YEZU filɛ yan, a ye cɛdennin dɔ minɛ a bolo. I ka la a la ko denmisɛnw koo ka di Yezu ye. A ka cidenw lo b’a filɛra. A be mun lo fɔra u ye do? An k’o lajɛ.

Yezu n’a ka cidenw bɔra tagama jan dɔ la. A ka cidenw tun ye ɲɔgɔn sɔsɔ koo dɔ la sira kan. O kama, Yezu y’u ɲininga ko: “Aw tun be mun sɔsɔli lo la sira kan?” Tiɲɛn na, Yezu tun b’u ka sɔsɔli kuun lɔn. Nka, a tun b’a fɛ k’a lɔn n’u bena tiɲɛn fɔ a ye.

Yezu ni cɛdennin dɔ

Cidenw m’a jaabi, sabu u tun be ɲɔgɔn sɔsɔra sira kan ko jɔn lo ye kuntigi ye u cɛma. Ciden dɔw tun b’a fɛ ka kɛ tɔɔw ɲɛmɔgɔw ye. Yezu tun bena a fɔ u ye cogo di ko a bɛnnin tɛ ka ɲɛmɔgɔya ɲini?

A ye cɛdennin dɔ minɛ k’a lɔ u ɲɛɛ na. O kɔ, a y’a fɔ a ka kalandenw ye ko: ‘Ne b’a fɔ aw ye ko ni aw ma aw sɔɔn yɛlɛma k’a kɛ i n’a fɔ denmisɛnw ta, aw tɛna don Ala ka masaya la fewu. Mɔgɔ min b’a yɛrɛ kɛ i n’a fɔ denmisɛn nin, o tigi bena kɛ mɔgɔba ye masaya la.’ I b’a lɔn fɛɛn min kama Yezu y’o fɔ wa?

Ayiwa, denmisɛnw ɲɛnako tɛ ka kɛ ɲɛmɔgɔw ye tɔɔw kun na. O la, cidenw ka kan k’a ɲini ka kɛ i n’a fɔ denmisɛnw sanni ka ɲɔgɔn kɛlɛ ɲɛmɔgɔya kosɔn.

Wagati wɛrɛw la fana Yezu y’a yira ko denmisɛnw koo ka di a ye kosɔbɛ. Kalo damanin o kɔ, mɔgɔw nana n’u ka denmisɛnw ye Yezu fɛ. Cidenw y’a ɲini k’u bali. Nka, Yezu y’a fɔ cidenw ye ko: ‘Aw ka denmisɛnw to u ka na ne fɛ, aw kana u bali bari Ala ka masaya ye olu bɔɲɔgɔnw le ta ye.’ O kɔ, Yezu ye denmisɛn nunu ta ani ka duga kɛ u ye. Yala koo ɲuman tɛ k’a lɔn ko denmisɛnw koo tun ka di Yezu ye wa?

Matiyo 18:1-4; 19:13-15; Mariki 9:33-37; 10:13-16.



Ɲiningaliw

  • Cidenw bɔtɔ tagama jan dɔ la, u ye ɲɔgɔn sɔsɔ mun lo la sira kan?
  • Mun na Yezu ye cɛdennin dɔ weele k’a lɔ cidenw cɛma?
  • Cogo juman na cidenw ka kan k’a ɲini ka kɛ i n’a fɔ denmisɛnw?
  • Kalo damanin o kɔ, Yezu y’a yira cogo di ko denmisɛnw koo ka di a ye?

Ɲiningali wɛrɛw

  • Matiyo 18:1-4 kalan.

    Mun na Yezu tun be tɛmɛ ntalen kumaw fɛ ka mɔgɔw kalan? (Mat. 13:34, 36; Mariki 4:33, 34)

  • Matiyo 19:13-15 kalan.

    An ka kan ka denmisɛnw ka sɔɔn juman ladegi n’an b’a fɛ ka Masaya ka dugaw sɔrɔ? (Zab. 25:9; 138:6; 1 Kor. 14:20)

  • Mariki 9:33-37 kalan.

    Yezu ye mun lo fɔ a ka kalandenw ye ɲɛmɔgɔya ɲinini koo la? (Mariki 9:35; Mat. 20:25, 26; Gal. 6:3; Fil. 2:5-8)

  • Mariki 10:13-16 kalan.

    Yezu y’a yira cogo di ko a labilanin lo mɔgɔw kama, ani diinan mɔgɔkɔrɔw be kalan juman sɔrɔ o koo la? (Mariki 6:30-34; Fil. 2:1-4; 1 Tim. 4:12)