Dzo kpo yi emenuwo dzi

Dzo kpo yi emenuawo dzi

 TA EWO

Nyateƒe Si Ku Ðe Mawudɔlawo Ŋu

Nyateƒe Si Ku Ðe Mawudɔlawo Ŋu

1. Nu ka tae wòle be míasrɔ̃ nu tso mawudɔlawo ŋu?

YEHOWA di be míanya nu tso yeƒe ƒomea ŋu. Mawudɔlawo nye Mawu ƒe ƒomea me tɔwo. Woyɔ wo le Biblia me be “Mawu viwo.” (Hiob 38:7) Dɔ kawoe mawudɔlawo wɔna? Aleke wokpe ɖe amewo ŋu le blema? Ðe woate ŋu akpe ɖe mía ŋu egbea?—Kpɔ Dzesidenya 8.

2. Aleke mawudɔlawo wɔ va dzɔ? Mawudɔla nenie wowɔ?

2 Ehiã be míanya nu tso ale si mawudɔlawo wɔ va dzɔ ŋu. Kolosetɔwo 1:16 gblɔ na mí be esi Yehowa wɔ Yesu vɔ la, wowɔ “nu bubu siwo katã le dziƒowo kple anyigba dzi.” Mawudɔlawo hã le eme. Mawudɔla nenie wowɔ? Biblia gblɔ be mawudɔla miliɔn alafa geɖewoe li.—Psalmo 103:20; Nyaɖeɖefia 5:11.

3. Nya kae Hiob 38:4-7 gblɔ na mí tso mawudɔlawo ŋu?

3 Biblia la gblɔ na mí hã be Yehowa wɔ mawudɔlawo hafi va wɔ anyigba la. Aleke mawudɔlawo wɔ nui esi wokpɔ anyigba la? Hiob ƒe agbalẽa gblɔ be wogli kple dzidzɔ. Wonye ƒome si me tɔwo le kplikplikpli eye wosubɔa Yehowa aduadu.—Hiob 38:4-7.

MAWUDƆLAWO KPENA ÐE AMEGBETƆWO ŊU

4. Aleke míewɔ nya be mawudɔlawo tsɔa ɖe le eme na amegbetɔwo?

4 Tso gbe aɖe gbe ke la, mawudɔlawo tsɔa ɖe le amegbetɔwo kple tame si Yehowa ɖo ɖe anyigba kple amegbetɔwo siaa ŋu me. (Lododowo 8:30, 31; 1 Petro 1:11, 12) Anya te ɖe wo dzi ŋutɔ esime Adam kple Xawa dze  aglã ɖe Mawu ŋu. Egatena ɖe wo dzi egbea wu ne wokpɔ ale si ame akpa gãtɔ gbe toɖoɖo Yehowa. Gake ne ame aɖe trɔ dzi me hetrɔ va Mawu gbɔ la, mawudɔlawo kpɔa dzidzɔ. (Luka 15:10) Mawudɔlawo tsɔa ɖe le eme na ame siwo subɔa Mawu la vevie. Yehowa zãa mawudɔlawo tsɔ kpena ɖe esubɔlawo ŋu hekpɔa wo ta. (Hebritɔwo 1:7, 14) Na míakpɔ esia ƒe kpɔɖeŋu aɖewo ɖa.

“Nye Mawu dɔ eƒe dɔla ɖa wòva mia nu na dzatawo.”—Daniel 6:22

5. Aleke mawudɔlawo kpe ɖe Mawu subɔlawo ŋu le blema?

 5 Yehowa dɔ mawudɔla eve wova kpe ɖe Lot kple eƒe ƒomea ŋu wosi esime wotsrɔ̃ Sodom kple Gomora. (1 Mose 19:15, 16) Ƒe alafa geɖewo megbe la, wotsɔ nyagblɔɖila Daniel ƒu gbe ɖe dzatawo ƒe do me, gake dzatawo mewɔ nu vevii o, elabena “Mawu dɔ eƒe dɔla ɖa wòva mia nu na dzatawo.” (Daniel 6:22) Emegbe esi wolé apostolo Petro de ga la, Yehowa dɔ mawudɔla aɖe wòyi ɖaɖee le gaxɔa me. (Dɔwɔwɔwo 12:6-11) Mawudɔlawo kpe ɖe Yesu hã ŋu esime wònɔ anyigba dzi. Le kpɔɖeŋu me, esi wonyrɔ Yesu megbe la, ‘mawudɔlawo va nɔ esubɔm.’ (Marko 1:13) Eye do ŋgɔ teti hafi woawu Yesu la, mawudɔla aɖe va ‘do ŋusẽe.’—Luka 22:43.

6. (a) Aleke míewɔ nya be mawudɔlawo gakpena ɖe Mawu ƒe amewo ŋu egbea? (b) Nyabiase kawo mee míadzro azɔ?

6 Egbea mawudɔlawo megadzena amegbetɔwo kpɔna o. Gake Mawu gazãa mawudɔlawo tsɔ kpena ɖe esubɔlawo ŋu. Biblia gblɔ be: “Yehowa ƒe dɔla ƒua asaɖa anyi ɖe ame siwo vɔ̃nɛ la ŋu godoo va kpe, eye wòɖea wo.” (Psalmo 34:7) Nu ka tae wòhiã be woakpɔ mía ta? Elabena gbɔgbɔmenuwɔwɔ vɔ̃ɖiwo hã li siwo dina be yewoagblẽ nu le mía ŋu! Ame kawoe wonye? Aleke wowɔ va dzɔ? Aleke wodina be yewoagblẽ nu le mía ŋui? Be míaɖo nyabiase siawo ŋu la, na míakpɔ nu si dzɔ esime wowɔ Adam kple Xawa vɔ megbe teti la ɖa.

MÍAƑE FUTƆ MAKPƆMAKPƆWO

7. Nu kae Satana ble amewo wowɔ?

7 Míesrɔ̃e le Ta 3 lia me be mawudɔla aɖe dze aglã ɖe Mawu ŋu eye wòdi be yeaɖu fia ɖe amewo dzi. Biblia yɔe be Satana Abosam. (Nyaɖeɖefia 12:9) Satana di be ame bubuwo hã nadze aglã ɖe Mawu ŋu. Ete ŋu ble Xawa,  eye tso ɣemaɣi la, ele amegbetɔ akpa gãtɔ blem. Gake ame aɖewo yi edzi wɔ nuteƒe na Yehowa, wo dometɔ aɖewoe nye Abel, Enok kple Noa.—Hebritɔwo 11:4, 5, 7.

8. (a) Aleke wòdzɔe be mawudɔla aɖewo va zu gbɔgbɔ vɔ̃wo? (b) Nu kae gbɔgbɔ vɔ̃wo wɔ hafi te ŋu tsi agbe le Tsiɖɔɖɔa me?

8 Le Noa ƒe ŋkekeawo me la, mawudɔla aɖewo dze aglã eye wodzo le wo nɔƒe le dziƒo va zu amegbetɔwo nɔ anyigba dzi. Nu ka tae? Biblia gblɔ na mí be wodi be yewoaɖe nyɔnuwo. (Xlẽ 1 Mose 6:2.) Gake mesɔ be mawudɔlawo nawɔ nu ma o. (Yuda 6) Ame akpa gãtɔ siwo nɔ anyi ɣemaɣi la nye ame gblẽkuwo kple ŋutasẽlawo abe mawudɔla mawo ke ene. Yehowa ɖoe be yeana tsi naɖɔ aɖe anyigba bliboa atsrɔ̃ ame vɔ̃ɖi mawo. Gake eɖe esubɔla wɔnuteƒewo ya. (1 Mose 7:17, 23) Mawudɔla vɔ̃ɖi mawo si le tsɔtsrɔ̃a nu trɔ yi dziƒo. Biblia yɔ mawudɔla vɔ̃ɖi mawo be gbɔgbɔ vɔ̃wo. Wova wɔ ɖeka kple Satana le eƒe aglãdzedzea me, eye Abosam zu woƒe fia.—Mateo 9:34.

9. (a) Nu kae dzɔ ɖe gbɔgbɔ vɔ̃awo dzi esi wotrɔ yi dziƒo? (b) Nu ka mee míadzro azɔ?

9 Esi wònye be aglãdzelawoe gbɔgbɔ vɔ̃wo nye ta la, Yehowa megaxɔ wo ɖe eƒe ƒomea me o. (2 Petro 2:4) Gbɔgbɔ vɔ̃wo magate ŋu atrɔ azu amegbetɔwo azɔ o, gake wogakpɔtɔ “le anyigbadzinɔlawo katã blem.” (Nyaɖeɖefia 12:9; 1 Yohanes 5:19) Na míakpɔ ale si woflua ame geɖewo alo blea woe ɖa.—Xlẽ 2 Korintotɔwo 2:11.

ALE SI GBƆGBƆ VƆ̃WO BLEA AMEWOE

10. Aleke gbɔgbɔ vɔ̃wo blea amewoe?

10 Gbɔgbɔ vɔ̃wo toa mɔ geɖe dzi blea amewo. Amewo doa ka kple gbɔgbɔ vɔ̃wo tẽe eye ɖewo hã doa ka kple wo to amegbetɔ siwo dometɔ aɖewoe nye bokɔnɔwo alo vivimenukpɔlawo  dzi. Woyɔa kadodo kple gbɔgbɔ vɔ̃wo be gbɔgbɔ vɔ̃wo subɔsubɔ alo gbɔgbɔyɔyɔ. Gake Biblia de se na mí be míate mía ɖokuiwo ɖa xaa tso nu sia nu si do ƒome kple gbɔgbɔ vɔ̃wo la gbɔ. (Galatiatɔwo 5:19-21) Nu ka tae? Abe ale si ko adela zãa mɔ̃ vovovowo tsɔ ɖea lãwoe ene la, nenema kee gbɔgbɔ vɔ̃wo hã blea amewo woƒe mɔ̃ ɖea wo eye wokpɔa ŋusẽ ɖe wo dzi.—Kpɔ Dzesidenya 26.

11. Nu kae nye afakaka, eye nu ka ta wòle be míatsrii?

11 Ameblemɔnu siawo dometɔ ɖekae nye nukaka. Eyae nye be woato vivimeŋusẽwo dzi adze agbagba be woanya etsɔme alo anya nane si le ɣaɣla. Mɔ siwo dzi ame aɖewo tona kaa nue nye ɣletivimekpɔkpɔ, nutabiabia, ɣletivimefakaka, gumagazazã atsɔ aka nui, ahuhɔ̃emefakaka kple asiƒomefakaka. Ame geɖe susuna be nu siawo megblẽa naneke le ame ŋu o. Gake nu siawo gblẽa nu le ame ŋu vevie. Le kpɔɖeŋu me, Biblia gblɔ be gbɔgbɔ vɔ̃wo kple afakalawo wɔa dɔ asi-le-asi-me. Dɔwɔwɔwo 16:16-18 gblɔ be ‘gbɔgbɔ vɔ̃ aɖe si naa wotea ŋu kaa afa’ la kpena ɖe nyɔnuvi aɖe ŋu ‘wòkaa afa.’ Gake esi apostolo Paulo nya gbɔgbɔ vɔ̃a do goe le nyɔnuvia me la, nyɔnuvia megatea ŋu kaa afa o.

12. Nu ka tae afɔku gã aɖe le ŋɔliyɔyɔ me? (b) Nu ka tae Mawu subɔlawo mekpɔa gome le gbɔgbɔ vɔ̃wo ƒe kɔnuwo me o?

12 Gbɔgbɔ vɔ̃wo gatoa mɔ bubu aɖe dzi blea amewo. Wodina be míaxɔe ase be míate ŋu aƒo nu kple kukuawo eye be kukuawo gakpɔtɔ le agbe le teƒe aɖe, woate ŋu aƒo nu kpli mí alo awɔ nu vevi mí. Le kpɔɖeŋu me, ne ame aɖewo ƒe xɔlɔ̃wo alo woƒe ame veviwo ku la, wotea ŋu yia nukalawo alo ŋɔliyɔlawo gbɔ. Ŋɔliyɔlawo ate ŋu agblɔ nya wɔdɔɖeamedzi aɖe tso wo xɔlɔ̃a alo woƒe  ƒometɔ si ku la ŋu. Ŋɔliyɔlawo ate ŋu asrɔ̃ ame siwo ku la ƒe gbe gɔ̃ hã. (1 Samuel 28:3-19) Wotu kukɔnu geɖewo hã ɖe dzixɔse si nye be kukuawo gale agbe le afi aɖe la dzi. Kukɔnu siawo dometɔ aɖewoe nye ameɖiɖimegbekplɔ̃ɖoɖo, kuzãɖuɖu, vɔsasa ɖe ame kukua ta, ahowɔwɔ kple ŋudɔdɔ. Ne Kristotɔwo gbe be yewomawɔ kɔnu siawo o la, woƒe ƒometɔwo alo nutoa me tɔwo ate ŋu ahe nya ɖe wo ŋu, adzu wo, alo alé fu wo gɔ̃ hã. Gake Kristotɔwo nyae be ame kukuwo mele agbe le afi aɖeke o. Mímate ŋu aƒo nu kple kukuawo o, eye woawo hã womate ŋu aƒo nu kpli mí o. (Psalmo 115:17) Kpɔ nyuie. Mègatee kpɔ gbeɖe be yeado ka kple kukuawo alo gbɔgbɔ vɔ̃wo o, eye mègakpɔ gome le trɔ̃kɔnu aɖeke me gbeɖe o.—Xlẽ 5 Mose 18:10, 11; Yesaya 8:19.

13. Nu kae ame geɖe siwo vɔ̃na na gbɔgbɔ vɔ̃wo tsã la te ŋu wɔ?

13 Menye ɖeko gbɔgbɔ vɔ̃wo blea amewo o, wodoa vɔvɔ̃ na amewo hã. Egbea Satana kple eƒe gbɔgbɔ vɔ̃wo nyae be “ɣeyiɣi vi aɖe koe susɔ” Mawu naɖe yewo ɖa le anyigba dzi, eya ta wole ŋutasẽnuwo wɔm hele adã dzi wu tsã. (Nyaɖeɖefia 12:12, 17) Ke hã, ame akpe geɖe siwo vɔ̃na na gbɔgbɔ vɔ̃wo tsã la megava vɔ̃na na wo o. Aleke wowɔ vo tso vɔvɔ̃ na gbɔgbɔ vɔ̃wo si me?

TSI TSITRE ÐE GBƆGBƆ VƆ̃WO ŊU EYE NÀVO TSO WO SI ME

14. Aleke míawɔ avo tso gbɔgbɔ vɔ̃wo si me abe ale si Kristotɔ siwo nɔ anyi le ƒe alafa gbãtɔ me wɔe ene?

14 Biblia gblɔ ale si míawɔ atsi tsitre ɖe gbɔgbɔ vɔ̃wo ŋu kple ale si míawɔ avo tso wo si me hã na mí. Le kpɔɖeŋu me, Efesotɔ aɖewo do ka kple gbɔgbɔ vɔ̃wo hafi va srɔ̃ nyateƒea. Aleke wowɔ vo tso wo si me? Biblia gblɔ be: “Afakalawo dometɔ gbogbo aɖewo tsɔ woƒe  agbalẽwo katã vɛ, eye wotɔ dzo wo le amewo katã ŋkume.” (Dɔwɔwɔwo 19:19) Esi wodi be yewoazu Kristotɔwo ta la, wogblẽ afakagbalẽwo dome. Nu ma tɔgbi hiã egbea hã. Ehiã be ame sia ame si di be yeasubɔ Yehowa la nagblẽ nu sia nu si le esi si do ka kple gbɔgbɔ vɔ̃wo la dome. Nu siawo dometɔ aɖewoe nye agbalẽwo, magazinewo, ɣletimefakaka, videowo, hadzidziwo, fefewo kple foto siwo nana wòdzena abe afɔku aɖeke mele afakaka, kadodo kple gbɔgbɔ vɔ̃wo alo vivimeŋusẽwo me o ene alo nana wòléa dzi na ame gɔ̃ hã. Esiawo lɔ takpɔnu siwo amewo dona be woakpɔ yewo ta tso vɔ̃ si me la hã ɖe eme.—1 Korintotɔwo 10:21.

15. Nu ka hãe wòle be míawɔ be míatsi tsitre ɖe Satana kple gbɔgbɔ vɔ̃wo ŋu?

15 Esi Kristotɔ siwo nɔ Efeso gblẽ woƒe afakagbalẽwo dome ƒe geɖe megbe la, apostolo Paulo ŋlɔ bena egahiã kokoko be woate “kame” kple ‘gbɔgbɔmeŋusẽ vɔ̃ɖiwo.’ (Efesotɔwo 6:12) Ɛ̃, togbɔ be wotɔ dzo woƒe agbalẽ mawo xoxo hã la, gbɔgbɔ vɔ̃wo gakpɔtɔ nɔ agbagba dzem be yewoagblẽ nu le wo ŋu. Eya ta nu kae wògahiã be woawɔ? Paulo gblɔ na wo be: “Milé xɔse ƒe akpoxɔnu gã, si miatsɔ atsi vɔ̃ɖitɔ la ƒe aŋutrɔ bibiawo katã nu la ɖe asi.” (Efesotɔwo 6:16) Abe ale si ko akpoxɔnu kpɔa aʋawɔla ta le aʋagbe dzi ene la, míaƒe xɔse ate ŋu akpɔ mía ta. Ne míexɔe se bliboe be Yehowa ate ŋu akpɔ mía ta la, míate ŋu atsi tsitre ɖe Satana kple gbɔgbɔ vɔ̃wo ŋu.—Mateo 17:20.

16. Nu kae míawɔ ale be ale si míexɔ Yehowa dzi se la me nasẽ ɖe edzi?

16 Nu kae míawɔ ale be ale si míexɔ Yehowa dzi se la me nasẽ ɖe edzi? Ehiã be míanɔ Biblia xlẽm gbe sia gbe eye míasrɔ̃ ale si míaɖo ŋu ɖe Yehowa ŋu be akpɔ mía ta.  Ne míeka ɖe Yehowa dzi bliboe la, Satana kple gbɔgbɔ vɔ̃wo mate ŋu awɔ nu vevi mí o.—1 Yohanes 5:5.

17. Nu bubu kae akpɔ mía ta tso gbɔgbɔ vɔ̃wo si me?

17 Nu bubu kae wògahiã be Kristotɔ siwo nɔ Efeso la nawɔ? Wonɔ du si me yɔ fũ kple gbɔgbɔ vɔ̃wo subɔsubɔ la me. Eya ta Paulo gblɔ na wo be: “Minɔ gbedodoɖa . . . dzi ɣeawokatãɣi.” (Efesotɔwo 6:18) Ehiã be woabia Yehowa be wòakpɔ yewo ta ɣeawokatãɣi. Ke míawo ya ɖe? Míawo hã míele xexe aɖe si me gbɔgbɔ vɔ̃wo subɔsubɔ xɔ aƒe ɖo me. Eya ta ehiã be míabia Yehowa be wòakpɔ mía ta, eye míazã eƒe ŋkɔa ne míele gbe dom ɖa. (Xlẽ Lododowo 18:10.) Ne míeyi edzi biaa Yehowa be wòaɖe mí tso Satana si me la, Yehowa aɖo míaƒe gbedodoɖawo ŋu.—Psalmo 145:19; Mateo 6:13.

18, 19. (a) Aleke míawɔ aɖu aʋa si wɔm míele kple Satana kpakple gbɔgbɔ vɔ̃wo la dzi? (b) Biabia ka ŋue míaɖo le ta si kplɔ esia ɖo me?

18 Ne míegblẽ míaƒe nu siwo katã do ka kple gbɔgbɔ vɔ̃wo subɔsubɔ dome eye míeka ɖe Yehowa dzi be akpɔ mía ta la, míate ŋu atsi tsitre ɖe Satana kple gbɔgbɔ vɔ̃wo ŋu. Mehiã be míavɔ̃ wo o. (Xlẽ Yakobo 4:7, 8.) Yehowa tri akɔ sãsãsã wu gbɔgbɔ vɔ̃wo. Ehe to na wo le Noa ƒe ŋkekea me, eye le etsɔme la atsrɔ̃ wo. (Yuda 6) Ðo ŋku edzi be menye míawo ɖeɖe koe le aʋa sia wɔm o, Yehowa le eƒe dɔlawo zãm tsɔ le mía ta kpɔm. (2 Fiawo 6:15-17) Eya ta kakaɖedzi nenɔ mía si be Yehowa akpe ɖe mía ŋu míaɖu aʋa si wɔm míele kple Satana kpakple gbɔgbɔ vɔ̃wo la dzi.—1 Petro 5:6, 7; 2 Petro 2:9.

19 Gake esi wònye be Satana kple gbɔgbɔ vɔ̃wo na amewo le fu kpem alea gbegbe ɖe, nu ka tae Mawu mekpɔ tsrɔ̃ wo haɖe o? Míakpɔ biabia sia ƒe ŋuɖoɖo le ta si kplɔ esia ɖo me.