Taga a kɔnɔkow lajɛ

Taga a kɔnɔnakow lajɛ

Maana 18nan: Yakuba be taga Aran

Maana 18nan: Yakuba be taga Aran

YAKUBA be kumana cɛɛ minw fɛ, i b’u lɔn wa? Yakuba ye tagama kɛ tile caaman. O kɔ, a y’u kunbɛn kɔlɔn dɔ daa la. U tun b’u ka sagaw dɛndɛna. Yakuba y’u ɲininga ko: ‘Aw bɔra min?’

U y’a jaabi ko: “An bɔra Aran.”

Yakuba y’u ɲininga ko: ‘Aw be Laban lɔn wa?’

U y’a jaabi ko ‘ɔnhɔn, a denmuso Arasɛli yɛrɛ natɔ filɛ n’a ka sagakulu ye.’ I ɲɛɛ be Arasɛli natɔ la yɔrɔ jan na wa?

Yakuba be Arasɛli kunbɛnna

Yakuba ye Arasɛli n’a belencɛ Laban ka sagaw ye tuma min na, a tagara kabakuru kolonkolon ka bɔ kɔlɔn daa la walisa sagaw ka se ka jii min. O kɔ, Yakuba ye i meleke Arasɛli la ani k’a yɛrɛ yira a la. Arasɛli ninsɔn diyara kosɔbɛ, a tagara soo k’o fɔ a facɛ Laban ye.

Laban fana ninsɔn diyara kosɔbɛ ka Yakuba sɔrɔ a ka soo. Ani tuma min na Yakuba ye Arasɛli ɲini furu la, o diyara Laban ye. Nka, a y’a ɲini Yakuba fɛ ko a ka baara kɛ ale ye saan wolonfila kɔnɔ walisa ka Arasɛli sɔrɔ. Yakuba sɔnna o ma, sabu a tun be Arasɛli kanu hali. Nka, furulon sera tuma min na, i y’a lɔn fɛɛn min kɛra wa?

Laban ye Arasɛli kɔrɔmuso Leya di Yakuba ma Arasɛli nɔɔ na. Yakuba sɔnna ka saan wolonfila baara kɛ Laban ye tugun minkɛ, Laban ye Arasɛli fana di a ma. O wagati la, Ala tun tɛ muso caaman furu kɛlɛ. Nka sisan, Bibulu b’a yira ko cɛɛ ka kan ka muso kelen dɔrɔn lo furu.

Zɛnɛzi 29:1-30.



Ɲiningaliw

  • Sunguru min be jaa kan, jɔn lo, ani Yakuba ye mun lo kɛ a ye?
  • Yakuba tun labɛnnin lo ka mun lo kɛ walisa ka Arasɛli sɔrɔ furu la?
  • Arasɛli furulon sera Yakuba fɛ tuma min na, Laban ye mun lo kɛ?
  • Yakuba sɔnna ka mun lo kɛ walisa ka Arasɛli sɔrɔ furu la?

Ɲiningali wɛrɛw

  • Zɛnɛzi 29:1-30 kalan.

    Yakuba ye koow kɛ ni danbe ye cogo di hali k’a to Laban y’a nanbara, ani an be kalan juman sɔrɔ o la? (Zɛnɛzi 25:27; 29:26-28; Mat. 5:37)

    Yakuba ka koo b’a yira cogo di ko kanuya ni jarabi tɛ kelen ye? (Zɛnɛzi 29:18, 20, 30; Dɔnk. 8:6)

    Muso naani jumanw lo nana kɛ Yakuba ka gwamɔgɔw ye ani ka dencɛw wolo a ye? (Zɛnɛzi 29:23, 24, 28, 29)