Taga a kɔnɔkow lajɛ

Taga a kɔnɔnakow lajɛ

 BAROKUN KALANTA KAFO KƆNƆ 24

Miiriya o miiriya be mɔgɔ bali ka Ala ka lɔnniya sɔrɔ, an k’an mabɔ o la!

Miiriya o miiriya be mɔgɔ bali ka Ala ka lɔnniya sɔrɔ, an k’an mabɔ o la!

“Miiriya minw bɛ mɔgɔw lafiri, ani fɛn o fɛn bɛ mɔgɔw bari ka Ala ta lɔnniya sɔrɔ, an bɛ o bɛɛ cɛn.”—2 KOR. 10:5, Biblu Ala ta Kuma.

DƆNKILI 124 Soyons fidèles (An ka kantigiya kɛ)

BAROKUN KƆNƆNAKOW *

1. Ciden Pol ye lasɔmini kuma jumanw lo lase kerecɛn mɔlenw ma?

BIBULU b’an lasɔmi ko: “Aw kana aw yɛrɛ kɛɲɛ ni bii diɲɛ ye.” (Ɔrɔm. 12:2). Ciden Pol y’o lasɔmini kumaw lase saan kɛmɛkulu fɔlɔ kerecɛnw ma. Mun na a y’o kangari la kerecɛn mɔlenw ye?—Ɔrɔm. 1:7.

2-3. Sutana b’a ɲini k’an mabɔ Jehova la cogo di? ‘Miirijugu’ minw ye sigiyɔrɔ sɔrɔ an kɔnɔ, an be se k’olu bɔ yen cogo di?

2 Pol y’o lasɔmini kumaw lase kerecɛn mɔlenw ma sabu a be komi Sutana ka duniɲa juguman tun ye nɔɔ to u dɔw kan (Efɛz. 4:17-19). O ɲɔgɔn be se k’an bɛɛ sɔrɔ. Duniɲa nin kuntigi Sutana be koo bɛɛ lajɛnin kɛra walisa k’an lasun an k’an mabɔ Jehova la. Ɲɛyirali fɛ, n’an b’a fɛ ka tɔgɔba wala lɔyɔrɔba sɔrɔ, Sutana bena tɛmɛ o fɛ k’a ɲini k’an mabɔ Jehova la. An ye kalan min sɔrɔ lakɔliso la wala an somɔgɔw ni mɔgɔ wɛrɛw y’an kalan min na, Sutana be se ka tɛmɛ o fɛ k’an lasun an ka kɛ n’ale ka miiriya ye.

3 ‘Miirijugu’ minw ye sigiyɔrɔ sɔrɔ an kɔnɔ, yala an be se k’olu bɔ yen wa? (2 Kor. 10:4). Ɔnhɔn, Jehova ka dɛmɛ barika la, an be se ka miiriya juguw bɔ an kɔnɔ. Ciden Pol y’a fɔ ko: “Miiriya minw bɛ mɔgɔw lafiri, ani fɛn o fɛn bɛ mɔgɔw bari ka Ala ta lɔnniya sɔrɔ, an bɛ o bɛɛ cɛn; an bɛ mɔgɔw bɛɛ ta miiriya yɛlɛma janko o ye Kirisita kan mina.” (2 Kor. 10:5, Biblu Ala ta Kuma). Fura be se  ka pɔsɔni baga faga. O cogo kelen na, Sutana ka duniɲa be nɔɔ jugu min to an kan, Ala ka Kuma be se k’o baga faga.

AN K’AN JOGOW “YƐLƐMA”

4. An caaman ye yɛlɛmani jumanw lo kɛ tuma min na an sɔnna Bibulu ka tiɲɛnkalanw ma?

4 Miiri k’a filɛ i ye yɛlɛmani minw kɛ wagati min na i sɔnna Bibulu ka tiɲɛnkalanw ma ani i y’a latigɛ ka Jehova sago kɛ. Walisa ka se k’o kɛ, an caaman ye kɛwale juguw dabila (1 Kor. 6:9-11). An be Jehova waleɲuman lɔn kosɔbɛ sabu a y’an dɛmɛ an sera k’o yɛlɛmaniw kɛ!

5. Ka kɛɲɛ ni Ɔrɔmukaw 12:2 ye, an ka ɲi ka koo fila jumanw lo kɛ?

5 Nka, an kana a miiri fewu ko an man ɲi ka yɛlɛmaniw kɛ tugun. Tiɲɛn lo ko an tun be jurumuba minw kɛ, an y’u dabila ka sɔrɔ ka batize. Nka, fɛɛn o fɛɛn be se k’a to an be segi k’o kojugubaw kɛ, an ka ɲi ka banba k’an yɛrɛ tanga o ma. An be se k’o kɛ cogo di do? Pol y’a fɔ ko: “Aw kana aw yɛrɛ kɛɲɛ ni bii diɲɛ ye, nga aw ye hakilikura min sɔrɔ, aw jogo ka yɛlɛma ka kɛɲɛ n’o ye.” (Ɔrɔm. 12:2). An ka ɲi ka koo fila lo kɛ. A fɔlɔ, an kana an “yɛrɛ kɛɲɛ ni bii diɲɛ ye.” O kɔrɔ, an kana a to duniɲa ka nɔɔ to an kan. A filanan, an ye hakili kura min sɔrɔ an ka ɲi k’an ‘jogo yɛlɛma ka kɛɲɛ n’o ye.’

6. An be kalan jumanw lo sɔrɔ Yezu ka kumaw na minw be sɔrɔ Matiyo 12:43-45 kɔnɔ?

6 Pol ye yɛlɛmani minw kofɔ, o ma ɲɛsin an sawura dɔrɔn ma. An ye mɔgɔ sifa min ye tigitigi, o ɲɛsinna o fana ma. (Koorilen nin lajɛ: “ An yɛlɛmana wala an y’a kɛ i n’a fɔ an yɛlɛmana?”) An ka ɲi k’an jija k’an miiricogo, an dusukunnakow ani an negelakow yɛlɛma pewu. An kelen kelen bɛɛ ka ɲi k’an yɛrɛ ɲininga ko: “Ne ye yɛlɛmani minw kɛ walisa ka kɛ kerecɛn ye, yala n’ y’o kɛ sanfɛ sanfɛ dɔrɔn le wala n’ ye n’ sɔɔn  yɛlɛma pewu le?” O ɲiningali kɔrɔtanin lo kosɔbɛ. Matiyo 12:43-45 kɔnɔ, Yezu y’a yira an ka ɲi ka min kɛ. (O vɛrisew kalan.) O vɛrisew b’an dɛmɛ ka koo nafaman nin faamu: Ka miiriya juguw bɔ an kɔnɔ, o dama tɛ bɔri kɛ. An ka ɲi fana k’an hakili fa ni Ala ka miiriyaw ye.

AN K’AN KA “MIIRIYA YƐLƐMA”

7. An ye mɔgɔ tigitigi min ye, an be se k’o yɛlɛma cogo di?

7 An ye mɔgɔ tigitigi min ye, yala an be se k’o yɛlɛma tiɲɛn na wa? Ala ka Kuma b’a fɔ ko an be se k’o kɛ. A ko: “Aw ka kan k’aw ka miiriya yɛlɛma, ka jogokura ta, ka kɛ Ala jaa ye, ka kɛ mɔgɔtilenninw ni mɔgɔɲumanw ye, minw be sɔrɔ Ala ka tiɲɛ barika la.” (Efɛz. 4:23, 24). Tiɲɛn lo ko a man nɔgɔ, nka an be se k’o yɛlɛmaniw kɛ. An ka ɲi ka ban an ka negelako juguw la ani ka kojugukɛ dabila. Nka o dɔrɔn tɛ. An ye mɔgɔ tigitigi min ye, an ka ɲi k’o yɛlɛma fana. O yɛlɛmani ɲɛsinna koo nunu ma: an negelakow, an ka kokɛcogow ani an ka ŋaniyaw. O kɔrɔ ko an ka ɲi ka to ka jijaliw kɛ sanga ni wagati bɛɛ.

8-9. Balimacɛ dɔ ka koo b’a yira cogo di ko an ka ɲi k’an sɔɔn yɛlɛma pewu?

8 An ka balimacɛ dɔ ka koo lajɛ. Fɔlɔ la, a tun ka fari, kɛlɛ tun ka di a ye ani a tun be dɔrɔ min kojugu. Nka, a y’o bɛɛ dabila ani a batizera. O kɛra seereya ɲuman ye a ka kiinmɔgɔw fɛ. Nka a batizenin kɔ a ma mɛɛn, loon dɔ sufɛ, a kɔrɔbɔra cogo dɔ la a tun ma miiri min na. Dɔrɔtɔ dɔ nana a darabɔ a ka soo. A daminɛ na, balimacɛ sera k’a yɛrɛ minɛ. Nka, tuma min na o cɛɛ ye Jehova tɔgɔjugu fɔ, balimacɛ dusu gwanna, a ma se k’a yɛrɛ minɛ tugun. A bɔra k’o cɛɛ minɛ k’a bugɔ. Mun na a y’o kɛ do? Tiɲɛn lo ko a ka bibulukalan tun y’a dɛmɛ a ye fariyakow dabila. Nka, a tun ye mɔgɔ sifa min ye tigitigi, a tun ma se k’o yɛlɛma fɔlɔ. O kɔrɔ ko a tun m’a sɔɔn yɛlɛma pewu.

9 Nka, o balimacɛ m’a fari faga (Talenw 24:16). Diinan mɔgɔkɔrɔw ka dɛmɛ sababu la, a tora ka ɲɛtaga kɛ. A yɛrɛ ye saratiw dafa ka kɛ diinan mɔgɔkɔrɔ ye. Loon dɔ sufɛ, kɔrɔbɔli min tun y’a sɔrɔ a saan damanin ye nin ye, o ɲɔgɔn y’a sɔrɔ tugun. Dɔrɔtɔ dɔ nana Masaya Boon gɛrɛfɛ ani a tun b’a fɛ ka diinan mɔgɔkɔrɔ dɔ bugɔ. Balimacɛ ye mun lo kɛ do? A kumana o dɔrɔtɔ fɛ ni dususuman ni bonya ye walisa k’a dusu mala. Balimacɛ yɛrɛ y’o cɛɛ dɛmɛ a tagara soo. Mun na a ye koow kɛ o cogo la sisan do? A y’o kɛ sabu a tun y’a sɔɔn yɛlɛma pewu! A tun kɛra mɔgɔ majiginin ani hɛɛrɛmɔgɔ ye. O ye nɔɔrɔ la Jehova kan!

10. An ka ɲi ka mun lo kɛ walisa k’an sɔɔn yɛlɛma pewu?

10 O balimacɛ sɔɔn ma yɛlɛma a yɛrɛ ma. Walisa k’o yɛlɛmani ɲɔgɔn kɛ, n’a sɔrɔ an ka ɲi k’an “jija” kosɔbɛ saan caaman kɔnɔ (2 Piyɛri 1:5). O yɛlɛmani tɛ kɛ sabu an be tiɲɛn sira kan kabi wagatijan. An ka ɲi k’an seko bɛɛ kɛ k’an sɔɔn yɛlɛma pewu. Fɛɛrɛ jɔnjɔn dɔw be se k’an dɛmɛ k’o kɛ. An k’u damanin lajɛ.

MUN LO BENA AN DƐMƐ AN K’AN SƆƆN YƐLƐMA PEWU?

11. Delili b’an dɛmɛ cogo di an k’an sɔɔn yɛlɛma pewu?

11 Delili ye fɛɛrɛ jɔnjɔn fɔlɔ ye. I ko Zaburu sɛbɛbaga, an ka ɲi ka delili kɛ ko: “Dusuɲuman di ne ma, Ala, miiriɲuman di ne ma fana.” (Zab. 51:12). An ka sɔn a ma ko an ka ɲi k’an sɔɔn  yɛlɛma pewu ani an ka Jehova deli a k’an dɛmɛ. Mun na an be se ka la a la ko Jehova bena an dɛmɛ k’o yɛlɛmani kɛ? Jehova ye layidu min ta Israɛlden dusu gwɛlɛw ye Ezekiyɛli ka wagati la, o lo b’a to an lanin b’o la. A ko: “Ne bɛna miiriya kelen le don o bɛɛ jusukun na, ka hakirikura . . . [ani] jusukunɲuman di aw ma.” (Ezek. 11:19, Biblu Ala ta Kuma). Dusukun min be sɔn Ala ka ɲɛminɛli ma, o lo ye “jusukunɲuman” ye. Jehova tun labilanin lo ka Israɛldenw dɛmɛ. Bi, a labilanin lo k’an fana dɛmɛ.

12-13. a) Ka kɛɲɛ ni Zaburuw 119:59 ye, an ka ɲi ka miiri mun lo kan? b) I ka ɲi k’i yɛrɛ ɲininga mun ni mun lo la?

12 Ka miiri Ala ka Kuma kan, o ye fɛɛrɛ jɔnjɔn filanan ye. An ka Ala ka Kuma kalan koɲuman loon o loon ani an ka wagati ta ka miiri a kan. O la, an bena a lɔn an ka ɲi k’an ka miiriyaw n’an dusukunnako minw yɛlɛma (Zaburuw 119:59 kalan; Eburuw 4:12; Zaki 1:25). An ka ɲi k’a ɲini k’a lɔn fana adamadenw ka hakilitigiya ye nɔɔ min to an ka miiriyaw n’an dusukunnakow kan. An ka ɲi ka sɔn a ma ko fiɲɛw b’an na ani k’an jija kosɔbɛ k’o fiɲɛw bɔ an yɛrɛ la.

13 Ɲɛyirali fɛ, i be se k’i yɛrɛ ɲininga ko: “Yala ɲangoya be n’ na hali dɔɔni wa?” (1 Piyɛri 2:1). “Yala n’ bɔyɔrɔ, n’ ye lakɔli kalan min kɛ wala n’ ka nafolotigiya b’a to n’ b’a miiri ko n’ ka fisa ni tɔɔw ye wa?” (Talenw 16:5). “Fɛɛn tɛ mɔgɔ minw fɛ ka se ne ma wala ne ni minw tɛ siya kelen ye, yala n’ b’olu mafiɲɛya wa?” (Zaki 2:2-4). “Yala Sutana ka duniɲa kɔnɔfɛnw ka di n’ ye wa?” (1 Zan 2:15-17). “Yala n’ be n’ yɛrɛ ɲɛnagwɛ ni kakalayakow ni fariyakow ye wa?” (Zab. 97:10; 101:3; Amɔsi 5:15). O ɲiningaliw jaabiliw bena i dɛmɛ k’a faamu i ka ɲi ka yɛlɛmani don koo minw na. N’an sera k’an ka “miirijuguw” dabila ani ka kɛ ni miiriya ɲumanw ye, an koo bena diya an sankolola Faa ye.—Zab. 19:15.

14. Mun na a kɔrɔtanin lo an ka teri ɲumanw sugandi?

14 Ka teri ɲumanw sugandi, o ye fɛɛrɛ jɔnjɔn sabanan ye. An b’a kala ma wo, an t’a kala ma wo, an teriw be nɔɔba to an ka (Talenw 13:20). Mɔgɔ minw t’an dɛmɛ ka miiri i ko Ala b’a fɛ cogo min na, an be n’olu lo ye baarakɛyɔrɔ wala lakɔliso la. Nka, an be teri ɲumanw sɔrɔ kafo ka lajɛnw lo la. O yɔrɔ la, balimaw b’an lasun ka “kanuya sira taama, ka koɲuman kɛ.”—Eburuw 10:24, 25.

AN SINSINNIN KA TO LIMANIYA LA

15-16. Sutana b’a ɲinina cogo di k’an ka miiriyaw yɛlɛma?

15 An k’a to an hakili la ko Sutana cɛsirinin lo k’a ɲini k’an ka miiriyaw yɛlɛma. Ala ka Kuma be nɔɔ ɲuman min to an kan, Sutana be tɛmɛ miiriya sifa bɛɛ fɛ k’a ɲini k’o nagasi.

16 Sutana ye Awa ɲininga Edɛn nankɔ kɔnɔ ko: “Tiɲɛ na, Ala y’a fɔ ko . . . ?” (Zɛnɛzi 3:1). A bele b’o ɲiningali ɲɔgɔn kɛra bi. Sutana ka duniɲa nin kɔnɔ, mɔgɔw ka teli k’an ɲininga koo dɔw la minw be se k’a to an be sigasiga an ka lannakow la. U b’an ɲininga ko: “Tiɲɛn na, yala Ala tɛ sɔn cɛɲɔgɔnɲini ni musoɲɔgɔnɲini ma wa? Tiɲɛn na, yala Ala t’a fɛ aw ka nowɛli ni wololon sanyɛlɛma fɛti kɛ wa? Tiɲɛn na, yala aw ka Ala ko aw kana sɔn u ka joli don aw fari la wa? Tiɲɛn na, yala kanutigi Ala ko aw kana jɛnɲɔgɔnya kɛ n’aw ka mɔgɔ  kanulenw ye minw gwɛnna ka bɔ kafo kɔnɔ wa?”

17. Ni mɔgɔ dɔw b’an ɲiningara koo dɔw la minw be se k’a to an be sigasiga an ka lannakow la, an ka ɲi ka mun lo kɛ do? Ka kɛɲɛ ni Kɔlɔsikaw 2:6, 7 ye, nafa juman lo b’a la k’o kɛ?

17 An ka ɲi ka la an ka lannakow la kosɔbɛ. Mɔgɔw be ɲiningali jɔnjɔn minw kɛ, n’an m’u jaabiliw sɔrɔ, an be se k’a daminɛ ka sigasiga an ka lannakow la. O sigasigali be se k’an ka miiricogo n’an ka limaniya nagasi. O la, an ka ɲi ka mun lo kɛ do? Ala ka Kuma b’a fɔ ko an ka ɲi k’an ka miiricogo yɛlɛma janko an ka se ka la a la sɔbɛ la ko Ala sago “ye koɲuman ye, . . . [ani] a dafanin” lo (Ɔrɔm. 12:2). N’an be Bibulu n’an ka gafew sɛgɛsɛgɛ tuma o tuma, an ye tiɲɛnkuma minw kalan, an bena la a la k’u ye tiɲɛn ye. An bena la a la sɔbɛ la fana ko Jehova ka sariyaw tilennin lo. O la, an bena sabati limaniya la i ko yiri min lili donna kosɔbɛ dugukolo la.—Kɔlɔsikaw 2:6, 7 kalan.

18. Sutana ka duniɲa be nɔɔ jugu min to mɔgɔw kan, mun lo bena i dɛmɛ ka see sɔrɔ o kan?

18 Mɔgɔ si tɛ se k’i ka limaniya sabati i nɔɔ na. O la, to k’i ka miiricogo lakuraya walisa k’i sɔɔn yɛlɛma pewu. I ka to ka delili kɛ tuma o tuma. A ɲini Jehova fɛ a ka hakili senu d’i ma. To ka miiri koɲuman Bibulu kɔnɔnakow la ani to k’i ka miiriyaw n’i ka ŋaniyaw sɛgɛsɛgɛ. Teri ɲumanw ɲini minw bena i dɛmɛ k’i ka miiricogo yɛlɛma ka bɛn Jehova sago ma. N’i b’o kɛ, Sutana ka duniɲa ye nɔɔ jugu min to i kan, i bena se k’o kɛlɛ ani k’i yɛrɛ tanga o ma. “Miiriya minw bɛ mɔgɔw lafiri, ani fɛn o fɛn bɛ mɔgɔw bari ka Ala ta lɔnniya sɔrɔ,” i bena see sɔrɔ o fana kan.—2 Kor. 10:5, Biblu Ala ta Kuma.

DƆNKILI 50 Prière d’offrande de soi (Yɛrɛkundili)

^ dakun 5 An ye kalan minw sɔrɔ lakɔliso, an ka kokɛcogow ani an bɔyɔrɔ be nɔɔ to an ka miiriyaw kan. N’a sɔrɔ an y’a kɔrɔsi ko delinanko jugu dɔ b’an na ani a ka gwɛlɛ an ma k’o dabila. Barokun nin bena a yira cogo min na an be se ka see sɔrɔ an ka delinanko juguw kan.