe gbeƒãe la meva mia gbɔ le nuƒoƒo ɖeɖe ko me o, ke eva le ŋusẽ kple gbɔgbɔ kɔkɔe kpakple kakaɖedzi sẽŋu hã me, abe ale si ko mienya ame si ƒomeviwo míeva zu na mi le mia ta la ene;
6 eye miezu míawo kple Aƒetɔ la srɔ̃lawo, esi wònye mietsɔ gbɔgbɔ kɔkɔe ƒe dzidzɔ xɔ nya la le xaxa geɖewo me ta,
7 si wɔe be mieva zu kpɔɖeŋu na xɔsetɔ siwo katã le Makedonia kple Axaya.
8 Nyateƒee wònye be, menye ɖekoe Yehowa ƒe nya la ɖi hoo tso mia gbɔ yi Makedonia kple Axaya o, ke le afi sia afi la, miaƒe Mawu dzi xɔxɔse ŋu nya hã kaka ale be mehiã be míagagblɔ nya aɖeke o.
9 Elabena woawo ŋutɔwo woyi edzi le nu ƒom tso ale si míege ɖe mia dome zi gbãtɔ, kple ale si mietrɔ tso miaƒe trɔ̃wo gbɔ va Mawu gbɔ, bene miasubɔ Mawu gbagbe vavã la abe kluviwo ene, la ŋuti,
10 eye mialala Via tso dziƒowo, ame si wòfɔ ɖe tsitre tso ame kukuwo dome, si nye Yesu, ame si ɖe mí tso dziku si gbɔna la me.
