YEZU lɔra Samari walisa ka lafiɲɛ kɔlɔn dɔ daa la. A ka kalandenw tagara dumuni sanyɔrɔ dugu kɔnɔ. Yezu be kumana ni muso min ye, a nana jii bɔyɔrɔ. Yezu y’a fɔ a ye ko: “N sɔn jii la n b’a min.”

Yezu be kumana ni Samarika muso dɔ ye

O kuma ye muso ni kabakoya kosɔbɛ. I b’a lɔn fɛɛn min kama wa? Yezu ye Yahutu ye ani o muso ye Samarika ye. Samarikaw koo man di Yahutu caaman ye. U yɛrɛ t’a fɛ ka kuma u fɛ! Yezu kɔni be mɔgɔ sifa bɛɛ kanu. O kama, a ko: ‘Mɔgɔ min be jii delila i fɛ, n’i tun b’ale lɔn, e yɛrɛ le tun bena jii deli a fɛ ani jii min be ɲɛnamaya di mɔgɔ ma, a tun bena o di i ma.’

Muso y’a fɔ a ye ko: ‘Juru t’i bolo, kɔlɔn fana ka dun. I bena o jii nin bɔ min?’

Yezu y’a jaabi ko: ‘N’i ye kɔlɔn nin jii min, minnɔgɔ bena i minɛ tugun. Nka jii min be ne fɛ, ni ne y’o di i ma i bena ɲɛnamaya kɛ fɔɔ abada.’

Muso nin y’a fɔ a ye ko: ‘Matigi, o jii nin di ne ma walisa minnɔgɔ kana n minɛ tugun ani n kana na yan jita kama tugun.’

Muso nin y’a miiri ko Yezu kaan be jii yɛrɛ yɛrɛ lo ma. Nka, Yezu tun be kumana tiɲɛn koo lo la ka ɲɛsin Ala n’a ka Masaya ma. O tiɲɛn be i n’a fɔ jii min be se ka ɲɛnamaya banbali di mɔgɔ ma.

Yezu y’a fɔ muso nin ye sisan ko: “Taga i cɛɛ wele ka na.”

A y’a jaabi ko: “Cɛɛ te n fɛ.”

Yezu ko: ‘I ye tiɲɛn fɔ. Bari i furula cɛɛ duuru fɛ ka tɛmɛ. E ni min be ɲɔgɔn fɛ sisan, i cɛɛ tɛ.’

Muso kabakoyara sabu o kumaw bɛɛ tun ye tiɲɛn ye. Yezu kɛra di k’o koow bɛɛ lɔn? Ala lo ye o koow bɛɛ yira Yezu la sabu a ye Ala ka Ciden ye. O yɔrɔnin bɛɛ Yezu ka kalandenw sera ani u kabakoyara k’a ye ko a be kumana Samarika muso dɔ fɛ.

An be kalan juman sɔrɔ maana nin na? A b’a yira ko Yezu be siyaw bɛɛ mɔgɔw minɛ ka ɲɛ. An fana ka kan k’o ɲɔgɔn lo kɛ. An man kan k’a miiri ko mɔgɔ dɔw man ɲi u ka siya kosɔn. Yezu b’a fɛ mɔgɔw bɛɛ ka tiɲɛn lɔn o min sen fɛ mɔgɔ be se ka ɲɛnamaya banbali sɔrɔ. An fana ka kan ka mɔgɔw dɛmɛ u ka tiɲɛn lɔn.

Zan 4:5-43; 17:3.



Ɲiningaliw

  • Mun na Yezu lɔra kɔlɔn dɔ daa la Samari, ani a be mun lo fɔra muso dɔ ye o yɔrɔ la?
  • Mun na o muso kabakoyara, Yezu ye mun lo fɔ a ye, ani mun na a y’o fɔ do?
  • Muso ka miiriya la, Yezu kaan be jii sifa juman lo ma, nka o jii ye mun yɛrɛ yɛrɛ lo ye?
  • Mun na muso kabakoyara k’a ye ko Yezu b’ale ka koow lɔn? Yezu kɛra di k’o koow bɛɛ lɔn?
  • An be kalan juman sɔrɔ maana nin na min ɲɛsinna Yezu ni Samarika muso ma kɔlɔnda la?

Ɲiningali wɛrɛw

  • Zan 4:5-43 kalan.

    An ni mɔgɔ minw tɛ siya wala lɔyɔrɔ kelen na, an ka kan ka Yezu ladegi k’u minɛ cogo di? (Zan 4:9; 1 Kor. 9:22; 1 Tim. 2:3, 4; Titi 2:11)

    Mɔgɔ mana kɛ Yezu ka kalanden ye, a tigi be duga jumanw sɔrɔ Alako ta fan fɛ? (Zan 4:14; Ezayi 58:11; 2 Kor. 4:16)

    Samarika muso ye min mɛn, a dusu diyara k’o tilan ni mɔgɔ wɛrɛw ye. Cogo juman na an be se ka kɛ ni waleɲumanlɔn ye i n’a fɔ o muso? (Zan 4:7, 28; Mat. 6:33; Luka 10:40-42)