Sanni n’ ka taga ɲɛ, a’ y’a to n’ ka koow lakali kabi a daminɛ yɔrɔ la. N’ wolola kɛlɛba filanan tuma na Kalgari dugu la, Kanada jamana na. A saan 75 ɲɔgɔn ye nin ye, piyɔniye kanbele dɔ y’an ka daa kɔkɔ. A tɔgɔ ko Donald Fraser. N’ bamuso sɔnna ka bibulukalan kɛ n’a ye, ani tiɲɛnkalanw diyara a ye kosɔbɛ. Nga a ka kɛnɛyakow kosɔn, a tun tɛ se ka taga kafo ka lajɛnw na tuma bɛɛ. O bɛɛ n’a ta, a ye ɲɛtaga kɛ ani saan 1950, a batizera. Nga, saan fila yɛrɛ ma dafa a batizenin kɔ, a sara. N’ facɛ tun tɛ Jehova Seere ye o tuma na, nga a sɔnna Jehova Seere dɔ ka forobakalan kɛ n’ bamuso sutara loon na.

Tile damanin n’ bamuso ka sutarali kɔ, balima musokɔrɔba dɔ ye n’ weele ka na kafo ka lajɛn dɔ la. A tɔgɔ ko Alice, ani kerecɛn mɔlen lo. Ne ni ale ye ɲɔgɔn lɔn sabu n’ tun be to ka n’ bamuso bila sira ka taga kafo ka lajɛnw na wikɛniw na, tuma min na a ka kɛnɛyako tun ka fisa dɔɔni. N’ ye sira deli n’ facɛ fɛ. A sɔnna n’ ka taga, nga a ko a bena n’ bila sira nin sen nin dɔrɔn na. O la, balimacɛ min ye forobakalan kɛ n’ bamuso sutara loon na, a bena se k’a fo. O loon sufɛ, n’ facɛ ye min mɛn o lajɛn na, a tun ma deli k’o ɲɔgɔn mɛn ka ye. A tun ye fɔrɔmasɔn sɔrɔ kumacogo koo la jamayɔrɔ la, ani a ye kalan minw mɛn o lajɛn na, o diyara a ye yɛrɛ le! O kama, a y’a latigɛ ka taga o lajɛn na lɔgɔkun o lɔgɔkun, ani dɔɔni dɔɔni, a y’a daminɛ ka taga lajɛn tɔɔw la.

O wagati la, balimacɛ minw y’u tɔgɔ sɛbɛ Ala ka Mara cidenyabaara lakɔli la, o lakɔli kɔrɔsibaga tun be lajɛn daminɛ a kɛtɔ k’olu tɔgɔ weele, ani u tun b’a jaabi ko: “Naamu.” Loon dɔ sufɛ, n’ y’a fɔ ko n’ b’a fɛ u ka ne fana tɔgɔ weele lajɛn nata la. O lakɔli kɔrɔsibaga ye n’ tando ni dusudiya ye, nga a ma n’ ɲininga ni n’ b’a faamu kuun min kama u be mɔgɔ dɔw tɔgɔ weele.

Ne tun m’a lɔn ko n’ ye n’ tɔgɔ di le walisa ka kalan kɛ Ala ka Mara cidenyabaara lakɔli la. Ne tun b’a fɛ le dɔrɔn u ka n’ tɔgɔ weele lajɛn na. Lɔgɔkun min tugura o kɔ, u ye n’ tɔgɔ weele, ani n’ y’a laminɛ ni dusudiya ye ko: “Naamu.” Lajɛn bannin kɔ, balimaw ye n’ tando kosɔbɛ. Lɔgɔkun caaman o kɔ, n’ kumana sɛbɛ min koo la barokun  daminɛ na, balimacɛ dɔ y’o di n’ ma, ani k’a fɔ n’ ye ko n’ ka ɲi ka kalan dɔ kɛ lajɛn na.

N’ tun sirannin lo kosɔbɛ! O wagati la, kalandenw ka kalan tun be mɛɛn miniti wɔɔrɔ ka taga se miniti segi ma. Lakɔlidenw tun tɛ Bibulu kalangwɛ dama kɛ. N’ facɛ ye n’ dɛmɛ n’ y’o kalan labɛn ani a y’a to n’ y’a kɛ k’a filɛ siɲɛ 20 ka sɔrɔ k’o kalan kɛ lajɛn na. O kɔ, lakɔli kɔrɔsibaga ye ladili nafamanw di n’ ma. Saanw tɛmɛtɔ, Jehova tɛmɛna n’ facɛ, balimacɛ ni balimamuso kolɔnbagaw ani a ka ɔriganisasiyɔn fɛ ka fɔrɔmasɔn di n’ ma.

JEHOVA TORA KA FƆRƆMASƆN DI N’ MA

N’ ye Alice min kofɔ barokun daminɛ na, ale ye fɔrɔmasɔn di n’ ma tuma min na n’ y’a daminɛ ka waajuli kɛ. O wagati la, u tun b’an jija an ka vɛrise saba kalan lamɛnnikɛla ye ani ka gafe di a ma. Ni n’ ka tur tun sera, Alice tun be foli kɛ, k’a tɔgɔ fɔ ani ka baro daminɛ. O kɔ, a tun b’a ɲini n’ fɛ n’ ka vɛrise fɔlɔ kalan. O vɛrise kalannin kɔ, n’ tun be taga ɲɛ ni baro ye ka vɛrise filanan ni sabanan kalan, ani ka gafe di lamɛnnikɛla ma. Kɔfɛ, n’ y’a lɔn baro be daminɛ cogo min na ni mɔgɔw ye. Saan 1954 laban na, n’ facɛ batizera. Ale fana y’a daminɛ ka fɔrɔmasɔn di n’ ma waajuli baara la. A ye n’ lamɔ a kelen ani a y’a seko bɛɛ kɛ ka n’ dɛmɛ n’ ye Jehova kanu. Lajɛnw ni waajuli baara tun kɔrɔtanin lo a fɛ kosɔbɛ. O la, n’ tun tɛ n’ yɛrɛ ɲininga n’an bena taga lajɛnw na wala ka waajuli kɛ wikɛniw na. O tun ye delinanko lo ye an fɛ.

N’ ye lakɔli kalan kɛ saan 12 kɔnɔ, ani n’ ye koo caaman faamu minw be n’ dɛmɛna n’ ka ɲɛnamaya kɔnɔ. Misali la, n’ ye koo caaman faamu matematiki ani angilikan sɛbɛcogo koo la. Biro min b’an ka gafew sɛbɛko kun na, n’ be baara kɛra o biro la. O la, n’ ye angilikan kalan min kɛ ani n’ ye fɔrɔmasɔn min sɔrɔ maanaw sɛbɛcogo koo la, o be n’ dɛmɛna n’ ka baara.

Mɔgɔw ka teli ka n’ ɲininga fɛɛn min kama miziki ka di n’ ye. Miziki ka di n’ ye sabu a tun ka di n’ bangebagaw ye. N’ saan wolonfila, n’ y’a daminɛ ka piyano fɔcogo degi ni muso dɔ ye. Nga, n’ y’o kɛ wagati damanin dɔrɔn lo kɔnɔ sabu n’ ka piyano fɔcogo tun tɛ n’ ka kalanfa ɲɛɛ fa. O la, a y’a fɔ n’ facɛ ye ko a ka fisa n’ ka piyanodegi dabila. N’ b’o faamu sabu piyanodegi lɔgɔ tun tɛ n’ na o wagati la.

Kalo damanin o kɔ, n’ facɛ ye kalanfa wɛrɛ sɔrɔ n’ ye. Nga nin sen nin na, n’ ye piyano fɔcogo ani dɔnkilila degi, ani n’ ye n’ sɔbɛ don a la. N’ denmisɛn tuma na, n’ kaan tun ka di ani n’ kɛra fɔlɔ ye ɲɔgɔndan dɔw la. N’ tun b’a fɛ ka kɛ miziki kalanfa ye walisa ka se ka wari sɔrɔ ka n’ mako wasa n’ ka kudayi cidenyabaara la. Nga, n’ y’a faamu ko walisa ka diplomu sɔrɔ ka se k’o kɛ, n’ ka ɲi ka wagati caaman ta ka kalan kɛ ani ka n’ yɛrɛ labɛn ɛkizamɛnw kama. O la, n’ y’o kalan lalɔ ani ka piyɔniye baara daminɛ saan 1963.

N’ YE NINSƆNDIYA SƆRƆ PIYƆNIYE BAARA LA

Saan kelen kɛnin kɔ kudayi piyɔniye baara la, u ye n’ kɛ dan na piyɔniye ye Kapuskezing dugu la, Ɔntario mara la. N’ ka piyɔniyeɲɔgɔn tɔgɔ tun ko Daniel Skinner ani a tun ka kɔrɔ ni n’ ye fɔɔ ka taga ka na. A ye n’ degi fɛɛn caaman na kafo ka koow labɛncogo koo la. N’ saan 20, n’ kɛra kafo ka waajuliko ɲɛnabɔbagaw jɛnkulu mɔgɔ dɔ ye. O la, n’ tun ka ɲi ka koo caaman degi. A ka di n’ ye k’a ye ko ɔriganisasiyɔn bele b’a yirala k’a gwɛ ko a kɔrɔtanin lo fɔrɔmasɔn ka di kanbelew ma. N’u b’u sɔbɛ don baara la, u be se ka koo caaman kɛ Jehova ye hali k’a sɔrɔ u ye kanbele kɛnɛ kɛnɛ ye.

Koow tun ma nɔgɔ tuma bɛɛ Kapuskezing dugu la. Tuma dɔw la nɛnɛ tuma na, yɔrɔ tun be suma tɔn tɔn tɔn fɔɔ yɔrɔ bɛɛ tun be kɛ galasi ye. Ne ni Daniel ye dugu yɔrɔ bɛɛ munumunu. N’ ye ninsɔndiya minw sɔrɔ n’ ka cidenya baara la yen, u dɔ ye ko n’ ye balimamuso dɔ kunbɛn min tɔgɔ ko Linda Cole. Kɔfɛ, a kɛra Linda Splane ye.

Waajuli baara tun ka di Linda ye kosɔbɛ ani a tun be ni viziti kura caaman ye. A tɛgɛ tun labilanin lo, a tun be tɔɔw minɛ ni ɲumanya ye ani a tun ka di a ye ka wagati kɛ ni mɔgɔw ye. A bamuso tɔgɔ ko Goldie ani balimamuso kantigi tun lo. A facɛ tɔgɔ ko Allen ani a daminɛ na, Jehova Seerew koo tun man di a ye. Tiɲɛn lo ko Allen tun b’a muso Goldie kɛlɛ a ka limaniya kosɔn. Nga o bɛɛ n’a ta, Goldie tun be to ka taga ni Linda n’a dɔgɔnin John ani Gordon ye lajɛnw na. A tun be fɔrɔmasɔn di u ma fana waajuli  baara kama. Wagati dɔ la, Goldie, Linda, John, ani Gordon bɛɛ kɛra piyɔniyew ye. Saan caaman o kɔ, Allen kɛra Jehova Seere dɔ ye ani a tun b’a seen don bɛrɛbɛrɛ kafo ka baaraw la.

Saan 1965, u ye n’ weele Masaya cidenyabaara lakɔli la walisa ka fɔrɔmasɔn wɛrɛ di n’ ma. O lakɔli kɛra Kanada Betɛli la, ani a mɛɛnna kalo kelen kɔnɔ. O lakɔli tuma na, u ye n’ jija ko n’ ka demandi dafa walisa ka taga Gilead lakɔli la. N’ tun ma miiri ka ye ko ne be se ka kɛ misɔnden ye. Nga o bɛɛ n’a ta, n’ y’o demandi dafa. U ye n’ weele Gilead lakɔli la ani n’ ye klasi 42nan kɛ. O lakɔli la, an tun be ɲɛtaga minw kɛ, an ka kalanfaw tun b’o fɔ an ye tuma o tuma. Kabi kalanw daminɛ na, u ye n’ jija ko n’ be se ka fɛɛn o fɛɛn lɔn Jehova ka ɔriganisasiyɔn koo la, n’ ka banba k’o lɔn. N’ tun be ni saan 21 dɔrɔn lo ye o wagati la. O la, o ladili tun bɛnnin lo yɛrɛ le.

Gilead lakɔli la, u y’a yira an na cogo min na an be se ka kumaɲɔgɔnya ɲuman kɛ ni mɔgɔw ye minw be baara kɛ arajosow, telewisɔnbonw ani zurunali sɛbɛyɔrɔw la. O kalanw diyara n’ ye kosɔbɛ yɛrɛ le. Nga n’ tun m’a faamu ka ɲɛ u tun bena n’ nafa bɛrɛbɛrɛ cogo min na sini ma. N’ bena o ɲɛfɔ aw ye kɔfɛ.

U YE N’ CI KA TAGA SƐNƐGALI

Gilead lakɔli banni kɔ, u ye ne ni Michael Höhle kɛ misɔndenw ye ani u y’an ci ka taga Sɛnɛgali, Afiriki. Tile damanin o kɔ, an ye Sɛnɛgali sira minɛ. O wagati la, weleweledala 100 ɲɔgɔn lo tun b’o yɔrɔ la.

N’ ye misɔndenya baara kɛ kalo caaman kɔnɔ. O kɔ, u ko n’ ka to ka na baara kɛ Betɛli la tile kelen lɔgɔkun kɔnɔ. Betɛli tun ye boon kelen dama le ye, ani a tun be misɔndenw ka luu kɔnɔ. Hali n’o boon tun ka dɔgɔ, Emmanuel Paterakis tun be n’ hakili jigi tuma o tuma ko o be jati Jehova ka ɔriganisasiyɔn lo ye o jamana na. Emmanuel Paterakis tun ye Betɛli kɔrɔsibaga lo ye o wagati la. Loon dɔ, balimacɛ Paterakis ko an ka lɛtɛrɛ ci misɔndenw ma walisa k’u jija. O wagati la, walisa ka lɛtɛrɛw kopi kɛ o sɔngɔ tun ka gwɛlɛ. O kama, an y’u kelen kelen bɛɛ sɛbɛ ni sɛbɛrikɛmansi ye. O tun ye baaraba le ye sabu an tun man ɲi ka fili si kɛ.

An ma tila joona o loon sufɛ. Tuma min na n’ tun be labɛnna ka segi misɔnden boon na, balimacɛ Paterakis ye anwolopu dɔ di n’ ma. A y’a fɔ ko: “David, ɔriganisasiyɔn ye lɛtɛrɛ dɔ ci i ma.” Kɔfɛ, tuma min na n’ y’o anwolopu yɛlɛ, n’ y’a kɔrɔsi ko n’ tun ye lɛtɛrɛ minw sɛbɛ, u dɔ lo tun b’a kɔnɔ! O koo ye n’ dɛmɛ k’a faamu ko Betɛli boon ma na dɔgɔya cogo o cogo, an ka ɲi ka bonya la a kan sabu a be jati Jehova ka ɔriganisasiyɔn lo ye.

N’ ye teri caaman sɔrɔ n’ ka kafo kɔnɔ ani samediw fanba wulafɛ, n’ tun be wagati kɛ ni n’ ka kafo denbayamɔgɔ dɔw ye. O tun ye wagati diimanw yɛrɛ le ye! Fɔɔ ka na se bi ma, an be to ka kaan bɔ ɲɔgɔn ma. N’ ye faransɛkan degi Sɛnɛgali minkɛ, o ye n’ nafa kosɔbɛ tuma min na n’ tagara bɔ balimaw ye Betɛli wɛrɛw la yɔrɔ minw na faransɛkan be fɔ.

Saan 1968, n’ ye Linda maminɛ. Kalo caaman kɔnɔ, n’ y’a daminɛ ka baara dɔ ɲini n’ tun bena to ka min kɛ tuma kelen kelen. N’ tun b’o baara ɲinina walisa ne ni Linda ka kɛ piyɔniyew ye ani ka to Sɛnɛgali. Nga, a tun ɲinina baarada ɲɛmɔgɔw fɛ u ka o yɔrɔ mɔgɔw lo ta baara la. N’ labanna ka kɔsegi Kanada. O yɔrɔ la, n’ ye Linda furu ani u  y’an ci ka taga kɛ dan na piyɔniyew ye Nuvo Brɔnswik, Ɛdmundstɔn dugu la. O dugu dennin yɔrɔ man jan ni Kebɛki mara ye.

AN KƐRA PIYƆNIYEW YE NUVO BRƆNSWIK ANI KEBƐKI

Yanni u k’an ci ka taga Ɛdmundstɔn dugu la, duguden si tun tɛ weleweledala ye ani Bibulu kalanden damanin dɔrɔn lo tun be yen. Katoliki diinan tun ye fanga sɔrɔ o dugu la, ani diinan ɲɛmɔgɔw tun mana min fɔ, mɔgɔw b’o lo kɛ. A tun sɛbɛra soow fanba daa la ko: “An tɛ Jehova Seerew fɛ yan.” Nga o wagati la, an tun t’an janto o la. An tun be don soo kelen kelen bɛɛ la. Lɔgɔkun bɛɛ, katoliki diinan ɲɛmɔgɔw tun be to k’a sɛbɛ zurunali kɔnɔ ko: “An ka Jehova Seerew yɔrɔ ɲini ani k’u tunu ka bɔ an ka dugu la.” Jehova Seere mɔgɔ naani dɔrɔn lo tun be yen: Ne ni Linda, Victor ani Velda Norberg. O la, an tun b’a lɔn ko u tun kaan be anw lo ma!

Kafokulu kɔrɔsibaga nana bɔ an ye siɲɛ fɔlɔ min na, n’ tɛna ɲinɛ o kɔ abada! A ye lɔgɔkun kelen kɛ ka ban n’an ye tuma min na, a y’a fɔ an ye ko: “Mɔgɔw be ni miiriya bɛnbali minw ye Jehova Seerew koo la, a’ ye banba u k’a ye k’o tɛ tiɲɛn ye.” Kabi o wagati, an tora k’an jija k’o lo kɛ. Dɔɔni dɔɔni, mɔgɔw y’a daminɛ k’a faamu ko Jehova Seerew majiginin lo k’a sɔrɔ katoliki diinan ɲɛmɔgɔw ye kuncɛbaw ye. Sisan, kafo dennin dɔ b’o dugu la.

An ye saan kelen ɲɔgɔn kɛ Ɛdmundstɔn dugu la. O kɔ an cira ka taga dɛmɛ don kafoba dɔ la Kebɛki dugu la. O kafo balimaw tun be lonanw ladon koɲuman ani an ye wagati diimanw kɛ n’u ye yɛrɛ le! An ye kalo wɔɔrɔ lo kɛ o yɔrɔ la ani o kɔ u y’an ci ka taga kafokulu kɔrɔsili baara la.

An kɛra piyɔniyew ye Nuvo Brɔnswik ani Kebɛki. Saan 14 minw tugura o kɔ, an tun be to ka taga bɔ balimaw ye kafokulu caaman na Kebɛki mara la. O tun ye wagati diiman ye yɛrɛ le sabu ɲɛtagaba tun be kɛra waajuli baara la! Misali la, an tun be taga bɔ kafo minw ye, tuma caaman na kafo kelen kɔnɔ denbaya caaman tun be bibulukalan kɛ walisa ka batize.

AN HAKILI BE BALIMA KANTIGIW LA

Kanada balima min be faransɛkan fɔ, u tɛ tiɲɛn munumunu ani u ninsɔn ka di. O kama, i tɛ se n’i m’u kanu. Nga, a ma nɔgɔya u dɔw ma ka kɛ Jehova Seerew ye sabu u somɔgɔw b’u kɛlɛ kosɔbɛ. Kanbelew ni sunguru dɔw bangebagaw y’a gwan u kun k’u ka bibulukalan dabila ni Jehova Seerew ye. Ko n’o tɛ, u bena u gwɛn ka bɔ soo. O bɛɛ n’a ta, u tora kantigiya la Jehova ye. Siga t’a la ko Jehova ninsɔn ka di kosɔbɛ u kɔrɔ!

An hakili be balima kantigi dɔw koo la fana minw tun ye kudayi piyɔniyew ni dan na piyɔniyew ye o wagati la. U fanba tun bɔra Kanada dugu wɛrɛw la ka na dɛmɛ don Kebɛki. Katoliki diinan tun ye nɔɔba to mɔgɔw kan. O bɛɛ n’a ta, piyɔniyew tun ka ɲi ka deli o mɔgɔw ka kokɛcogo n’u ka miiricogo la. O wagati kelen na, u tun ka ɲi ka faransɛkan fana degi.

Tuma caaman na, u tun be dan na piyɔniyew ci ka taga yɔrɔ minw na weleweledalaw tɛ yen. Komi Jehova Seerew koo tun man di o yɔrɔ mɔgɔw ye, a tun ka gwɛlɛ o balimaw fɛ ka boon sɔrɔ. Min yɛrɛ tun ka gwɛlɛ kosɔbɛ, o ye ka baara dɔ sɔrɔ u tun be se ka min kɛ tuma kelen kelen. Tuma dɔw la yɛrɛ piyɔniye minw furula kura ye, u mɔgɔ naani, wɔɔrɔ wala seegi tun be si boon kelen na walisa ka se ka luwanse sara. O piyɔniye kantigiw  tun be baaraba lo kɛ. Misali la, ni u tun ye bibulukalan daminɛ ni mɔgɔ dɔ ye, u tun b’u seko bɛɛ lo kɛ walisa k’a tigi dɛmɛ. Bi bi nin na, weleweledalaw ka ca Kebɛki. O kama, piyɔniye minw tun nana dɛmɛ don, u caaman tagara mara wɛrɛw la, yɔrɔ minw na weleweledalaw man ca.

N’an tun tagara bɔ balimaw ye kafokulu kɔrɔsili baara sen fɛ, an tun b’an jija ka waajuli kɛ ni kanbelew ni sunguruw ye samedi sɔgɔma. O tun b’an dɛmɛ k’a lɔn gwɛlɛya minw b’u kan. Sisan u dɔw ye misɔndenw ye jamana wɛrɛw la, ani kunkanbaara wɛrɛw kalifara dɔ wɛrɛw ma.

An tun b’an ka voyazi musaka n’a ɲɔgɔnnaw sara, ani o kɔ kafow tun b’o wari segi an ma. Nga, komi see tun tɛ kafo dɔw ye k’o wari segi an ma, tuma dɔw la wari bɛrɛ tun tɛ kɛ an fɛ kalosa la. O wagatiw la, an tun b’an jigi bɛɛ la Jehova kan sabu ale kelen dɔrɔn lo tun b’a lɔn min b’an kan. A m’an to yen abada! An mako tun be wari min na walisa ka voyazi kɛ ka taga kafo ni kafow la, an ma fɔn o la abada!

N’ YE KALAN CAAMAN SƆRƆ BALIMA KANTIGIW FƐ

K’an to Kebɛki, an ye sababu caaman sɔrɔ ka waajuli kɛ arajo, telewisɔn ani zurunaliw sababu fɛ. O la, n’ ninsɔn tun ka di kosɔbɛ sabu n’ tun y’o koow degi Gilead lakɔli la. N’ tun be baara kɛ ni balimacɛ Léonce Crépeault ye. Ale fana tun ye kafokulu kɔrɔsibaga ye. A tun be se kumaɲɔgɔnya la ni mɔgɔw ye minw tun be baara kɛ arajoso, telewisɔnbon ani zurunali sɛbɛyɔrɔw la. N’an tun tagara kuma n’o baarada dɔ ɲɛmɔgɔ ye, sanni a k’a yira ko ale be koo caaman lɔn, a tun b’a fɔ ko: “Ne ni n’ teri ye waajulikɛlaw dama lo ye. An tɛ bɛrɛ lɔn piblisite koo la, nga a ɲinina an fɛ an k’a fɔ mɔgɔw ye ko Jehova Seerew bena u ka lajɛnba dɔ kɛ. N’aw tun be se k’an dɛmɛ, o tun bena diya an ye kosɔbɛ.” Komi balimacɛ Léonce Crépeault tun be koow kɛ ni majigilenya ye, mɔgɔ caaman sɔnna k’an dɛmɛ.

Kɔfɛ, Betɛli y’a ɲini n’ fɛ ko n’ ka baara kɛ ni balimacɛ Glen How ye kitiko gwɛlɛ dɔw kan. Glen How tun ye an ka awoka dɔ le ye. An ye baara kɛ kitiko minw kan, u tun ka teli ka kuma o koow la arajo ni telewisɔn na, ani zurunaliw kɔnɔ. O la, n’ y’a ye ko n’ ye fɔrɔmasɔn min sɔrɔ Gilead lakɔli la ani tuma min na n’ tun be baara kɛra ni balimacɛ Léonce Crépeault ye, o ye n’ dɛmɛ kosɔbɛ o baara la. Ni balimacɛ Glen How tun be Jehova ka ɔriganisasiyɔn lafasara kititigɛso la, a tun tɛ siran hali dɔɔni. Min kɔrɔtanin lo kosɔbɛ, o  ye ko a tun be Jehova kanu yɛrɛ le. Nɛɛmaba tun lo n’ fɛ ka baara kɛ n’a ye.

Saan 1985, u y’an ci ka taga kafokulu kɔrɔsili baara kɛ Kanada tileben fan fɛ. O y’a to an sera k’an janto n’ facɛ la. A ka soo yɔrɔ tun man jan n’o yɔrɔ ye. Kalo saba an senin kɔ yen, n’ facɛ banna. An ye kafokulu kɔrɔsili baara kɛ yen fɔɔ saan 1989. O kɔ, u y’an weele ko an ka na baara kɛ Etazini Betɛli la. O barila an na yɛrɛ le! O kɔrɔ ko an tun ka ɲi ka kafokulu kɔrɔsili baara to yen. An y’o baara kɛ saan 19 ɲɔgɔn. O saanw bɛɛ la an sira boon caaman kɔnɔ, ani an ye dumuni kɛ balima caaman fɛ. O balimaw tigɛ tun labilanin lo yɛrɛ le! An b’u bɛɛ waleɲuman lɔn kosɔbɛ o kosɔn!

AN YƐLƐMANA ETAZINI

An senin Buruklini, Biro min be waajuliko ɲɛnabɔ, u ye n’ ci ka taga baara kɛ yen. N’ ye fɔrɔmasɔn ɲuman sɔrɔ o yɔrɔ la ani n’ be balimaw waleɲuman lɔn o kosɔn. U ye n’ kalan koo minw na, u dɔ ye ko n’ kana a miiri ko n’ be koo dɔ lɔn k’a sɔrɔ n’ ma kunnafoniw bɛɛ sɔrɔ o koo la. O kɔ saan 1998, biro min be an ka gafew sɛbɛko kun na, u ye n’ ci ka taga baara kɛ yen. N’ bele be koo caaman degira o yɔrɔ la. Saan caaman kɔnɔ, n’ ye nɛɛma sɔrɔ ka balimacɛ John Barr dɛmɛ a ka baara la. Gafew sɛbɛbagaw ka kɔmite ka koow labɛnbaga tun lo. A tun be ni jogo ɲumanw ye yɛrɛ le. A diyara n’ ye kosɔbɛ ka fɔrɔmasɔn sɔrɔ ka bɔ a fɛ ani ka wagati kɛ n’a ye.

Biro min be an ka gafew sɛbɛko kun na, balima minw be baara kɛ yen u majiginin lo kosɔbɛ. Ninsɔndiyaba lo n’ fɛ ka baara kɛ n’o balimaw ye. U be Jehova deli tuma bɛɛ a k’u dɛmɛ u ka baara la. U b’a lɔn ko u be min o min kɛ, u be sera k’o kɛ Jehova ka hakili senu lo barika la. U yɛrɛ ka setigiya tɛ.

Ne ni Linda ye nɛɛma sɔrɔ ka taga bɔ an balimaw ye jamana 110 kɔnɔ. An y’a ye k’o balimaw be kantigiya kɛra Jehova ye. An y’a ye fana ko misɔndenw, tɔnbolow ka kɔmite mɔgɔw ani kudayi cidenya baarakɛla tɔɔw be Jehova kanu kosɔbɛ. Ka fara o kan, an y’a kɔrɔsi ko weleweledalaw kisɛyanin lo ani u be kantigiya kɛra Jehova ye, kɛlɛw ni fantanya bɛɛ n’a ta ani hali k’a sɔrɔ dɔw b’u kɛlɛla u ka limaniya kosɔn. Siga t’a la ko Jehova b’o balimaw kanu kosɔbɛ!

O saanw bɛɛ la, Linda ka dɛmɛ sababu la n’ sera ka n’ ka kunkanbaaraw dafa. A be mɔgɔw kanu, ani a b’a seko bɛɛ kɛ k’u dɛmɛ. A ka nɔgɔ a ma fana ka baro daminɛ ni mɔgɔw ye sababu dɔ sen fɛ. Ka fara o kan, a ye mɔgɔ caaman dɛmɛ u ye Jehova lɔn. Mɔgɔ minw tun ye Jehova sago kɛli dabila, a sera k’u dɔw dɛmɛ u kɔsegira Jehova ma. Linda ye Ala sɔnni yɛrɛ le ye. Komi an kɔrɔla, balima kanbelew ni sunguruw b’an dɛmɛ n’an ka ɲi ka taga voyazi la. U b’an dɛmɛ fana koo tigitigi wɛrɛw la. An b’u waleɲuman lɔn kosɔbɛ u ka dɛmɛ kosɔn.—Mariki 10:29, 30.

Ni n’ miirila saan 80 tɛmɛninw na, n’ be Jehova waleɲuman lɔn kosɔbɛ! N’ be ni Zaburu sɛbɛbaga ka miiriya ɲɔgɔn ye. A y’a fɔ ko: “Ala, e ye ne kalan kabini n kanbelen tuma. Fɔɔ ka na se bii ma, ne b’i ka koɲumanw fɔ.” (Zab. 71:17). Ka n’ to sii la, n’ b’a fɔ ka to k’o lo kɛ.