1-2. Tuma min na an ye tiɲɛn lɔn, n’a sɔrɔ mun lo y’a to an n’an somɔgɔw ka jɛnɲɔgɔnya tiɲɛna?

 LOON dɔ, cɛɛ dɔ tun b’a fɛ ka tugu Yezu kɔ. Nga Yezu y’a fɔ a ye ko: “Matigi Ala hinɛna i la ka koba min kɛ i ye, i ka taga o lakali i ka somɔgɔw ye.” (Mariki 5:19). Yezu y’o fɔ sabu a tun b’a lɔn ko ni mɔgɔ ye kibaro diiman dɔ mɛn, a b’a ɲini k’o fɔ a somɔgɔw ye.

² I siɲɛ fɔlɔ ka kibaro diiman mɛn, i hakili b’a la o ye min kɛ i la wa? N’a sɔrɔ i tun tɛ sera k’o mara i kɔnɔ ninsɔndiya bolo! Nga a be se ka kɛ ko i somɔgɔw dimina i kɔrɔ o kosɔn. A be se ka kɛ fana ko i y’u waaju cogo min na, o y’a to bɛnbaliyako donna aw ni ɲɔgɔn cɛ. N’o lo, i be se ka jɛnɲɔgɔnya ɲuman kɛ n’i somɔgɔw ye cogo di ani o wagati kelen na, ka to kantigiya la Jehova ye?

3. An bena mun lo ye barokun nin na?

³ Barokun nin na, an bena koo naani lajɛ minw bena an dɛmɛ ka to hɛɛrɛ la n’an somɔgɔw ye minw tɛ Jehova batora. A fɔlɔ, an bena a ye ko n’an be hinɛ u la, o be se k’an dɛmɛ k’an mako don u la hali n’u t’a fɛ ka dɔ lɔn Jehova koo la. A filanan, an bena a ye an be se ka min kɛ n’u donna an gasi la. A sabanan, an bena a ye ko n’an be muɲu ani n’an t’an fari faga u kɔrɔ, o be se k’u dɛmɛ ka tiɲɛn lɔn. A naaninan, an  bena a ye fana an be se k’a yira u la cogo min na ko an b’u kanu.

HINƐ I SOMƆGƆW LA

4. Mɔgɔ minw m’u mako don Yezu ka kumaw na, a y’u minɛ cogo di?

⁴ Mɔgɔ minw m’u mako don Yezu ka kumaw na, a m’a fari faga u kɔrɔ joona joona. Yezu y’a yɛrɛ suma ni forotigi dɔ ye min ye jijalibaw kɛ ka torosun dɔ ladon walisa a ka den (Luka 13:6-9). Tuma min na a y’o ntalen kumaw fɔ, a saan saba ɲɔgɔn lo tun ye nin ye a be Yahutuw dɛmɛna u ka limaniya ale la ani ka kɛ a ka kalandenw ye. Mun na a muɲuna ka to k’u dɛmɛ? Yezu tun be hinɛ u la. O lo y’a dɛmɛ ka muɲu u kɔrɔ.

5. Mun lo y’a to Yezu tun be hinɛ a Yahutuɲɔgɔnw na?

⁵ Yezu tun be hinɛ a Yahutuɲɔgɔnw na sabu diinan kuntigiw tun m’u dɛmɛ u ka limaniya Ala la. A y’a ye ko u “be i ko sagaw, dɛndɛbaga te minw na.” (Mariki 6:34). Dɔɔni ka kɔn Yezu saya ɲɛ, a kasira Zeruzalɛmu koo la sabu a tun b’a lɔn k’o dugumɔgɔw fanba bena bɔnɛ u niin na u ka dannabaliya kosɔn (Luka 19:41-44). N’an fana be hinɛ an somɔgɔw la minw tɛ Jehova batora, o bena a to an b’u dɛmɛ.

6. An somɔgɔ minw tɛ Jehova batora, mun na an ka ɲi ka muɲu u kɔrɔ? (Galatikaw 6:9).

⁶ Galatikaw 6:9 kalan. Hali n’an somɔgɔw t’u mako donna an ka lannakow la fɔlɔ, an ka ɲi ka muɲu u kɔrɔ ani ka to k’u minɛ ni ɲumanya ye. An b’a lɔn ko mɔgɔw kalanna koo minw na u ka diinanw na, u lanin b’o la kosɔbɛ. Tiɲɛn na, ka se k’o to yen ani ka la Jehova la, o be wagati ta. N’a sɔrɔ fɔlɔ la, koow tun be ten ele fana fɛ. Jigiya tun t’i la sabu i “tun te Ala lɔn.” (Efɛz. 2:12). Mɔgɔ dɔ muɲuna i kɔrɔ k’i kalan Jehova koo la ani k’i dɛmɛ ka yɛlɛmaniw kɛ. N’ele fana muɲuna i somɔgɔw kɔrɔ, n’a sɔrɔ i bena sababu sɔrɔ k’u dɛmɛ ka Jehova lɔn.

KANA A TO U KA KUMAW N’U KA KƐWALEW K’I FARI FAGA

7. N’a sɔrɔ mun lo y’a to Yezu dɔgɔw ma limaniya a la a daminɛ na?

⁷ Yezu ye kabako minw kɛ Galile mara la, n’a sɔrɔ a dɔgɔw y’o koo mɛn (Luka 4:14, 22-24). O bɛɛ n’a ta, u ma limaniya a la o wagati la (Zan 7:5). Mun na do? Bibulu t’o fɔ an ye. Nga Bibulu be kuma kuun fila koo la minw y’a to Yahutu dɔw banna ka kɛ Yezu ka kalandenw ye. Dɔw tun be siranna k’u sigiɲɔgɔnw bena u kɛlɛ o kosɔn (Zan 9:18-22). Dɔ wɛrɛw tun ye Yezu lɔn kabi a denmisɛnman. O la, a tun ka gwɛlɛ u ma ka sɔn a ma ko ale lo ye Masiya ye (Mariki 6:1-4). A be komi Yezu dɔgɔw fana tun be n’o miiriyaw ɲɔgɔn ye. O cogo kelen na, n’a sɔrɔ i somɔgɔw t’a fɛ k’i lamɛn sabu u be siranna mɔgɔw kana u kɛlɛ, wala u be ni Yezu ka wagati mɔgɔw ka miiriya ɲɔgɔn lo ye i koo la.

8. N’a sɔrɔ mun lo b’a to an somɔgɔw be kuma dɔw fɔ wala ka koo dɔw kɛ minw be digi an na?

⁸ Miiri k’a filɛ fɛɛn min kama u be kuma dɔw fɔ wala ka koo dɔw kɛ minw be digi i la. Yezu somɔgɔ minw tun ko “a kuun wilila,” a be komi a dɔgɔw tun b’u cɛma (Mariki 3:21). N’a sɔrɔ mun lo y’a to u y’o fɔ? Bibulu b’a fɔ ko Yezu tun be to ka waajuli kɛ ani ka banabagatɔw kɛnɛya fɔɔ tuma dɔw la, wagati tun t’a fɛ ka dumuni kɛ (Mariki 3:20). I be taga a sɔrɔ a somɔgɔw y’a miiri k’o koow y’a kuun bɛɛ ta. N’a sɔrɔ an somɔgɔw fana b’a miiri ko an ka diinanko y’an kuun bɛɛ ta. N’o lo, an k’a yira an ka kumaw n’an ka kɛwalew fɛ k’u be min miirila, o tɛ.

9. Mun lo be se k’an somɔgɔw dɛmɛ u k’u ka miiriya yɛlɛma Jehova Seerew koo la? (1 Piyɛri 3:1, 2; jaaw lajɛ fana).

 ⁹ A to i ka kumaw n’i ka kɛwalew k’a yira i ye mɔgɔ sifa min ye. N’an be kuma ani ka koow kɛ ni ɲumanya ye, o be se k’an somɔgɔw ka miiriya yɛlɛma Jehova Seerew koo la (1 Piyɛri 3:1, 2 kalan). Miiri balimamuso dɔ koo la min cɛɛ tɛ Jehova Seere ye. N’a y’a cɛɛ to a kelen ka taga waajuli wala lajɛnw na, a be se ka dimi o kosɔn. N’o balimamuso t’a fɛ o ka kɛ, a be se k’a ka waajuli porogramu yɛlɛma walisa ka wagati caaman kɛ n’a cɛɛ ye. Misali la, n’a cɛɛ be baara dɔ la wala n’a bɔra, a be se ka taga waajuli kɛ o tuma na. Ni muso b’o yɛlɛmaniw ɲɔgɔn kɛ walisa k’a cɛɛ ninsɔn diya, o be se ka kɛ sababu ye cɛman b’a ka miiriya yɛlɛma Jehova Seerew koo la.

10. N’an somɔgɔw ye kumajugu fɔ an ma, an be se ka Yezu ladegi cogo di?

¹⁰ N’i somɔgɔw ye kumajugu fɔ i ma, tuma dɔw la a ka fisa i ka je. Tuma min na Yezu tun be dugukolo kan, mɔgɔ dɔw bagara a ma ko a ye nugubatɔ ni dɔrɔtɔ ye. Nga a ma dimi u kɔrɔ wala k’a ɲini ka joo di a yɛrɛ ma. A y’a to mɔgɔw ka kɔrɔsili kɛ u yɛrɛ ma ani k’a filɛ ni min fɔra ale koo la, o ye tiɲɛn ye (Mat. 11:19). A y’a yira fana ko a tɛ dumuni ni minni kɛ k’a dama tɛmɛ, ani ko a ninsɔn ka di (Zan 2:2, 6-10 lajɛ). O cogo kelen na, n’i somɔgɔw ye kumajugu fɔ i ma, tuma dɔw la a ka fisa i ka je. U be min fɔ i koo la, kana miiri o la kojugu. Nga a yira i ka kɛwalew fɛ ko i tɛ koow kɛ ka dama tɛmɛ ani ko i ninsɔn ka di. N’a sɔrɔ u bena a faamu ko u ye kumajugu minw mɛn i koo la, o tɛ tiɲɛn ye.

MUƝU U KƆRƆ ANI KANA I JIGI TIGƐ U KOO LA

11. Hali k’a sɔrɔ Yezu dɔgɔw tun limaniyanin tɛ a la, a y’u minɛ cogo di?

¹¹ Yezu ye kabako fɔlɔ min kɛ Kanaan dugu la, a dɔgɔw tun be yen (Zan 2:11, 12). O bɛɛ n’a ta, u ma limaniya a la. Nga Bibulu b’a fɔ ko Yezu ma ban u la, a tora ka muɲu u kɔrɔ. Saan saba ɲɔgɔn a ka kabako fɔlɔ kɛnin kɔ, Bibulu b’a yira ko Yezu tun be n’a dɔgɔw ye ani a tun be kumana u fɛ ni ɲumanya ye.—Zan 7:5-8.

12. Mun an man kan k’a miiri ko an somɔgɔw tɛna kɛ Jehova sagokɛlaw ye abada?

¹² Jehova be makari kosɔbɛ cogo min na, n’an b’o to an hakili la, an tɛna a miiri ko an somɔgɔw tɛna kɛ Jehova sagokɛlaw ye abada. Ni ngalon diinanw halakira tɔɔrɔba wagati la, an somɔgɔw hakili be se ka jigi ko an tun kɔnna k’o kofɔ u ye a (Yir. 17:16). N’a sɔrɔ u yɛrɛ bena fara an kan ka Jehova bato.  Nga yanni o cɛ, ni gwɛlɛya b’an somɔgɔw kan, an k’an seko bɛɛ kɛ k’u dɛmɛ. N’u y’a ye ko an b’u kanu sɔbɛ la, n’a sɔrɔ u bena a ɲini ka bibulukalan kɛ.

A YIRA U LA KO U KOO KA DI I YE

13. Hali n’an bolo degunnin lo kosɔbɛ Jehova ka baara la, an ka ɲi k’an janto mun lo la?

¹³ Hali n’an be baara caaman kɛ Jehova ye, an t’a fɛ an somɔgɔw k’a miiri ko an bolo degunnin kojugu fɔɔ an tɛ se ka wagati kɛ n’u ye, wala ko an t’u kanu (Mat. 7:12). An be se k’a yira cogo di ko a b’an janto u la? An ka koo damanin lajɛ an be se ka minw kɛ.

14-15. An somɔgɔ minw tɛ Jehova batora, an be se ka mun lo kɛ k’a yira u la ko an b’u kanu? Misali dɔ fɔ.

¹⁴ To ka kuma n’u ye ani a yira u la ko i b’u kanu. N’an ka teli k’an ka kibaruya di an somɔgɔw ma, an b’a yira u la ko an b’u kanu. Misali la, an be se k’u weele telefɔni na, wala ka mesazi ni foto dɔw ci u ma minw bena diya u ye. N’an b’o koow ɲɔgɔn kɛ, an b’a yira ko an b’u kanu, ani o be se ka koow fisaya an ni ɲɔgɔn cɛ.

¹⁵ Sisan, an ka balimamuso dɔ ka koo lajɛ min tɔgɔ ko Anna. A be Arimeni jamana na. A ye tiɲɛn lɔn tuma min na, a somɔgɔw tun be hamina a kana u bila. Mun na do? Sabu a tun ka di u ye ka kɛ ɲɔgɔn fɛ sanko u ka wololon sanyɛlɛma fɛtiw ani u ka diinan fɛtiw wagati la. U tun be hamina fana ko n’a kɛra Jehova Seere ye, koow bena na gwɛlɛya a ma. O la, Anna ye mun lo kɛ k’u hakili sigi do? A ko: “Ni n’ tagara bɔ n’ somɔgɔw ye, ni n’ be baro kɛra n’u ye, n’ tɛ n’ ka koow dogo u la. Ka fara o kan, tuma dɔw la, n’ be n’ teriw ni n’ somɔgɔw weele n’ ka soo. O y’a to n’ somɔgɔw fanba be n’ teriw lɔn ka ɲɛ, ani u delila ɲɔgɔn na. U caaman y’a fɔ n’ ye k’u y’a kɔrɔsi ko n’ ninsɔn ka di, ani ko u tɛ jɔrɔla n’ koo la tugun.”

16. Yezu y’a mako don a dɔgɔcɛ Zaki la cogo di? (jukɔrɔla kunnafoni fana lajɛ).

¹⁶ I mako don u la. Yezu suu kununin kɔ, a y’a yɛrɛ yira a dɔgɔcɛ Zaki la. O cogo la, a y’a yira a la ko a b’a mako don a la (1 Kor. 15:7). O ɲɔgɔnye ye Zaki dɛmɛ ka la a la ko Yezu lo ye Masiya ye. Siga t’a la ko Zaki ninsɔn diyara kosɔbɛ tuma min na a y’a ye ko Yezu bele b’ale kanu. Kɔfɛ, n’a sɔrɔ Zaki y’a somɔgɔ dɔw dɛmɛ k’a faamu ko Yezu lo ye Masiya ye. b—Kɛw. 1:14.

17. Min fɔra Ɔrɔmukaw 12:15 la, an be se k’o sira tagama cogo di? (jaa lajɛ fana).

¹⁷ Ɔrɔmukaw 12:15 kalan. An somɔgɔ  minw tɛ Jehova batora, n’an b’an mako don u la ninsɔndiya wagati ni gwɛlɛya wagati la, o be se k’u dɛmɛ u k’a ye k’u tun be min miirila an koo la, o tɛ. c Misali la ni dɔ jigira, an be se k’a tigi tando wala ka kado dɔ di a ma walisa k’a yira a la ko an ninsɔn ka di. Ka fara o kan ni banni kɛra, an be se ka kuma dɔw fɔ walisa k’u dusu saalo, ka mesazi ci u ma wala k’u dɛmɛ cogo wɛrɛw la. An k’an jija fana ka to k’u ka kibaruya sɔrɔ, sanko ni gwɛlɛya b’u kan.

18. An be se ka ciden Andere ladegi cogo di?

¹⁸ I kerecɛnɲɔgɔn dɔw yira i somɔgɔw la. Tuma min na Andere y’a faamu ko Yezu lo ye Masiya ye, a bolila ka taga o fɔ a kɔrɔcɛ Piyɛri ye walisa ale fana ka na a ɲɛɛ la a kan (Zan 1:40-42). An be se ka Andere ladegi cogo di? An be se k’an somɔgɔ dɔw weele tuma kelen kelen, u ka na an ka lajɛnw na, wala n’an b’a fɛ k’an teri dɔw weele soo u ka na dumuni kɛ, an be se k’an somɔgɔ dɔw weele u ka na fara an kan. N’an b’o kɛ, n’a sɔrɔ an somɔgɔw bena a ye ko Jehova Seerew ye mɔgɔ ɲumanw ye.

19. Hali n’an somɔgɔw t’an ka lannakow faamu tuma bɛɛ, an be se k’u minɛ cogo di? (1 Piyɛri 3:15, 16).

¹⁹ Vɛrise nunu kalan: 1 Piyɛri 3:15, 16. N’a sɔrɔ tuma bɛɛ tɛ an somɔgɔw ben’a faamu fɛɛn min kama an be ban ka koo dɔw kɛ. Nga, n’an be ɲumanya kɛ u ye ani k’u bonya, u tɛna ɲinɛ o kɔ. Hali n’an tɛ fɛti dɔw ni landako dɔw kɛ, n’an b’an jija ka wagati kɛ n’u ye, o bena diya u ye. Misali la, an be se ka taga bɔ u ye, ka gwa kɛ ka taga a di u ma wala ka kado kɛ u ye wagati wɛrɛw la.

 KANA I FARI FAGA I SOMƆGƆW KOO LA FEWU!

20. Mun na Zaki ka koo b’an jija?

²⁰ Yezu dɔgɔcɛ Zaki ma sɔn ka tugu a kɔ a ka cidenyabaara tuma na. Nga kɔfɛ, a nana kɛ a ka kalanden dɔ ye (Gal. 1:18, 19; 2:9). A ye Yezu ka kalanw faamu, fɔɔ a ye Bibulu yɔrɔ dɔ sɛbɛ min be kuma Yezu ka kalan koo la, a ye min kɛ kulu kan. d

21. Mun na an man kan k’an fari faga an somɔgɔw koo la?

²¹ Hali n’an b’an seko bɛɛ kɛra k’an somɔgɔw minɛ ni ɲumanya ye, n’a sɔrɔ u tɛna u mako don tiɲɛnkalanw na wala k’an minɛ ni ɲumanya ye. O bɛɛ n’a ta, an man ɲi k’an fari faga sabu n’an b’an somɔgɔw minɛ ni ɲumanya ye, an b’a yira o cogo la ko an be makari u la, i ko Jehova n’a Dencɛ Yezu (Luka 6:33, 36). O be se ka kɛ sababu ye u b’u ka miiriya yɛlɛma an koo la loon dɔ. A yɛrɛ bena bari an na k’a ye k’u hakili b’an ka lannako dɔw la, an tun ye minw kofɔ u ye. N’an m’an fari faga, n’a sɔrɔ an somɔgɔ dɔw bena na fara an kan ka Jehova bato. O bena an ninsɔndiya yɛrɛ le!