JAA nunu filɛ. U kelen kelen ye tɔɔrɔ dɔ tagamasiɲɛ ye, Jehova ye minw lase Misira jamana ma. Jaa fɔlɔ kan, an ɲɛɛ be Arɔn la a be Nili baji bugɔra n’a ka bere ye. Jii yɛlɛmana ka kɛ joli ye. Jɛgɛw sara ani baji kasa gwoyara.

Tɔɔrɔw Misira jamana kan

O kɔ, Jehova y’a kɛ tɔrisenjanw bɔra Nili baji la ka yɔrɔ bɛɛ fa: buru dilanyɔrɔw n’u nɔniyɔrɔw, mɔgɔw ka dilanw kan ani yɔrɔ bɛɛ la. Tuma min na tɔrisenjanw sara, Misirakaw y’u cɛ k’u tonton, ani jamana kasa gwoyara kosɔbɛ.

O kɔ, Arɔn ye dugukolo gosi n’a ka bere ye, buguri yɛlɛmana ka kɛ sosow ye mɔgɔw ni bɛgɛnw kan. O kɛra tɔɔrɔ sabanan ye Misira jamana na.

Tɔɔrɔ tɔɔw ye Misirakaw dama lo sɔrɔ, u ma se Israɛldenw ma. Tɔɔrɔ naaninan kɛra limɔgɔbaba caaman ye minw donna Misirakaw bɛɛ ka soow kɔnɔ. Tɔɔrɔ duurunan ye bɛgɛnw lo sɔrɔ. Misirakaw ka misiw n’u ka sagaw n’u ka baa caaman sara.

O kɔ, Musa ni Arɔn ye buguri ta k’a fili sanfɛ. O kɛra sumunin juguw ye mɔgɔw ni bɛgɛnw kan. O tun ye tɔɔrɔ wɔɔrɔnan ye.

O kɔ Musa y’a bolow wuli sanfɛ, ani Jehova ye sanpɛrɛn ni sanbɛrɛ bila ka jigi. O sanbɛrɛ ɲɔgɔn tun ma deli ka ben Misira jamana kan.

Tɔɔrɔ seeginan kɛra tɔɔnw ye minw jigira caaman caaman jamana kan. O tɔɔn caaman ɲɔgɔn tun ma deli ka ye abada. Sanbɛrɛ tun ma fɛɛn minw halaki, tɔɔnw y’u bɛɛ ɲimi.

Tɔɔrɔ kɔnɔntɔnnan kɛra dibiba ye. Tile saba kuru bɛɛ la, dibiba ye jamana bɛɛ datugu, nka yeelen tun be Israɛldenw fɛ.

A laban, Ala y’a fɔ a ka mɔgɔw ye ko u ka bakɔrɔnin wala sagaden joli seriseri u ka bonda yiriw kan. O kɔ, Ala ka mɛlɛkɛ ye Misira jamana bɛɛ yaala. A tun mana joli ye bonda min na, a tun tɛ mɔgɔ si faga yen. Nka joli tun tɛ bonda minw kan, Ala ka mɛlɛkɛ ye mɔgɔw ni bɛgɛnw ka deen fɔlɔw faga yen. O kɛra tɔɔrɔ tannan ye.

O tɔɔrɔ tannan kɔ, Farahuna ye sira di Israɛldenw ma u ka taga. Ala ka mɔgɔw labɛnnin tun lo ka taga. O suu yɛrɛ la, u ye tagama daminɛ ka bɔ Misira.

Ɛkizɔdi sapitiri 7-12.



Ɲiningaliw

  • Tɛmɛ jaa nunu fɛ k’a lakali Jehova ye tɔɔrɔ saba fɔlɔ minw lase Misira ma.
  • Faranfasi juman be tɔɔrɔ saba fɔlɔw ni tɔɔrɔ tɔɔw cɛ?
  • Tɔɔrɔ naaninan, duurunan ani wɔɔrɔnan kɛra mun ni mun lo ye?
  • Tɔɔrɔ wolonfilanan, seeginan ani kɔnɔntɔnnan lakali.
  • Sanni tɔɔrɔ tannan ka kɛ, Jehova y’a ɲini Israɛldenw fɛ u ka mun lo kɛ?
  • Tɔɔrɔ tannan kɛra mun lo ye, ani mun lo kɛra o kɔ?

Ɲiningali wɛrɛw

  • Ɛkizɔdi 7:19-8:19 kalan.

    Jehova ye tɔɔrɔ fɔlɔ fila minw kɛ, Misirakaw ka jinamoriw sera k’olu ɲɔgɔn kɛ. Nka, u waajibiyara ka sɔn mun lo ma tɔɔrɔ sabanan kɛnin kɔ? (Ɛkiz. 8:14, 15; Mat. 12:24-28)

    Tɔɔrɔ naaninan y’a yira cogo di ko see be Jehova ye k’a ka mɔgɔw tanga, ani o koo be mun lo kɛ Ala sagokɛlaw la k’u to “tɔɔrɔba” makɔnɔni na? (Ɛkiz. 8:18, 19; Yir. 7:13, 14; 2 Til. Kib. 16:9)

  • Ɛkizɔdi 8:20; 9:3, 6, 10, 11, 14, 16, 23-25 ani 10:13-15, 21-23 kalan.

    Tɔɔrɔ tan nunu ye jɛnkulu fila jumanw faranfasi ka bɔ ɲɔgɔn na, ani o koo b’an lasun k’o jɛnkulu fila jati cogo di bi? (Ɛkiz. 8:6, 14, 15; 9:14)

    Cogo juman na Ɛkizɔdi 9:16 b’an dɛmɛ k’a faamu fɛɛn min kama Jehova ye Sutana to yen fɔɔ ka na se bi ma? (Ɔrɔm. 9:21, 22)

  • Ɛkizɔdi 12:21-32 kalan.

    Cogo juman na Tɛmɛkan seli kɛra kisili sababu ye mɔgɔ caaman fɛ, ani a tun be koo nata juman lo yira? (Ɛkiz. 12:21-23; Zan 1:29; Ɔrɔm. 5:18, 19, 21; 1 Kor. 5:7)