Dzo kpo yi emenuwo dzi

Dzo kpo yi emenuawo dzi

 NUSƆSRƆ̃ 5

Samuel Yi Edzi Wɔ Nu Nyui

Samuel Yi Edzi Wɔ Nu Nyui

Tso Samuel ƒe ɖevime la, avɔgbadɔa mee wònɔ eye afi mae wòwɔa dɔ le. Avɔgbadɔ sia mee amewo va subɔa Yehowa le. Ènya nu si dzɔ hafi Samuel va tsi avɔgbadɔa mea? Gbã la, na míasrɔ̃ nu tso Xana si nye Samuel dada ŋu.

Ƒe gbogbo aɖewo va yi Xana medzi vi aɖeke o togbɔ be edi vevie be yeadzi vi hã. Eya ta edo gbe ɖa na Yehowa eye wòɖe kuku nɛ be wòakpe ɖe ye ŋu. Egblɔ na Yehowa be ne yedzi ŋutsuvi la yeana wòayi avɔgbadɔa me eye wòawɔ dɔ le afi ma. Yehowa ɖo eƒe gbedodoɖa ŋu nɛ, eye Xana dzi ŋutsuvi. Ena ŋkɔ ɖevia be Samuel. Esi Samuel xɔ ƒe etɔ̃ alo ƒe ene la, Xana kplɔe woyi avɔgbadɔa me be wòasubɔ Mawu le afi ma abe ale si wòdo ŋugbe ene.

Eli ye nye nunɔlagã le avɔgbadɔa me. Via ŋutsu eveawo hã wɔa dɔ le afi ma. Ðo ŋku edzi be avɔgbadɔe nye Mawu ƒe aƒe, afi si amewo subɔa Mawu le, ele be ame siwo nɔa afi ma la nawɔ nu nyui. Gake Eli ƒe viwo wɔa nu gbegblẽwo. Samuel kpɔ nu siwo wonɔ wɔwɔm. Ðe Samuel hã wɔa nu gbegblẽ siwo Eli ƒe viwo wɔna?​— Ao, eyi edzi wɔ nu nyui abe ale si edzilawo fiae ene.

Le wò susu nu la, nu kae wòle be Eli nàwɔ na via eveawo hafi?​—Ðe wòle be wòahe to na viawo. Mele be wòaɖe mɔ na wo be woagawɔ dɔ le Mawu ƒe aƒea me azɔ o. Gake Eli mewɔ nu ma o. Eya ta Yehowa do dziku ɖe Eli kple via ŋutsu eveawo ŋu. Yehowa ɖoe be yeahe to na wo.

Samuel gblɔ Yehowa ƒe nya na Eli

Gbe ɖeka zã me, esi Samuel nɔ alɔ̃ dɔm la, ese ame aɖe yɔe be: ‘Samuel!’ Eƒu du yi Eli gbɔ, ke Eli gblɔ nɛ be: “Nyemeyɔ wò o.” Esia dzɔ zi eve sɔŋ. Esi wògadzɔ zi etɔ̃lia la, Eli gblɔ na Samuel be ne egase gbea la, negblɔ be: ‘Yehowa meɖe kuku, ƒo nu! Wò dɔla kè to ɖi.’ Alea tututue Samuel wɔ. Eye Yehowa gblɔ na Samuel be: ‘Gblɔ na Eli be mahe to na eƒe ƒomea godoo le nu gbegblẽ siwo wowɔ la ta.’ Èsusu be enɔ bɔbɔe na  Samuel be wòagblɔ nya sia na Elia?​— Ao, menɔ bɔbɔe nɛ o. Togbɔ be Samuel nɔ vɔvɔ̃m hã la, ewɔ nu si Yehowa gblɔ nɛ be wòawɔ. Nya si Yehowa gblɔ la va eme pɛpɛpɛ. Wowu Eli viŋutsu eveawo, eye Eli ŋutɔ hã ku.

Samuel ɖo kpɔɖeŋu nyui ɖi na mí. Ewɔ nu nyui togbɔ be ekpɔ ame bubuwo nɔ nu gbegblẽ wɔm hã. Ke wò ya ɖe? Ànɔ abe Samuel ene ayi edzi anɔ nu nyui wɔma? Ne èyi edzi le nu nyui wɔm la, àna Yehowa kple dziwòlawo siaa nakpɔ dzidzɔ.

XLẼE LE WÒ BIBLIA ME