BIBULU t’a fɔ an ye Yezu wolola wagati tigitigi min na. Nka, a be dalilu barikamanw di an ma minw b’a to an b’a fɔ ko a ma wolo desanburukalo la.

I k’a filɛ wagati tun be cogoya min na desanburukalo la, Bɛtilehɛmu mara la Yezu wolola yɔrɔ min na. Yahutuw ka Kislɛvu kalo (novanburukalo ni desanburukalo cɛ) tun ye samiɲakalo ni nɛnɛkalo ye. O nɔfɛ kalo tun ye Tebɛt kalo ye (desanburukalo ni zanwiyekalo cɛ). O kalo ka nɛnɛ tun ka jugu ka tɛmɛ kalo tɔɔw ta kan, ani tuma dɔw la nɛzi tun be ben ka kuluw sanfɛlaw datugu. An k’a filɛ Bibulu be min fɔ Bɛtilehɛmu ka wagati cogoya koo la.

Bibulu sɛbɛbaga Ɛsidirasi b’a yira ko Kislɛvu kalo ye samiɲakalo ni nɛnɛkalo ye tiɲɛn na. A y’a sɛbɛ ko jama ye ɲɔgɔn lajɛn Zeruzalɛmu “saan kalo  kɔnɔntɔnnan [Kislɛvu kalo] tile mugannan loon” na, ani ko mɔgɔw ‘tun be yɛrɛyɛrɛla sanji kosɔn.’ Jama yɛrɛ y’a fɔ Kislɛvu kalo ka wagati cogoya koo la ko: “samiɲa fana lo, mɔgɔ te se ka to kɛnɛma.” (Ɛsidirasi 10:9, 13; Zeremi 36:22). O lo y’a to, Bɛtilehɛmu mara la, desanburukalo tun mana surunya, bɛgɛndɛndɛbagaw tun be labɛn kɛ walisa suu kana ko k’u sɔrɔ kɛnɛ ma n’u ka bɛgɛnw ye!

K’a masɔrɔ Bibulu b’a fɔ ko Yezu wololon sufɛ, sagadɛndɛbaga dɔw tun be u ka sagaw kɔrɔsira kongo kɔnɔ. Bibulu sɛbɛbaga Luka yɛrɛ b’a fɔ ko sagadɛndɛbagaw “tun be si ɲana kongo kɔnɔ k’u ka sagaw kɔlɔsi” Bɛtilehɛmu mara la (Luka 2:8-12). I k’a kɔrɔsi ko a fɔra ko sagadɛndɛbagaw tun be si ɲana kongo kɔnɔ. U tun tɛ bɔ n’u ka bɛgɛnw ye tile fɛ dɔrɔn. U n’u ka bɛgɛnw tun be kɛnɛ ma kongo kɔnɔ sufɛ. Yala o tun bɛnnen lo ni Bɛtilehɛmu ka wagati cogoya ye yɔrɔ min na nɛnɛ ni sanji be yen desanburukalo la wa? Ayi dɛ! O la, Yezu wolotuma ka koow cogoya b’a yira ko Yezu ma wolo desanburukolo la. *

Ala ka Kuma b’a fɔ an ye Yezu sara wagati tigitigi min na. Nka, a tɛ kunnafoni bɛrɛ di an ma a wolotuma koo la. O b’an hakili jigi masacɛ Solomani ka kumaw la ko: “Tɔgɔɲuman ka fisa ni tulu kasadiman ye. Mɔgɔ salon ka fisa n’a wololon ye.” (Waajulikɛla 7:1). A tɛ bari an na k’a ye ko Bibulu be kunnafoni caaman di an ma Yezu ka cidenya baara n’a ka saya koo la, nka a tɛ kunnafoni bɛrɛ di an ma a wolotuma koo la.

Yezu wolotuma na, sagadɛndɛbagaw n’u ka bɛgɛnw tun be kɛnɛ ma kongo kɔnɔ sufɛ

^ dakun 1 N’i be kunnafoni wɛrɛw fɛ, i k’a filɛ gafe Comment raisonner à partir des Écritures kɔnɔ, a ɲɛɛ 161-165. Jehova Seerew lo y’a sɛbɛ.