I ƝƐƐ be mun lo la sisan jaa nin kan? Mɔgɔw lo be yen. Cɛɛ fɔlɔ ni muso fɔlɔ lo. Jɔn lo ye u dan? Ala lo. Yala i be Ala tɔgɔ lɔn wa? A tɔgɔ ko Jehova. Cɛɛ nin tɔgɔ ko Adama, a muso tɔgɔ ko Awa.

Adama ni Awa be Edɛn nankɔtu kɔnɔ

A filɛ Jehova Ala ye Adama dan cogo min na. A ye dugukolo buguri dɔ ta ka cɛɛ farisogo dafalen dilan. O kɔ, Ala y’a dafiɲɛ fiyɛ a nunwow la, ani Adama kɛra ɲɛnamaya la.

Jehova ye baara di Adama ma. A y’a fɔ a ye ko a ka tɔgɔ di bɛgɛn sifaw bɛɛ ma. N’a sɔrɔ Adama tun ye bɛgɛnw kɔlɔsi wagati jan kɔnɔ ka sɔrɔ ka tɔgɔ bɛnnen di u bɛɛ kelen-kelen ma. K’a to Adama be bɛgɛnw tɔgɔ lara, a ye koo dɔ kɔrɔsi. I y’a lɔn koo min lo wa?

A y’a kɔrɔsi ko bɛgɛnw bɛɛ tun be fila fila, cɛɛ ni muso. O cogo la sama facɛmanw ni bamusomanw tun be yen ani jara facɛmanw ni bamusomanw fana tun be yen. Nka, ale Adama tun b’a kelen na. O kama, Jehova ye sinɔgɔba bila Adama la ani a y’a galagakolo dɔ bɔ. Jehova ye o galagakolo kɛ muso ye k’a di Adama ma k’a kɛ a muso ye.

Sisan, Adama ninsɔn diyara kosɔbɛ! Ani i ka miiri k’a filɛ Awa ninsɔn diyara cogo min na k’a yɛrɛ sɔrɔ nin nankɔtu cɛɲumanba ɲɔgɔn kɔnɔ! Sisan, u tun be se ka deenw sɔrɔ ani ka ɲɛnamaya kɛ hɛɛrɛ la ɲɔgɔn fɛ.

Jehova tun b’a fɛ ko Adama ni Awa ka ɲɛnamaya kɛ kudayi. A tun b’a fɛ u ka dugukolo kuru bɛɛ kɛ yɔrɔ ɲuman ye i ko Edɛn nankɔtu. Adama ni Awa tun mana miiri o baara koo la, u ninsɔn tun be diya kosɔbɛ! Yala a tun bena diya i ye ka baara kɛ walisa dugukolo ka kɛ nankɔtu cɛɲumanba ye wa? Nka, Adama ni Awa ka hɛɛrɛ ma mɛɛn. An k’a filɛ koo min kɛra.

Zɛnɛzi 1:26-31; 2:7-25; Zaburuw 83:19, Bible Senuman 1961.



Ɲiningaliw

  • Faranfasi juman be yen maana 3nan ni maana 2nan ka jaaw cɛ?
  • Jɔn lo ye cɛɛ fɔlɔ dan, ani o cɛɛ tɔgɔ tun ko di?
  • Ala ye baara juman di Adama ma?
  • Mun na Ala ye sinɔgɔba bila Adama la?
  • Adama ni Awa tun be se ka ɲɛnamaya kɛ fɔɔ wagati juman, ani Jehova tun ye baara juman kalifa u ma?

Ɲiningali wɛrɛw

  • Zaburuw 83:19 kalan (Bible Senuman 1961).

    Ala tɔgɔ ko di, ani ale kelenpe be ni lɔyɔrɔ juman ye dugukolo kun na? (Zer. 16:21; Dan. 4:14)

  • Zɛnɛzi 1:26-31 kalan.

    Loon wɔɔrɔnan na, Ala ye mun lo dan k’a ka danni baara kuncɛ, ani danfaran juman tun be o danfɛn ni bɛgɛnw cɛ? (Zɛnɛzi 1:26)

    Jehova ye mun lo di mɔgɔw ni bɛgɛnw fana ma? (Zɛnɛzi 1:30)

  • Zɛnɛzi 2:7-25 kalan.

    Adama tun ka kan ka mun lo kɛ ka sɔrɔ ka tɔgɔ la bɛgɛnw ni kongosogow la? (Zɛnɛzi 2:19)

    Cogo juman na Zɛnɛzi 2:24 b’an dɛmɛ ka Jehova ka miiriya faamu furu ni farali ni furusa koo la? (Mat. 19:4-6, 9)