1. An b’a lɔn cogo di ko batɛmu kɔrɔtanin lo kosɔbɛ?

 MIIRI k’a filɛ an ninsɔn ka di cogo min na ni mɔgɔ dɔ batizera. Kerecɛn fɔlɔw y’o ninsɔndiya ɲɔgɔn lo sɔrɔ tuma min na mɔgɔ caaman batizera saan 33 Pantekɔte loon na (Kɛw. 2:38, 40, 41). O lajɛn na, ciden Piyɛri ye batɛmu kalan dɔ kɛ ani a y’a ɲɛfɔ ko a kɔrɔtanin lo an ka batize. Kɔfɛ, ciden Pol yɛrɛ y’a sɛbɛ ko batɛmu ye Krista ka kalan jɔnjɔn dɔ ye (Eburuw 6:1, 2). O la, an ka ɲi k’a ɲini k’a faamu koɲuman Bibulu be min fɔ batɛmu koo la. Mun na do?

2. Bibulu be min fɔ batɛmu koo la, mun na an ka ɲi k’a ɲini k’o faamu ka ɲɛ?

² Ni boon juu sigira ka ɲɛ, a man teli ka ben. O cogo kelen na, Bibulu be min fɔ batɛmu koo la, n’an b’o faamu ka ɲɛ, o b’a to an be kɛ ni limaniya barikaman ye. An be ɲɛtaga kɛra walisa ka batize wo wala an batizera a mɛɛnna wo, an bɛɛ ka ɲi k’a ɲini k’a faamu koɲuman Bibulu be min fɔ batɛmu koo la. O la, an bena ɲiningali nunu jaabi barokun nin na: Batɛmu kɔrɔ ye mun ye? Mun lo be kɛ batɛmu tuma na? Ani mun na an be batize Faa, Dencɛ ani hakili senu tɔgɔ la?

I KA BATƐMU KƆRƆ YE MIN YE

3. Batɛmu kɔrɔ ko di?

³ N’i batizera, i b’a yira jama na ko Bibulu be min fɔ Jehova ni Yezu koo la, i sɔnna o ma, ko i nimisara i ka jurumuw na ani ko i ye yɛlɛmaniw kɛ walisa ka Jehova sago kɛ. l y’a yira fana ko i lanin b’a la ko Ala be tɛmɛ  Yezu lo fɛ k’an kisi ani i y’a fɔ Jehova ye delili la ko i b’a fɛ k’a sago kɛ n’a ka ɔriganisasiyɔn ye. N’i y’o layidu ta, o kɔrɔ, n’i y’i yɛrɛkun di Jehova ma ani ka batize, i b’a daminɛna le ka tagama ɲɛnamaya banbali sira kan.

4. N’u y’i fari kuturu bɛɛ tunu jii la ani k’i bɔ, o kɔrɔ ko di? (jaa lajɛ fana).

⁴ I ka batɛmu tuma na u b’i fari kuturu bɛɛ tunu jii la ani k’i bɔ. a N’u y’i fari kuturu tunu jii la, a be komi i tun sara ani u y’i suu don. N’u y’i bɔ jii la, a be komi i suu lakununa (Kɔlɔsikaw 2:12 lajɛ). Mun na o ɲɛyirali bɛnnin lo? N’u y’i fari kuturu tunu jii la, o b’a yira ko i y’i ka ɲɛnamaya kɛcogo kɔrɔ dabila. N’u y’i bɔ jii la, i be ɲɛnamaya kɛcogo kura daminɛ, o min ye ka Ala sago kɛ i ɲɛnako fɔlɔ ye.

5. An be jijali minw kɛ ka saratiw dafa walisa ka batize, an be se k’o suma ni mun ye ani mun na?

⁵ A fɔra 1 Piyɛri 3:20-21 (NW) kɔnɔ ko: “[Mɛlɛkɛ juguw] tun ma mɛnni kɛ Ala fɛ tuma min na a tun be muɲuna ka kɔnɔni kɛ Nuhun ka wagati la, kurun dilan tuma na. Mɔgɔ damanin lo kisira jii ma o kurun kɔnɔ, o kɔrɔ, mɔgɔ seegi. O koo ye batɛmu tagamasiɲɛ ye, o min b’aw kisi sisan Yezu Krista ka sukununi barika la. O tɛ farisogo nɔgɔw koli ye. Nga, delili lo walisa Ala ka dusukun ɲuman di aw ma.” Ka kɛɲɛ n’o vɛrisew ye, an be jijali minw kɛ ka batize, an be se k’o suma ni Nuhun ka kurunlɔ baara ye. Nuhun ye baara min kɛ ka kurun lɔ, o tun tɛ kɔlɔkɔlɔko ye. O cogo kelen na, n’i ye bibulukalan daminɛ a ma mɛɛn, a be se ka kɛ i ɲɛɛ na ko i ka ɲi ka jijali minw kɛ ka saratiw dafa ka sɔrɔ ka batize, o fana tɛ kɔlɔkɔlɔko ye. Nga kuun b’a la i k’o jijaliw kɛ wa? Ɔnhɔn kuun b’o la. Mun na an ko ten? An ka miiri  Nuhun koo la. Ala y’a fɔ a ye a tun ka ɲi ka kurun lɔ cogo min na ani a y’o lo kɛ tigitigi. O kɛra sababu ye ale n’a ka denbayamɔgɔw kisira sanjiba tuma na. Nuhun sera ka kurun lɔ sabu a tun limaniyanin lo Jehova la, a ye mɛnni kɛ a fɛ ani Jehova y’a dɛmɛ. I ko Nuhun, Ala be min ɲini i fɛ, i fana be se k’o “bɛɛ kɛ.”—Zɛnɛzi 6:22.

6. Kɔrɔ juman na batɛmu b’an kisi?

⁶ Vɛrise 21nan kɔnɔ ciden Piyɛri ko: “Batɛmu . . . b’aw kisi.” O kɔrɔ tɛ ko n’u y’an fari kuturu bɛɛ tunu jii la, o lo b’a to an be kisi wala an ka jurumuw be yafa. Mun na an ko ten? Sabu Yezu ka kunmabɔsara barika dɔrɔn lo la an ka jurumuw be se ka yafa (1 Zan 1:7). O bɛɛ n’a ta, a kɔrɔtanin lo an ka batize sabu Ala b’o lo ɲini an fɛ. Ka fara o kan, n’an batizera, an be Ala delila le ko a ka ‘dusukun ɲuman di an ma.’ Ani Jehova ninsɔn ka di k’o di an ma. O cogo lo la batɛmu b’an kisi wala a be kɛ sababu ye an be ɲɛnamaya banbali sɔrɔ.

MUN LO BE KƐ BATƐMU TUMA NA?

7. Batɛmu ka ɲi ka kɛ cogo di?

⁷ Bibulu b’an dɛmɛ k’a faamu ko mɔgɔ fari kuturu ka ɲi ka tunu jii la batɛmu tuma na. K’o niin bɔ a la, a tɛ bɛrɛ fɔ an ye batɛmu kɛcogo koo la. Nga a b’an dɛmɛ k’a lɔn koo minw bɛnnin lo. Misali la, Bibulu ka sariyakolow be batɛmu ɲinilaw dɛmɛ k’a lɔn u ka ɲi ka fani sugu minw don ani ka batɛmu filɛbagaw dɛmɛ k’a lɔn u ka ɲi ka koow kɛ cogo min na (1 Kor. 14:40; 1 Tim. 2:9). Bi, diinan mɔgɔkɔrɔw lo ka teli ka mɔgɔw batize. Nga, an man ɲi ka bonya la u kan kojugu (1 Kor. 1:14, 15). Batɛmu be kɛra mɔgɔ minw ɲɛna, u ka ca wo, u man ca wo, o lo kɔrɔtanin tɛ.—Kɛw. 8:36.

8. U be ɲiningali jumanw lo kɛ batɛmu ɲinilaw ye ani mun na? (Kɛwaliw 2:38-42; jaa lajɛ fana).

⁸ Bibulu b’a yira ko walisa ka kisi, an man ɲi ka limaniya an dusu la dɔrɔn. Nga, an ka ɲi k’o ‘bɔ an daa la’ bɛɛ ɲɛɛ na (Ɔrɔm. 10:9, 10; kunnafoni wɛrɛw lajɛ Bible d’étude kɔnɔ kuma nin koo la: “Déclares publiquement”). O la, a bɛnnin lo an k’o kɛ an ka batɛmu loon na sabu o lo bena a to an be kisi. O kama, u be batɛmu ɲinilaw ɲininga koo fila la. A fɔlɔ ye ko: “Yala aw nimisara aw ka jurumuw na, aw ye aw yɛrɛkun di Jehova ma ani aw sɔnna Jehova ka kisili la Yezu Krista barika la wa?” Batɛmu ɲinilaw ye koo minw kɛ walisa k’u yɛrɛ labɛn batɛmu kama, o ɲiningali ɲɛsinna o lo ma. Ciden Piyɛri y’o kumaw ɲɔgɔn lo fɔ Pantekɔte loon na tuma min na a ye jama jija ko u ka nimisa u ka jurumuw na ani ka batize. Ɲiningali filanan ye ko: “Yala aw b’a faamu ko n’aw batizera, o b’a yira ko aw kɛra Jehova Seere dɔ ye ani ko aw ye Jehova ka ɔriganisasiyɔn mɔgɔ dɔ ye sisan wa?” O ɲiningali b’an hakili jigi ko walisa ka koow kɛ ka kɛɲɛ n’an ka yɛrɛkundili ye, Jehova be tɛmɛ a ka ɔriganisasiyɔn fɛ ka cikan minw di an ma, an ka ɲi k’o labato. An ka ɲi fana ka jɛn ka Jehova sago kɛ n’an kerecɛnɲɔgɔnw ye i ko saan kɛmɛkulu fɔlɔ kerecɛnw tun b’a kɛ cogo min na (Kɛwaliw 2:38-42 kalan). Minw b’o ɲiningaliw jaabi ko ɔnhɔn, u b’a yira ko u labɛnnin lo batɛmu kama.

9. An ka ɲi ka mun lo kɛ walisa k’an koo diya Ala ye?

⁹ Yanni i ka tiɲɛn lɔn, i tun be ɲɛnamaya kɛra cogo min na, n’a sɔrɔ i tun t’o jati basi ye ani i tun ma jurumuba si kɛ ka ye. Wala n’a sɔrɔ i bangebagaw ye Jehova Seerew ye ani u y’i dɛmɛ ka Jehova kanu. N’o lo,  yala i mako b’a la ka nimisa i ka jurumuw na ani ka batize walisa k’i koo diya Ala ye wa? Ɔnhɔn. N’an ye lɔnniya sɔrɔ Jehova koo la, an b’a faamu ko an ye jurumutɔw ye kabi an wolotuma ani ko an tun tɛ koo bɛɛ kɛra i ko Jehova b’a fɛ cogo min na (Zab. 51:7). O b’a to an be nimisa an ka jurumuw na, an tun be koo jugu minw kɛra an b’u dabila ani an be Jehova sago kɛ an ɲɛnako fɔlɔ ye. O kɔ le an be se ka batize.—Kɛw. 3:19.

10. N’i tun be diinan wɛrɛ la ani i batizera yen, yala i mako b’a la ka batize tugun walisa ka kɛ Jehova Seere ye wa? A ɲɛfɔ.

¹⁰ N’i tun be diinan wɛrɛ la ani i batizera yen, yala i mako b’a la ka batize tugun walisa ka kɛ Jehova Seere ye wa? Ɔnhɔn. Mun na do? Sabu i tun tɛ ni faamuyali ɲuman ye Jehova Ala ani Yezu koo la. Ka fara o kan, hali n’i tun y’i yɛrɛkun di Ala ma delili la, i tun tɛ ni lɔnniya sɔbɛ ye o wagati la a sagonata koo la. Ciden Pol ye cɛɛ dɔw kunbɛn Efɛzi dugu la minw tun batizera ka ban k’a sɔrɔ u tun tɛ tiɲɛn lɔn Yezu koo la. Tuma min na Pol ye koow ɲɛfɔ u ye, u y’a faamu ko u ka ɲi ka batize kokura b (Kɛw. 19:1-5). Bi fana, mɔgɔ min be ni lɔnniya sɔbɛ ye Jehova n’a sagonata koo la, a be sɔn o tigi ka batɛmu lo la.

“FAA, DENCƐ ANI HAKILI SENU TƆGƆ LA”

11. Ka batize “Faa, Dencɛ ani hakili senu tɔgɔ la” o kɔrɔ ko di? (Matiyo 28:18-20).

¹¹ Minw b’a fɛ ka kɛ Yezu ka kalandenw ye, Yezu ko u ka ɲi ka batize “Faa, Dencɛ ani hakili senu tɔgɔ la.” (Matiyo 28:18-20 kalan). O kɔrɔ ko di? Bibulu kɔnɔ n’u ko “tɔgɔ,” tuma caaman na o ɲɛsinna mɔgɔ tɔgɔ ɲuman wala a tɔgɔ jugu lo ma. O be se ka ɲɛsin fana a tigi lɔyɔrɔ wala a ka kuntigiya ma (Matiyo 10:41 lajɛ; kunnafoni wɛrɛw lajɛ Bible d’étude kɔnɔ kuma nin koo la: “Parce que c’est un prophète”). O la, ka batize Jehova ni Yezu tɔgɔ la, o kɔrɔ ko an sɔnna a ma ko see b’u ye ani joo b’u fɛ k’a fɔ  an ye an ka ɲi ka min kɛ. Ka batize hakili senu tɔgɔ la, o kɔrɔ ko k’a to hakili senu k’an ɲɛminɛ. Sisan an k’a filɛ an be se k’o kɛ cogo tigitigi minw na.

12. An be batize Faa tɔgɔ la cogo di? (Yirali 4:11; jaa lajɛ fana).

¹² An be batize Faa tɔgɔ la, n’an lanin b’a la ko ale lo y’an sankolola Faa ani niin Dibaga ye. An lanin b’a la fana ko ale lo ye Sebagayabɛɛtigi Ala ye ani fɛɛn bɛɛ Danbaga ye (Yirali 4:11 kalan). Ka fara o kan, an lanin b’a la ko a b’an ka deliliw lamɛn. An b’a tɔgɔ fɔ fana n’an be delili kɛra ani n’an b’a kofɔra tɔɔw ye. An b’o kɛ ni bonya ye (Zab. 65:3). Ka batize Faa tɔgɔ la, o tɛ dan o dɔrɔn ma. Mun na an b’o fɔ? Sabu Piyɛri ye mɔgɔ minw kalan Pantekɔte loon na, olu tun be Jehova tɔgɔ lɔn ka ban. Nga u tun ka ɲi k’a lɔn fana ko Jehova ye kanutigi Ala ye ani ko ale lo be se ka ɲɛnamaya banbali di an ma ani a b’o kɛ Yezu Krista dɔrɔn lo barika la.—Ɔrɔm. 5:8.

13. An be batize Dencɛ tɔgɔ la cogo di? (jaa lajɛ fana).

¹³ An be batize Dencɛ tɔgɔ la, n’an lanin b’a la ko Yezu ye Ala Dencɛ ye. An lanin b’a la fana ko Yezu lo ye “sira” ye ani ko ale kelen dɔrɔn lo sababu la an be se ka jɛnɲɔgɔnya ɲuman kɛ ni Jehova ye (Zan 14:6). Ka fara o kan, an lanin b’a la ko Yezu ka saya sababu lo la an be se ka ɲɛnamaya banbali sɔrɔ. O lo kama, an b’a fɛ k’a ladegi an ka batɛmu loon na ani loon tɔɔw la (1 Zan 2:6). Misali la, i ko Yezu, an t’a to foyi k’an bali ka waajuli kɛ ni kisɛya ye (Luka 4:43). Ka fara o kan, an mana kɔrɔbɔli o kɔrɔbɔli sɔrɔ sabu an be kantigiya kɛra Jehova ye, an labɛnnin lo k’o muɲu (2 Tim. 3:12). An be batize Dencɛ tɔgɔ la fana n’an lanin b’a la ko Yezu lo ye kafo Kuntigi ye. O la, a ye mɔgɔ minw sigi an kun na walisa u k’u janto an na, an b’u ka cikanw labato.—Efɛz. 4:8, 11, 12; 5:23.

14. a) An be batize hakili senu tɔgɔ la cogo di? (jaa lajɛ fana). b) Kerecɛn mɔlenw ka batɛmu wɛrɛw ye jumanw lo ye? (koorilen nin lajɛ: “ Kerecɛn mɔlenw ka batɛmuw”).

¹⁴ An be batize hakili senu tɔgɔ la cogo di?  Bibulu be min fɔ hakili senu koo la, an ka ɲi ka sɔn o ma. Dɔw b’a miiri ko Faa, Dencɛ ani hakili senu ye mɔgɔ kelen lo ye. Nga, an b’a lɔn ko o tɛ tiɲɛn ye. Hakili senu tɛ mɔgɔ ye. Nga, Ala ka fanga lo a be tɛmɛ min fɛ ka baara kɛ. An lanin b’a la ko Jehova tɛmɛna a ka hakili senu fɛ k’a ka kiraw ɲɛminɛ ani ka Bibulu sɛbɛbagaw dɛmɛ u k’a lɔn a b’a fɛ u ka min sɛbɛ tigitigi (2 Piyɛri 1:20, 21). Ka fara o kan, an b’an seko bɛɛ kɛ an kana jurumuba kɛ sabu o be se k’an bali ka hakili senu sɔrɔ. O yɛrɛ be se ka hakili senu bali ka baara kɛ ka ɲɛ kafo kɔnɔ.—Efɛz. 4:30.

15. An ka ɲi k’an cɛsiri ka mun lo kɛ?

¹⁵ N’i batizenin lo, i jija ka to k’i hakili jigi ko batɛmu koo kɔrɔtanin lo kosɔbɛ. c Ka fara o kan, komi i y’i daa di Jehova ma ko i bena kantigiya kɛ a ye, i jija fana k’i ka layidu dafa ani ka koow kɛ ka kɛɲɛ n’i ka batɛmu kɔrɔ ye. Nga n’i ma batize fɔlɔ, mun lo b’i bali k’o kɛ? Barokun nata la, an bena a ye i be se ka min kɛ ka saratiw dafa walisa ka batize.