1. Mun na an be se k’a fɔ ko teri sɔbɛw ye Jehova ka nilifɛn ye?

 TERI sɔbɛw ye Jehova ka nilifɛn ye sabu u be Jehova kanu ani u b’an fana kanu (Zaki 1:17). N’an dusu ka di, u be ninsɔn diya n’an ye. Nga n’an dusu man di, u b’an dusu saalo. N’an mako be ladiliw ye, u b’u kɔnɔ gwɛ ka ladili ɲumanw di an ma. Ka fara o kan, u ye kantigiw ye ani an be se k’an jigi la u kan. O teriw “be mɔgɔ dusu diya” yɛrɛ le!—Talenw 27:9.

2. Mun na a kɔrɔtanin lo furuɲɔgɔnw ka to k’u ka teriya sabati? (Matiyo 19:6).

² A kɔrɔtanin lo cɛɛ n’a muso ka kɛ teri sɔbɛw ye. U ka ɲi k’a to u hakili la ko u ka ɲi ka to ka jijalibaw lo kɛ walisa k’u ka teriya sabati. N’o tɛ, u be se k’a jati k’u b’u kelen na, u dusu be se ka kasi wala u be dimi ɲɔgɔn kɔrɔ yɛrɛ. Nga n’u tora k’u ka teriya sabati, o be se k’a to u b’u magwɛrɛ ɲɔgɔn na kosɔbɛ ka kɛ teri sɔbɛw ye (Matiyo 19:6 kalan). Barokun nin na, an bena a ye furuɲɔgɔnw be se ka to k’u ka jɛnɲɔgɔnya sabati cogo min na. An ka kɔn k’a filɛ kerecɛn minw ma furu, olu be se ka min kɛ walisa ka furuɲɔgɔn ɲuman sugandi min bena kɛ u teri sɔbɛ ye u sii tɔɔ bɛɛ la.

I BE SE KA FURUƝƆGƆN SUGANDI COGO DI MIN BENA KƐ I TERI SƆBƐ YE I SII TƆƆ BƐƐ LA?

3-4. Mun lo bena kerecɛn dɛmɛ a ka furuɲɔgɔn ɲuman sugandi? (Talenw 31:10).

³ Sanni an ka desizɔnba dɔ ta, an ka ɲi ka miiri o desizɔn nɔfɛkow la. An be desizɔn minw ta, u be se ka nɔɔ to an kan  wagatijan kɔnɔ. O kama, a kɔrɔtanin lo an ka miiri koɲuman ka sɔrɔ ka desizɔnba dɔ ta.

⁴ An be desizɔnba minw ta an ka ɲɛnamaya kɔnɔ, u la dɔ ye k’an furuɲɔgɔn sugandi. Mun na do? Sabu o tigi bena kɛ an teri sɔbɛ ye an sii tɔɔ bɛɛ la. Jehova lo ye furu jusigibaga ye. O kama, a kɔrɔtanin lo an ka ladiliw ɲini a fɛ n’an b’a fɛ ka furuɲɔgɔn ɲuman sugandi. A b’a fɛ cɛɛ ka muso ɲuman sɔrɔ ani muso ka cɛɛ ɲuman sɔrɔ. Ka fara o kan, ale lo b’a lɔn min ka fisa an ma tuma bɛɛ (Talenw 31:10 kalan; Ezayi 48:17, 18). Ladili minw be sɔrɔ Bibulu kɔnɔ, u be se ka kerecɛn dɛmɛ ka mɔgɔ dɔ sugandi min bena kɛ furuɲɔgɔn ɲuman ye a fɛ.

5. Mun na a kɔrɔtanin lo an k’an furuɲɔgɔn sugandi Jehova sagokɛla batizeninw cɛma?

⁵ N’i batizera, i be kɛ Jehova teri ye (Zab. 25:14). O kama n’i b’a fɛ ka furu, a ka ɲi i k’i furuɲɔgɔn sugandi Jehova teriw cɛma (1 Kor. 7:39). N’i be koow kɛ o cogo la, i bena a yira ko i be Jehova ka sariyaw labato ani i bena i furuɲɔgɔn jati Jehova ka nilifɛn ye (Talenw 19:14). Mɔgɔ be se ka gwɛlɛya minw sɔrɔ n’a furula mɔgɔ dɔ ma min tɛ Jehova kanu, i bena i yɛrɛ tanga o ma (2 Kor. 6:14). Hali n’i b’a miiri ko a ka gwɛlɛ ka furuɲɔgɔn sɔrɔ Jehova sagokɛlaw cɛma, hakilitigiyako tɛ ka teriya kɛ furu kama ni mɔgɔ dɔ ye min tɛ Jehova bato. Hakilitigiyako tɛ fana k’a miiri ko i be se ka teriya kɛ ni mɔgɔ dɔ ye furu kama sabu i jigi b’a la ko a tigi bena kɛ Jehova Seere ye loon dɔ.

6-7. I ɲɛbɔra mɔgɔ min fɛ, i be se k’i yɛrɛ ɲininga mun lo la o tigi koo la?

⁶ O kɔrɔ tɛ ko balima batizenin bɛɛ bena kɛ furuɲɔgɔn ɲuman ye i fɛ. O la n’i ɲɛbɔra mɔgɔ dɔ fɛ, a ka ɲi i k’i yɛrɛ ɲininga ko: “A b’a somɔgɔw minɛ cogo di? Yala a b’u bonya wa? Jɔnw lo y’a teriw ye? A be bɛnbaliyakow ɲɛnabɔ cogo di? Yala a be ja kelen kan ko fɔɔ koow ka kɛ i ko ale b’a fɛ cogo min na wa? Wala a be sɔn tɔɔw ta ma n’o tɛ Bibulu ka sariyakolo dɔ tiɲɛ wa? A be wariko jati cogo di?”

⁷ I be se k’i yɛrɛ ɲininga fana ko: “N’ ɲɛbɔra mɔgɔ min fɛ, yala a tigi be Jehova kanu kosɔbɛ wa? Yala a b’a jijara ‘ka jogokura ta’ wa? Yala a bena n’ dɛmɛ n’ ka to ka n’ seko bɛɛ kɛ Jehova ka baara la wa? Yala an ka laɲinitaw ye kelen ye Alako ta fan fɛ wa? Yala an bena se ka kɛ teri sɔbɛw ye ani an bena se k’an ka teriya barika bonya ka taga wa?” (Kɔlɔs. 3:9, 10). N’i ye balimamuso ye, i yɛrɛ ɲininga ko: “N’ be teriya kɛra ni balimacɛ min ye furu kama, yala a bena kɛ teri sɔbɛ ye n’ fɛ ani sotigi ɲuman ye wa?” (1 Kor. 11:3). N’i ye balimacɛ ye, i yɛrɛ ɲininga ko: “N’ be teriya kɛra ni balimamuso min ye furu kama, yala a bena sɔn n’ ka kuntigiya ma n’ ka dafabaliyakow bɛɛ n’a ta wa?” Ka se k’o ɲiningaliw jaabili sɔrɔ, o be wagati ta. O la, i be teriya kɛra ni mɔgɔ min ye furu kama, wagati ta k’o tigi lɔn koɲuman.

8-9. N’i be teriya kɛra ni mɔgɔ dɔ ye furu kama, mun lo be se k’i dɛmɛ ka desizɔn ɲuman ta? (jaa lajɛ fana).

⁸ N’i be teriya kɛra ni mɔgɔ dɔ ye furu kama, a ɲini k’o tigi lɔn koɲuman. O la, i bena se ka desizɔn ɲuman ta. A ɲini k’a lɔn fana tɔɔw be min miiri a tigi koo la. I be se k’u ɲininga a be ni jogo minw ye. Misali la, yala a lɔnnin lo ko a majiginin lo, a be tɔɔw minɛ ni ɲumanya ye ani a be koow kɛ ka dama kɛɲɛ wa? Balimamuso Sarah be Guyane mara la ani a cɛɛ tɔgɔ ko  Daniel. A ko: “N’ ye balima dɔw ɲininga Daniel koo la. Misali la, n’ kumana balimacɛ dɔ fɛ min tun be si boon kelen kɔnɔ n’a ye. A piyɔniyeɲɔgɔn tun lo. N’ kumana diinan mɔgɔkɔrɔ dɔ ani balimamuso dɔw fɛ fana minw tun b’a ka kafo kɔnɔ. Ka fara o kan, n’ kumana mɔgɔ dɔw fɛ minw tun y’an fila bɛɛ teriw ye.” I be teriya kɛra ni mɔgɔ min ye furu kama, i be se k’a tigi ɲininga ni koo dɔ be yen i ka ɲi ka min lɔn a koo la. O be se ka kɛ a ka koo tɛmɛnin dɔ ye, wala koo dɔ min be kɛra sisan a ka ɲɛnamaya kɔnɔ. A kɔrɔtanin lo k’o lɔn sabu fɛɛn dɔw be se ka na ni gwɛlɛya ye kɔfɛ aw ka furu kɔnɔ.

⁹ N’a sɔrɔ i be sigasigara n’a tigi bena kɛ furucɛ ɲuman wala furumuso ɲuman ye i fɛ. Wala n’a sɔrɔ balima kolɔnbaga dɔw ye jogo jugu dɔw kɔrɔsi a tigi la ani u y’o fɔ i ye. N’o lo, o koo ta sɔbɛ la. N’i ye koow kɛ o cogo la, o bena i dɛmɛ k’a lɔn n’aw ka ɲi k’aw ka teriya lalɔ wala n’aw ka ɲi ka furu ɲɔgɔn ma. a Sisan, an ka kuma furuɲɔgɔnw koo la.

AW YE WAGATI KƐ ƝƆGƆN FƐ

10. Mun na cɛɛ n’a muso ka ɲi ka to ka wagati kɛ ɲɔgɔn fɛ?

¹⁰ Cɛɛ n’a muso bolo mana degun cogo o cogo, u ka ɲi k’u jija ka to ka wagati kɛ ɲɔgɔn fɛ. O bena u dɛmɛ k’u ka teriya barika bonya furu kɔnɔ. O bena sababu di u ma k’a fɔ ɲɔgɔn ye u tilera cogo min na, k’u dusukunnakow fɔ ɲɔgɔn ye, k’u ka kanuya yira ɲɔgɔn na ani ka wagati diiman kɛ ɲɔgɔn fɛ.

11. Mun lo be se ka furuɲɔgɔnw ka teriya bila farati la?

¹¹ Ni cɛɛ n’a muso ye teri sɔbɛw ye, a ka di u ye ka wagati kɛ ɲɔgɔn fɛ sanni ka to u kelen na. Tiɲɛn lo ko u tɛ se ka kɛ ɲɔgɔn fɛ tuma bɛɛ. Nga hali n’u ka ɲi ka koo dɔw kɛ dan na dan na, u man ɲi k’a to o ka mɛɛn. Misali la, dɔw sɔnna ka taga baara kɛ jamana wɛrɛ la ani o kosɔn, u y’u yɔrɔ janya u ka denbayamɔgɔw la wagatijan kɔnɔ. Hali n’u bena wari caaman sɔrɔ k’u mako wasa, n’u y’u yɔrɔ janya u furuɲɔgɔn na wagatijan kɔnɔ, o be se k’u ka furu bila farati la.

12-13. a) Furuɲɔgɔn dɔw ye mun lo kɛ walisa ka wagati kɛ ɲɔgɔn fɛ? (jaa lajɛ fana). b) I be jɛnɲɔgɔnya min kɛra n’i furuɲɔgɔn ye, i ka ɲi k’o jati cogo di? (koorilen nin lajɛ: “ I furuɲɔgɔn lɔyɔrɔ ye juman ye i ka ɲɛnamaya kɔnɔ?”).

¹² An k’a filɛ furuɲɔgɔn dɔw be min kɛ walisa ka wagati kɛ ɲɔgɔn fɛ tuma o tuma. Balimamuso dɔ tɔgɔ ko Leah ani a be Guwamu guun kan. A ko: “A ka di ne ni n’ cɛɛ ye ka koo caaman kɛ ɲɔgɔn fɛ. Tuma caaman na n’an b’a fɛ ka taga ɲɛnagwɛ dɔ la, an be taga ɲɔgɔn fɛ.” Balimamuso  dɔ tɔgɔ ko Roxanne ani a be Etazini. Ale ko: “An bolo degunnin lo kosɔbɛ. O kosɔn, an ye wagati dɔ kunmabɔ walisa ka kɛ ɲɔgɔn fɛ, i n’a fɔ an be wagati kunmabɔ koo kɔrɔtanin wɛrɛw kama cogo min na.” (Amɔsi 3:3 lajɛ). Balimamuso Katie fana be Etazini jamana na. Ale ko: “Tuma dɔw la, an b’an ka telefɔniw bila yɔrɔjan walisa u kana an bali ka wagati diiman kɛ ɲɔgɔn fɛ.” Balimacɛ Damien be Faransi. Ale y’a fɔ ko: “Koo minw ka di n’ muso ye kosɔbɛ, n’ tora k’u kɛ n’a ye fɔɔ u nana diya ne ye fana. N’ muso fana y’o lo kɛ.”—Mat. 7:12.

¹³ Min yɛrɛ kɔrɔtanin lo kosɔbɛ, o ye ka Alakow kɛ ɲɔgɔn fɛ. Balimamuso Myriam be Faransi. A ko: “N’an wulila sɔgɔma dɔrɔn, an be Bibulu kalan. Koo minw diyara an ye, an b’u tilan ni ɲɔgɔn ye ani an b’a filɛ an be se k’u sira tagama cogo min na. O wagatiw ka di n’ ye kosɔbɛ!” Myriam y’a fɔ fana ko: “N’an be delili kɛ ɲɔgɔn fɛ fana, o ka di n’ ye  yɛrɛ le! O wagati la, n’ be sababu sɔrɔ k’a ye n’ cɛɛ be Jehova kanu kosɔbɛ cogo min na.” An tun kumana balimamuso Katie min koo la, ale ko: “Ka waajuli kɛ ɲɔgɔn fɛ, o yɛrɛ lo ka di an ye ka tɛmɛ. An mana a ye an kelen kelen bɛɛ be Jehova kofɔra mɔgɔ dɔ ye, o b’an magwɛrɛ ɲɔgɔn na kosɔbɛ ka tɛmɛ fɔlɔ kan ani o b’a to an be dɔ lɔn tugun ɲɔgɔn koo la.”—Talenw 27:17.

AW MAGWƐRƐNIN KA TO ƝƆGƆN NA GWƐLƐYAW TUMA NA

14-15. Mun na furuɲɔgɔnw ka ɲi k’u seko bɛɛ kɛ k’u ka gwɛlɛyaw ɲɛnabɔ? Misali dɔ fɔ.

¹⁴ An ye mɔgɔ dafabaliw ye minkɛ, an bena gwɛlɛyaw sɔrɔ an ka furu kɔnɔ. Bibulu yɛrɛ b’a fɔ ko mɔgɔ furuninw “bena tɔɔrɔba sɔrɔ.” (1 Kor. 7:28). Furuɲɔgɔnw ka teli ka gwɛlɛya minw sɔrɔ, o tɔɔrɔba ɲɛsinna o lo ma. N’u y’o gwɛlɛyaw sɔrɔ, mun na u ka ɲi k’u seko bɛɛ kɛ k’o ɲɛnabɔ ɲɔgɔn fɛ?

¹⁵ An ka misali dɔ lajɛ. Miiri boon belebeleba cɛɲumanin dɔ koo la. N’a tiɲɛna, siga t’a la ko a tigi bena a ɲini k’a lalaga. N’a sɔrɔ a bena wariba lo don o la ani o baara bena mɛɛn saan caaman kɔnɔ. O bɛɛ n’a ta, a tɛna a fari faga. Mun na do? Sabu o boon koo ka gwɛlɛ a ma. O cogo kelen na, furu bɛɛ ye fɛɛn nafamanba ye. Nga hali ni furuɲɔgɔnw ka di cogo o cogo, u bena gwɛlɛyaw sɔrɔ. I ko boon tiɲɛni be se ka lalaga cogo min na, ni furuɲɔgɔnw ka jɛnɲɔgɔnya nagasira, u be se k’o sabati kokura. N’a sɔrɔ u ka ɲi ka jijaliba kɛ ani o bena wagati ta. Nga Jehova ninsɔn bena diya k’a ye ko u b’u seko bɛɛ kɛra k’u ka furu sabati ani k’u magwɛrɛ ɲɔgɔn na kosɔbɛ (Mal. 2:16). N’u b’o kɛ, u b’a yira k’u be ɲɔgɔn bonya ani ko u be ɲɔgɔn kanu. Nga o dɔrɔn tɛ. U b’a yira fana ko u be Jehova kanu ani ko u b’a bonya, ale min ye furu jusigibaga ye.

16. Ka kɛɲɛ ni 1 Korɛntikaw 13:4-8a ye, ni gwɛlɛyabaw be furuɲɔgɔnw kan, mun lo be se k’u dɛmɛ? (jaa lajɛ ani koorilen nin fana lajɛ: “ Mun lo be se k’i dɛmɛ ka ele n’i furuɲɔgɔn ka teriya barika bonya?”).

¹⁶ Ni gwɛlɛyaw b’aw kan aw ka furu kɔnɔ, aw kana teliya ka faran ɲɔgɔn na (1 Kor. 7:10, 11). Nga aw kelen kelen bɛɛ be se k’aw yɛrɛ ɲininga ko: “N’ be se ka koo wɛrɛ juman lo kɛ walisa k’an ka teriya barika bonya?” Bibulu be min fɔ kanuya koo la, o sɛgɛsɛgɛ. Miiri k’a filɛ i be se ka min kɛ k’a yira i furuɲɔgɔn na ko i b’a kanu bɛrɛbɛrɛ i ko a fɔra 1 Korɛntikaw 13:4-8a la cogo min na (o vɛrisew kalan). Aw kana a ɲini ka faran ɲɔgɔn na. Nga aw ye fɛɛrɛw ɲini walisa k’aw magwɛrɛ ɲɔgɔn na kokura. Aw kelen kelen  bɛɛ be se ka min kɛ k’aw ka jɛnɲɔgɔnya barika bonya kokura, aw ye miiri o la. A’ ye Jehova deli fana walisa a k’aw dɛmɛ. Aw mako be dɛmɛ min na, aw be se k’o sɔrɔ an ka gafew ani an ka videwow kɔnɔ. Aw be se ka dɛmɛ ɲini diinan mɔgɔkɔrɔw ani kerecɛn kolɔnbaga wɛrɛw fɛ fana. Bibulu be furu suma ni jurukisɛ saba ye minw melekera ɲɔgɔn na. Jehova lo ye jurukisɛ sabanan ye min barika ka bon ani min kɔrɔtanin lo ka tɛmɛ tɔɔw bɛɛ kan. O la ni furuɲɔgɔnw be koow kɛ i ko Jehova b’a fɛ cogo min na, u ka furu bena barika sɔrɔ.—Waaj. 4:12.

17. Minw b’a fɛ ka furu ani minw furula ka ban, u be se ka ninsɔndiya sɔrɔ cogo di?

¹⁷ Jehova sagokɛla minw b’a fɛ ka furu wo, minw furula ka ban wo, a b’a fɛ u bɛɛ ka ninsɔndiya sɔrɔ. O la n’i b’a fɛ ka furu, i furuɲɔgɔn sugandi koɲuman. N’i furula ka ban, to k’i ka jɛnɲɔgɔnya sabati n’i furuɲɔgɔn ye. Ni gwɛlɛyaw b’aw kan aw ka furu kɔnɔ, aw y’aw jija k’u ɲɛnabɔ ani k’aw jigi la Jehova kan. N’aw y’o kɛ, aw “nisɔn [bena] diya” n’aw furuɲɔgɔn kanulen ye.—Waaj. 9:9.