KA TIƝƐN lɔn mun koo la? Ka tiɲɛn lɔn ɲiningaliba dɔw koo la minw be mɔgɔw dabali ban kabi galen. N’a sɔrɔ i delila k’i yɛrɛ ɲininga ko:

  • Yala Ala b’i janto an na tiɲɛn na wa?

  • Yala marifakɛlɛw ni tɔɔrɔw bena ban loon dɔ wa?

  • Mun lo be yen saya kɔ?

  • Yala suuw be ni jigiya ye wa?

  • Ne be se ka Ala deli cogo di walisa a ka ne jaabi?

  • Ne be se ka hɛɛrɛ sɔrɔ cogo di?

I bena o ɲiningaliw jaabiliw sɔrɔ min? N’i tagara sɛbɛfeereyɔrɔw wala u marayɔrɔw la, i be se ka gafe caamanba sɔrɔ, bɛɛ n’a ka jaabili. Nka tuma caaman na o gafew be ɲɔgɔn sɔsɔ. U dɔw ka jaabili be se ka mɔgɔ wasa u sɛbɛ tuma na, nka u sanga tɛ mɛɛn ka ben. O la, u kɔnɔna koow be yɛlɛma wala dɔ wɛrɛw be sɛbɛ u nɔɔ na.

Nka kitabu dɔ be yen, jaabili sɔbɛw be sɔrɔ a kɔnɔ. Ngalon si t’a kɔnɔ. Ala delitɔ, Yesu Krista y’a fɔ ko: “I ka kuma ye tiɲɛ ye.” (Yuhana 17:17). Bi, an b’a lɔn k’o kuma ye Bibulu senuman lo ye. Sɛbɛ nin ɲɛɛ nataw la, i bena Bibulu ka jaabili gwɛnen lakikaw sɔrɔ o ɲiningaliw koo la.

 Yala Ala b’i janto an na tiɲɛn na wa?

O ƝININGALI KUUN: Duniɲa nin falen be fariyakow ni tilenbaliyakow la. Diinan caaman b’a fɔ ko an ka tɔɔrɔw ye Ala ka latigɛ ye.

BIBULU BE MIN FƆ: Ala tɛ kojugu kɛ fewu. Job 34:10 b’a fɔ ko: “Ala ni kojugukɛlaw cɛ ka jan, Sebaayabɛɛtigi ni tilenbaliya cɛ ka jan.” Ala be ni sagonata ɲuman ye ka ɲɛsin hadamadenw ma. O kama, Yesu y’an kalan ko an ka Ala deli ko: “An Fa min bɛ sankolo la, . . . I ka masaya ka na. I sago ka kɛ dugukolo kan i ko a bɛ kɛ sankolo la cogo min na.” (Matiyu 6:​9, 10). Ala b’an kanu haali fɔɔ a ye koow bɛɛ lajɛnnen kɛ walisa k’a ka sagonata dafa.​​—⁠Yuhana 3:⁠16.

Jenɛse 1:​26-28; Yakuba 1:13; ani 1 Piɛrɛ 5:​6, 7 fana lajɛ.

Yala marifakɛlɛw ni tɔɔrɔw bena ban loon dɔ wa?

O ƝININGALI KUUN: Hali bi, marifakɛlɛw b’a la ka mɔgɔ caaman faga. Tɔɔrɔw b’an bɛɛ sɔrɔ.

BIBULU BE MIN FƆ: Ala ye wagati dɔ kofɔ tuma min na a bena hɛɛrɛ sigi dugukolo kuru bɛɛ kan. A ka Masaya mara la, o min ye sankolola gofɛrɛnɛman ye, mɔgɔw “tɛna dege kɛlɛ kow la tun.” Nka “u na u ka npanw faga ka kɛ misidabaw ye.” (Esayi 2:⁠4). Ala bena tilenbaliyakow ni tɔɔrɔw bɛɛ ban. Bibulu kɔnɔ, Ala be layidu ta ko: “A na ɲɛji bɛɛ cɛ ka bɔ u ɲɛ la. Saya tɛna kɛ tun, su kasi fana tɛna kɛ tun, wala kasikan wala dimin, k’a masɔrɔ fɛn fɔlɔw [i n’a fɔ tilenbaliyakow ni tɔɔrɔw] tɛmɛnna.”​​—⁠Jirali 21:​3, 4.

Zaburuw 37:​10, 11; 46:10; ani Mise 4:​1-4 fana lajɛ.

Mun lo be yen saya kɔ?

O ƝININGALI KUUN: Diinan caaman b’a fɔ ko mɔgɔ mana sa, fɛɛn dɔ be bɔ a la ka to niin na. Dɔw b’a miiri ko mɔgɔ salenw be se ka kojugu kɛ mɔgɔ ɲɛnamaw la wala ko Ala be mɔgɔ juguw jalaki k’u tɔɔrɔ jahanama tasumaman kɔnɔ fɔɔ abada.

BIBULU BE MIN FƆ: Mɔgɔ mana sa, a niin banna. Waajulikɛla 9:5 b’a fɔ ko: “Mɔgɔ salenw tɛ foyi dɔn.” Komi mɔgɔ salenw tɛ foyi lɔn ani u tɛ foyi kala ma, u tɛ se ka kojugu kɛ mɔgɔ ɲɛnamaw la wala k’u dɛmɛ.​​—⁠Zaburuw 146:​3, 4.

Jenɛse 3:19 ani Waajulikɛla 9:​6, 10 fana lajɛ.

 Yala suuw be ni jigiya ye wa?

O ƝININGALI KUUN: An b’a fɛ ka to niin na ani ka ɲɛnamaya diya bɔ n’an diyanye mɔgɔw ye. A dagalen lo an k’a ɲini k’an diyanye mɔgɔ salenw ye kokura.

BIBULU BE MIN FƆ: Mɔgɔ minw sara, u caamanba bena lakunu. Yesu ye layidu ta ko: “Mɔgɔ salen minnu bɛ [hakilijigi, NW] kaburuw kɔnɔ, . . . U na bɔ yen.” (Yuhana 5:​28, 29). Ka kɛɲɛ ni Ala ka sagonata fɔlɔ ye, minw bena lakunu hadamadenw cogo la, u bena sababu sɔrɔ ka ɲɛnamaya kɛ alijɛnɛ kɔnɔ dugukolo kan (Luka 23:43). O layidu kɔrɔ ko hadamaden kanminɛbagaw bena kɛnɛya dafalen ani ɲɛnamaya banbali sɔrɔ. Bibulu b’a fɔ ko: “Dugukolo na kɛ mɔgɔ tilennenw ciyɛn ye. U na sigi a kan badaa.”​​—⁠Zaburuw 37:⁠29.

Job 14:​14, 15; Luka 7:​11-17; ani Kɛwalew 24:15 fana lajɛ.

Ne be se ka Ala deli cogo di walisa a ka ne jaabi?

O ƝININGALI KUUN: Ka diinan damanin niin bɔ a la, diinanw bɛɛ ka mɔgɔw be delili kɛ. Nka a be u caaman ɲɛɛ na ko u ka deliliw tɛ jaabili sɔrɔ.

BIBULU BE MIN FƆ: Yesu y’an kalan ko an kana kuma dɔw degi an kuun fɛ ani ka to k’u fɔ delili kɛtɔ. A y’a fɔ ko: “Ni aw bɛ Ala deli . . . aw kana segin kumaw kan” (Matiyu 6:⁠7). N’an b’a fɛ Ala k’an ka deliliw lamɛn, an ka kan ka delili kɛ i n’a fɔ ale b’a fɛ cogo min na. O kama an ka ɲi k’a ɲini ka Ala sago lɔn ani ka delili kɛ ka kɛɲɛ n’o ye. 1 Yuhana 5:14 b’a ɲɛfɔ ko: “Ni an ye fɛn dɔ deli [Ala] fɛ ka kɛɲɛ ni a sago ye, a bɛ an lamɛn.”

Zaburuw 65:3; Yuhana 14:​6, 14; ani 1 Yuhana 3:22 fana lajɛ.

Ne be se ka hɛɛrɛ sɔrɔ cogo di?

O ƝININGALI KUUN: Mɔgɔ caaman b’a miiri ko hɛɛrɛ be sɔrɔ wari, tɔgɔba wala saramaya fɛ. O kama u be boliboli o fɛɛnw nɔfɛ, nka o hɛɛrɛ be taga k’u dan.

BIBULU BE MIN FƆ: Yesu ye hɛɛrɛ gundo yira a kɛtɔ k’a fɔ ko: “Minnu y’a dɔn ko u ye faantanw ye Ala ta fan fɛ, olu ye dubadenw ye, katuguni sankolo masaya ye u ta ye.” (Matiyu 5:⁠3). Hɛɛrɛ lakika tɛ sɔrɔ fɔɔ n’an ye fɛɛrɛw kɛ walisa k’an ka mako fisaman wasa, o min ye: nege min b’an na ka Ala n’a sagonata lɔn ka ɲɛsin an ma. O tiɲɛn be sɔrɔ Bibulu kɔnɔ. O tiɲɛn lɔnni b’an dɛmɛ an k’a lɔn fɛɛn min kɔrɔtalen lo tiɲɛn-tiɲɛn na ani fɛɛn min tɛ bɛrɛ ye. N’an b’a to Bibulu ka tiɲɛn kumaw k’an ɲɛminɛ an ka ŋaniya n’an ka kɛwalew la, kuun bena sɔrɔ an ka ɲɛnamaya la.​​—⁠Luka 11:⁠28.

Ntalenw 3:​5, 6, 13-18 ani 1 Timote 6:​9, 10 fana lajɛ.

 An daa sera min ma, o ye ɲiningali wɔɔrɔ dama ka jaabiliw ye Bibulu be minw di. Yala i be kunnafoni wɛrɛw fɛ tugun wa? Siga t’a la n’i fana ye mɔgɔ ye min ye “faantan ye Ala ta fan fɛ”. N’a sɔrɔ ɲiningali wɛrɛw b’i fɛ i n’a fɔ: ‘Ni Ala b’i janto an na, mun na a y’a to kojugu ni tɔɔrɔ cayara ten kabi galen? Ne be se k’an ka denbaya ka ɲɛnamaya kɛcogo fisaya cogo di?’ Bibulu be o ɲiningaliw ani caaman wɛrɛw jaabi. O jaabiliw be mɔgɔ wasa bɛrɛbɛrɛ.

Nka mɔgɔ caaman be sigasiga ka Bibulu lajɛ. A be u ɲɛɛ na ko a ka bon ani a faamuyali ka gwɛlɛ tuma dɔw la. Yala i be dɛmɛ fɛ walisa k’i ka ɲiningaliw jaabiliw sɔrɔ Bibulu kɔnɔ wa? Jehova Seerew be fɛɛn fila kofɔ mɔgɔw ye minw be se k’i dɛmɛ.

A fɔlɔ ye gafe nin ye: Kalan tigitigi juman be Bibulu kɔnɔ? A sɛbɛra walisa ka mɔgɔw dɛmɛ, minw bolo degunnen lo, u ka Bibulu sɛgɛsɛgɛ ka jaabili gwɛnenw sɔrɔ ɲiningaliba dɔw la. Fɛɛn filanan ye bibulukalan ye, u be min kɛ ni mɔgɔw ye u ka soo: wariko t’a la. I sigida la Jehova Seere setigi dɔ be se ka na i ka soo wala yɔrɔ bɛnnen wɛrɛ la ka baro kɛ n’i ye gwansan Bibulu kan wagati dɔɔni kɔnɔ lɔgɔkun o lɔgɔkun. O labɛn ye mɔgɔ miliyɔn caaman nafa duniɲa kuru bɛɛ kɔnɔ. A laban, u caaman sɔnna k’a fɔ ko: “Ne ye tiɲɛn sɔrɔ!”

Nafoloba wɛrɛ tɛ yen o kɔ. Bibulu ka tiɲɛn kalan b’an hɔɔrɔnya ka bɔ lannako kunntanw, koo ferekelenw ani siranya jugu la. A b’an dɛmɛ ka jigiya, kuun ani ninsɔndiya sɔrɔ an ka ɲɛnamaya kɔnɔ. Yesu y’a fɔ ko: “Aw na tiɲɛ dɔn, tiɲɛ na aw hɔrɔnya.”​​—⁠Yuhana 8:⁠32.