Masacɛ jugu dɔ tun be masaya kɛra Israɛl jamana na, min tɔgɔ ko Akabu. A y’a to boli batoli jɛnsɛnna jamana kuru bɛɛ la. A tun ye cɛɛ dɔ sigi a ka soo kun na, min tɔgɔ ko Obadiyawu. Hali k’a sɔrɔ Israɛldenw fanba tun be boliw lo bato, Obadiyawu tun be ‘siran Masaba ɲa kabi a denmisɛntuma.’ (1 Mas. 18:1-13). O la, tuma min na Akabu muso Zezabɛli ye cii di ko u ka Jehova ka kiraw bɛɛ faga, Obadiyawu y’a jaa gwɛlɛya k’o kiraw dɛmɛ. A tun b’a lɔn ko ka kira kelen dɔrɔn dogo, farati tun b’o la. Nga, a ye Jehova ka kira 100 bɛɛ dogo ani a tun be to ka dumuni di u ma jaa tuma na. Ngalon kira minw tun be baara kɛ masacɛ Akabu n’a muso ye, u tun ka ca kosɔbɛ. O la, miiri k’a filɛ a gwɛlɛyara Obadiyawu ma cogo min na ka Jehova ka kiraw dogo ani k’u balo o mɔgɔw bɛɛ ɲina ma!—1 Mas. 18:19.

Tiɲɛn lo ko Obadiyawu tun be siran Akabu ɲɛ, nga, a tun be siran Jehova ɲɛ ka tɛmɛ. O y’a to a y’a jaa gwɛlɛya k’a balimaw dogo, hali n’a tun b’a lɔn ko u tun be se k’a faga o kosɔn. An be kalan juman lo sɔrɔ Obadiyawu fɛ? An ka mara la, n’u ye bali sigi an ka batoli la, an fana be se k’a yira ko an be ni Ala ɲɛsiran ye. O bena a to an b’an jaa gwɛlɛya k’an balimaw dɛmɛ gwɛlɛyaw wagati la.