Sayuli lo kɛra Israɛl ka masacɛ fɔlɔ ye. Nka, Jehova banna a la, ani a ye Dawuda sugandi k’a kɛ masacɛ ye a nɔɔ na. An bena koo caaman kalan Dawuda koo la. A kanbeleman ye cɛɛ jamanjanba Goliyati kɛlɛ ka see sɔrɔ a kan. Kɔfɛ, a bolila masacɛ Sayuli ɲɛ a ka ɲangoya kosɔn. Loon dɔ, muso cɛɲumanba Abigayɛli ye Dawuda bali ka koo jugu dɔ kɛ.

An bena koo caaman kalan fana Dawuda dencɛ Solomani koo la ale min sigira masaya la a faa nɔɔ na. Masacɛ saba fɔlɔ minw sigira Israɛl kun na, u bɛɛ kelen kelen ye saan 40 kɛ masaya la. Solomani sanin kɔ, Israɛl tilanna ka kɛ masaya fila ye: saheli fan fɛ ni worodugu fan fɛ.

Israɛl siya tan ka masaya min tun be saheli fan fɛ, o ye saan 257 kɛ ani Asirikaw y’o halaki. Saan 133 o kɔ, siya fila ka masaya min tun be worodugu fan fɛ, o fana halakira. O wagati la, Israɛldenw cɛra ka taga Babilɔni. YƆRƆ 4NAN ka maanaw bɛɛ lajɛnnin kɛra saan 510 kɔnɔ, u minw na koo kabakoman caaman kɛra.

Masacɛ Solomani be delili kɛra