Dzo kpo yi emenuwo dzi

Dzo kpo yi emenuawo dzi

 NUSƆSRƆ̃ 11

Aleke Biblia Me Gɔmeɖosewo Ðea Vi Na Míi?

Aleke Biblia Me Gɔmeɖosewo Ðea Vi Na Míi?

1. Nu ka tae míehiã mɔfiamewo?

Aleke Biblia me gɔmeɖosewo ate ŋu akpe ɖe mía ŋu míawɔ nu siwo ana míanɔ dedie?—PSALMO 36:10.

Mía Wɔla la nya nu wu mí. Esi wònye Fofo lɔ̃ame ta la, eléa be na mí. Ke hã meɖoe be míanɔ mía ɖokuiwo si ye manɔmee o. (Yeremiya 10:23) Eya ta abe ale si ko ɖeviwo hiãa wo dzilawo ƒe mɔfiame ene la, mí katã míehiã Mawu ƒe mɔfiamewo. (Yesaya 48:17, 18) Biblia me gɔmeɖosewo fiaa mɔ mí, eye wonye nunana tso Mawu gbɔ na mí.​—Xlẽ 2 Timoteo 3:16.

Yehowa ƒe sewo kple eƒe gɔmeɖosewo fiaa mɔ nyuitɔ si nu wòle be míanɔ agbe ɖo la mí egbea kple ale si míawɔ axɔ teƒeɖoɖo mavɔwo le etsɔme. Esi wònye Mawue wɔ mí ta la, ɖeko wòsɔ be míawɔ ɖe eƒe mɔfiamewo dzi ŋudzedzekpɔkpɔtɔe.​—Xlẽ Psalmo 19:8, 12; Nyaɖeɖefia 4:11.

2. Nu kawoe nye Biblia me gɔmeɖosewo?

Biblia me gɔmeɖosewoe nye nyateƒenya veviwo. Gake sewo ya kuna ɖe nɔnɔme gobi aɖewo ŋuti. (5 Mose 22:8) Ehiã be míabu tame nyuie hafi míate ŋu ase ale si woate ŋu awɔ gɔmeɖose aɖe ŋu dɔ le nɔnɔme aɖe koŋ me la gɔme. (Lododowo 2:10-12) Le kpɔɖeŋu me, Biblia fia mí be nunanae agbe nye tso Mawu gbɔ. Gɔmeɖose vevi sia ate ŋu afia mɔ mí le ale si míawɔ nu ne míele dɔ me, aƒe me, alo míele mɔ zɔm la me. Enana míewɔa nu siwo ana míanɔ dedie.​—Xlẽ Dɔwɔwɔwo 17:28.

3. Gɔmeɖose eve kawoe nye vevitɔwo?

Yesu ƒo nu tso gɔmeɖose eve siwo le vevie wu la ŋu. Gbãtɔ ɖe nu si ta koŋ mí amegbetɔwo míele agbe ɖo la fia, eyae nye be míanya Mawu, alɔ̃e ahasubɔe  nuteƒewɔwɔtɔe. Ele be míabu gɔmeɖose gbãtɔ sia ŋu le míaƒe nyametsotso ɖe sia ɖe wɔwɔ me. (Lododowo 3:6) Ame siwo léa gɔmeɖose sia me ɖe asi la nyea Mawu xɔlɔ̃wo, wokpɔa dzidzɔ vavãtɔ, eye woava nɔ agbe mavɔ.​—Xlẽ Mateo 22:36-38.

Gɔmeɖose evelia ate ŋu afia mɔ mí míanɔ ŋutifafa me kple ame bubuwo. (1 Korintotɔwo 13:4-7) Gɔmeɖose evelia sia dzi wɔwɔ bia be míasrɔ̃ ale si Mawu wɔa nu kple amewoe.​—Xlẽ Mateo 7:12; 22:39, 40.

4. Aleke Biblia me gɔmeɖosewo ɖea vi na míi?

Biblia me gɔmeɖosewo fiaa ƒomewo ale si woawɔ awɔ ɖeka le lɔlɔ̃ me. (Kolosetɔwo 3:12-14) Mawu ƒe Nya la gakpɔa ƒomewo ta le mɔ sia nu be efia gɔmeɖose bubu aɖe hã wo, eyae nye be ele be srɔ̃tɔwo nanɔ wo nɔewo gbɔ ɖaa.​—Xlẽ 1 Mose 2:24.

Ne míewɔna ɖe Biblia ƒe nufiafiawo dzi la, ate ŋu akpɔ mía ta le ŋutilã me kple seselelãme gome siaa. Le kpɔɖeŋu me, zi geɖe la, dɔtɔwo dia dɔwɔla siwo wɔna ɖe Biblia me gɔmeɖose siwo nye anukwareɖiɖi kple kutrikuku la dzi. (Lododowo 10:4, 26; Hebritɔwo 13:18) Mawu ƒe Nya la fia mí hã be míana nu siwo le mía si la nadze mía ŋu eye míade asixɔxɔ mía kple Mawu dome xɔlɔ̃wɔwɔa ŋu wu ŋutilãmenuwo.​—Xlẽ Mateo 6:24, 25, 33; 1 Timoteo 6:8-10.

Biblia me gɔmeɖosewo dzi wɔwɔ kpɔa míaƒe lãmesẽ ta. (Lododowo 14:30; 22:24, 25) Le kpɔɖeŋu me, Mawu ƒe se siwo tsi tsitre ɖe ahamumu ŋu dzi wɔwɔ kpɔa mía ta tso dɔléle vɔ̃ɖiwo kple afɔkuwo si me. (Lododowo 23:20) Yehowa ɖe mɔ na mí be míate ŋu ano aha muame, gake míanoe le ŋuɖɔɖo me. (Psalmo 104:15; 1 Korintotɔwo 6:10) Mawu ƒe gɔmeɖosewo ɖea vi na mí le mɔ sia nu be wofiaa mí be míanɔ ŋudzɔ ɖe míaƒe nuwɔnawo kple tamesusuwo siaa ŋu. (Psalmo 119:97-100) Ke hã, menye vi si Mawu ƒe sewo ɖena na Kristotɔ vavãwo la ta koe wowɔna ɖe wo dzi ɖo o. Ke boŋ be woade bubu Yehowa ŋu tae.​—Xlẽ Mateo 5:14-16.