Psalmowo 102:1-28
Ame si hiã tu ƒe gbedodoɖa, ne mɔkpɔkpɔ bu ɖee,* eye wòtrɔ eƒe dzimaɖitsitsiwo ƒo ɖe Yehowa ŋkume.+
102 Oo Yehowa, se nye gbedodoɖa;+Eye nye ɣlidodo hena kpekpeɖeŋu neɖo gbɔwò.+
2 Mègaɣla wò mo ɖem ne meɖo xaxa me o.+
Ƒu to anyi ɖe ŋunye;*Ne meyɔ wò la, nàtɔ nam kaba.+
3 Elabena nye ŋkekewo nu le yiyim abe dzudzɔ ene,Eye nye ƒuwo ʋu dzo hɛ̃e abe mlekpui me ene.+
4 Woƒo nye dzi abe gbe ene, eye wòyrɔ,+Elabena meŋlɔ nye nuɖuɖu gɔ̃ hã be.
5 Le nye ŋeŋe sesĩe ta,+Nye ŋutilã lé ɖe nye ƒuwo ŋu kpaɖii.+
6 Meɖi aluge si le gbedzi;Mele abe ʋlukuku si le aƒedowo me ene.
7 Metsi zãdomadɔlɔ̃e;*Eye mele abe xevi tsiakogo le xɔ ta ene.+
8 Nye futɔwo ɖea alɔme le ŋunye ŋkeke bliboa.+
Ame siwo doa vlom la tsɔa nye ŋkɔ wɔa ɖiŋudonui.
9 Elabena dzofi zu abolo meɖuna,+Eye nye nunono tɔtɔ kple aɖatsi,+
10 Le wò dɔmedzoe kple dziku ta,Elabena ède asi tenye, be yeatsɔm aƒu gbe.
11 Nye ŋkekewo le abe vɔvɔli si nu le yiyim ene,*+Eye meyrɔ abe gbe ene.+
12 Ke wò la, Oo Yehowa, ànɔ anyi tegbetegbe,+Eye wò ŋkɔxɔxɔ* anɔ anyi tso dzidzime yi dzidzime.+
13 Àtso akpɔ nublanui na Zion godoo,+Elabena enuveɣi ɖo;+Ɣeyiɣi ɖoɖi la de.+
14 Elabena eƒe xɔtukpewo dzea wò subɔlawo ŋu+Eye eƒe kewo gɔ̃ hã xɔ asi na wo.+
15 Dukɔwo avɔ̃ Yehowa ƒe ŋkɔ,Eye anyigbadzifiawo katã avɔ̃ wò ŋutikɔkɔe.+
16 Elabena Yehowa agbugbɔ Zion atso;+Ado le eƒe ŋutikɔkɔe me.+
17 Atrɔ ɖe wɔnamanɔŋutɔwo ƒe kokoƒoƒo ŋu;+Eye mado vlo woƒe gbedodoɖa o.+
18 Woŋlɔ esia ɖi na megbeviwo,+Ale be ame siwo ava dzɔ* la nakafu Yah.
19 Elabena ekpɔa nu tso eƒe kɔkɔeƒe si le dzi,+Yehowa kpɔa anyigba la tso dziƒo,
20 Ne wòase gamenɔla ƒe hũɖeɖe,+Ne wòaɖe ga ame siwo wotso kufia na,+
21 Ale be woaɖe gbeƒã Yehowa ƒe ŋkɔ le Zion,+Kple eƒe kafukafu le Yerusalem,
22 Ne dukɔwo kple fiaɖuƒewo naƒo ƒu,Asubɔ Yehowa.+
23 Exɔ ŋusẽ le asinye le mɔ ta;Eye wòɖe nye ŋkekewo dzi kpɔtɔ.
24 Mebe: “Oo nye Mawu,Mègaɖem ɖa le nye agbemeŋkekewo ƒe domedome o;Wò Ame si ƒe ƒewo li tso dzidzime yi dzidzime.+
25 Gbe aɖe gbe kee nèɖo anyigba gɔme anyi,Eye dziƒowo nye wò asinudɔwɔwɔ.+
26 Wo nu ava yi, ke wò ya ànɔ anyi;Wo katã woanyunyɔ abe avɔ ene.
Àɖɔli wo abe awudodo ene, eye wo nu ayi.
27 Ke wò la, nenema ko nèle, eye nuwuwu meli na wò ƒewo gbeɖe o.+
28 Wò subɔlawo ƒe viwo anɔ anyi dedie,Eye woƒe dzidzimeviwo ali ke ɖaa le ŋkuwòme.”+
