U tun be bɛgɛn minw saraka Alabatosoba kɔnɔ Zeruzalɛmu, sarakalasebagaw tun b’u joli kɛ di?

SAAN o saan Israɛl jamana na, sarakalasebagaw tun be bɛgɛn waa caaman lo saraka Alabatosoba ka sarakabɔlan kan. Saan kɛmɛkulu fɔlɔ la, Yahutuw ka tarikikow sɛbɛbaga dɔ tɔgɔ tun ko Josephus. Ka kɛɲɛ n’ale ka fɔta ye, Tɛmɛnkan seli tuma na, u tun be sagaden 250000 ni kɔ lo saraka. O kama, joli caaman lo tun be bɔn sarakabɔlan kan (Lev. 1:10, 11; Nɔnb. 28:16, 19). O joli bɛɛ tun be kɛ di le?

Erɔdi ye Alabatosoba min lɔ, sɛgɛsɛgɛrikɛlaw ye wɔgɔbiri kɛ ka taga bɔ jiwoyosira dɔ kan yen. Baara kɛra n’o jiwoyosira ye fɔɔ ka taga se Alabatosoba halakituma na saan 70 Krista tile la. Siga t’a la ko bɛgɛn minw tun be saraka, u joli tun be bɔ Alabatosoba kɔnɔ n’o jiwoyosira lo ye.

An ka koo fila lajɛ o minw tun b’a to sarakabɔlan saniyanin be to:

• Woo dɔw tun be sarakabɔlan jukɔrɔ: Yahutuw ka gafe kɔrɔ dɔ b’a fɔ ko woo fila tun be sarakabɔlan faan kelen dɔ la. O gafe sɛbɛra saan kɛmɛkulu sabanan daminɛ fan fɛ Krista tile la ani a be Yahutuw ka sariyaw n’u ka landakow ɲɛfɔ. O gafe kɔnɔ, a fɔra ko bɛgɛnw joli ani sarakabɔlan sanangoji bɛɛ tun be tɛmɛ o woow fɛ ka jigi jiwoyosira fɛ ani ka taga bɔn Sedirɔn kɔkɛnɛ na. Yahutuw ka tariki gafe dɔ sɛbɛra a ma mɛɛn ten ani sɛgɛsɛgɛrikɛlaw kumana jiwoyosira min koo la, a kofɔra o cogo kelen na o gafe kɔnɔ. Sɛgɛsɛgɛrikɛlaw ye min ye u ka sɛgɛsɛgɛri tuma na, o y’a to u sɔnna a ma ko n’a sɔrɔ bɛgɛnw joli tun be tɛmɛ o woow lo fɛ ka woyo ka bɔ Alabatosoba kɔnɔ.

• U tun be jii caaman sɔrɔ: Sarakalasebagaw mako tun be jii caaman na ka se ka sarakabɔlan jukɔrɔyɔrɔ ani jiwoyosira sanango walisa u saniyanin ka to. U mako tun be jii min na, u tun b’o sɔrɔ tuma o tuma Zeruzalɛmu dugu kɔnɔ. Jii tun be tɛmɛ jibolisiraw ani fɛɛrɛ wɛrɛw fɛ ka na Alabatosoba kɔnɔ. Sɛgɛsɛgɛrikɛla Joseph Patrich y’a fɔ ko labɛn ɲuman min tun kɛra walisa ka na ni jii saniyanin ye Alabatosoba kɔnɔ ani ka bɔ ni jinɔgɔ ye, o ɲɔgɔn tun tɛ yen o wagati la.