1. a) Nafa minw b’a la ka batize, u dɔw ye jumanw ye? b) An bena mun lo ye barokun nin na?

 YALA i y’i yɛrɛkun di Jehova ma ani ka batize wa? N’o lo, o ye koo ɲuman yɛrɛ lo ye! O b’a yira ko i ye Ala deli ko a k’i ka jurumuw yafa ani k’a to i ka kɛ a sagokɛla dɔ ye (1 Piyɛri 3:21). O la, minw ma batize fɔlɔ, i ye ɲɛyirali ɲuman ye u fɛ. Nga hali n’i ma batize fɔlɔ, siga t’a la ko i be Jehova kanu ani i b’a fɛ k’a sago kɛ. I b’a lɔn fana ko n’i b’a fɛ Jehova ka yafa i ma ani n’i b’a fɛ ka kɛ a teri ye, a kɔrɔtanin lo kosɔbɛ i ka batize (Kɛw. 2:38-40). Nga n’a sɔrɔ o bɛɛ n’a ta, i bele be sigasigara ka batize. N’o lo, mun lo be se k’i dɛmɛ? Barokun nin na, an bena a ye 1) fɛɛn min kama dɔw be sigasiga ka batize, 2) fɛɛn min kama a kɔrɔtanin lo an k’a to an hakili la ko duniɲa nin laban surunyana ani 3) nafa minw b’a la ka yɛlɛmaniw kɛ walisa ka batize, ani an kana o koo bila ka suma.

MUN NA DƆW BE SIGASIGA KA BATIZE?

2. Mun na dɔw be sigasiga ka batize?

² Dɔw be sigasiga ka batize siranya kosɔn. Hali n’u b’a fɛ ka Jehova sago kɛ, u be siran ko u tɛna se k’o kɛ abada. N’ele fana be siranna o lo ɲɛ, vɛrise dɔw kalan minw bena i dɛmɛ k’a faamu ko Jehova t’a ɲini i fɛ i ka koow kɛ cogo dafanin na ani ko n’i b’i seko bɛɛ kɛra a ye, o ka di a ye (Zab. 103:13,  14; Kɔlɔs. 3:23). N’i be siranna fana ko u bena i kɛlɛ n’i batizera, Jehova deli a k’i dɛmɛ i ka kɛ ni Zaburu sɛbɛbaga dusukunnakow ɲɔgɔn ye. A ko: “Masaba be ni ne ye, ne tena siran foyi ɲa. Adamadenw be se ka mun kɛ ne la?”—Zab. 118:6.

3. Koo wɛrɛ juman lo be mɔgɔ dɔw bali ka batize? (jaa lajɛ fana).

³ Dɔw be Jehova kanu, nga u b’u ka batɛmu koo bila ka suma sabu u b’a miiri ko u tɛ koo caaman lɔn Bibulu ani Jehova koo la. Nga yala an mako b’a la ka koo bɛɛ lɔn Bibulu koo la ka sɔrɔ ka batize wa? Ayi! An ka misali dɔ lajɛ Bibulu kɔnɔ. U tun ye ciden Pol ni Silasi minɛ k’u don kaso la. Loon dɔ sufɛ, dugukolo yɛrɛyɛrɛla ani kasobon daaw yɛlɛla. O kɛra sababu ye Pol ni Silasi ye kasobon kɔrɔsibaga n’a somɔgɔw waaju. Siga t’a la ko o cɛɛ n’a somɔgɔw y’a faamu ko kabako dɔ lo kɛra. Ka fara o kan, u ye koo kɔrɔtanin dɔw faamu Jehova ni Yezu koo la o loon sufɛ. O kama, ale n’a somɔgɔw bɛɛ sinna ka batize (Kɛw. 16:25-33). O b’a yira ko n’i be Jehova lɔn, n’i b’a kanu n’i dusu bɛɛ ye, n’i be Bibulu ka kalan jɔnjɔnw faamu, n’i nimisara i ka jurumuw na ani n’i cɛsirinin lo ka Jehova ka sariyaw labato, o kɔrɔ ko i labɛnnin lo batɛmu kama.—Mariki 12:30.

4. Koo wɛrɛ juman lo b’a to dɔw be sigasiga ka batize? (jaa lajɛ fana).

⁴ Tiɲɛn lo ko koo jugu tɛ ka miiri ka ɲɛ ka sɔrɔ ka desizɔnw ta (Luka 14:27-30). Nga minw b’a fɛ ka yɛlɛmaniw kɛ walisa ka batize, u dɔw be wagatijan ta ka jatiminɛ kɛ sabu u b’a miiri ko a ka gwɛlɛ kojugu k’o yɛlɛmaniw kɛ. Misali la, dɔw ka ɲi ka kari fɛɛn minw kɔ walisa ka Ala sago kɛ, u be jɔrɔ o lo la. Balimamuso Candace fana tun be jɔrɔla o lo la. A denmisɛn tuma na, u y’a dɛmɛ k’a faamu a ka ɲi ka min kɛ walisa k’a koo diya Jehova ye. Nga u y’a kalan min na, a tun t’o sira tagama. Kɔfɛ, tuma min na a kɔrɔbayara, a ye bibulukalan daminɛ kokura. A ko: “N’ tun b’a lɔn n’ ka ɲi ka min kɛ walisa ka Jehova dusu diya. Nga fɛɛn dɔ tun be n’ balila k’o kɛ. N’ tun be ɲɛnamaya kɛra cogo min na, o tun ka di n’ ye, hali k’a sɔrɔ n’ tun b’a lɔn k’o man di Jehova ye. N’ tun b’a lɔn ko a bena gwɛlɛya n’ ma ka n’ ka ɲɛnamaya kɛcogo yɛlɛma.” Dɔ wɛrɛw be jɔrɔla ko n’u batizera, u tɛna se ka Jehova ka sariyaw labato. Misali la, u be siranna ko u batizenin kɔ, n’a sɔrɔ u bena jurumuba dɔ kɛ  ani u bena u bɔ kafo kɔnɔ o kosɔn. N’o miiriya ɲɔgɔn lo b’a to ele fana be sigasigara ka batize, i be se ka mun lo kɛ?

5. N’i be sigasigara ka batize, i ka ɲi ka miiri mun lo la? (Matiyo 13:44-46).

⁵ N’an b’a fɛ ka fɛɛn dɔ san, an b’a sɔngɔ filɛ. Nga an tɛ dan o ma. An b’a filɛ fana n’a nafa ka bon. Ni fɛɛn dɔ nafa ka bon, hali n’a sɔngɔ ka gwɛlɛ, an be sin k’a san. O cogo kelen na, n’i b’a fɛ ka batize, hali n’a bena gwɛlɛya i ma ka yɛlɛmaniw kɛ, i man ɲi ka miiri o dɔrɔn lo la. Miiri k’a filɛ fana nafa min b’a la ka jɛnɲɔgɔnya ɲuman kɛ ni Jehova ye. Yezu ye talen fila la walisa k’an dɛmɛ k’o faamu (Matiyo 13:44-46 kalan). O talen kelen kelen bɛɛ la, cɛɛ dɔ ye fɛɛn nafamanba dɔ ye. O kama, a sinna k’a bololafɛnw bɛɛ feere walisa k’o san. O cogo kelen na, i ye Masaya kibaro diiman mɛn minkɛ, i ye fɛɛn nafamanba dɔ lo sɔrɔ. Nga n’i be sigasigara ka yɛlɛmaniw kɛ walisa ka batize, miiri koɲuman o talen kumaw na. I be se k’i yɛrɛ ɲininga ko: “Yala n’ lanin b’a la ko Masaya kibaro diiman nafa ka bon kosɔbɛ wa? N’ be teriya min kɛra ni Jehova ye, n’ be ni jigiya min ye ka ɲɛnamaya kɛ fɔɔ abada ani n’ be jɛnɲɔgɔnya ɲuman min kɛra ni n’ balimaw ye, yala n’ b’o jati fɛɛn nafamanba ye wa?” I ka jaabiliw bena i dɛmɛ k’a lɔn i ka ɲi ka min kɛ walisa ka batize.

6. An ye min faamu an ka bibulukalan na, an ka ɲi ka mun lo kɛ walisa ka se k’o sira tagama?

⁶ Yezu ka talen dɔ la, a y’a ɲɛfɔ ko mɔgɔ dɔw bena sɔn ka kibaro diiman lamɛn. A ko u ye min mɛn, u dɔw tɛna o sira tagama, nga dɔw bena o “minɛ ni dusuɲuman ye” ani k’o sira tagama (Luka 8:5-15). I ye min faamu i ka bibulukalan na, n’i be jɔrɔla sabu a nege t’i la k’o sira tagama, kana i fari faga. Jehova be se k’a sago kɛli nege don i la. O la, a deli a k’i dɛmɛ walisa i be min kalanna, o ka diya i ye ani i k’o sira tagama.—Ezek. 18:31; 36:26.

7-8. Mun na kanbelew ni sunguru dɔw tɛ sera ka ɲɛtaga kɛ walisa ka batize? (jaa lajɛ fana).

⁷ Kanbelew ni sunguru dɔw be Jehova kanu, nga u tɛ yɛlɛmaniw kɛ walisa ka batize sabu mɔgɔ dɔw b’u lasun ka koow kɛ cogo wɛrɛ la. Misali la, Jehova be koo minw jati koo jugu ye, kalanfa dɔw b’a fɔ u ye lakɔli la ko o tɛ basi ye. Nga n’u tugura o ladili kɔ, o be se ka bɔnɛba lase u ma (Zab. 1:1, 2; Talenw 7:1-5). I be se k’i yɛrɛ tanga o farati ma n’i b’i be tugu Zaburu sɛbɛbaga ka ɲɛyirali kɔ. A y’a fɔ Jehova ye ko: “Ne be koo lɔn ka tɛmɛ n kalanfaw kan, bari ne be miiri i ka kuma na kosɔbɛ.”—Zab. 119:99.

⁸ Faan wɛrɛ fɛ, bangebaga minw ye Jehova Seerew ye, u dɔw b’u deenw bali ka ɲɛtaga kɛ ani ka batize. Cogo di do? U deenw bena kalan kɛ ka se klasi min na ani u b’a fɛ ka baara min kɛ, tuma dɔw la, o bangebagaw be sinsin o lo kan kosɔbɛ. Nga u t’u dɛmɛ ka laɲinitaw latigɛ u yɛrɛ ye Alako ta fan fɛ. Yala a tun bena diya i ye i bangebagaw ka koo wɛrɛw kɛ k’i dɛmɛ ka ɲɛtaga kɛ walisa ka batize wa? N’o lo, kana siran ka baro kɛ n’u ye o koo la. A lɔn ko hali n’i ye denmisɛn ye, i be se ka kɛ Jehova teri ye.—Talenw 20:11.

9. Mun na dɔw be kɔnɔni kɛ ka sɔrɔ ka batize?

⁹ Dɔw be batɛmu saratiw dafa, nga u be kɔnɔni kɛ sabu u teri wala u somɔgɔ dɔ b’a fɛ u ka kɔnɔni kɛ u be batize loon kelen na. Tiɲɛn lo ko ka batize loon kelen na n’i ka mɔgɔ sɔbɛ dɔ ye, o tɛ koo jugu ye. Nga, yala o ka ɲi k’a to i b’i ka batɛmu koo bila ka suma wa? A to i hakili la ko i ma jɛn ni mɔgɔ si ye k’i yɛrɛkun di Jehova ma. O la, i man ɲi k’a fɔ ko i be mɔgɔ dɔ lo kɔnɔna ka sɔrɔ ka batize.—Ɔrɔm. 14:12.

 A TO I HAKILI LA KO LABAN LOON SURUNYANA

10. Kuun wɛrɛ juman lo kosɔn mɔgɔ dɔw tɛ ɲɛtaga kɛra walisa ka batize?

¹⁰ An ye kuun dɔw lajɛ, minw kosɔn mɔgɔ dɔw tɛ ɲɛtaga kɛra walisa ka batize. Ka fara o kan, mɔgɔ dɔw tɛ ɲɛtaga kɛra sabu u b’a miiri ko wagati caaman bele b’u fɛ yanni laban ka se. Nga, o miiriya bɛnnin tɛ sabu Yezu y’a ka kalandenw lasɔmi ko: “Aw . . . labɛnnin ka kan ka to, bari aw te miiri waati min koo la, o waati la, Mɔgɔ Dencɛ bena na.”—Luka 12:40.

11. Ni dɔ tora ka fara an ka lɔnniya kan Jehova koo la, an bena mun lo kɛ ani mun na? (Zaburuw 119:60).

¹¹ Kanuya lo ka ɲi k’a to an b’an yɛrɛkun di Jehova ma. Ni dɔ tora ka fara an ka lɔnniya kan Jehova koo la, an bena a kanu kosɔbɛ ani a ka sariyaw koo bena diya an ye. O la, an bena sin k’u sira tagama (Zaburuw 119:60 kalan). Yezu ka kalanden Zaki y’a ɲɛfɔ kuun wɛrɛ min kosɔn a kɔrɔtanin lo an ka sin ka Jehova ka sariyaw labato. A y’a ɲɛfɔ ko an si t’a lɔn min bena kɛ sini. N’a sɔrɔ an yɛrɛ tɛna kɛ sii la sini ka se ka ‘koo ɲuman’ kɛ. O la, Jehova b’a fɛ an ka min kɛ, sisan yɛrɛ le an ka ɲi k’o kɛ.—Zaki 4:13-17.

12. Yezu ye talen min la ɛrɛzɛnforo koo la, an be kalan juman lo sɔrɔ o la?

¹² An ka Yezu ka talen dɔ lajɛ a ye min la ɛrɛzɛnforo koo la. O talen na, a y’a ɲɛfɔ ko dɔw ye baara kɛ lɛri kelen dɔrɔn, nga u ye sara kelen lo sɔrɔ ni tɔɔw ye minw ye baara kɛ tile kuru bɛɛ la. Minw ye baara kɛ lɛri kelen dɔrɔn, mun na u ma baara daminɛ joona? U y’a fɔ ko: “Mɔgɔ si m’an ta baara la.” O baarakɛlaw tun tɛ salabagatɔw ye. A tun bena diya u ye ka baara kɛ tile kuru bɛɛ la, nga mɔgɔ si m’u ta baara la le. O la, tuma min na ɛrɛzɛnforo tigi ko u ka taga baara kɛ a ka foro la, u sinna ka taga (Mat. 20:1-16). An be kalan juman lo sɔrɔ o la? Bi fana, Yezu ko an ka kɛ ale ka kalandenw ye ani k’an niin don Masaya waajuli baara la. O la, an ka ɲi ka sin ka sɔn o welekan ma.

13. An be kalan juman lo sɔrɔ Lɔti muso ka koo la?

¹³ Dɔw b’a fɔ u kɔnɔ ko u bena kɔnɔni kɛ dɔɔni dɔrɔn ka kɔn laban ɲɛ ka sɔrɔ ka yɛlɛmaniw kɛ. Nga u tɛ min kala ma, o ye ko ka se ka yɛlɛmaniw kɛ o wagati la, o tɛna kɛ kɔlɔkɔlɔko ye. Yezu tun b’o kala ma. O kama, a y’a ka kalandenw lasɔmi ko: “Koo min kɛra Lɔti ka muso la, aw k’aw hakili jigi o la.” (Luka 17:31-35). Lɔti muso tun  b’a lɔn ko Jehova bena Sodɔmu ni Gɔmɔri duguw halaki yanni dɔɔni dɔrɔn. Nga, a tun t’a fɛ ka taga k’a bololafɛnw to yen (Zɛnɛzi 19:23-26). A ka koo b’a dɛmɛ k’a faamu fana ko Jehova ye wagati min to mɔgɔw ye walisa u ka yɛlɛmaniw kɛ janko k’u koo diya a ye, o tɛna mɛɛn fɔɔ abada. Ni Jehova ka wagati sera, mɔgɔw tɛna sababu sɔrɔ tugun ka yɛlɛmaniw kɛ.—Luka 13:24, 25.

14. Bibulu ka kiraya kuma minw ɲɛsinna laban loonw ma, i mana a ye k’u be dafara, o ka ɲi k’a to i be mun lo kɛ?

¹⁴ Koo minw be kɛra duniɲa kɔnɔ bi, u b’a yira ka gwɛ ko Bibulu kɔnna ka min fɔ laban loonw koo la, o be dafara. N’a sɔrɔ o koo dɔw tɛ kɛra i ka jamana na. Nga i mana a ye o koow be kɛra duniɲa yɔrɔ caaman na, o ka ɲi k’a to i b’a ɲini ka yɛlɛmaniw kɛ walisa ka batize, ani i kana o koo bila ka suma. An k’a filɛ ciden Piyɛri ye min fɔ kerecɛn fɔlɔw ye. A ko u “labɛnnin ka to” sabu “fɛɛnw bɛɛ banwaati surunyana.” (1 Piyɛri 4:7). A tun kaan be Zeruzalɛmu n’a ka Alabatosoba halaki tuma lo ma. Piyɛri y’a ka lɛtɛrɛ ci kerecɛn minw ma, u yɔrɔ tun ka jan ni Zeruzalɛmu ye. O la, u tun tɛna kɛ Zeruzalɛmu a halaki tuma na (1 Piyɛri 1:1). Nga u tun mana a ye k’o kiraya kuma be dafara, u tun bena la a la kosɔbɛ ko Jehova ka kiraya kuma tɔɔw bɛɛ bena dafa. O cogo kelen na, kiraya kuma minw ɲɛsinna laban wagati ma, i mana a ye k’u be dafara, o bena a to i b’a ɲini ka saratiw dafa walisa ka batize.

15. An labɛnnin be se ka to cogo di Jehova ka loon kama? (2 Piyɛri 3:10-13).

¹⁵ Piyɛri ka bataki filanan na, a y’a ɲɛfɔ an ka ɲi ka min kɛ walisa an labɛnnin ka to Jehova ka loon kama. Piyɛri y’a ka bataki sɛbɛ tuma min na, Jehova ka loon bele tun ka jan. O bɛɛ n’a ta, a ye saan kɛmɛkulu fɔlɔ kerecɛnw jija ko u k’o loon to u hakili la (2 Piyɛri 3:10-13 kalan). An be Jehova ka loon to an hakili la n’an tɛ ɲinɛ ko o loon bena na yanni dɔɔni. Ka fara o kan, an b’a yira ko an labɛnnin lo o loon kama n’an be “siran Ala ɲa” ani k’an “taamacogo . . . ɲa.” O la, n’i b’i jija ka kɛ ni Ala ɲɛsiran ye ani k’i tagamacogo ɲɛ, o bena Jehova dusu diya  kosɔbɛ. N’i y’i yɛrɛkun di a ma ani ka batize, o yɛrɛ lo bena a dusu diya ka tɛmɛ.

NAFA MINW B’A LA KA BATIZE SISAN

16. Tuma juman lo ye wagati bɛnnin ye ka ɲɛtaga kɛ walisa ka batize? (2 Korɛntikaw 6:1, 2; jaaw lajɛ fana).

¹⁶ Sisan yɛrɛ lo ye wagati bɛnnin ye ka ɲɛtaga kɛ walisa ka batize (2 Korɛntikaw 6:1, 2 kalan). Etiyopikacɛ dɔ tun y’o lo faamu. Loon dɔ, Filipu y’a kunbɛn sira kan ani ka kibaro diiman fɔ a ye. Tuma min na a ye koo dɔw faamu ani a ye jiyɔrɔ dɔ ye a tun be se ka batize yɔrɔ min na, a m’a fɔ a kɔnɔ ko: “N’ b’a fɛ ka koo caaman faamu fɔlɔ ka sɔrɔ ka batize. N’a sɔrɔ an bena jii sɔrɔ yɔrɔ wɛrɛ la sira kan.” Nga a y’a fɔ Filipu ye ko: “Mun le bɛ ne bari ka batize?” (Kɛw. 8:26, 27, 35-39, Biblu Ala ta Kuma). O ye ɲɛyirali ɲuman yɛrɛ lo ye an fɛ! Etiyopikacɛ batizenin kɔ, a y’a ka “sira ta ka taga, a ninsɔndiyanin.”

17. An be se ka la mun lo la?

¹⁷ N’i be sigasigara ka batize, la a la ko Jehova b’a fɛ k’i dɛmɛ i ka kɛ a teri sɔbɛ ye (Ɔrɔm. 2:4). N’i be siranna, n’i b’a miiri ko a ka gwɛlɛ kojugu ka yɛlɛmaniw kɛ wala ni mɔgɔ wɛrɛw t’i jijara ka yɛlɛmaniw kɛ walisa ka batize, la a la ko Jehova be se k’i dɛmɛ. N’i batizera, i ninsɔn bena diya kosɔbɛ k’a ye ko i be min kɛra, o ka di Jehova ye. Ka fara o ka, i karila fɛɛn minw kɔ, i tɛna u jati tugun (Filip. 3:8, 13). O la, mɔgɔ minw y’u yɛrɛkun di Jehova ma ani ka batize, Jehova y’a daa di ko a bena koo minw kɛ u ye, i ninsɔndiyanin bena o koow makɔnɔ.—Kɛw. 3:19.