1. Ka kɛɲɛ ni Zaburuw 31:3-6 ye, mun na an be se k’an jigi la Jehova kan?

 SUTANA lo be duniɲa nin marala ani mɔgɔ caaman ye ngalontigɛlaw, janfanciw ani nanbaratɔw ye. O kama tuma dɔw la, an t’a lɔn an be se k’an jigi la mɔgɔ min kan. Misali la, jagokɛla caaman be nanbarakow kɛ ani u be sannikɛlaw lafili u ka feerefɛnw koo la. Tuma dɔw la yɛrɛ, a ka gwɛlɛ mɔgɔ dɔw ma k’u jigi la u teri sɔbɛw kan. Nga k’a lɔn ko an be se k’an jigi la Jehova kan tuma bɛɛ, o b’an hakili sigi yɛrɛ le! Bibulu b’a fɔ ko ale lo ye “Ala tiɲɛtigi ye.” (Zaburuw 31:3-6 kalan). Jehova tɛ ngalon tigɛ abada, a ka fɔtaw bɛɛ ye tiɲɛn ye. O la, an be se ka la a la ko a ye min o min fɔ, a bena o kɛ.

2. An bena mun lo ye barokun nin na?

² Kuun minw kama an be se k’an jigi bɛɛ la Jehova kan, an bena kɔn k’u dɔw lajɛ. O kɔ, an bena a ye cogo min na Ala tiɲɛntigi bena daan sigi Sutana ka duniɲa juguman nin na. Ani a laban, an bena a ye Jehova be min kɛra kabi sisan k’a ka layiduw dafa. Barokun nin bena an dɛmɛ an k’an jaa gwɛlɛya ka tiɲɛn fɔ mɔgɔw ye Jehova koo la.

FƐƐN MIN KAMA AN BE SE K’AN JIGI LA TIƝƐNTIGI ALA KAN

3. Mun na an be se k’an jigi bɛɛ la Jehova kan?

³ An be se k’an jigi la Jehova kan sabu ale lo ye Danbaga ye.  A ye sankolo ni dugukolo dan ani ale lo ye niin Dibaga ye (Zɛnɛzi 1:1; Zab. 36:10; Yir. 4:11). A ye dugukolo dan cogo dɔ la walisa an mako be min na ka to niin na, an k’o sɔrɔ tuma bɛɛ i n’a fɔ fɔɲɔ ani jii. A b’a ka danfɛnw bɛɛ lɔn koɲuman ani see b’a ye u kan. Jehova lo y’an dan, a be koo bɛɛ lɔn ani daan t’a ka sebagaya la fana. O la, an be se ka la a la ko a be se k’an ɲɛminɛ koɲuman ani ko a bena siniɲasigi hɛɛrɛman di an ma.

4. An b’a lɔn cogo di ko Jehova b’an kanu?

⁴ An be se k’an jigi la Jehova kan sabu a b’an kanu. Jehova ye adamadenw dan sabu a b’a fɛ olu fana ka ɲɛnamaya diyabɔ. A sagonata ye min ye, a y’o yira ka gwɛ. A ko: “An ka mɔgɔ dan an yɛrɛ jaa la, a ka kɛ i n’a fɔ an yɛrɛ.” (Zɛnɛzi 1:26). A ye see di an ma an ka se ka desizɔnw ta an yɛrɛ ma ani a ye yɔrɔ ɲuman labɛn an ye walisa an ka sigi a kɔnɔ (Zab. 115:16). Ka fara o kan, a ye baara nafaman kalifa Adama ni Awa ma, o min ye ka dugukolo kɛ alijɛnɛ ye (Zɛnɛzi 1:28; 2:15). A ye dumuni, yiriw ni bɛgɛn sifa caaman di u ma ani fɛɛn caaman wɛrɛw. A y’o kɛ walisa u ka se ka ɲɛnamaya diyabɔ. O b’a yira ko Jehova b’an kanu kosɔbɛ ani ko a ka kanuya kantigiman tɛ ban abada.—Zab. 103:17.

5. a) Jehova ye mun lo kɛ tuma min na Adama ni Awa ma mɛnni kɛ a fɛ? b) Jehova y’a ka layidu minw dafa ka ban, u dɔw ye jumanw ye? (koorilen nin lajɛ: “ Ala be tiɲɛn fɔ tuma bɛɛ”).

⁵ An be se k’an jigi la Jehova kan sabu a mana min o min fɔ, a b’o lo kɛ. Misali la, Bibulu b’a fɔ ko a ma dugukolo “dan k’a lakolon to, a y’a dan janko mɔgɔ ka to a kan.” (Ezayi 45:18, 19). Tuma min na Adama ni Awa murutira Ala ma, u sara i ko Ala tun y’a fɔ cogo min na. O la, a tun be komi Ala sagonata tɛna dafa. Nga, foyi tɛ se ka Jehova bali k’a sagonata dafa. A ye min latigɛ, a b’o lo kɛ tuma bɛɛ (Ezayi 46:10, 11). O la, an be se ka la a la ko a sagonata ma yɛlɛma. A bele b’a fɛ adamaden tilenninw ka dugukolo fa. O lo kama, a y’a to Adama ni Awa ye denmisɛnw sɔrɔ. Ka fara o kan, a y’a Dencɛ ci ka na a niin di an kosɔn walisa an ka se ka ɲɛnamaya kɛ fɔɔ abada. O ye jigiya ɲuman yɛrɛ lo ye!—Zan 3:16.

 TIƝƐNTIGI ALA B’A SAGONATA DAFARA

6. Adama ni Awa murutinin kɔ, Jehova y’a fɔ ko a bena mun lo kɛ?

⁶ Tigi min ye Adama ni Awa lasun ka muruti Ala ma, ale lo be weele ko “sakɔrɔ, jinaw kuntigi, Sutana.” a (Yir. 12:9; Zɛnɛzi 3:4, 5; Zan 8:44). Sutana ye Adama ni Awa lasun ka muruti minkɛ, Jehova y’a fɔ ko a bena a halaki (Zɛnɛzi 3:15). Yanni o cɛ, mɔgɔ caaman bena tugu Sutana kɔ ani ka koow kɛ i ko ale. Nga mɔgɔ dɔw bena to kantigiya la Jehova ye.

7. Jɔnw lo be tugura Sutana kɔ ani mun lo bena u sɔrɔ?

⁷ Minw be tugura Sutana kɔ, u dɔw ye mɛlɛkɛw ye minw murutira Ala ma. U dɔw fana ye adamadenw ye minw t’a fɛ ka mɛnni kɛ Ala fɛ. U ye Sutana kɔmɔgɔw ye sabu u be Jehova kɛlɛ. Nga, Ala ka wagati latigɛnin na, a bena Sutana n’a kɔmɔgɔw bɛɛ halaki.—Dan. 2:44; Ɔrɔm. 16:20.

8. Yezu ye mun lo kɛ saan 1914? (jaaw lajɛ fana).

⁸ Jehova ye layidu min ta ko a bena Sutana n’a kɔmɔgɔw halaki, mun na an lanin b’a la k’o bena dafa? Saan 1914, Yezu ye kɛlɛ daminɛ ni Sutana n’a ka jinaw ye ani a y’u gwɛn ka jigi dugukolo kan (Yir. 12:7-9). Hali n’o kɛlɛ kɛra sankolo la, mɔgɔw y’o kɛlɛ nɔfɛkow ye dugukolo kan. Bibulu b’a fɔ ko: “Bɔnɛ ye aw diɲɛ mɔgɔw ni kɔgɔji kɔnɔ fɛɛnw ta ye, bari Sutana dimininba jigira aw fɛ. A b’a lɔn ko a halakilon tɔɔ man jan tugu.” (Yir. 12:12). Kabi saan 1914, Sutana b’a seko bɛɛ kɛra walisa mɔgɔw fanba ka tugu ale kɔ. O lo kama duniɲa ka koow  be juguyara ka taga. Nga yanni dɔɔni, Yezu bena duniɲa kuntigi Sutana n’a kɔmɔgɔw bɛɛ halaki pewu (Yir. 6:2). O cogo la, Yezu bena a yira bɛɛ la ka gwɛ ko Sutana ka jugu ani ko a ye ngalon lo tigɛ ka la Jehova kan (Zab. 45:5-7). Bɛɛ bena a lɔn ko Jehova lo ye tiɲɛntigi Ala ye.—Ezek. 38:23.

JEHOVA BE TIƝƐN KANUBAGAW LAJƐNNA

9. Jehova be jɔnw lo lajɛnna bi?

⁹ Fɛɛn “minw be sankolo la ani minw be dugukolo kan,” Jehova be olu lajɛnna walisa “Krista ka kɛ u bɛɛ kuntigi ye.” (Efɛz. 1:10). Fɛɛn “minw be sankolo la,” o ye kerecɛn mɔlenw lo ye, Jehova ye olu minw sugandi walisa u ka kuntigiya kɛ ni Krista ye sankolo la. Fɛɛn “minw be dugukolo kan,” o ɲɛsinna mɔgɔw ma minw bena ɲɛnamaya kɛ alijɛnɛ na dugukolo kan fɔɔ abada. O mɔgɔw bɛɛ b’u jijara kosɔbɛ ka tɔɔw dɛmɛ u ka tiɲɛn lɔn Jehova koo la ani k’a yira u la ko Sutana ye ngalontigɛla ye.

10. Jehova be mɔgɔw dɛmɛna cogo di u ka tiɲɛn lɔn ale koo la? (Yirali 14:6, 7).

¹⁰ Tiɲɛn ka di mɔgɔ minw ye, Jehova b’olu lajɛnna waajuli baara sababu fɛ, o min be kɛra duniɲa kuru bɛɛ kɔnɔ. Baaraba min be kɛra waajuli la, o ɲɔgɔn ma deli ka kɛ ka ye (Yirali 14:6, 7 kalan). Tiɲɛn lo ko Jehova be tɛmɛ adamadenw lo fɛ ka kibaro diiman lase mɔgɔw ma. Nga tiɲɛn ka di mɔgɔ minw ye, mɛlɛkɛw lo b’an dɛmɛ k’o tigiw sɔrɔ. Kabi saan kɛmɛkulu caaman, Sutana be tɛmɛna ngalon diinanw lo fɛ ka ngalon jɛnsɛn Jehova koo la. Nga, an ka waajuli baara sababu fɛ, an b’u ka ngalonw bɔ kɛnɛ kan (Yir. 18:2, 4). Yanni dɔɔni, ngalon diinanw bɛɛ bena halaki pewu. Tiɲɛntigi Ala Jehova ka kan ni nɔɔrɔ min ye, a kanubagaw bɛɛ bena o la a kan bɛrɛbɛrɛ.—Yir. 17:16.

11. An be se ka Jehova batobaga sɔbɛw lɔn cogo di?

¹¹ Tiɲɛn ka di mɔgɔ minw ye, u siya, u bɔyɔrɔ, u ka kokɛcogow ani u ka koow cogoya tɛ kelen ye (Yir. 7:9, 10). U siɲɛ fɔlɔ ka Jehova koo mɛn, u y’a faamu ko u ye tiɲɛn diinan lo sɔrɔ ani u farala Jehova sagokɛlaw kan (Mariki 13:10). Bi bi nin na, mɔgɔ minw be Jehova sago kɛra ani minw t’a kɛra, mɔgɔw b’o yera ka gwɛ. Jehova tɛmɛna kira Malasi fɛ k’a fɔ ko: “Faranfasi min be mɔgɔtilennin ani mɔgɔjugu cɛ, aw bena o lɔn. Min be baara kɛ ne Ala ye, ani min te baara kɛ ne ye, faranfasi min b’u cɛ, aw bena o lɔn.” (Mal. 3:18). Jehova sagokɛlaw ka kɛwale ɲumanw n’u ka waajuli baara fɛ, u b’a yira ko u be tiɲɛntigi Ala lo batora.

12. Cogo juman na waajuli baara b’an dɛmɛ ka Jehova sagonata dafa?

 ¹² N’an be “Masaya kibaro diiman” fɔ, an be Yezu ka cikan lo labatora ani o wagati kelen na, an be Bibulu ka kiraya kumaw dafa (Mat. 24:14; 28:18-20). An ka waajuli baara sababu la, mɔgɔ caaman be kɛra Yezu ka kalandenw ye duniɲa kuru bɛɛ kɔnɔ ani u jigi b’a la ka tiɲɛntigi Ala Jehova bato fɔɔ abada. O ye Ala sagonata lo ye. Nɛɛmaba lo an fɛ ka dɛmɛ don walisa k’o sagonata dafa!

AN KA LA A LA KO JEHOVA BENA A KA LAYIDUW DAFA

13. Sutana be jɔnw lo kɛlɛ kosɔbɛ ani mun na?

¹³ Sutana dimininba lo sabu a b’a lɔn ko “a halakilon tɔɔ man jan tugu.” (Yir. 12:12, 13). Minw bena kuntigiya kɛ ni Yezu ye sankolo la, Sutana b’olu yɛrɛ lo kɛlɛla kosɔbɛ. Mun na do? Sabu u “be Ala ka kuma batora” ani u be seereya kɛra Yezu koo la (Yir. 12:17; 14:12). Mɔgɔ minw bɛɛ b’u dɛmɛna o baara la, Sutana b’olu fana kɛlɛ.

14. Tuma min na Sutana kɔmɔgɔw bena wuli Jehova sagokɛlaw kama, mun lo bena kɛ? (jaa lajɛ fana).

¹⁴ Babilonɛba halakinin kɔ, Sutana kɔmɔgɔw bena a ɲini ka Jehova sagokɛlaw bɛɛ halaki. O lo bena kɛ Arimagedɔn kɛlɛ daminɛ ye (Yir. 16:13, 14, 16). O wagati la, Yezu n’a ka kɛlɛbolo bena Jehova sagokɛlaw kisi ani ka Sutana kɔmɔgɔw bɛɛ halaki pewu (Yir. 19:19-21). Mɔgɔ juguw, ngalontigɛlaw ani nanbaratɔw tɛna kɛ yen tugun (Yir. 21:8). O wagati la, bɛɛ bena a lɔn ko Jehova be koo tilennin kɛ tuma bɛɛ ani ko a be tiɲɛn fɔ tuma bɛɛ fana.

15. Mun na an be se ka la a la ko Jehova ka layiduw bena dafa? (Ezayi 65:16, 17; jaa lajɛ fana).

 ¹⁵ Bi ka tɛmɛ sanga ni wagati bɛɛ kan, mɔgɔw be ɲɔgɔn kɛlɛ ani u be ngalon tigɛ. Nga Jehova ka dɛmɛ barika la, a sagokɛlaw kaan bɛnnin lo. Tiɲɛn ka di mɔgɔ minw ye, Jehova b’olu bɛɛ lajɛnna a ka denbaya kɔnɔ. Ka fara o kan foyi tɛ se k’a bali k’a sagokɛlaw duga ani k’u dɛmɛ waajuli baara la (Ezayi 65:16, 17 kalan). An be se ka la a la ko a ka layiduw bena dafa. Mun na do? Sabu ciden Pol ye min fɔ Ɔrɔmukaw 8:38, 39 kɔnɔ, o b’an hakili sigi. A ko: “Bari ne jigi b’a la ko hali saya yɛrɛ, walima sijan, walima mɛlɛkɛw, walima jinaw, walima fɛɛn minw be diɲɛ na bii, walima minw bena kɛ yen sini, walima setigiw, hali fangatigi minw be sanfɛ, walima minw be dugukolo jukɔrɔ, walima danfɛn wɛrɛw, fɛɛn si te yen min be se k’an faran ka bɔ Ala ka kanuya la min yirala an Matigi Yezu Krista sababu la.”

16. Mun na i jigi bɛɛ lanin be Jehova kan?

¹⁶ An b’an jigi bɛɛ la tiɲɛntigi Ala Jehova kan kuun caaman kosɔn. Ale lo y’an Danbaga ye ani a b’an kanu kosɔbɛ. Ka fara o kan, a be jamaba dɔ lajɛnna duniɲa kuru bɛɛ kɔnɔ walisa u k’ale bato cogo bɛnnin na (Ezayi 60:22; Zak. 8:23). An b’a lɔn ko a b’a ka layiduw dafa tuma bɛɛ ani ko yanni dɔɔni, a bena daan sigi Sutana ka ngalonw n’a ka nanbarakow bɛɛ la. O kama i ko Dawuda, an b’a fɛ k’a fɔ Jehova ye ko: “Barika, Masa Ala, . . . e kelen le be kabakow kɛ. Ne b’i fo tuma bɛɛ, Nɔɔrɔtigi Ala, a to i ka nɔɔrɔ ka ye dugukolo yɔrɔ bɛɛ la.”—Zab. 72:18, 19.