Dzo kpo yi emenuwo dzi

Dzo kpo yi emenuawo dzi

 NUSƆSRƆ̃ 14

Nu Ka Tae Habɔbɔ Le Mawu Si Ðo?

Nu Ka Tae Habɔbɔ Le Mawu Si Ðo?

1. Nu ka ta Mawu na blema Israel viwo nye dukɔ si nɔ ɖoɖo nu?

Mawu ƒo blemafofo Abraham ƒe dzidzimeviwo nu ƒu wonye dukɔ, eye wòde sewo na wo. Eyɔ dukɔ ma be “Israel,” eye wòbia tso wo si be woalé tadedeagu vavãa me ɖe asi ahakpɔ yeƒe nya la ta. (Psalmo 147:19, 20) Esia awɔe be dukɔwo katã akpɔ viɖe to Israel dzi.​—Xlẽ 1 Mose 22:18.

Mawu tia Israel viwo be woanye yeƒe ɖasefowo. Woƒe blemaŋutinya ɖe ale si toɖoɖo Mawu ƒe sewo ɖea vi na amee la fia. (5 Mose 4:6) Ale wɔ ame bubuwo ate ŋu ava nya Mawu vavã la to nusɔsrɔ̃ tso Israel viwo ŋu me.​—Xlẽ Yesaya 43:10, 12.

2. Nu ka tae Kristotɔ vavãwo nye habɔbɔ ɖo?

Israel viwo ƒe nu megava dze Mawu ŋu o, eya ta Yehowa na Kristo hamea va xɔ ɖe dukɔ ma teƒe. (Mateo 21:43; 23:37, 38) Kristotɔ vavãwo va xɔ ɖe Israel viwo teƒe egbea hezu Yehowa ƒe ɖasefowo.​—Xlẽ Dɔwɔwɔwo 15:14, 17.

Yesu wɔ ɖoɖo na eyomedzelawo be woaɖe gbeƒã ahawɔ dukɔwo katã me tɔwo nusrɔ̃lawoe. (Mateo 10:7, 11; 24:14; 28:19, 20) Dɔ sia le eƒe yɔyrɔe nu ɖom fifia le nuɖoanyi sia ƒe nuwuɣi sia me. Esiae nye zi gbãtɔ si Yehowa ƒo ame miliɔn geɖewo nu ƒu tso dukɔwo katã me ɖe tadedeagu vavã me. (Nyaɖeɖefia 7:9, 10) Kristotɔ vavãwo nye habɔbɔ si me tɔwo dea dzi ƒo na wo nɔewo hekpena ɖe wo nɔewo ŋu. Biblia me nufiame ɖekae woxɔna le woƒe kpekpewo me le xexea me godoo.​—Xlẽ Hebritɔwo 10:24, 25.

 3. Aleke Yehowa Ðasefowo ƒe habɔbɔ si li egbea la ƒe dɔwo dze egɔmee?

Le ƒe 1870-awo me la, Biblia nusrɔ̃viwo ƒe ƒuƒoƒo sue aɖe va nɔ kekem ɖe Biblia me nyateƒe siwo amewo megafiana o ƒe geɖee nye ma la ŋu. Wonyae be Yesu wɔ ɖoɖo be Kristo hamea nanɔ gbeƒã ɖem, eya ta wote gbeƒãɖeɖe tso Fiaɖuƒea ŋu le dukɔ vovovowo me. Wotsɔ ŋkɔ si nye Yehowa Ðasefowo le ƒe 1931 me.​—Xlẽ Dɔwɔwɔwo 1:8; 2:1, 4; 5:42.

4. Ðoɖo ka nue Yehowa Ðasefowo le?

Le ƒe alafa gbãtɔ me la, dɔdzikpɔha aɖe si lɔ̃ ɖe edzi be Yesue nye hamea ƒe Ta lae kpɔa Kristo hame siwo nɔ dukɔ vovovowo me la dzi. (Dɔwɔwɔwo 16:4, 5) Egbea hã, Dɔdzikpɔha si me tɔwo nye hamemetsitsi kpɔnuteƒewoe kpɔa Yehowa Ðasefowo ƒe dɔa dzi le xexea me godoo. Wokpɔa Yehowa Ðasefowo ƒe alɔdzedɔwɔƒe siwo ɖea gbe gɔme, taa agbalẽwo alo maa Biblia srɔ̃gbalẽwo le gbegbɔgblɔ siwo wu 600 me la dzi. Ale wɔ Dɔdzikpɔha la tea ŋu naa Ŋɔŋlɔawo me dzideƒo kple mɔfiame hame siwo wu 100,000 le xexea me godoo. Woɖoa ŋutsu siwo dze la hamemetsitsiwo alo dzikpɔlawoe le hame ɖe sia ɖe me. Ŋutsu siawo léa be na Mawu ƒe alẽha la le lɔlɔ̃ me.​—Xlẽ 1 Petro 5:2, 3.

Yehowa Ðasefowo wɔ ɖoɖo ɖe gbeƒãɖeɖe nya nyuia kple nusrɔ̃lawo wɔwɔ dɔa ŋu. Míeɖea gbeƒã tso aƒe me yi aƒe me abe ale si ko apostoloawo wɔe ene. (Dɔwɔwɔwo 20:20) Azɔ hã míesrɔ̃a Biblia kple ame siwo lɔ̃ nyateƒea tso dzi blibo me. Gake menye habɔbɔ koe Yehowa Ðasefowo nye o. Fofo lɔ̃ame aɖe ƒe ƒomea me tɔwoe míenye. Míenye nɔviŋutsu kple nɔvinyɔnu siwo léa be na mía nɔewo. (2 Tesalonikatɔwo 1:3) Esi Yehowa ƒe amewo dina vevie be yewoadze Mawu ŋu ahakpe ɖe amewo ŋu ta la, wonye ƒome si kpɔa dzidzɔ wu le anyigba dzi.​—Xlẽ Psalmo 33:12; Dɔwɔwɔwo 20:35.