MƐLƐKƐ min tɔgɔ ko Misɛli, Bibulu t’a kofɔ siɲɛ caaman na. Nka,, Bibulu mana a kofɔ, a b’a yira ko a be wale dɔ lo kɛra. A kofɔra Daniyɛli ka kitabu kɔnɔ ko a be mɛlɛkɛ juguw kɛlɛla. Zude ka bataki b’a fɔ ko sɔsɔli donna ale ni Sutana cɛ. Ani, Yirali ka kitabu b’a yira ko a be Sutana n’a ka jinaw kɛlɛla. Misɛli kɛtɔ ka Jehova ka kuntigiya lafasa ani ka a juguw kɛlɛ, a be koow kɛ ka kɛɲɛ n’a tɔgɔ kɔrɔ ye sabu Misɛli kɔrɔ ko: “Jɔn lo be komi Ala?” Nka, Misɛli ye jɔn lo ye?

Mɔgɔ dɔw be ni tɔgɔ caaman ye. Ɲɛyirali fɛ, cɛmɔgɔba Yakuba tɔgɔ wɛrɛ ko Israɛl, ani ciden Piyɛri be weele fana ko Simɔn (Zɛnɛzi 49:1, 2; Matiyo 10:2). O cogo kelen na, Bibulu b’a yira ko Misɛli ye Yezu Krista tɔgɔ wɛrɛ ye. Sanni a ka na dugukolo kan a tun be weele o tɔgɔ la ani a kɔsegini kɔ sankolo la, o tɔgɔ lo b’a kan. An ka dalilu dɔw lajɛ Bibulu kɔnɔ minw b’a to an b’a fɔ ko Misɛli ye Yezu tɔgɔ wɛrɛ ye.

Mɛlɛkɛba. Ala ka Kuma be Misɛli weele ko “mɛlɛkɛba.” (Zude 9). O kuma kɔrɔ ko “mɛlɛkɛw kuntigiba.” Bibulu tɛ kuma abada mɛlɛkɛba caaman koo la, nka a be kuma mɛlɛkɛba kelenpe dɔrɔn lo koo la. O b’a yira k’o mɛlɛkɛ  ɲɔgɔnna wɛrɛ tɛ yen. Ka fara o kan, Bibulu b’a yira ko mɛlɛkɛba ka lɔyɔrɔ ɲɛsinna Yezu lo ma. 1 Tesalonikaw 4:16 (ABM ) b’a fɔ Matigi Yezu Krista lakununen koo la ko: “Matigi yɛrɛ na jigin ka bɔ sankolo la ni pɛrɛnkanba ni mɛlɛkɛw kuntigi kanba . . . ye.” O vɛrise b’a yira ko Yezu kaan ye mɛlɛkɛba kaan ye. O kɔrɔ ko Yezu yɛrɛ lo ye mɛlɛkɛw kuntigiba Misɛli ye.

Kɛlɛbolo kuntigi. Bibulu b’a fɔ ko ‘Misɛli ni a ka mɛlɛkɛw ye o dragon ni a ka mɛlɛkɛw kɛlɛ.’ ( Yirali 12:7, ABM ). O cogo la, Misɛli ye mɛlɛkɛ kantigimanw kɛlɛbolo kuntigi ye. Yirali ka kitabu fana b’a yira ko Yezu ye mɛlɛkɛ kantigimanw kɛlɛbolo kuntigi ye ( Yirali 19:14-16). Ani, ciden Pol be kuma ka gwɛ “Matigi Yezu” koo la ani “a ka mɛlɛkɛ setigiw” koo la (2 Tesalonikaw 1:7; Matiyo 16:27; 24:31; 1 Piyɛri 3:22). O cogo la, Bibulu be kuma ‘Misɛli ni a ka mɛlɛkɛw’ koo la ani Yezu fana ni ‘a ka mɛlɛkɛw’ koo la (Matiyo 13:41). Bibulu kɔni t’a fɔ yɔrɔ si la ko mɛlɛkɛ kantigimanw kɛlɛbolo fila lo be yen sankolo la (ko Misɛli be kelen kun na ani Yezu be tɔɔ kelen kun na). O la, a bɛnnen lo k’a fɔ ko Misɛli tɛ dɔ wɛrɛ ye Yezu Krista kɔ a ka lɔyɔrɔ la sankolo la. *

^ dakun 1 N’i be kunnafoni wɛrɛw fɛ minw b’a yira ko Misɛli tɔgɔ ɲɛsinna Ala Dencɛ lo ma, i k’a filɛ gafe Étude perspicace des Écritures kitabu 2nan kɔnɔ, a ɲɛɛ 280-281 (faransɛkan). Jehova Seerew lo y’a sɛbɛ.