MƐLƐKƐ filɛ yan, a be kasobon daa yɛlɛla. A be cɛɛ minw labɔra kaso la, olu ye Yezu ka cidenw ye. An k’a filɛ fɛɛn min kama u y’u don kaso la.

Mɛlɛkɛ dɔ be cidenw bɔra kaso la

Hakili senu jigira Yezu ka kalandenw kan a ma mɛɛn, a filɛ min kɛra: Piyɛri ni Zan tun be tagara Alabatosoba kɔnɔ loon dɔ wulada fɛ. Alabatosoba donda la u ye cɛɛ dɔ sɔrɔ min tun ye muruku ye kabi a wolotuma. Loon o loon, mɔgɔw tun be to ka na o cɛɛ bila yen walisa a ka wari deli donbagaw fɛ. A ye Piyɛri ni Zan ye tuma min na, a ye delili kɛ u fɛ. Cidenw tun bena mun lo kɛ?

Piyɛri ni Zan lɔra k’o cɛɛ filɛ. Piyɛri ko: “Wari te n fɛ, nka fɛɛn min be n fɛ, ne b’o le d’i ma: Nazarɛtika Yezu Krista tɔgɔ barika la, wili ka taama.” Piyɛri y’a minɛ a kinibolo ma, a panna ka cun ani k’a daminɛ ka tagama. O kabakoba ye jama kɔnɔnafili ani u ninsɔndiyara k’a ye ko cɛɛ be tagamana.

O la, Piyɛri ko: ‘Ala min ye Yezu lakunu saya la, an ye kabako nin kɛ ale lo barika la.’ Ka Piyɛri ni Zan to kuma na, diinan kuntigi dɔw sera. U y’a ye ko Piyɛri ni Zan be jama kalanna Yezu lakununi koo la minkɛ, u dimina. U y’u minɛ ka taga u datugu kaso la.

O dugusagwɛ, diinan kuntigiw ye ɲɔgɔnyeba dɔ kɛ. U nana ni Piyɛri ni Zan ye u cɛma ani cɛɛ min kɛnɛyara. Diinan kuntigiw y’u ɲininga ko: “Aw ye muruku nin kɛnɛya ni see jumɛn ye?”

Piyɛri y’u jaabi k’o kɛra Ala le barika la, ale min ye Yezu lakunu saya la. Sarakalasebagaw m’a lɔn u bena min kɛ u la, sabu u tun tɛ se ka ban a la k’o kabakoba kɛra. O kama, u ye kangari la cidenw ye ko Yezu tɔgɔ kana mɛn u daa la tugun, ani u y’u bila ka taga.

Cidenw tora ka waajuli kɛ Yezu koo la ani ka banabagatɔw kɛnɛya. U tun be kabako minw kɛ, o kibaro tun be jɛnsɛn ka taga ɲɛ. O kama, jama tun be bɔ Zeruzalɛmu lamini duguw la ka na n’u ka banabagatɔw ye cidenw fɛ walisa u k’u kɛnɛya. Cidenw keleya donna diinan kuntigiw la, u y’u minɛ ka don kaso la. Nka, u ma mɛɛn kaso la.

Sufɛ, Ala ka mɛlɛkɛ nana kasobon daa yɛlɛ i ko i ɲɛɛ b’a la jaa kan. Mɛlɛkɛ ko: ‘A’ ye taga Alabatosoba kɔnɔ ani a’ ye to ka kuma jama fɛ.’ O dugusagwɛ sɔgɔma, diinan kuntigiw ye mɔgɔw bila ka taga cidenw bɔ kaso la ka na n’u ye, nka u ma cidenw sɔrɔ yen. Kɔfɛ, u y’u sɔrɔ Alabatosoba kɔnɔ u be mɔgɔw kalanna. U y’u minɛ ka taga n’u ye kititigɛyɔrɔ la.

Diinan kuntigiw ko: ‘An tun ma kangari la aw ye ko aw kana mɔgɔw kalan tugun Yezu koo la wa? Nka, a’ ye Zeruzalɛmukaw tulo fa n’aw ka kalan ye.’ O la, cidenw y’u jaabi ko: “Anw tɛ se ka ban Ala sago la ka adamadenw ta kɛ.” O kama, u tora ka “kibaru diman” fɔ. Yala nin tɛ ɲɛyirali ɲuman ye an ka kan ka tugu min kɔ wa?

Kɛwaliw sapitiri 3-5.



Ɲiningaliw

  • Tuma min na Piyɛri ni Zan tun be tagara Alabatosoba kɔnɔ loon dɔ wulada fɛ, mun lo kɛra?
  • Piyɛri ye mun lo fɔ murukucɛ dɔ ye, ani a ye mun lo di a ma min ka fisa ni wari ye?
  • Mun na diinan kuntigiw dimina, ani u ye mun lo kɛ Piyɛri ni Zan na?
  • Piyɛri ye mun lo fɔ diinan kuntigiw ye, nka olu ye kangari juman la cidenw ye?
  • Mun na keleya donna diinan kuntigiw la, ani mun lo kɛra tuma min na u ye cidenw don kaso la siɲɛ filanan na?
  • Cidenw ye diinan kuntigiw jaabi cogo di tuma min na u tagara n’u ye kititigɛyɔrɔ la?

Ɲiningali wɛrɛw

  • Kɛwaliw 3:1-10 kalan.

    Hali ni see t’an ye bi ka kabakow kɛ, Piyɛri ka kuma minw be sɔrɔ Kɛwaliw 3:6 kɔnɔ, u b’an dɛmɛ cogo di ka Masaya kibaro jati fɛɛnba ye? (Zan 17:3; 2 Kor. 5:18-20; Fil. 3:8)

  • Kɛwaliw 4:1-31 kalan.

    Ni mɔgɔw b’an kɛlɛ waajuli la, cogo juman na an be se k’an balima kerecɛn fɔlɔw ladegi? (Kɛw. 4:29, 31; Efɛz. 6:18-20; 1 Tes. 2:2)

  • Kɛwaliw 5:17-42 kalan.

    Galen ani bi, mɔgɔ minw tɛ Jehova Seerew ye, olu dɔw y’a yira cogo di k’u sabarinin lo an ka waajuli baara fan fɛ? (Kɛw. 5:34-39)