Tuma juman na le jamanaw ɲɛmɔgɔw bena a fɔ ko “hɛɛrɛ be yen, an latanganin lo”?

Kalanbagaw ka ɲiningali dɔ be sɔrɔ saan 2025, novanburukalo ka Kɔrɔsili Sangaso kɔnɔ. A tun fɔra yen ko yanni dɔɔni, Jehova bena a ka miiriya don jamanaw ɲɛmɔgɔw dusukun na, walisa u k’u ka sebagaya di Nasiyɔn Zini ma. Bibulu kɔnɔ, jamanaw ɲɛmɔgɔw lo weelela ko “gɔɔn tan,” ani Nasiyɔn Zini weelela ko “sogo wulenman” wala ko “sogo jaa.” (Yir. 13:14, 15; 17:3, 16, 17). Ni fangatigiya dira Nasiyɔn Zini ma, ale ni jamanaw ɲɛmɔgɔw bena ngalon diinanw halaki duniɲa kuru bɛɛ kɔnɔ. Tuma juman na le jamanaw ɲɛmɔgɔw bena a fɔ ko “hɛɛrɛ be yen, an latanganin lo?” a U bena o fɔ ka kɔn ngalon diinanw halakili ɲɛ, wala u bena o fɔ u halakinin kɔ le?—1 Tes. 5:3, NW.

An t’a lɔn wagati tigitigi min na jamanaw ɲɛmɔgɔw bena a fɔ ko “hɛɛrɛ be yen, an latanganin lo.” N’an tun be ni kunnafoniw bɛɛ ye o koo la, an mako tun tɛna kɛ a la ka to ɲɛɛ na. Nga Yezu y’a fɔ a kalandenw ye siɲɛ caaman na ko u ka “to ɲɛɛ na.” (Mat. 24:42; 25:13; 26:41). Ciden Pol ye min fɔ 1 Tesalonikaw 5nan na, an k’o lajɛ koɲuman.

Pol y’a sɛbɛ ko: “Tuma min na u bena a fɔ ko ‘hɛɛrɛ be yen, an latanganin lo!’, o tuma na halakili bena cun u kan yɔrɔnin kelen.” (1 Tes. 5:2, 3, NW). An ka gafew tun be Pol ka kumaw ɲɛfɔ ten ko: Jamanaw ɲɛmɔgɔw bena a fɔ ko “hɛɛrɛ be yen, an latanganin lo,” dɔɔni ka kɔn tɔɔrɔba daminɛ ɲɛ. A tun ɲɛfɔra fana ko tɔɔrɔba bena daminɛ ni Babilonɛba halakili ye, o min ye duniɲa kuru bɛɛ ka ngalon diinanw jɛnkulu ye. Ka fara o  kan, a tun yirala ko ngalon diinanw halakili lo bena kɛ tagamasiɲɛ laban ye min bena a yira ko tɔɔrɔba wagati sera.

Nga an ye sɛgɛsɛgɛri kɛ koɲuman o kiraya kuma koo la. O y’a to an y’a ye ko a be se ka faamu cogo wɛrɛ la. N’a sɔrɔ jamanaw ɲɛmɔgɔw bena a fɔ ko “hɛɛrɛ be yen, an latanganin lo,” ngalon diinanw halakinin kɔ. An ka ɲiningali saba jaabili lajɛ minw bena an dɛmɛ k’a faamu fɛɛn min kama an ko ten.

Kɛlɛ minw be kɛra duniɲa kɔnɔ, mun na an be se k’a fɔ ko ngalon diinanw niin b’o la? Bibulu b’a fɔ ko “mɔgɔ minw bɛɛ fagara dugukolo kan, olu bɛɛ joli bɔnnin yera [kakalamuso fɛ, o kɔrɔ Babilonɛba].” (Yir. 17:1, 5; 18:24). Kabi wagatijan, ngalon diinanw be dɛmɛ donna kɛlɛkow la ani tuma caaman na u kɛra sababu ye fariyakow kɛra ani mɔgɔ miliyɔn caaman sara. Sanni ngalon diinanw ka mɔgɔw jija u ka hɛɛrɛ sigi ani u ka banba walisa u latanganin ka to, u be mɔgɔw lasun ka kɛlɛw ni fariyakow kɛ. O la, n’a sɔrɔ jamanaw ɲɛmɔgɔw bena Babilonɛba halaki fɔlɔ ka sɔrɔ k’a fɔ ko “hɛɛrɛ be yen, an latanganin lo.” Nga an tɛ se k’a fɔ ko koow bena kɛ ten le tigitigi.

Ni jamanaw ɲɛmɔgɔw y’a fɔ ko “hɛɛrɛ be yen, an latanganin lo,” mun lo bena kɛ o kɔ? Pol y’a fɔ ko: “O tuma na halakili bena cun u kan yɔrɔnin kelen.” (1 Tes. 5:3, NW). Ni jamanaw ɲɛmɔgɔw y’a fɔ ko “hɛɛrɛ be yen, an latanganin lo,” ka sɔrɔ ka ngalon diinanw halaki, o kɔrɔ ko wagati dɔ ka ɲi ka tɛmɛ yanni olu yɛrɛ ka halaki. Nga komi Pol y’a fɔ ko halakili bena cun u kan yɔrɔnin kelen, n’a sɔrɔ jamanaw ɲɛmɔgɔw bena a fɔ ko “hɛɛrɛ be yen, an latanganin lo,” ngalon diinanw halakinin kɔ le.

Jehova sagokɛlaw bena koow ta cogo di? Pol y’a fɔ ko: “N balimaw, aw te dibilamɔgɔw ye, n’o loon be na bali aw la i n’a fɔ soon.” (1 Tes. 5:4). Miiri k’a filɛ: Ni jamanaw ɲɛmɔgɔw y’a fɔ ko “hɛɛrɛ be yen, an latanganin lo,” ngalon diinanw halakinin kɔ, o la, Jehova sagokɛlaw bena a lɔn ko jamanaw ɲɛmɔgɔw halakituma sera. Nga o halakili bena bari jamanaw ɲɛmɔgɔw la i n’a fɔ soon.

An lanin be min na o ye ko yanni dɔɔni, jamanaw ɲɛmɔgɔw ani Nasiyɔn Zini bena ngalon diinanw halaki. O lo bena kɛ tɔɔrɔba daminɛ ye. An b’a lɔn fana ko wagati dɔ la, jamanaw ɲɛmɔgɔw bena a fɔ ko “hɛɛrɛ be yen, an latanganin lo.” Nga u bena o fɔ wagati juman le? An y’a ye ko n’a sɔrɔ u bena o fɔ ka kɔn ngalon diinanw halakili ɲɛ wala u halakinin kɔ. An ka ɲi ka kɔnɔni kɛ walisa k’a lɔn min bena kɛ. Tuma caaman na an be Bibulu ka kiraya kumaw faamu bɛrɛbɛrɛ n’u be dafara wala u dafanin kɔ.—Zan 12:16 lajɛ.

Tuma min na jamanaw ɲɛmɔgɔw bena a fɔ ko “hɛɛrɛ be yen, an latanganin lo,” o lo kɔrɔtanin tɛ kosɔbɛ an fɛ. Min kɔrɔtanin lo kosɔbɛ, o ye ka to kantigiya la. O la, an “ka to ɲana tuma bɛɛ” walisa an labɛnnin ka to o kiraya kuma mana dafa tuma o tuma.—1 Tes. 5:6.