YALA i ka mɔgɔ kanulen dɔ delila ka kado dɔ di i ma min diyara i ye kosɔbɛ wa? N’o lo, i ye mun lo kɛ n’a ye do? Siga t’a la ko i y’o kado minɛ ka ɲɛ.

O cogo kelen na, Bibulu b’a fɔ ko “deenw ye Masaba ka difɛn ye,” o kɔrɔ, Ala sɔnnin (Zab. 127:3). Kerecɛn minw ye bangebagaw ye, siga t’a la ko u b’u deenw jati Jehova ka nilifɛn nafamanba ye. U b’u seko bɛɛ kɛ k’u deenw dɛmɛ u k’u makoɲɛfɛnw sɔrɔ, u b’u janto u ka kɛnɛyako la ani u b’u jija u ka ninsɔndiya sɔrɔ. Ka fara o kan, u b’u dɛmɛ u ka jɛnɲɔgɔnya ɲuman kɛ ni Jehova ye.

A fɔ man di nga bi bi nin na, bangebaga dɔw t’u deenw jati Ala sɔnnin ye (Ezayi 49:15; 2 Tim. 3:1-3). Faan wɛrɛ fɛ, dɔw b’a fɛ sɔbɛ la k’u janto u deenw na, nga a man nɔgɔ u ma k’o kɛ sabu u deenw ka ca ani u tɛ se k’u janto u bɛɛ la. Mun lo b’a to bangebaga dɔw be deen caaman wolo? Jehova be mun lo ɲini bangebagaw fɛ? Ani u be se k’u deenw lamɔ ka ɲɛ cogo di?

MUN LO B’A TO BANGEBAGA DƆW BE DEEN CAAMAN WOLO?

• Furuɲɔgɔn dɔw somɔgɔw wala mɔgɔ wɛrɛw b’a gwan u kun u ka deen caaman wolo. Jamana dɔw la, deen caaman be mɔgɔ minw fɛ, u b’olu lo jati kosɔbɛ. O kama, furuɲɔgɔn dɔw somɔgɔw wala u sigiɲɔgɔnw b’a gwan u kun u ka deen caaman wolo k’a sɔrɔ u tɛna se k’u ladon.

• Dɔw b’a latigɛ ka deen caaman wolo sabu u be jɔrɔ siniko la. Jamana dɔw la, denɲɛnin caaman be sa dumuni tanya ani bana caaman kosɔn. Ka fara o kan, dɔgɔtɔrɔsow man ca. O kama, bangebaga dɔw b’a latigɛ ka denmisɛn caaman wolo walisa hali ni dɔw sara, dɔw ka to. Dɔw fana b’a latigɛ ka deen caaman wolo walisa n’u kɔrɔla mɔgɔ dɔ ka se k’a janto u la. Furuɲɔgɔn dɔw b’o lo kɛ sanko jamana minw na faamanw tɛ dɛmɛ lase mɔgɔw ma minw kɔrɔla.

• Wolo bɔɲɔgɔnna. Jamana dɔw la, wolo bɔɲɔgɔnna fɛɛrɛw man ca. Faan wɛrɛ fɛ, furuɲɔgɔn dɔw lanin t’o fɛɛrɛw la sabu u be siran ko a bena u bana. Jamana wɛrɛw la, dɔw tɛ se k’o furaw san sabu u sɔngɔ ka ca. a

JEHOVA BE MUN LO ƝINI BANGEBAGAW FƐ?

Jehova b’a fɛ bangebagaw k’u deenw mako wasa. A b’a fɛ u ka banba ka dumuni, faniw ani siyɔrɔ di u deenw bɛɛ ma fɔɔ ka taga u kɔrɔbaya. Nga o kɔrɔ tɛ ko waajibi lo bangebagaw ka kɛ waritigiw ye. Jehova yɛrɛ ye mɔgɔ minw sugandi walisa u k’a Dencɛ lamɔ, fantanw tun lo. Nga, u ye baaraba kɛ walisa k’u ka denbaya mako wasa. Jehova b’a fɛ fana bangebagaw k’u deenw kolo ani k’u dɛmɛ u ka lɔnniya sɔrɔ. O lo kama  bangebaga minw ye kerecɛnw ye, olu t’u deenw don ɛntɛrna na. Nga u b’u janto walisa u deenw ka to n’u ye fɔɔ ka taga u kɔrɔbaya. U ka ɲi k’u dɛmɛ fana u ka lɔnniya dɔw sɔrɔ wala ka baarakɛcogo dɔw degi minw bena u nafa kɔfɛ. U ka ɲi ka wagati kɛ n’u deen kelen kelen bɛɛ ye fana walisa u k’a ye ko u latanganin lo ani ko u bangebagaw b’u kanu.—Mat. 13:55, 56; Luka 2:24.

Bibulu ka sariyakolo dɔ: “Mɔgɔ o mɔgɔ te janto a ka somɔgɔw la, o tigi banna lanaya la. Mɔgɔ min ma la Ala la, ale yɛrɛ ka fisa n’a ye.”—1 Tim. 5:8.

Jehova b’a faamu ko bangebagaw mako be se ka kɛ dɛmɛ na n’u kɔrɔla. O la, denmisɛnw be se k’u bangebagaw bonya cogo minw na, u dɔ ye k’u dɛmɛ u k’u makoɲɛfɛnw sɔrɔ n’u kɔrɔla (Ɛkiz. 20:12; 1 Tim. 5:4). Sanni bangebagaw ka miiri k’a filɛ u deenw bena min kɛ k’u janto u la n’u nana kɔrɔ, Jehova be min fɛ, o ye ko u k’a filɛ olu yɛrɛ be se ka min kɛ walisa k’u janto u deenw na sisan.—2 Kor. 12:14.

Bangebagaw ka ɲi k’u deenw kalan Jehova koo la. Jehova b’a fɛ fana bangebagaw k’u deenw dɛmɛ u k’ale kanu ani k’a bato. O dɛmɛ kɔrɔtanin lo kosɔbɛ a fɛ.—Deter. 6:6, 7.

Bibulu ka sariyakolo dɔ: “Aw k’u kolo k’u ladi, ani k’u kalan ka kɛɲɛ ni Matigi sago ye.”—Efɛz. 6:4.

JEHOVA B’A FƐ K’AW DƐMƐ

A’ ye miiri koɲuman k’a filɛ aw b’a fɛ ka deen hakɛ min sɔrɔ. N’aw be deenw fɛ, a’ ye miiri koɲuman aw ka koow cogoya la fɔlɔ. Misali la, yala aw bena se ka denmisɛn caaman ladon wa? Walisa ka deen caaman kolo, k’u balo ani k’u fɛɛrɛbɔ, bangebagaw mako be wari caaman na. Ka fara o kan, o tɛ ɲɛ jijalibaw kɔ ani o be wagati ta. Siga t’a la ko aw b’a fɛ k’aw janto aw deen kelen kelen bɛɛ la i ko Jehova b’a fɛ cogo min na. O la, a’ ye baro kɛ ɲɔgɔn fɛ k’a filɛ aw b’a fɛ ka deen hakɛ min sɔrɔ. Jehova b’a faamu ko n’a sɔrɔ koo bɛɛ tɛna kɛ i ko aw y’a latigɛ cogo min na (Waaj. 9:11). Nga, aw be jijali minw bɛɛ kɛra walisa ka kɛ bangebaga ɲumanw ye, a bena aw duga o kosɔn.

Bibulu ka sariyakolo dɔw: “Baarakɛbaga ka jatiminɛ be na ni nafolo ye. Kɔrɔtɔkojugu be laban ni dɛsɛ ye.”—Talenw 21:5.

“Aw cɛma ni mɔgɔ dɔ b’a fɛ ka sangaso jamanjan lɔ, a te sigi fɔlɔ k’a lɔsɔngɔ jati k’a filɛ yala n’a ka wari bena se k’o baara laban wa?”—Luka 14:28.

A’ ye Jehova batoli kɛ aw ɲɛnako fɔlɔ ye. Ni denmisɛnw b’aw fɛ ka ban, a’ y’aw jija k’u kelen kelen bɛɛ dɛmɛ u ka Jehova kanu. A’ y’u dɛmɛ u ka mɛnni koɲuman kafo ka lajɛnw na ani a’  y’aw janto ko u be lajɛnw faamu ka ɲɛ. A’ ye banba ka gwa kɔnɔ batoli kɛ lɔgɔkun bɛɛ ani a’ y’aw deenw degi waajuli kɛcogo la. Aw kana o koow kalifa aw deen kɔrɔbaw wala mɔgɔ wɛrɛw ma sabu o ye aw yɛrɛ ka kunkanbaara lo ye. K’aw deenw dɛmɛ u ka Jehova kanu, o be wagati ta ani o tɛ jijalibaw kɔ. Nga aw ninsɔn bena diya kosɔbɛ k’a ye ko u be Jehova batora ninsɔndiya la.

Bibulu ka sariyakolo dɔ: “Ni ne y’a mɛn ko n deenw tagamacogo bɛnnin lo ni Ala ka tiɲɛ ye, o le ka di n ye ka tɛmɛ fɛɛn bɛɛ kan.”—3 Zan 4. b

A’ y’aw jigi la Jehova kan. Aw be deenw fɛ wo wala denmisɛnw b’aw fɛ ka ban wo, a’ ye la a la ko Jehova ka sariyaw kɔrɔtanin lo ka tɛmɛ aw ka jamana mɔgɔw ka kokɛcogow kan.

N’aw y’a latigɛ ko aw tɛna deen caaman wolo, a’ ye la a la ko Jehova bena to k’a janto aw la ani k’aw dɛmɛ aw k’aw makoɲɛfɛnw sɔrɔ, hali n’aw kɔrɔla. O la, aw man ɲi k’a ɲini ka deen caaman wolo sabu aw b’a fɛ u k’aw ladon n’aw nana kɔrɔ. Aw kan’a miiri abada ko Jehova bena aw to yen. A y’a daa di ko a bena a janto aw la ani a b’a ka layiduw dafa tuma bɛɛ.—Zozuwe 23:14.

Bibulu ka sariyakolo dɔw: “E jigi la Masaba kan sɔbɛ la. Kan’i bolo la i yɛrɛ ka lɔnniya kan. I ka koo bɛɛ la, miiri a la, a bena i ka sira gwɛya i ye.”—Talenw 3:5, 6.

“Ne tun ye kanbelen ye, n kɔrɔla sisan, nga n ma mɔgɔtilennin filinin ye kɔfɛ, n fana m’a ye n’a kɔmɔgɔ b’a daladumuni daali.”—Zab. 37:25.

“O la, a’ ye to ka Ala ka Masaya n’a ka tilenninya ɲini fɔlɔ. N’aw y’o kɛ, Ala bena o fɛɛn tɔɔw bɛɛ di aw ma.”—Mat. 6:33.

Denmisɛnw ye nilifɛn nafamanba lo ye Jehova ye min di bangebagaw ma. Miiri k’a filɛ a ninsɔn ka di cogo min na n’a y’a ye ko bangebagaw b’u jantora u deenw na i ko a b’a fɛ cogo min na! Kerecɛn bangebagaw b’a jati ko Jehova be min ɲini u fɛ, o lo kɔrɔtanin lo ka tɛmɛ u ka jamana mɔgɔw ka kokɛcogow kan. O kama, u be miiri koɲuman ka sɔrɔ k’a latigɛ u b’a fɛ ka deen hakɛ min sɔrɔ. O cogo la, u b’u janto ko u bena se k’u deen kelen kelen bɛɛ mako wasa, k’u dɛmɛ u ka ninsɔndiya sɔrɔ ani ka Jehova kanu. N’u b’o kɛ, u b’a yira ko u b’u deenw kanu kosɔbɛ ani ko u b’u jati “Masaba ka difɛn ye.”