FIYENTƆ fila kɛnɛyali kɔ, Yezu sera dugudennin dɔ la Zeruzalɛmu gɛrɛfɛ. A y’a fɔ a ka kalanden fila dɔw ye ko: ‘Aw ye taga ɲafɛ dugu nin na. Aw bena faliden dɔ sɔrɔ yen. Aw k’a foni ka na n’a ye.’

U nana faliden di Yezu ma tuma min na, a yɛlɛla a kan ka Zeruzalɛmu sira minɛ. A surunyana Zeruzalɛmu na tuma min na, jamaba bɔra k’a kunbɛn. U fanba y’u ka faniw bɔ k’u la sira kan. U dɔw ye tenfuraburuw tigɛ k’u la sira kan fana. Jama tun be kulera ko: ‘E min be nana Jehova tɔgɔ la, Ala ka duga i ye!’

jamaba be Yezu kunbɛnna

Galen Israɛl jamana na, masacɛ kuraw ka delinanko tun ye ka sigi faliden kan ani ka don Zeruzalɛmu kɔnɔ walisa k’u yɛrɛ yira jama na. Yezu b’o lo kɛra ten. Mɔgɔ nunu b’a yirala ko u b’a fɛ Yezu ka kɛ u ka masacɛ ye. Nka, a koo tun man di bɛɛ ye. An k’a filɛ koo min kɛra a dontɔ Alabatosoba kɔnɔ.

A ye fiyentɔw ni murukuw kɛnɛya batosoba kɔnɔ. Denmisɛnw y’o ye minkɛ, u kulera ka Yezu tando. Nka, o koo ye sarakalasebagaw dimi ani u y’a fɔ Yezu ye ko: “I ma denmisɛn nunu ka kuma mɛn wa?”

Yezu y’u jaabi ko: “Ɔnhɔn, aw fana ma deli k’a kalan Ala ka kuma na ko: ‘E y’e tanuli kuma don denmisɛnw ni denɲɛninw daa la.’?” O la, denmisɛnw tora ka Ala ka masacɛ tando.

Yala an t’a fɛ ka kɛ denmisɛn nunu ɲɔgɔn ye wa? Mɔgɔ dɔw be se k’a ɲini k’an bali an kana kuma Ala ka masaya koo la. Nka, Yezu bena kabako minw kɛ mɔgɔw ye a ka ɲi an ka to k’o weleweleda.

K’a to dugukolo kan, wagati tun ma se Yezu fɛ ka masaya daminɛ. O wagati tun bena se tuma juman? A ka kalandenw tun b’a fɛ k’o lɔn. An bena o lajɛ kɔfɛ.

Matiyo 21:1-17; Zan 12:12-16.



Ɲiningaliw

  • Yezu senin kɔ dugudennin dɔ la Zeruzalɛmu gɛrɛfɛ, a y’a fɔ ko a ka kalandenw ka mun lo kɛ?
  • Jaa nin kan, mun lo kɛra tuma min na Yezu surunyana Zeruzalɛmu na?
  • Denmisɛnw ye mun lo kɛ tuma min na u y’a ye ko Yezu ye fiyentɔw ni murukuw kɛnɛya?
  • Sarakalasebagaw dimina, Yezu ye mun lo fɔ u ye?
  • Denmisɛn minw ye Yezu tando, an be se k’u ladegi cogo di?
  • Kalandenw tun b’a fɛ ka mun lo lɔn?

Ɲiningali wɛrɛw

  • Matiyo 21:1-17 kalan.

    Yezu masalaman donna Zeruzalɛmu kɔnɔ cogo min na, cogo di o ni Ɔrɔmu jalatigiw ta tɛ kelen ye tuma min na u ye see sɔrɔ kɛlɛ la? (Mat. 21:4, 5; Zak. 9:9; Fil. 2:5-8; Kɔl. 2:15)

    Tuma min na Yezu donna Alabatosoba kɔnɔ, Israɛl denmisɛnw y’a tando ni Zaburu 118 ka kumaw ye. Bi, denmisɛnw be kalan juman sɔrɔ o la? (Mat. 21:9, 15; Zab. 118:25, 26; 2 Tim. 3:15; 2 Piyɛri 3:18)

  • Zan 12:12-16 kalan.

    Mɔgɔw ye tenfuraburuw la sira kan ka Yezu tando, o be mun lo yira? (Zan 12:13; Fil. 2:10; Yir. 7:9, 10)