Dzo kpo yi emenuwo dzi

Dzo kpo yi emenuawo dzi

 TA 5

Nuwɔŋusẽ—‘Dziƒo Kple Anyigba Wɔla’

Nuwɔŋusẽ—‘Dziƒo Kple Anyigba Wɔla’

1, 2. Aleke ɣe la nye ɖaseɖiɖi le Yehowa ƒe nuwɔŋusẽ ŋui?

ÈƑU dzo le zã si me vuvɔ nɔ wɔwɔm le kpɔa? Ðewohĩ èdo asi ɖa wòle afisi sɔ tso dzoa gbɔ be dzo naɖo lãme na wò. Ne ète ɖe dzoa ŋu akpa la, dzoa aɖu wò. Ne ègate yi megbe akpa hã la, zãya fafɛ la anɔ ƒoƒom ɖe wò, eye vuvɔ awɔ wò.

2 “Dzo” aɖe li si naa dzoxɔxɔ míaƒe ŋutilã le ŋkeke me. “Dzo” ma le bibim anye kilometa miliɔn 150 tso mía gbɔ! * Alesi ɣe la le didiƒe ŋutɔ tso gbɔwò gake nète ŋu sea eƒe dzoxɔxɔ la fia be menye ŋusẽ feŋui ye le esi o! Ke hã anyigba la le xlã ƒom dzokpo gã ma le dometsotso si sɔ pɛpɛpɛ tso egbɔ me. Ne anyigba te ɖe eŋu akpa la, dzoxɔxɔa ana edzi tsiwo nano avɔ; ne egale adzɔge akpa hã la, fafa ana tsiawo katã nabla azu tsikpe. Nu gbagbe aɖeke mate ŋu anɔ anyigba dzi ne ɖe wòle adzɔge loo alo te ɖe ɣea ŋu akpa o. Tsɔ kpe ɖe alesi ɣe ƒe keklẽa hiã vevie na agbenɔnɔ le anyigba dzi ŋu la, ele dzadzɛ eye wòwɔa dɔ nyuie, wòhevivia ame nu hã.—Nyagblɔla 11:7.

Yehowae “ɖo kekeli kple ɣe”

3. Nyateƒenya vevi ka ŋue ɣea ɖia ɖase le?

3 Ke hã ame akpa gãtɔ medea asixɔxɔ boo aɖeke ɣea ŋu o, togbɔ be eya dzie woƒe agbe nɔ te ɖo hã. Ewɔe be woƒe asi mesu nufiame si míate ŋu akpɔ tso ɣea gbɔ dzi o. Biblia gblɔ le Yehowa ŋu be: “Wòe ɖo kekeli kple ɣe.” (Psalmo 74:16) Ẽ, ɣea hea bubu vɛ na Yehowa, “amesi wɔ dzi kple anyi.” (Psalmo 19:2; 146:6) Esia nye dziƒonu gbogbo siwo míate ŋu axlẽ  o siwo fiaa nu mí le Yehowa ƒe nuwɔŋusẽ triakɔ ŋu la dometɔ ɖeka ko. Mina míalé ŋku ɖe dziƒonu siawo dometɔ aɖewo ŋu nyuie eye emegbe míatrɔ susu ɖe anyigba kple nu gbagbe siwo le edzi ŋu.

“Mifɔ Mo Dzi, ne Miakpɔ Nu”

4, 5. Ŋusẽ ka gbegbee le ɣea si eye aleke gbegbe wòloloe, ke hã aleke wòle ne wotsɔe sɔ kple ɣletivi bubuwo?

4 Abe alesi ɖewohĩ ènya ene la, ɣletivie míaƒe ɣea nye. Edze abe ɖe wòlolo wu ɣletivi bubu siwo míekpɔna le zã me ene, elabena ne míetsɔe sɔ kple wo la, ete ɖe mía ŋu wu wo. Ŋusẽ ka gbegbee le esi? Ɣea tome ƒe dzoxɔxɔ aɖo dzidzenu Celsius 15,000,000. Ne ɖe nàte ŋu aka ɣea tome ƒe kakɛ sue aɖe si ƒe lolome le abe abui ƒe ta ko ene atsɔ ada ɖe anyigba dzi afisia la, màte ŋu anɔ te ɖe eƒe dzoxɔxɔ nu ne èyi adzɔge kilometa 140 tso dzo kakɛ sue ma gɔ̃ hã gbɔ o! Sɛkɛnd ɖesiaɖe la, ŋusẽ si gbegbe dona le ɣea me ade nukliabɔmb alafa miliɔn geɖe ƒe wowó.

5 Ɣea lolo ale gbegbe be míaƒe anyigba la ƒe lolome teƒe  1,300,000 ayi ɖe eme. Ðe ɣea nye ɣletivi si lolo ale gbegbe be ɖeke mede enu oa? Ao, ɣletiviŋununyalawo yɔnɛ be ɣletivi sue aŋutiɖiɖi la. Apostolo Paulo ŋlɔ be “vovo le ɣletivi kple ɣletivi dome le ŋutikɔkɔe gome.” (Korintotɔwo I, 15:41) Anɔ eme be Paulo menya nya mawo siwo gbɔgbɔ ʋãe wòŋlɔ la ƒe nyateƒenyenye bliboe o. Ɣletivi aɖe li si lolo ale gbegbe be ne woadae ɖe afisi tututu ɣea le la, axɔ teƒe si lolo wu tso ɣea gbɔ va ɖo anyigba dzi ale be míaƒe anyigba la nabu ɖe eme. Ɣletivi gã bubu aɖe li si ne woadae ɖe ɣea ƒe teƒe la, aɖo keke afisi ɣletinyigba si nye Saturn le—togbɔ be ɣletinyigba ma gbɔ didi tso anyigba gbɔ ale gbegbe be ƒe ene ye wòxɔ hafi yamenutomeyimɔ̃ aɖe ɖo egbɔ, evɔ mɔ̃ ma ƒua du abe tu sesẽtɔ kekeake ƒe kpe ƒe ablaɖeɖe ƒe teƒe 40 kple edzivɔ ene hã!

6. Aleke Biblia ɖee fia be ɣletiviwo ƒe xexlẽme sɔ gbɔ ŋutɔ le amegbetɔ ƒe nukpɔkpɔ nu?

6 Nusi gadzi ŋɔ kura wu ɣletiviwo ƒe lolomee nye woƒe agbɔsɔsɔ. Le  nyateƒe me la, Biblia fia be ɣletiwo mele xexlẽ me o, abe alesi wòasesẽ be woaxlẽ “ƒutake” ene. (Yeremya 33:22) Nyagbɔgblɔ sia fia be ɣletivi gbogbo aɖewo li wu esiwo ŋku te ŋu kpɔna. Evɔ ne ɖe Biblia-ŋlɔla abe Yeremya ene fɔ kɔ dzi kpɔ yame le zã me eye wòdi be yeaxlẽ ɣletivi siwo le dzedzem la, anye ne akpe etɔ̃ kple nu vi aɖe koe wòakpɔ axlẽ, elabena agbɔsɔsɔme ma koe ŋku ate ŋu akpɔ le zã si me yame kɔ nyuie. Agbɔsɔsɔ ma le abe kekui asiʋlo ɖeka ene. Gake le nyateƒe me la, ɣletiviwo ƒe xexlẽme wu gbɔgblɔ, abe ƒutake ene. * Amekae ate ŋu axlẽ agbɔsɔsɔme ma gbegbe?

“Eyɔa wo katã ŋkɔ”

7. (a) Ɣletivi nenie le míaƒe Milky Way ɣletivihatsotsoa me, eye xexlẽme ka gbegbee nye ema? (b) Nukatae alesi wòsesẽ na ɣletiviŋununyalawo be woanya ɣletivihatsotsowo ƒe xexlẽme la nye nya vevi, eye nukae nya sia fia mí tso Yehowa ƒe nuwɔŋusẽ ŋu?

7 Yesaya 40:26 ɖo eŋu be: “Mifɔ mo dzi, ne miakpɔ nu! Ameka wɔ nusiawo, eye wòkplɔa eŋu nuwo doa goe dedie? Eyɔa wo katã ŋkɔ.” Psalmo 147:4 gblɔ be: “Eya, amesi ɖo xexlẽme na dzinuviwo.” ‘Ɣletiviwo ƒe xexlẽmee’ nye neni? Biabia sia ŋu ɖoɖo mele bɔbɔe o. Ɣletiviŋununyalawo bu akɔnta be ɣletivi biliɔn 100 kple edzivɔe le míaƒe Milky Way ɣletivihatsotsoa ɖeɖe dzaa me. * Gake míaƒe ɣletivihatsotsoa nye geɖe siwo li la dometɔ ɖeka ko, eye ɣletivi siwo le wo dometɔ aɖewo me sɔ gbɔ sasasã wu. Ɣletivihatsotso nenie li? Ɣletiviŋununyala aɖewo gblɔ be woade biliɔn 50. Bubuwo bu akɔnta be woate ŋu ade biliɔn 125 sɔŋ. Eyata amegbetɔ mete ŋu nya xexlẽme na ɣletivihatsotsoawo gɔ̃ hã o, ʋuu keke woahayi  ɣletivi biliɔn nane siwo le wo dometɔ ɖesiaɖe me ƒe xexlẽme bliboa nya ge o. Gake Yehowa ya nya xexlẽme ma. Gawu la, etsɔ ŋkɔ na ɣletivi ɖesiaɖe!

8. (a) Aleke nàte ŋu agblɔ be Milky Way ɣletivihatsotsoa ƒe lolome le? (b) Ðoɖo ka nue Yehowa na dziƒonuwo zɔna ɖo?

8 Ðeko wòle be míaƒe mawuvɔvɔ̃ nadzi ɖe edzi godoo ne míede ŋugble le ɣletivihatsotsowo ƒe lolome ŋu. Wobu akɔnta be Milky Way ɣletivihatsotsoa keke ale gbegbe be axɔ ƒe 100,000 le kekeli ƒe duƒuƒu nu hafi woazɔ mɔ tso eƒe liƒo ɖeka ayi kemɛa. Bu eŋu kpɔ be kekeli ƒua du kilometa 300,000 le sɛkɛnd ɖeka ko me. Keklẽ ma axɔ ƒe 100,000 hafi aɖo míaƒe ɣletivihatsotsoa ƒe akpa kemɛ! Eye ɣletivihatsotso aɖewo lolo wu mía tɔ zi gbɔ zi geɖe. Biblia gblɔ be Yehowa ‘kekea’ dziƒo gbahoo sia me abe avɔ ene. (Psalmo 104:2) Eyae wɔ ɖoɖo na nuwɔwɔ siawo ƒe zɔzɔ hã. Tso dziƒonuwo dome nu suetɔ kekeake dzi va ɖo ɣletivihatsotso gãtɔ kekeake dzi la, nusianu zɔna ɖe se siwo Mawu ɖo eye wòna wole dɔ wɔm la dzi. (Hiob 38:31-33) Eyata dzɔdzɔmeŋutinunyalawo tsɔ ɖoɖo si nu dziƒonu siawo zɔna ɖo pɛpɛpɛ la sɔ kple alesi ɣeɖulawo ɖua ɣe ɖekae kple atsyã! Ekema bu Amesi wɔ nusiawo ŋu kpɔ. Ðe Mawu si si nuwɔŋusẽ triakɔ sia gbegbe le ƒe ŋɔdzi melé wò oa?

“Amesi Tsɔ Eƒe Ŋusẽ Wɔ Anyigba”

9, 10. Aleke Yehowa ƒe ŋusẽ dze le míaƒe ɣea kple eŋu ɣletinyigbawo, Jupiter, anyigba, kple dzinu ƒe nɔƒe ŋui?

9 Yehowa ƒe nuwɔŋusẽ dze le míaƒe aƒe, si nye anyigba ŋu. Eda anyigba ɖe teƒe nyui aɖe le yamenuto gã sia me. Dzɔdzɔmeŋutinunyala aɖewo xɔe se be masɔ na míaƒe ɣletinyigba sia si dzi nu gbagbewo le la be wòanɔ ɣletivihatsotso bubuawo dometɔ geɖe me o. Edze ƒã be womeɖoe be nu gbagbewo nanɔ míaƒe Milky Way ɣletivihatsotsoa ƒe teƒe akpa gãtɔ o. Ɣletiviwo sɔ gbɔ tititi ɖe ɣletivihatsotsoa ƒe titina. Ɣletiviawo ɖea ŋusẽ geɖe ɖe go, eye wodea ŋgo kpe ge kple wo nɔewo zi geɖe. Dzɔdzɔmenu vevi siwo hiã be nuwo nate ŋu  anɔ agbe mele ɣletivihatsotsoa ƒe liƒowo dzi o. Woda míaƒe anyigba kple ɣe kpakple ɣletinyigba siwo ƒo xlãe ɖe teƒe si sɔ pɛpɛpɛ le nɔnɔme eve siawo dome.

10 Anyigba kpɔa viɖe tsoa takpɔnu aɖe si le adzɔge ʋĩ gake wòhelolo ŋutɔ la gbɔ—eyae nye ɣletinyigba si woyɔna be Jupiter. Jupiter ƒe lolome nye Anyigba ƒe teƒe akpe ɖeka kple edzivɔ, eye eƒe nuheŋusẽ nu sẽ ŋutɔ. Vi kae wòɖena? Ehea nu bubu siwo sina toa dziŋgɔlime la ɖe eɖokui ŋu alo trɔa mɔ na wo. Dzɔdzɔmeŋutinunyalawo bu akɔnta be ne ɖe Jupiter meli o la, anye ne yamenutome nu gã siwo gena va dzea anyigba dzi la adzi ɖe edzi zi gbɔ zi 10,000 wu alesi wòle fifia. Ne míete va aƒe vie la, wogayra míaƒe anyigba la kple nu tɔxɛ bubu aɖe si ƒoa xlãe—eyae nye dzinu. Menye ɖe dzinua dze ani eye wònye “zãkaɖi” ko o, ke ehea anyigba be wòviã ɖe dzidze ɖoɖi aɖe nu ɣesiaɣi. Alesi anyigba viã aleae wɔe be nuƒãɣi kple nuŋeɣi siwo ƒe ɣeyiɣi li koŋ la li—esia hã nye nu vevi bubu si de agbenɔnɔ dzi le anyigba dzi afisia.

11. Aleke wowɔ anyigba ƒe yame be wòanye akpoxɔnui?

11 Yehowa ƒe nuwɔŋusẽ dze le anyigba ƒe wɔwɔme ƒe akpa sia akpa. De ŋugble le yame si ƒo xlã mí, si wowɔ wòwɔa dɔ abe akpoxɔnu ene, ŋu kpɔ. Keklẽ nyuiwo kple esiwo menyo na mí o siaa tsoa ɣea gbɔ. Ne keklẽ gblẽnuawo ɖo ya si ƒo xlã anyigba ƒe akpa si le etame la, wonaa ɔksidzin zua ya ƒomevi si woyɔna be ozone. Azɔ ozone-ya sia hã léa keklẽ siawo ƒe akpa gãtɔ. Eyata ɖeko wòle abe ɖe wowɔ xexi na míaƒe ɣletinyigba la wòkpɔa eta ene!

12. Aleke ɖoɖo si nu tsi trɔna ɖo le yame ɖe Yehowa ƒe nuwɔŋusẽ fiae?

12 Míaƒe yame, si me ya vovovowo tsaka le wòsɔ be wòana nu gbagbe siwo le anyigba dzi nate ŋu anɔ agbe la ƒe nɔnɔme ɖeka koe nye ema. Yame ƒe nukunuawo dometɔ ɖeka hãe nye ɖoɖo si nu tsi trɔna ɖo zua alilikpo eye wògadzana. Ƒe sia ƒe la, ɣea lɔa anyigba ƒe atsiaƒu me tsi si axɔ teƒe si ƒe didime, kekeme, kple kɔkɔme de kilometa 400,000 togodo la yia yame abe afu ene. Tsia zua alilikpowo, eye yaƒoƒo kakaa  wo ɖe teƒeteƒewo. Azɔ etrɔna zua tsi si me wotsyɔ wòle dzadzɛ eye wòzua tsi, sno, kple tsikpe hedzana ɖe anyigba dzi, ale be tsiteƒewo gaɖoa woƒe nɔnɔ ake. Ðeko wòle tututu abe alesi Nyagblɔla 1:7 gblɔe ene be: “Tɔwo katã sina yia atsiaƒu me, ke atsiaƒu meyɔna gbeɖe o; afisi tɔwo sina yina la, afima woyina ɖaa.” Yehowa ɖeɖekoe ate ŋu awɔ tsi ƒe tɔtrɔ ƒe ɖoɖo sia be wòawɔ dɔ.

13. Wɔla la ƒe ŋusẽ ŋuti kpeɖodzi kae míekpɔna le anyigba dzi numiemiewo kple ke ŋu?

13 Afisiafi si míakpɔ nu gbagbewo le la, míekpɔa Wɔla la ƒe ŋusẽ si dze kɔte. Tso ati gã kɔkɔ siwo te ŋu kɔkɔna wu dziƒoxɔ tuɖedzi 29 dzi va ɖo numiemie suesue gbogbo siwo le atsiaƒu me siwo naa míekpɔa ɔksidzin-ya si míegbɔna dzi la, Yehowa ƒe nuwɔŋusẽ dze ƒã le wo me. Nu gbagbewo yɔ anyigba ƒe ke me fũ—vɔkluiwo, hlo ƒomeviwo, kple tomenugbagbeviwo, wo katã wowɔa dɔ aduadu nukutɔe ale be numiemiewo tsina. Biblia gblɔe wòsɔ be ŋusẽ le ke ŋu.—Mose I, 4:12, NW.

14. Ŋusẽ ka gbegbee ɣla ɖe atɔm nyaŋui me?

14 Ðikeke mele eme o be Yehowae nye “amesi tsɔ eƒe ŋusẽ wɔ anyigba.” (Yeremya 10:12) Mawu ƒe ŋusẽ dze le nu suetɔ kekeake siwo wòwɔ gɔ̃ hã me. Le kpɔɖeŋu me, ne wotsia nu suetɔ kekeake si woyɔna be atɔm miliɔn ɖeka ɖe wo nɔewo nu hã la, makeke ade amegbetɔ ƒe ɖa kui ɖeka ƒe titrime nu o. Eye ne ɖe woana atɔm ɖeka nalolo ɖe edzi vaseɖe esime wòakɔkɔ abe dziƒoxɔ tuɖedzi 13 ene hã la, ɖeko eƒe niuklɔs si le etome ƒe lolome anɔ abe dzekui ɖeka ene si anɔ dziƒoxɔa ƒe dzisasra adelia dzi. Gake niuklɔs sue nyaŋui ma mee ŋusẽ gã si doa go le nukliaŋusẽ ƒe wowó me la le!

‘Nusianu si me Gbɔgbɔ Le’

15. Esi Yehowa ƒo nu tso gbemelã vovovowo ŋu la, nukae wòfia Hiob?

15 Nu bubu si gaɖe Yehowa ƒe nuwɔŋusẽ fia nyuie la dze le lã gbogbo siwo le anyigba dzi ŋu. Woyɔ nu geɖe siwo kafua Yehowa le Psalmo 148 me, eye woyɔ “gbemelãwo kple aƒemelãwo” le kpukpui 10 lia me. Be amegbetɔ nanya nusita  wòle be wòade bubu deto Wɔla ŋu la, Yehowa ƒo nu ɣeaɖeɣi na Hiob tso lã aɖewo abe dzata, gbetedzi, tò, Behemoth (alo tɔmenyi), kple Leviathan (si anye lo) ŋu. Le susu ka ta? Ne amegbetɔ vɔ̃na na lã sẽŋu wɔadã siawo siwo womate ŋu amla o la, ke aleke wòle be woabu wo Wɔlae?—Hiob, ta 38-41.

16. Nukae wɔ dɔ ɖe dziwò le xe siwo Yehowa wɔ dometɔ aɖewo ŋu?

16 Woyɔ “xevi dzodzoewo” hã le Psalmo 148:10. Wò ya bu wo ƒomevi vovovo siwo li ŋu kpɔ! Yehowa ƒo nu tso golo, si ‘koa sɔ kple edola,’ ŋu na Hiob. Ele eme baa be xe sia si kɔkɔ meta eve kple afã la mate ŋu adzo o ya, gake ete ŋu ƒua du kilometa 65 le gaƒoƒo ɖeka me, eye ne eɖe afɔ ɖeka la, dometsotsoa nye meta ene kple afã! (Hiob 39:13, 18) Le xe si woyɔna be albatross gome la, enɔa yame le atsiaƒu dzi le eƒe agbenɔɣi katã kloe. Xe sia nye agbasala tso dzɔdzɔme, eye ne ekeke eƒe aʋala me la, ade meta etɔ̃. Ete ŋu saa agba le yame ɣeyiɣi didi aʋala maƒomaƒoe. Gake aɖitsi ya le sue ŋutɔ ne míetsɔe sɔ kplii, eye eƒe didime katã nye sentimeta 5 pɛ ko, eyae nye xe suetɔ kekeake le xexeame. Ete ŋu ƒoa aʋala zi 80 le sɛkɛnd ɖeka ko me! Aɖitsi, siwo daa dzo abe sikanu toaʋala suesuewo ene, te ŋu tɔna ɖe teƒe ɖeka le yame abe helikɔpta ene eye wote ŋu dzona yia megbemegbee gɔ̃ hã.

17. Aleke gbegbee boso si nye blue whale la loloe, eye ne míede ŋugble le lã siwo Yehowa wɔ ŋu la, aleke míaƒo nya tae?

17 Wogblɔ le Psalmo 148:7 be “bosowo” gɔ̃ hã kafua Yehowa. Bu boso si ame geɖe buna be eyae nye lã gãtɔ kekeake le anyigba sia dzi, si nye esi woyɔna be blue whale ŋu kpɔ. ‘Ƒumelã klitsu’ sia si nɔa atsiaƒu gɔme ʋĩ la, ƒe didime te ŋu ɖoa meta 30 alo ete ŋu wua nenema kura gɔ̃ hã. Eƒe kpekpeme ate ŋu ade atiglinyi tsitsi 30 ƒe kpekpeme nu. Eƒe aɖe ɖeɖe dzaa ƒe kpekpeme ade atiglinyi ɖeka ƒe kpekpeme nu. Eƒe dzi lolo de ʋu sue ƒe lolome nu. Dzi gã sia tsona zi 9 le aɖabaƒoƒo ɖeka me—evɔ aɖitsi ƒe dzi tsona wòdea zi 1,200 le aɖabaƒoƒo ɖeka me. Ne mede ɖeke o hã la, boso gã sia ƒe ʋuka ɖeka lolo ale gbegbe be ɖevi ate ŋu ata ato eme. Ðikeke mele eme  o be eʋãa dzi na mí be míawo hã míagblɔ nuxlɔ̃amenya si wotsɔ wu Psalmowo ƒe agbalẽa nui, be: “Nusianu, si me gbɔgbɔ le la, nekafu Yehowa!”—Psalmo 150:6.

Nusɔsrɔ̃ tso Yehowa ƒe Nuwɔŋusẽ Ŋu

18, 19. Nusiwo Yehowa wɔ ɖe anyigba sia dzi hamehame nenie li, eye nukae nusiwo wòwɔ la fia mí tso eƒe dziɖulanyenye ŋu?

18 Nukae míesrɔ̃ tso alesi Yehowa zãa eƒe nuwɔŋusẽe me? Nu hamehame siwo wòwɔ la na ŋɔdzi lé mí. Hakpala aɖe gblɔ be: “Yehowa, wò dɔwɔwɔwo sɔ gbɔ loo! . . . Anyigba yɔ fũ kple wò nuwɔwɔwo.” (Psalmo 104:24) Nyateƒe tututue! Nugbagbeŋutinunyalawo de dzesii be nu gbagbe vovovo miliɔn ɖeka kple edzivɔe le anyigba dzi; gake amewo le susu vovovowo dom ɖa be woasɔ gbɔ ade miliɔn 10, miliɔn 30, alo be woawu nenema. Ɣeaɖewoɣi la, amegbetɔ aɖaŋudɔwɔla te ŋu kpɔnɛ be yemeganya nu yeye si yeawɔ o. Gake edze ƒã be seɖoƒe meli na Yehowa ƒe nuwɔŋutete o—meli na eƒe ŋusẽ si le esi be wòato nu yeye vovovowo vɛ ahawɔ wo o.

19 Alesi Yehowa zãa eƒe nuwɔŋusẽe la fia nane mí tso eƒe dziɖulanyenye ŋu. Nya si nye “Wɔla” ɖeɖe kura gɔ̃ hã na Yehowa ɖe vovo tso nu bubu ɖesiaɖe si le xexeame, siwo katã nye eƒe “nuwɔwɔwo,” la gbɔ. Womeyɔa Yehowa ƒe Tenuvi, amesi nye “dɔnunɔla” le nuwo wɔɣi, gɔ̃ hã le Biblia me be Wɔla  alo hati Wɔla gbeɖe o. (Lododowo 8:30; Mateo 19:4) Ke boŋ eyae nye ‘nuwɔwɔwo katã ƒe ŋgɔgbevi.’ (Kolosetɔwo 1:15) Wɔla ƒe ɖoƒe si Yehowa le la wɔe be gome le esi be eya koe dze akpɔ dziɖuŋusẽ ɖe xexeame katã dzi.—Romatɔwo 1:20; Nyaɖeɖefia 4:11.

20. Gɔmesese ka nue Yehowa dzudzɔ le tso esime wòwu anyigba dzi nuwo wɔwɔ nu?

20 Ðe Yehowa dzudzɔ eƒe nuwɔŋusẽa zazã? Enye nyateƒe be Biblia gblɔ be esi Yehowa wu nuwo wɔwɔ nu le nuwɔwɔ ŋkeke adelia dzi la, “[edzudzɔ] le ŋkeke adreagbe tso eƒe dɔ, siwo katã wòwɔ la me” ya. (Mose I, 2:2) Apostolo Paulo ɖee fia be ‘ŋkeke’ adrelia sia ƒe didime nye ƒe akpe geɖe, elabena wogakpɔtɔ nɔ ŋkekea me le eŋɔli gɔ̃ hã. (Hebritɔwo 4:3-6) Gake ɖe ‘dzudzɔ’ fia be Yehowa tɔ te dɔ ɖesiaɖe wɔwɔa? Ao, Yehowa medzudzɔa dɔwɔwɔ gbeɖe o. (Psalmo 92:5; Yohanes 5:17) Ekema kpuie ko la, eƒe dzudzɔ la fia be anyigbadzinu siwo míekpɔna kple ŋku wɔwɔe wòtɔ te. Gake ele dɔ si hiã be wòawɔ ne eƒe tameɖoɖowo nava eme la dzi madzudzɔmadzudzɔe. Dɔ ma ƒe akpa aɖee nye alesi wòna eƒe gbɔgbɔ ʋã amewo woŋlɔ Ŋɔŋlɔ Kɔkɔeawoe. Eƒe dɔa lɔ “nuwɔwɔ yeye,” si ŋu míaƒo nu tsoe le Ta 19 lia me, gɔ̃ hã ɖe eme.—Korintotɔwo II, 5:17.

21. Aleke Yehowa ƒe nuwɔŋusẽ awɔ dɔ ɖe amegbetɔ wɔnuteƒewo dzi yi ɖe mavɔmavɔ mee?

21 Ne Yehowa ƒe dzudzɔŋkekea wu enu mlɔeba la, ate ŋu agblɔ le eƒe anyigba dzi nuwɔwɔwo katã ŋu be “wonyo ŋutɔ,” abe alesi wògblɔe le nuwɔwɔ ŋkeke adeawo ƒe nuwuwu ene. (Mose I, 1:31) Esusɔ be míalala akpɔ alesi wòadi be yeazã yeƒe nuwɔŋusẽ si seɖoƒe meli na o lae le ɣeyiɣi ma megbe. Aleke ke wòanɔ o, míate ŋu aka ɖe edzi be alesi Yehowa azã eƒe nuwɔŋusẽa akpɔtɔ awɔ nuku na mí godoo. Míayi edzi anɔ nu geɖe srɔ̃m tso Yehowa ŋu to nusiwo wòwɔ dzi yi ɖe mavɔmavɔ me. (Nyagblɔla 3:11) Zi alesi míayi edzi anɔ nu srɔ̃m tso eŋui la, zi nenemae bubu deto si míatsɔ nɛ la ade toe ɖe edzi—eye zi nenemae míate ɖe mía Wɔla Gã la ŋui.

^ mm. 2 Be míate ŋu akpɔ alesi gbegbe wòdidii tso mía gbɔ le susu me la, bu nusia ŋu kpɔ: Ne èɖo ʋu be yeazɔ mɔ didime ma—ale be ʋua le du ƒum kilometa 160 le gaƒoƒo ɖeka me, wòyi edzi gaƒoƒo 24 la katã ŋkeke ɖesiaɖe matɔmatɔe—la, mɔa zɔzɔ axɔ ƒe alafa ɖeka kple edzivɔ hafi nàɖo!

^ mm. 6 Ame aɖewo bui be anye be didiƒekpɔmɔ̃ madeŋgɔ aɖee blematɔwo zã le Biblia ƒe ɣeyiɣiwo me. Woƒe susue nye be ne manye nenemae o la, aleke wɔ hafi ɣeyiɣi ma me tɔwo te ŋu nya be le amegbetɔ ƒe nukpɔkpɔ nu la, ɣletiviwo ƒe xexlẽme sɔ gbɔ nenema gbegbe eye be xexlẽme mele wo ŋu o? Nuŋububu masɔmasɔ ma wɔe be wometsɔ bubu si dze na Yehowa, amesi nye Biblia Ŋlɔla la, nɛ o.—Timoteo II, 3:16.

^ mm. 7 Bu ɣeyiɣi didi si nàtsɔ axlẽ ɣletivi biliɔn 100 ko ŋu kpɔ. Ne ɖe nàte ŋu axlẽ ɖeka le sɛkɛnd ɖeka ɖesiaɖe me—eye nànɔ exexlẽ dzi gaƒoƒo 24 bliboa gbesiagbe—la, ƒe 3,171 sɔŋ ye nàtsɔ axlẽe!