SISAN an be lamisalon sufɛ. Yezu n’a ka ciden 12 nana sangaso bonba nin kɔnɔ walisa ka Tɛmɛnkan seli dumuni kɛ. I ɲɛɛ be cɛɛ min bɔtɔ la, Zuda Isikariyɔti lo. A be tagara a fɔ sarakalasebagaw ye cogo min na u be se ka Yezu minɛ.

Matigi ka surafana dumuni

Arabalon na, Zuda tun tagara bɔ u fɛ k’u ɲininga ko: “Aw bena mun le di ne ma, ni ne y’aw dɛmɛ ka Yezu minɛ?” U y’a jaabi ko: “Warigwɛ bi saba.” O lo y’a to Zuda be bɔra sisan ka taga o cɛɛw ɲɛminɛ walisa ka Yezu yɔrɔ yira u la. Nin ye kojuguba daan ye dɛ!

Yezu n’a ka cidenw tilara Tɛmɛnkan seli dumuni na. Nka, Yezu be dumuni kɛrɛnkɛrɛnnin wɛrɛ daminɛ n’u ye. A ye burukun dɔ di u ma ani k’a fɔ u ye ko: ‘Aw k’a minɛ k’a dumu, nin ye ne fari tagamasiɲɛ ye min bena di aw kosɔn.’ O kɔ, a ye diwɛn fana ta jifilen kɔnɔ k’a di u ma k’a fɔ ko: ‘Aw k’a minɛ k’a min, nin ye ne joli tagamasiɲɛ ye min bena bɔn aw kosɔn.’ Bibulu b’o weele ko ‘Matigi ka surafana.’

Israɛldenw tun be Tɛmɛnkan seli dumuni kɛ walisa k’u hakili jigi ko Ala ka mɛlɛkɛ tun tɛmɛna u ka soow kan Misira jamana na, nka a tun ye Misirakaw ka deen fɔlɔw faga u ka soow kɔnɔ. Nka, sisan Yezu tun b’a fɛ a ka kalandenw k’u hakili to ale koo la ani cogo min na a y’a niin di u kosɔn. O lo y’a to a y’a ɲini u fɛ u ka to k’o dumuni kɛrɛnkɛrɛnnin seli kɛ saan o saan.

Matigi ka surafana dumuni kɛnin kɔ, Yezu y’a fɔ a ka cidenw ye ko u ka barika don u yɛrɛ la k’u jaa gwɛlɛya. A laban, u ye Ala tando ni dɔnkiliw ye ani u tagara. Dugu tilara sisan, n’a sɔrɔ minuwi tɛmɛna. An k’a filɛ u bɔra ka taga yɔrɔ min na.

Matiyo 26:14-30; Luka 22:1-39; Zan sapitiri 13-17; 1 Korɛntikaw 11:20.



Ɲiningaliw

  • I ko i ɲɛɛ b’a la jaa nin kan, Yezu n’a ka ciden 12 nana mun lo kɛ sangaso bonba nin kɔnɔ?
  • I ɲɛɛ be cɛɛ min bɔtɔ la, jɔn lo ani a be tagara mun lo kɛyɔrɔ?
  • Tɛmɛnkan seli dumuni banni kɔ, Yezu ye dumuni kɛrɛnkɛrɛnnin juman daminɛ n’a ka cidenw ye?
  • Tɛmɛnkan seli tun be Israɛldenw hakili jigi mun lo la, ani dumuni kɛrɛnkɛrɛnnin nin be Yezu ka kalandenw hakili jigi mun lo la?
  • Matigi ka surafana banni kɔ, Yezu ye mun lo fɔ a ka kalandenw ye, ani u ye mun lo kɛ o kɔ?

Ɲiningali wɛrɛw

  • Matiyo 26:14-30 kalan.

    Matiyo 26:15 b’a yira cogo di ko Zuda y’a dabɔ a kama ka Yezu janfa?

    Yezu joli bɔnni be laɲinita fila jumanw dafa? (Mat. 26:27, 28; Zer. 31:31-33; Efɛz. 1:7; Eburuw 9:19, 20)

  • Luka 22:1-39 kalan.

    Kɔrɔ juman na Sutana donna Zuda kɔnɔ? (Luka 22:3; Zan 13:2; Kɛw. 1:24, 25)

  • Zan 13:1-20 kalan.

    Ka kɛɲɛ ni Zan 13:2 ka fɔta ye, yala a bɛnni lo ka Zuda jalaki a ka kɛta la wa? Ani Ala sagokɛlaw be se ka kalan juman sɔrɔ o koo la? (Zɛnɛzi 4:7; 2 Kor. 2:11; Gal. 6:1; Zaki 1:13, 14)

    Yezu ye kalan nafamanba juman di? (Zan 13:15; Mat. 23:11; 1 Piyɛri 2:21)

  • Zan 17:1-26 kalan.

    Kɔrɔ juman na Yezu ye delili kɛ ko a ka kalandenw “ka kɛ kelen ye”? (Zan 17:11, 21-23; Ɔrɔm. 13:8; 14:19; Kɔl. 3:14)