Yehowa gblɔ na Mose be: ‘Va gbɔnye le to la dzi. Maŋlɔ nye sewo ɖe kpe gbadzɛ aɖe dzi atsɔ ana wò.’ Eya ta Mose lia to la eye wònɔ afi ma ŋkeke 40 kple zã 40. Esi wònɔ afi ma la, Yehowa ŋlɔ Se Ewoawo ɖe kpe gbadzɛ eve dzi eye wòtsɔ wo na Mose.

Le ɣeyiɣi aɖe megbe la, Israel-viwo susu be Mose gblẽ yewo ɖi. Wogblɔ na Aron be: ‘Míedi be ame aɖe nanye míaƒe kplɔla. Wɔ mawu aɖe na mí!’ Eya ta Aron gblɔ na wo be: ‘Mitsɔ miaƒe sikawo vɛ nam.’ Elólo sika la eye wòtsɔe wɔ sikanyivi. Dukɔ la gblɔ be: ‘Nyivi siae nye Mawu si kplɔ mí tso Egipte!’ Wode ta agu na sikanyivi la, eye woɖu azã. Nu nyui wònye wowɔa? Ao, elabena dukɔ la do ŋugbe be Yehowa ɖeɖe koe yewoasubɔ. Gake fifia womele wɔwɔm ɖe ŋugbe ma si wodo la dzi o.

 Yehowa kpɔ nu si nɔ dzɔdzɔm eye wògblɔ na Mose be: ‘Ði, nàyi dukɔ la gbɔ. Wogbe toɖoɖom hele ta dem agu na alakpamawu.’ Mose tsɔ kpe gbadzɛ eveawo eye wòɖi le toa dzi.

Esi Mose gogo afi si ameawo le la, ese wonɔ ha dzim. Eye wòkpɔ be wonɔ ɣe ɖum henɔ ta dem agu na sikanyivi la. Dzi ku Mose ale gbegbe. Exlã kpe gbadzɛ eveawo ɖe anyi eye wogbã kakɛkakɛe. Egbã sikanyivi la enumake. Eye wòbia Aron be: ‘Nya kae dukɔ la gblɔ na wò hafi nèwɔ nu vɔ̃ɖi sia gbegbe?’ Aron ɖo eŋu be: ‘Mègado dziku o. Wò ŋutɔ ènya dukɔ sia nyuie. Wobe mawɔ mawu na yewo, eya ta metsɔ woƒe sikawo ƒu gbe ɖe dzo me eye wòtrɔ zu sikanyivi sia!’ Mele be Aron nawɔ nu ma hafi o. Mose trɔ yi to la dzi eye wòɖe kuku na Yehowa be wòatsɔe ake ameawo.

Yehowa tsɔ ke ame siwo lɔ̃ be yewoaɖo toe la. Èkpɔ ale si wòle vevie be Israel-viwo nabɔbɔ wo ɖokui ɖe Mose ƒe kpɔkplɔ tea?