Taga a kɔnɔkow lajɛ

Taga a kɔnɔnakow lajɛ

Maana 95nan: Yezu ka mɔgɔ kalancogo

Maana 95nan: Yezu ka mɔgɔ kalancogo

LOON dɔ la, Yezu y’a fɔ cɛɛ dɔ ye ko a ka kan k’a mɔgɔɲɔgɔn kanu. O cɛɛ ye Yezu ɲininga ko: “Jɔn le ye ne mɔgɔɲɔgɔn ye?” Ayiwa, Yezu y’a lɔn o cɛɛ ka miiriya ye min ye. O cɛɛ b’a miiri ko ale ka siya n’a ka diinanmɔgɔw dɔrɔn lo ye ale mɔgɔɲɔgɔnw ye. O la, an k’a filɛ Yezu ye min fɔ a ye.

Tuma dɔw la, Yezu tun be maana dɔ lakali walisa ka mɔgɔw kalan. A y’o lo kɛ sisan. A ye maana dɔ lakali min ɲɛsinna Yahutucɛ dɔw ani Samarikacɛ dɔ ma. An y’a kalan ka tɛmɛ ko Samarikaw koo man di Yahutuw fanba ye. Ayiwa, Yezu ka maana filɛ:

Cɛɛ dɔ tun bɔra Zeruzalɛmu n’a be tagara Zeriko, sira dɔ fɛ kuluw cɛma. Benkannikɛlaw girinna a kan. U y’a ka wari bɔsi a la ka tila k’a bugɔ fɔɔ ka kirin.

Kɔfɛ, Yahutuw ka sarakalasebaga dɔ tun be o sira kelen kan ka na. A ye cɛɛ mandiminin ye. E ka miiri la, a ye mun lo kɛ? A faranna ka tɛmɛ sira faan dɔ fɛ ka taga. O kɔ, cɛɛ dɔ min ka Alako tun ka bon kosɔbɛ, o fana nana. Levi kɔmɔgɔw dɔ lo. Yala a lɔra wa? Ayi, a ma lɔ ka cɛɛ mandiminin nin dɛmɛ dɛ! Sarakalasebaga ani Levite cɛɛ nunu tagatɔ filɛ yɔrɔ jan.

Nka, jɔn lo be ni cɛɛ mandiminin nin ye? Samarikacɛ dɔ lo. A be Yahutucɛ dɛmɛna. A ye fila dɔ don a jolidaw la. O kɔ, a ye Yahutucɛ ta ka taga n’a ye yɔrɔ dɔ la walisa a ka lafiɲɛ ani ka kɛnɛya.

Samarika ɲuman

Yezu tilanin kɔ a ka maana na, cɛɛ min tun y’a ɲininga, a y’a fɔ o ye ko: ‘E ka miiri la, mɔgɔ saba nunu na, juman lo ye cɛɛ mandiminin mɔgɔɲɔgɔn ye? Sarakalasebaga wa, Levite wa wala Samarika?’

Cɛɛ y’a jaabi ko: ‘Samarika lo. A ye koo ɲuman kɛ cɛɛ mandiminin nin ye.’

Yezu ko: ‘I ye tiɲɛn fɔ. Ayiwa, i fana ka taga o ɲɔgɔn kɛ.’

Yezu ka mɔgɔw kalancogo ka di i ye wa? Yezu ka kuma minw be sɔrɔ Bibulu kɔnɔ, n’an b’u kalan an be se ka koo kɔrɔtalen caaman faamu. Tiɲɛn tɛ?

Luka 10:25-37.



Ɲiningaliw

  • Cɛɛ dɔ ye ɲiningali juman kɛ Yezu ye, ani mun na?
  • Tuma dɔw la, Yezu tun be tɛmɛ fɛɛrɛ juman fɛ ka mɔgɔw kalan, ani an ye mun lo kalan ka tɛmɛ Yahutuw ni Samarikaw koo la?
  • Yezu ka maana kɔnɔ, Yahutu dɔ tagatɔ Zeriko, mun lo y’a sɔrɔ?
  • Yahutuw ka sarakalasebaga dɔ ani Levite dɔ tɛmɛtɔ ye mun lo kɛ?
  • Jaa nin kan, jɔn lo be Yahutucɛ mandiminin nin dɛmɛna?
  • Yezu tilanin kɔ a ka maana na, a ye ɲiningali juman kɛ, ani cɛɛ y’a jaabi cogo di?

Ɲiningali wɛrɛw

  • Luka 10:25-37 kalan.

    Sanni a ka sin ka sariya karamɔgɔ dɔ ka ɲiningali jaabi, Yezu y’a dɛmɛ cogo di ale yɛrɛ k’a hakili jagabɔ koo dɔ kan? (Luka 10:26; Mat. 16:13-16)

    Cogo di, Yezu tɛmɛna ntalen kumaw fɛ k’a lamɛnbagaw dɛmɛ u ka see sɔrɔ siyawoloma koo kan? (Luka 10:36, 37; 18:9-14; Titi 1:9)