Dzo kpo yi emenuwo dzi

Dzo kpo yi emenuawo dzi

 TA BLAEVELIA

“Mexɔe Se”

“Mexɔe Se”

1. Ƒo nu tso ale si Marta nɔ nu xam kple nu si tae wònɔ nu xam ɖo la ŋu.

MARTA le nɔviaŋutsua ƒe yɔdo si nye agado si nu wotsɔ kpe ɖo la kpɔm ɖaa le susu me. Nuxaxa zu agba kpekpe le edzi abe kpe ma ene. Esesẽ nɛ ŋutɔ be wòaxɔe ase be Lazaro, ye nɔviŋutsu lɔlɔ̃a, ku. Ŋkeke enee nye ema tso esime Lazaro ku; ɖeko wòwɔ nɛ abe nu ɖeka mawo tɔgbi koe le edzi yim gbe sia gbe ene—nuxaxa, sasrãkpɔwo kple akɔfanamenyawo.

2, 3. (a) Aleke Marta anya se le eɖokui me esi wòkpɔ Yesu? (b) Nu kae nya vevi si Marta gblɔ la ɖe fia tso eŋu?

2 Fifia, Lazaro xɔlɔ̃ vevitɔe nye ema le tsitre ɖe Marta ŋkume. Esi wòkpɔ Yesu la, esia gaɖo ŋku eƒe nuxaxaa dzi nɛ, elabena ame sia koe ate ŋu axɔ na nɔvia hafi. Ke hã Marta ƒe dzi dze eme vie esi wòyi ɖakpe Yesu le todu sue si nye Betania la ƒe gbɔto. Ale si Yesu wɔa nu ɖe ame ŋu dɔmenyotɔe kple eƒe veveseɖeamenu la fa akɔ nɛ hede dzi ƒo nɛ le woƒe gododo kpui ma me. Yesu bia nya siwo ana Marta ƒe susu nanɔ xɔse si le esi kple nu siwo wònya tso tsitretsitsia ŋu dzi lae. Woƒe dzeɖoɖoa na Marta gblɔ nya vevitɔ kekeake siwo wògblɔ kpɔ la dometɔ ɖeka. Egblɔ be: ‘Mexɔe se be wòe nye Kristo, Mawu ƒe Vi la, Ame si gbɔna xexea me.’—Yoh. 11:27.

3 Nya mawo ɖee fia be xɔse sẽŋu nɔ Marta si. Míate ŋu asrɔ̃ nu vevi geɖe siwo ado ŋusẽ míaƒe xɔse la tso nya ʋɛ siwo Biblia gblɔ na mí tso eŋu la me. Be míakpɔ nu si tae míegblɔe alea ɖo la, na míatrɔ susu ɖe zi gbãtɔ si woƒo nu tso Marta ŋu le Biblia me ŋu.

“Ètsi Dzi Hele Fu Ðem Na Ðokuiwò”

4. Mɔ ka nue Marta ƒe ƒomea ɖe dzesi le, eye aleke woa kple Yesu dome nɔ?

4 Ɣleti aɖewo do ŋgɔ la, Lazaro nɔ agbe henɔ lãmesẽ me. Yesu Kristo, si nye amedzro vevitɔ kekeake si ame ate ŋu axɔ la, gbɔna woƒe aƒe me dze ge le Betania. Nane ɖe dzesi le Lazaro, Marta kple Maria ƒe ƒomea ŋu—wonye nɔvi tsitsi etɔ̃ siwo gakpɔtɔ  le aƒe ɖeka me. Numekula aɖewo gblɔ be ɖewohĩ Marta ye nye tsitsitɔ, elabena edzena abe eyae xɔa ŋgɔ le amedzrowɔwɔ me ene, eye ɣeaɖewoɣi la, eƒe ŋkɔe woyɔna gbã le nɔviawo dome. (Yoh. 11:5) Míate ŋu anya ne wo ame etɔ̃awo dometɔ aɖe va ɖe srɔ̃ ya o. Aleke kee wòɖale o, míenya be wova nye Yesu xɔlɔ̃ veviwo. Esime Yesu nɔ gbeƒã ɖem le Yudea, afi si wòdo go tsitretsiɖeŋu geɖe le la, woƒe aƒe mee wòdzena. Ðikeke mele eme o be dedienɔƒe ma si wòkpɔa ŋutifafa kple kpekpeɖeŋu tsonɛ la dze eŋu ŋutɔ.

5, 6. (a) Nu ka tae Marta nɔ dɔ wɔm kple ŋkubiã esi Yesu va wo gbɔ? (b) Nu kae Maria wɔ esi Yesu va woƒe aƒe me?

5 Marta zãna ɖe amedzrowɔwɔ kple beléle na aƒea ŋu. Vovo menɔa eŋu o, edoa vevie nu, eye wònɔa dɔ dzi nɔa yiyim nɔa gbɔgbɔm. Alea kee wòwɔ nui esi Yesu va dze wo gbɔ. Ewɔ kaba wɔ ɖoɖo be yeaɖo kplɔ̃ tɔxɛ aɖe si me yeatsɔ nuɖuɖu vovovowo aɖo amedzro vevi sia kple ɖewohĩ exɔlɔ̃ siwo nɔ mɔa zɔm kplii la kɔme. Ɣemaɣi la, wobua amedzrowɔwɔ nu vevii ŋutɔ. Ne amewo xɔ amedzro la, wogbugbɔa nu nɛ tsɔ doa woezɔ nɛ, woɖea atokota le eƒe afɔ heklɔa afɔ nɛ, eye wosia ami ʋeʋĩ ɖe ta nɛ. (Xlẽ Luka 7:44-47.) Wodzea agbagba vevie naa teƒe nyui amedzroa be wòamlɔ, eye woɖaa nu viviwo nɛ.

6 Dɔ geɖe nɔ Marta kple Maria dzi woawɔ atsɔ axɔ amedzro vevi sia. Ðikeke mele eme o be Maria, si ame aɖewo buna be eya dzie nu wɔa dɔ ɖo wu eye wònɔa anyi kpoo la, nɔ kpekpem ɖe nɔvia ŋu hafi. Gake esi Yesu va ɖo la, nuwo trɔ. Yesu kpɔe be yeƒe afi ma vava nye mɔnukpɔkpɔ na ye be yeafia nu wo, eye nu ma tututue wòwɔ! Yesu mewɔ nu abe hakplɔla siwo nɔ anyi ɣemaɣi la ene o, ede bubu nyɔnuwo ŋu, eye elɔ̃ faa fia nu wo tso Mawu Fiaɖuƒea, si nye nu si koŋ ŋu wòɖea gbeƒã tsoe la, ŋu. Dzi dzɔ Maria ŋutɔ ɖe mɔnukpɔkpɔ sia ta, eya ta ebɔbɔ nɔ anyi ɖe Yesu ƒe afɔ nu heɖo to nya sia nya si wògblɔ.

7, 8. Nu kae te ɖe Marta dzi, eye aleke wòɖee gblɔe?

7 Míate ŋu akpɔ ale si esia anya nɔ tetem ɖe Marta dzii la le susu me. Le nuɖuɖu vovovo siwo gbɔ kpɔm wònɔ na eƒe amedzroawo kpakple aƒemedɔ bubuawo ta la, etsi dzi, eye eƒe susu megava nɔ Yesu ŋu o. Esi wònɔ yiyim nɔ gbɔgbɔm hele nɔvia kpɔm wòbɔbɔ nɔ anyi eye mele kpekpeɖeŋu aɖeke namee o la, ɖe wòdo dziku, ɖu tse alo yɔ moa? Mawɔ nuku na mí ne ewɔ nu alea o. Eya ɖeka mate ŋu awɔ dɔ mawo katã o!

8 Mlɔeba Marta megate ŋu lé eɖokui o. Ege ɖe woƒe dzeɖoɖoa me hegblɔ na Yesu be: “Aƒetɔ, mètsɔ ɖeke le eme be nɔvinyea  gblẽ nuwo katã gbɔ kpɔkpɔ ɖe nye ɖeka dzinye oa? Eya ta gblɔe nɛ be wòava kpe ɖe ŋunye.” (Luka 10:40) Esia fia be nyaa te ɖe edzi. Biblia gɔmeɖeɖe aɖewo ɖe eƒe nyaa gɔme ale: “Aƒetɔ mèkpɔe be . . . ?” Eyome egblɔ na Yesu be wòagbe nya na Maria, eye wòagblɔ nɛ be netrɔ yi wòaɖakpe asi ɖe dɔa ŋu.

9, 10. (a) Aleke Yesu ɖo nya ŋu na Marta? (b) Aleke míewɔ nya be menye ɖe Yesu nɔ gbɔgblɔm be mesɔ be Marta nazã ɖe amedzrowɔwɔ na yewo ŋu o?

9 Ale si Yesu ɖo nya ŋu na Marta la anya wɔ nuku nɛ, abe ale si wòwɔa nuku na Biblia xlẽla geɖe ene. Egblɔ nɛ tufafatɔe be: “Marta, Marta, ètsi dzi hele fu ɖem na ɖokuiwò le nu geɖewo ŋuti. Gake nu ʋɛ aɖewo koe hiã, alo ɖeka pɛ ko. Maria ya tia nyuia gome, eye womele exɔ ge le esi o.” (Luka 10:41, 42) Yesu ƒe nyaawo gɔme ɖe? Ðe wònɔ gbɔgblɔm be ŋutilãmenuwo ko ŋue Marta tsia dzi ɖoa, alo be menyo be wòawɔ dɔ sesĩe aɖa nu nyui na yewo oa?

Togbɔ be Marta ‘tsi dzi henɔ fu ɖem na eɖokui’ hã la, ebɔbɔ eɖokui esi woɖɔe ɖo

10 Ao. Yesu nyae kɔtɛ be lɔlɔ̃e ʋã Marta, eye susu nyuiwoe nɔ esi. Gawu la, Yesu mebui be kplɔ̃ gã ɖoɖo na amedzro nye nu gbegblẽ kokoko o. Ɣeaɖeɣi la, Mateo “ɖo kplɔ̃ gã aɖe” nɛ, eye wòde kplɔ̃ɖoƒea. (Luka 5:29) Menye nu si ɖam Marta nɔ la ŋue nya ku ɖo o; ke boŋ nu si wòtsɔ ɖo nɔƒe gbãtɔ lae. Etsi dzi ɖe nu geɖe siwo ɖam wònɔ la ŋu ale gbegbe be eƒe susu dzo le nu si le vevie wu la dzi. Eyae nye nu ka?

Yesu de asixɔxɔ Marta ƒe amedzrowɔwɔ ŋu, enyae hã be lɔlɔ̃e ʋãe, eye susu nyuiwoe nɔ esi

11, 12. Aleke Yesu ɖɔ Marta ɖo tufafatɔe?

11 Yesu, Yehowa Mawu ƒe Tenuvi la, va Marta ƒe me be yeafia nyateƒea. Nu bubu aɖeke megale vevie wu esia o, eɖanye nu nyui si ɖam wònɔ loo alo nu bubu aɖee o. Anya te ɖe Yesu dzi godoo be mɔnukpɔkpɔ nyui sia si su Marta si be wòado ŋusẽ eƒe xɔse la nɔ eŋu tom, gake eɖe mɔ nɛ be wòawɔ eya ŋutɔ ƒe nyametsotso. * Ke hã Marta tɔ medzɔ be wòbia tso Yesu si be wòana Maria nadzudzɔ nya vevi mawo sese o.

12 Eya ta Yesu ɖɔ Marta ɖo tufafatɔe, eyɔ eƒe ŋkɔ zi eve vividoɖeameŋutɔe be eƒe dzi nafa, eye wòka ɖe edzi nɛ be mehiã be ‘wòatsi dzi ahanɔ fu ɖem na eɖokui le nu geɖewo ŋuti’ o. Kplɔ̃ vi aɖe ɖoɖo, si me woaɖa nu ɖeka alo eve aɖewo le koe hiã,  vevietɔ ne wole Mawu ƒe nya me dzrom. Eya ta manya wɔ be Yesu naxɔ “nyuia gome,” si Maria tia, si nye mɔnukpɔkpɔ si su esi be wòasrɔ̃ nu tso ye gbɔ la, le esi o!

13. Nu kae míate ŋu asrɔ̃ tso ale si Yesu ɖɔ Marta ɖoe la me?

13 Nufiame geɖe le nudzɔdzɔ kpui ma si yi edzi le Marta ƒe aƒe me la me na Kristo yomedzelawo egbea. Mele be míaɖe mɔ naneke naxe mɔ na mí be míagakpɔ míaƒe ‘gbɔgbɔ me nuhiahiãwo’ gbɔ gbeɖe o. (Mat. 5:3) Anyo be míasrɔ̃ Marta ƒe dɔmenyo kple kutrikukua ya, gake míadi gbeɖe be ‘míatsi dzi’ ɖe amedzrowɔwɔ ŋu fũu akpa ahanɔ ‘fu ɖem na mía ɖokui’ ale be nu si le vevie wu la nato mía ŋu o. Menye nu viviwo ɖuɖu koŋ tae míedea ha kple mía nɔvi tadeagulawo ɖo o, ke boŋ be míade dzi  ƒo na mía nɔewo ahatu mía nɔewo ɖo le gbɔgbɔ me. (Xlẽ Romatɔwo 1:11, 12.) Aleke kee kplɔ̃ɖoɖoa le sue o, hadede sia tɔgbi ate ŋu atu ame ɖo.

Wo Nɔviŋutsu Lɔlɔ̃a Ku Eye Wogafɔe

14. Nu ka tae míate ŋu agblɔ be Marta ɖo kpɔɖeŋu nyui aɖe ɖi na mí le ale si míalɔ̃ woaɖɔ mí ɖoe ŋu?

14 Esi Yesu ɖɔ Marta ɖo tufafatɔe la, ɖe wòse egɔme hesrɔ̃ nu tso emea? Biblia ɖo nya sia ŋu na mí. Le apostolo Yohanes ƒe nuŋlɔɖi wɔdɔɖeamedzi si ku ɖe Marta nɔviŋutsua ŋu ƒe gɔmedzedze la, eɖo ŋku edzi na mí be: “Yesu lɔ̃a Marta kple nɔvianyɔnua kpakple Lazaro.” (Yoh. 11:5) Esia nye ɣleti aɖewo le Yesu ƒe Betania yiyi si ŋu míeƒo nu tsoe va yi la megbe. Edze ƒãa be Marta mebi dzi o; melé Yesu ɖe dɔ me ɖe ale si wòɖɔe ɖo lɔlɔ̃tɔe la ta o. Exɔe kple dzi faa. Le go sia hã me la, eɖo xɔse ƒe kpɔɖeŋu nyui ɖi na mí, elabena mí katã míehiã na ɖɔɖɔɖo le nu suesue aɖewo me ɣeaɖewoɣi.

15, 16. (a) Esi Marta nɔviŋutsua dze dɔ la, aleke wòanya wɔ nui? (b) Nu ka tae Marta kple Maria ƒe mɔkpɔkpɔa meva eme o?

15 Esi Marta nɔviŋutsua dze dɔ la, ɖikeke mele eme o be Marta nɔ dɔ dzi vevie nɔ egbɔ kpɔm. Ewɔ nu sia nu si wòate ŋui be ye nɔvia nakpɔ gbɔdzɔe eye eƒe dɔa naka ɖe eme nɛ. Ke hã ɖeko Lazaro ƒe dɔlélea nɔ sesẽm ɖe edzi. Nɔvianyɔnuawo megblẽe ɖi o, wonɔ eŋu nɔ be lém nɛ. Ɣesiaɣi si Marta kpɔ nɔvia ƒe mo si wɔ dɔ̃ la, aɖo ŋku ƒe geɖe siwo me wokpɔ dzidzɔ ɖekae hexa nu ɖekae la dzi godoo!

16 Esi Marta kple Maria kpɔe be yewomagate ŋu awɔ naneke le Lazaro ƒe dɔlélea ŋu o la, woɖo du ɖe Yesu. Ɣemaɣi la, Yesu nɔ gbeƒã ɖem le afi si didi tso wo gbɔ abe ŋkeke eve ƒe mɔzɔzɔ ene. Woƒe gbedeasia nɔ kpuie heyi ale: “Aƒetɔ, kpɔ ɖa! Ame si gbɔ mèlɔ̃a nu le o la le dɔ lém.” (Yoh. 11:1, 3) Wonya be Yesu lɔ̃ yewo nɔvia, eye woxɔe se be awɔ nu sia nu si wòate ŋui atsɔ akpe ɖe exɔlɔ̃a ŋu. Ðe wonɔ mɔ kpɔm vevie be Yesu ava ɖo hafi yewo nɔvia nakua? Ne nenemae la, ke woƒe mɔkpɔkpɔa meva eme o, elabena Lazaro ku hafi wòva ɖo.

17. Nu kae na Marta tɔtɔ, eye aleke wòwɔ nui esi wòsee be Yesu gbɔna?

17 Marta kple Maria fa na wo nɔviŋutsua, wowɔ dzadzraɖowo ɖe eɖiɖi ŋu, eye woxɔ amedzro geɖe siwo tso Betania kple nuto siwo ƒo xlãe la me. Gake Yesu meva ɖo haɖe o. Anɔ eme be esi ɣeyiɣia va nɔ yiyim la, Marta tɔtɔ ŋutɔ. Mlɔeba, esi ŋkeke ene va yi tso esime Lazaro ku la, Marta see be Yesu gogo dua. Marta nye ame aɖe si tsɔa dzo ɖe nu ŋu, eya ta togbɔ be enɔ nu  xam hã la, etso hewɔ kaba yi ɖakpe Yesu, eye meklã Maria gɔ̃ hã o.—Xlẽ Yohanes 11:20.

18, 19. Mɔkpɔkpɔ kae nɔ Marta si, eye nu ka tae eƒe xɔse ɖe dzesi?

18 Esi Marta kpɔ eƒe Aƒetɔa la, egblɔ nya si nɔ fu ɖem na woa kple Maria ŋkeke aɖewoe nye ema la nɛ be: “Aƒetɔ, ne ɖe nènɔ afi sia la, anye ne nɔvinye la meku o.” Gake mɔkpɔkpɔ mebu ɖee o, eye eƒe xɔse megbɔdzɔ o. Egblɔ kpee be: “Ke hã, fifia kura gɔ̃ hã menya be nu geɖe ale si nu nàbia Mawu la, Mawu ana wò.” Enumake Yesu do ŋusẽ eƒe xɔse esi wògblɔ nɛ be: “Nɔviwò la atsi tsitre.”—Yoh. 11:21-23.

19 Marta susui be ame kukuwo fɔfɔ ɖe tsitre le etsɔme ŋu nya gblɔm Yesu nɔ, eya ta eɖo eŋu nɛ be: “Menya be atsi tsitre le tsitretsitsi la me le ŋkeke mamlɛa dzi.” (Yoh. 11:24) Exɔ tsitretsitsia dzi se ale gbegbe. Gake Yudatɔwo ƒe hakplɔla siwo woyɔna be Zadukitɔwo ya gblɔna be tsitretsitsi meli o, evɔ enye nufiafia  si me kɔ nyuie le Ŋɔŋlɔawo me hafi. (Dan. 12:13; Marko 12:18) Ke hã Marta nya be Yesu fia nu tso tsitretsitsi mɔkpɔkpɔa ŋu, eye be efɔ ame kukuwo ɖe tsitre gɔ̃ hã. Gake ame siwo wòfɔ ɖe tsitre la dometɔ aɖeke meku wòde ŋkeke ene kpɔ abe Lazaro ene o. Marta menya nu si le ŋgɔ gbɔna o.

20. Gɔmesese kae le Yesu ƒe nya wɔdɔɖeamedzi si le Yohanes 11:25-27 kple nya si Marta gblɔ tsɔ ɖo eŋui la ŋu?

20 Eyome Yesu gblɔ nya aɖe si womaŋlɔ be akpɔ o be: “Nyee nye tsitretsitsi la kple agbe la.” Nyateƒee, Yehowa Mawu na ŋusẽ Via be wòafɔ ame kukuwo ɖe tsitre le xexea me godoo le etsɔ si gbɔna me. Yesu bia Marta be: “Èxɔ nya sia dzi sea?” Ɣemaɣie Marta gblɔ nya si me míedzro le ta sia ƒe gɔmedzedze la tsɔ ɖo eŋu nɛ. Exɔe se be Yesue nye Kristo, alo Mesia la, exɔe se be enye Yehowa Mawu ƒe Vi, eye eya ŋue nyagblɔɖilawo gblɔ nya ɖi le be ava xexea me.—Yoh. 5:28, 29; xlẽ Yohanes 11:25-27.

21, 22. (a) Aleke Yesu ɖe ale si wòsena le eɖokui me ɖe ame siwo dzi ku dzɔ ɖo ŋu la fiae? (b) Ƒo nu tso Lazaro ƒe tsitretsitsia ŋu.

21 Ðe Yehowa Mawu kple Via, Yesu Kristo, dea asixɔxɔ ame siwo si xɔse le abe Marta ene ŋua? Nu siwo teƒe Marta kpɔ le esia yome la na ŋuɖoɖoa dze kɔtɛ. Ewɔ kaba yi ɖayɔ nɔvianyɔnua. Eyome ekpɔ ale si Lazaro ƒe kua wɔ dɔ ɖe Yesu dzii esime Yesu nɔ nu ƒom na Maria kple fanamela gbogbo siwo kpe ɖe eŋu. Ekpɔ ale si Yesu fa aɖatsii tsɔ ɖe ale si gbegbe vevesese si ku hena vɛ la tena ɖe edzii la fia le gaglãgbe. Esee Yesu gblɔ be woaɖe kpe si wotsɔ ɖo nɔvia ƒe yɔdoa nui la ɖa.—Yoh. 11:28-39.

22 Esi Marta ɖɔa ŋu ɖo ɣesiaɣi ta la, egblɔ be amea ƒaƒã xoxo, elabena eku ŋkeke enee nye ema. Yesu ɖo eŋu nɛ be: “Ðe nyemegblɔe na wò be ne èxɔe se la, àkpɔ Mawu ƒe ŋutikɔkɔe oa?” Exɔe se, eye wòkpɔ Yehowa Mawu ƒe ŋutikɔkɔe hã vavã. Le gaƒoƒo ma tututu dzi la, Yehowa na ŋusẽ Via be wòagbɔ agbe Lazaro! Bu nu vovovo siwo anya tsi Marta ƒe susu me le eƒe agbemeŋkekewo katã me esi wòkpɔ nudzɔdzɔ ma teƒe la ŋu kpɔ: Yesu do ɣli gblɔ bena, “Lazaro lee, do va!”; ese Lazaro ƒe nuwɔwɔ ŋkɔ ɖaa le yɔdoa me esime wòfɔ eye ameɖivɔwo gakpɔtɔ le eŋu, eye wòwɔ ɖɔɖɔɖɔ zɔ va agadoa ƒe mɔnu; eyome Yesu gblɔ be, “mitui, eye mina wòadzo”; enumake Marta kple Maria wɔ atuu na wo nɔvia kple dzidzɔ gã manyagblɔ aɖe. (Xlẽ Yohanes 11:40-44.) Helehele si tsi akɔ dzi na Marta la nu yi enumake!

Marta xɔ Yesu dzi se eye woɖo eteƒe nɛ esi woa kple Maria wokpɔ eteƒe wofɔ wo nɔviŋutsua ɖe tsitre

23. Nu kae Yehowa kple Yesu di be yewoawɔ na wò, eye nu kae wòhiã be nàwɔ?

23 Nudzɔdzɔ sia ɖo kpe edzi be tsitretsitsi ƒe mɔkpɔkpɔa menye drɔ̃e dzro aɖe ko o; enye Biblia ƒe nufiafia lédziname, eye  ŋutinya ɖo kpe eƒe nyateƒenyenye dzi. (Hiob 14:14, 15) Yehowa kple Via dina vevie be yewoaɖo eteƒe na ame siwo ɖe xɔse fia, abe ale si wowɔe na Marta, Maria kple Lazaro ene. Woaɖo eteƒe na wò hã alea ne ètu xɔse sẽŋu ɖo.

“Marta Nɔ Wo Subɔm”

24. Nya kae nye mamlɛtɔ si wogagblɔ tso Marta ŋu le Biblia me?

24 Zi ɖeka koe wogaƒo nu tso Marta ŋu le Biblia me le nudzɔdzɔ siawo megbe. Eyae nye le Yesu ƒe anyigbadzinɔnɔ ƒe kwasiɖa mamlɛtɔ ƒe gɔmedzedze. Esi wònye be Yesu nya fukpekpe siwo me to ge yegbɔna ta la, etiae be yeagadze dedienɔƒe ma si le Betania la ake. Tso afi ma yi Yerusalem abia be wòazɔ kilometa etɔ̃ ƒe mɔ. Yesu kple Lazaro nɔ nu ɖum le Simon, kpodɔléla la, ƒe aƒe me, eye afi siae woƒo nu tso Marta ŋu le zi mamlɛtɔ le Biblia me be: “Marta nɔ wo subɔm.”—Yoh. 12:2.

25. Nu ka tae nyɔnu siwo le abe Marta ene la nye yayra na hameawo?

25 Nyɔnu veviedolawo ƒe kpɔɖeŋu ɖedzesi aɖee nye esia vavã! Zi gbãtɔ si woƒo nu tso eŋu le Biblia me la, enɔ dɔ wɔm; zi mamlɛtɔ si woƒo nu tso eŋu la, eganɔ dɔ dzi henɔ etɔ si nua wɔm be yeakpɔ ame siwo dome wònɔ la ƒe hiahiãwo gbɔ na wo. Yayrae wònye be nyɔnu siwo le abe Marta ene la le Kristo yomedzelawo ƒe hame siwo li egbea la me—dzi le wo ƒo, wonyoa dɔme, eye woɖea woƒe xɔse fiana ɣesiaɣi to wo ɖokuiwo tsɔtsɔ na faa me. Ðe Marta yi edzi wɔ nu alea? Anɔ eme nenema. Ne nenemae la, ke ewɔ nu le nunya me, elabena kuxi sesẽwo ganɔ eŋgɔ.

26. Nu kae Marta ƒe xɔse kpe ɖe eŋu wòwɔ?

26 Le ŋkeke ʋɛ aɖewo ko megbe la, Marta xa nu vevie esi eƒe Aƒetɔ, Yesu, si wòlɔ̃na la ku. Gawu la, hlɔ̃dola alakpanuwɔla siwo wui la ɖoe kplikpaa be yewoawu Lazaro hã, elabena eƒe tsitretsitsia na ame geɖe nɔ Yesu dzi xɔm nɔ sesem. (Xlẽ Yohanes 12:9-11.) Eye míenya be ku va klã Marta kple nɔviawo dome mlɔeba. Míenya ɣeyiɣi si me esia dzɔ alo ale si wòdzɔe ya o, gake míeka ɖe nya sia dzi be: Xɔse sẽŋu si nɔ Marta si la kpe ɖe eŋu wòdo dzi va se ɖe nuwuwu. Esia tae wòanyo ŋutɔ be Kristotɔ siwo li egbea la nasrɔ̃ Marta ƒe xɔse.

^ mm. 11 Le ƒe alafa gbãtɔ me la, zi geɖe la, Yudatɔwo meɖea mɔ na nyɔnuwo be woakpɔ gome le agbalẽsɔsrɔ̃ me o. Aƒemedɔwo wɔwɔ koŋue wofiaa wo. Eya ta Marta anya susui be mesɔ be nyɔnu nabɔbɔ anɔ anyi ɖe nufiala ƒe afɔ nu be yeasrɔ̃ nu tso egbɔ o.