Taga a kɔnɔkow lajɛ

Taga a kɔnɔnakow lajɛ

Baara kɛ ni Jehova ye loon o loon

Baara kɛ ni Jehova ye loon o loon

“An ni Ala ye baarakɛɲɔgɔnw ye.”—1 KOR. 3:9, ABM.

DƆNKILIW: 64, 111

1. An be baara kɛ ni Jehova ye cogo jumanw na?

DANBAGA tun b’a fɛ adamaden dafaninw ka baara kɛ n’ale ye k’a sago dafa. Bi, adamadenw ka dafabaliya bɛɛ n’a ta, mɔgɔ kantigiw bele be se ka baara kɛ ni Jehova ye loon o loon. Ɲɛyirali fɛ, an ni Ala bena kɛ “baarakɛɲɔgɔnw ye,” n’an be Masaya kibaro diiman fɔ ani n’an be mɔgɔw kalan walisa u ka kɛ Krista ka kalandenw ye (1 Kor. 3:5-9). O baara kɔrɔtanin lo kosɔbɛ. Nɛɛmaba lo sabu Sebagayabɛɛtigi Ala yɛrɛ lo y’an sugandi o baara kama! An be se ka baara kɛ ni Jehova ye cogo wɛrɛw la fana. An b’o kɛ n’an b’an somɔgɔw n’an kerecɛnɲɔgɔnw dɛmɛ, n’an be mɔgɔw ladon an ka soo ani n’an be dɛmɛ don Jehova ka baara la min be kɛra duniɲa kuru bɛɛ kɔnɔ. An bena o lo lajɛ barokun nin na.—Kɔlɔs. 3:23.

2. An be se ka min kɛ Jehova ka baara la, mun na an man ɲi k’o suma fewu ni tɔɔw ta ye?

2 Barokun nin lajɛtɔ, i janto nin na: I be se ka min kɛ Jehova ka baara la, kana o suma ni tɔɔw ta ye. A to i hakili la ko mɔgɔw sanda, u ka kɛnɛyako, u ka koow cogoya ani u ka setigiya tɛ kelen ye. Ciden Pol y’a sɛbɛ ko: “Mɔgɔ kelen kelen bɛɛ k’a yɛrɛ sɛgɛsɛgɛ, n’i ye koo dɔ ye n’i be se k’i yɛrɛ boɲa o la, e k’i yɛrɛ  boɲa, o ka kɛ i yɛrɛ ka koo la, mɔgɔ si kan’a ta kɛɲɛ n’a tɔɲɔgɔn ta ye ka sɔrɔ k’a yɛrɛ boɲa.”—Gal. 6:4.

I SOMƆGƆW N’I KERECƐNƝƆGƆNW DƐMƐ

3. Mɔgɔ min b’a ka denbaya mako wasa, mun na an be se k’a fɔ k’o tigi be baara kɛra ni Ala ye?

3 Jehova b’a fɛ a sagokɛlaw k’u somɔgɔw ladon. Ɲɛyirali fɛ, n’a sɔrɔ i ka ɲi ka baara kɛ walisa k’i ka denbaya mako wasa. Muso caaman fana be to soo walisa k’u deenw ladon. Bangebaga dɔw tɛ se k’u yɛrɛ ladon ani u deenw lo ka ɲi k’o kɛ. O koow ye waajibiko lo ye. Ala ka Kuma b’a fɔ ko: “Mɔgɔ o mɔgɔ te janto a ka somɔgɔw la, o tigi banna lanaya la. Mɔgɔ min ma la Ala la, ale yɛrɛ ka fisa n’a ye.” (1 Tim. 5:8). N’i be n’o kunkanbaaraw ye, n’a sɔrɔ wagati caaman t’i fɛ ka Alakow kɛ i ko i b’a fɛ cogo min na. Nka, kana i fari faga! N’i b’i ka denbaya mako wasa, o ka di Jehova ye.—1 Kor. 10:31.

4. Bangebagaw be se ka Ala ka Masaya kɛ u ɲɛnako fɔlɔ ye cogo di? Nafa juman lo b’o la?

4 Kerecɛn bangebagaw be baara kɛ ni Jehova ye n’u b’u deenw dɛmɛ ka laɲinitaw latigɛ u yɛrɛ ye Alako ta fan fɛ. Bangebaga caaman y’o lo kɛ. O kama, u deenw y’a latigɛ kɔfɛ ka kudayi cidenya baara kɛ Jehova ye hali n’u ka ɲi ka taga yɔrɔjan. U dɔw ye misɔndenw ye, dɔ wɛrɛw tagara dɛmɛ don yɔrɔ minw na waajulikɛlaw man ca. Dɔw fana be baara kɛra Betɛli la. Ni deenw yɔrɔ ka jan, bangebagaw tɛ se ka wagati caaman kɛ n’u ye i ko u b’a fɛ cogo min na. O bɛɛ n’a ta, minw be ni yɛrɛsaraka hakili ye, olu b’u deenw jija u ka to u ka cidenya baara la. Mun na do? Sabu u ninsɔn ka di kosɔbɛ k’a lɔn ko Ala ka Masaya lo y’u deenw ɲɛnako fɔlɔ ye (3 Zan 4). N’a sɔrɔ bangebaga caaman be ni Anɛ ka miiriya ɲɔgɔn ye. Ale y’a fɔ ko a y’a dencɛ Samuyɛli “kalifa” Jehova ma. O bangebagaw fɛ, nɛɛmaba lo ka baara kɛ Jehova ye o cogo la.—1 Sam. 1:28.

5. I be se k’i ka kafomɔgɔw dɛmɛ cogo di? (Jaa lajɛ, barokun daminɛ na.)

5 A be se ka kɛ ko balima dɔ b’a bangebagaw ladonna, ko farikolodɛsɛ be dɔ la, ko balima dɔ kɔrɔla wala ko dɔ mako be dɛmɛ na. Ni kunkanbaaraba dɔ t’i fɛ denbaya kɔnɔ, yala i be se k’o balimaw dɛmɛ wa? A filɛ i ka kafo kɔnɔ ni mɔgɔ dɔ mako be dɛmɛ na. Ɲɛyirali fɛ, a be se ka kɛ ko balimamuso dɔ b’a bangebagaw ladonna sabu u kɔrɔla. N’a sɔrɔ i be se ka to n’a bangebagaw ye walisa a ka se ka koo wɛrɛ kɛ. I be se fana ka balima dɔ ta ka taga n’a ye lajɛnw na, sannikɛyɔrɔ la wala ka taga mɔgɔ dɔ filɛ dɔgɔtɔrɔso la. N’i y’o kɛ, i be baara kɛra ni Jehova ye walisa dɔ ka delili ka jaabi.—1 Korɛntikaw 10:24 kalan.

TƆƆW LADON I KA SOO

6. An be se ka tɔɔw ladon cogo di?

6 A lɔnnin lo ko Ala sagokɛlaw be mɔgɔw ladon u ka soo. Bibulu kɔnɔ, gɛrɛkikan kumaden min bayɛlɛmana ko “ladon,” o kɔrɔ ko ka “ɲumanya kɛ lonanw ye.” (Eburuw 13:2). Ɲɛyirali dɔw be sɔrɔ Bibulu kɔnɔ minw b’an dɛmɛ k’a faamu an be se ka tɔɔw ladon cogo min na (Zɛnɛzi 18:1-5). Tuma o tuma, an ka ɲi ka tɛmɛ sababuw fɛ ka tɔɔw dɛmɛ hali n’u t’an “balima dannabaaw” ye. An ka la a la ko an be se k’o kɛ.—Gal. 6:10.

7. Nafa juman lo b’a la ka kudayi cidenya baarakɛlaw ladon an ka soo?

7 Kudayi cidenya baarakɛla minw mako be siyɔrɔ la, n’i b’u ladon i ka soo, i be baara kɛra ni Jehova ye (3 Zan 5, 8 kalan). Tuma caaman na, o be sababu di  an ma ka “ɲɔgɔn jaa gwɛlɛya.” (Ɔrɔm. 1:11, 12). An ka Olaf ka koo lajɛ. A kanbele tuma, kafokulu kɔrɔsibaga dɔ tun nana bɔ a ka kafo ye. O kafokulu kɔrɔsibaga tun ye cɛgwana ye ani a mako tun be siyɔrɔ la. Kafo kɔnɔ, mɔgɔ si tun tɛ se ka siyɔrɔ di a ma. Olaf bangebagaw tun tɛ Jehova Seerew ye. A y’u deli walisa kafokulu kɔrɔsibaga ka na si u ka soo. U sɔnna nka, u y’a fɔ ko Olaf ka ɲi ka si kanape kan. A y’o lo kɛ ani a ma nimisa o la. A ye wagati ɲuman kɛ ni kafokulu kɔrɔsibaga ye o lɔgɔkun na. Sɔgɔma o sɔgɔma, u tun be wuli joona walisa ka barokun diiman caaman lajɛ daraka tuma na. Kafokulu kɔrɔsibaga ye Olaf jija kosɔbɛ. O kama, Olaf y’a latigɛ ka kudayi cidenya baara kɛ. Saan 40 tɛmɛninw na, a ye misɔndenya baara kɛ jamana caaman na.

8. Hali ni mɔgɔw t’an waleɲuman lɔn, mun na an ka ɲi ka ɲumanya kɛ u ye? Ɲɛyirali dɔ fɔ.

8 I be se ka ɲumanya kɛ lonanw ye cogo caaman na, hali n’a daminɛ na mɔgɔw t’i waleɲuman lɔn o kosɔn. An ka ɲɛyirali dɔ lajɛ. Balimamuso dɔ be Ɛsipaɲi ani a tun be bibulukalan kɛra ni Yesica ye. Ale tun be bɔ Ekuwatɛri. Loon dɔ, Yesica tora ka kasi bibulukalan tuma na. Balimamuso y’a ɲininga fɛɛn min kɛra. Yesica y’a fɔ ko sanni ale ka na Ɛsipaɲi, ale ka fantanya tun ka jugu. Loon dɔ, foyi tun t’a fɛ k’a di a denmuso ma jii kɔ. A y’a ɲini k’a deen nigɛnigɛ walisa a ka sinɔgɔ ani a tora ka Ala deli a k’a dɛmɛ. Dɔɔni o kɔ, Jehova Seere fila nana bɔ a ye ani u ye zurunali dɔ di a ma. Nka, a y’u nɛni ani a y’o zurunali faran. A ko: “Aw b’a fɛ n’ ka nin lo di n’ denmuso ma a k’a dumu wa?” Balimamusow y’a ɲini k’a dusu saalo, nka Yesica ma mɛnni kɛ u fɛ. Kɔfɛ, u ye sinsin dɔ fa dumuni na ka na o bila a ka daa la. A tun be kasira sabu a y’a faamu ko Ala tun y’a ka delili jaabi, nka ale lo m’a janto o la. Sisan kɔni, a tun b’a fɛ n’a dusu bɛɛ ye ka Jehova sago kɛ. Siga t’a la, o balimamuso fila ye ɲumanya min kɛ, nafaba sɔrɔla o la!—Waaj. 11:1, 6.

SƆN K’I YƐRƐ DI KA JEHOVA KA BAARAW KƐ

9, 10. a) Sababu jumanw tun dira Israɛldenw ma u k’u yɛrɛ di ka baara kɛ Jehova ye? b) Bi, balimacɛw be se ka dɛmɛ don kafo kɔnɔ cogo di?

9 Galen, sababu caaman tun dira Israɛldenw ma u k’u yɛrɛ di ka baara kɛ Jehova ye (Ɛkiz. 36:2; 1 Til. Kib. 29:5; Neemi 11:2). Bi, sababu caaman b’ele fana fɛ k’i ka wagati, i bololafɛnw ani i ka setigiya kɛ k’i balimaw dɛmɛ. N’i sɔnna k’o kɛ, i bena ninsɔndiya kosɔbɛ ani i bena duga caaman sɔrɔ o la.

10 Ala ka Kuma be balimacɛw jija u ka baara kɛ ni Jehova ye. U be se k’o kɛ cogo di do? U k’a ɲini ka saratiw dafa walisa ka baara kɛ kafo kɔnɔ i ko kɔrɔsigi cidenw wala diinan mɔgɔkɔrɔw (1 Tim. 3:1, 8, 9; 1 Piyɛri 5:2, 3). Minw b’o kɛ, u ka ɲi k’a ɲini ka balimaw dɛmɛ cogo tigitigi dɔw la ani Alako ta fan fɛ (Kɛw. 6:1-4). Diinan mɔgɔkɔrɔw be se k’a ɲini balimacɛ dɔ fɛ a k’u dɛmɛ koo nunu dɔ la: ka mɔgɔw kunbɛn kafo kɔnɔ, ka sɛbɛw wala kiinw koo ɲɛnabɔ, ka Masaya Boon ladon wala ka koo wɛrɛ kɛ. Yala u delila k’o dɔ ɲini i fɛ wa? Minw b’o baaraw kɛ, olu y’a fɔ k’u be ninsɔndiyaba sɔrɔ o la.

N’an b’an yɛrɛ di ka Jehova ka baaraw kɛ, o be sababu caaman di an ma ka teri kuraw sɔrɔ (Dakun 11nan lajɛ)

11. Balimamuso dɔ ye teri minw sɔrɔ Jehova ka baaraw la, olu y’a dɛmɛ cogo di?

11 Minw b’u yɛrɛ di ka Jehova ka baaraw kɛ, olu ka teli ka teri kuraw sɔrɔ. An ka Margie ka koo lajɛ. Kabi saan 18, ale tun be dɛmɛ don walisa ka  Masaya Boonw lɔ. Saan caaman kɔnɔ, a ye fɔrɔmasɔn di sunguru caaman ma. A k’o kɛra sababu ɲuman ye u ye ɲɔgɔn jija Alako ta fan fɛ (Ɔrɔm. 1:12). Margie ye teri minw sɔrɔ o baaraw sababu fɛ, olu y’a jija kosɔbɛ gwɛlɛyaw wagati la. Yala i delila k’i yɛrɛ di walisa ka Masaya Boon n’a ɲɔgɔnnaw lɔ wa? I be se boonlɔ la wo, i tɛ se a la wo, i be se k’i yɛrɛ di k’o baara kɛ.

12. Ni balawo dɔ cunna, i be se k’i balimaw dɛmɛ cogo di?

12 Ni balawo dɔ cunna balimaw kan, an be se fana ka baara kɛ ni Ala ye k’u dɛmɛ. Ɲɛyirali fɛ, an be se ka wari di k’u dɛmɛ (Zan 13:34, 35; Kɛw. 11:27-30). An be se fana ka dɛmɛ don ka yɔrɔw saniya wala k’o balimaw ka boon tiɲɛninw lɔ. Balimamuso Gabriela be bɔ Polɔɲi jamana na. Sanjiba tun benna k’ale ka boon tiɲɛ kosɔbɛ. Kafo minw b’a ka soo gɛrɛfɛ, tuma min na o kafodenw nana a dɛmɛ, a ninsɔndiyara kosɔbɛ. A ko: “N’ bɔnɛna fɛɛn minw na, n’ t’a fɛ ka kuma olu koo la sabu bololafɛnw dama lo. Nka, n’ b’a fɛ k’a fɔ aw ye n’ ye nafa caaman minw sɔrɔ. O y’a to n’ y’a faamu ko ka kɛ kerecɛn kafo kɔnɔ, o ɲɔgɔn tɛ yen. Ka fara o kan, ne ye ninsɔndiyaba sɔrɔ.” Mɔgɔ minw ye dɛmɛ sɔrɔ balawow sen fɛ, u caaman y’a fɔ ko olu fana ye nafa caaman sɔrɔ o dɛmɛ barika la. Minw be baara kɛ ni Jehova ye k’o dɛmɛ ɲɔgɔn lase u balimaw ma, olu fana be ninsɔndiyaba sɔrɔ.—Kɛwaliw 20:35; 2 Korɛntikaw 9:6, 7 kalan.

13. N’an be sɔn k’an yɛrɛ di ka baara kɛ Jehova ye, o b’an ka jɛnɲɔgɔnya sabati n’a ye cogo di? Ɲɛyirali dɔ fɔ.

13 Balima dɔw tagara kalifa Etazini sabu kɛlɛ b’u ka jamana na. Stephanie ni weleweledala wɛrɛw ye ninsɔndiya sɔrɔ ka baara kɛ ni Ala ye k’o balimaw dɛmɛ. U y’o balimaw dɛmɛ ka boonw ani minan dɔw sɔrɔ. Stephanie y’a fɔ ko: “Balima minw be duniɲa kuru bɛɛ kɔnɔ, olu ye kanuya min yira o balimaw na, u y’u waleɲuman lɔn kosɔbɛ o kosɔn ani u ninsɔn diyara. O koo y’an dusukun sɔrɔ kosɔbɛ. O denbayamɔgɔw b’a miiri ko an y’u dɛmɛ. Nka tiɲɛn fɔ ka di, olu yɛrɛ lo y’an dɛmɛ kosɔbɛ.” A y’a fɔ  fana ko: “An y’a ye k’u be Jehova kanu, k’u limaniyanin lo ani k’u jigi lanin be Jehova kan. Tiɲɛn na, o koo ye dɔ fara an ka kanuya kan Jehova koo la. Ka fara o kan, o y’a to Jehova ka ɔriganisasiyɔn be fɛɛn minw bɛɛ di an ma, o fɛɛnw koo diyara an ye kosɔbɛ.”

DƆ FARA I KA WAAJULI BAARA KAN

14, 15. a) Ezayi tun be ni miiriya juman lo ye? b) Bi, kerecɛnw be se ka Ezayi ladegi cogo di?

14 Yala i b’a fɛ ka baara kɛ Jehova ye bɛrɛbɛrɛ wa? Yala a bena diya i ye ka taga dɛmɛ don yɔrɔ minw na weleweledalaw man ca wa? Tiɲɛn lo ko waajibi tɛ an ka taga yɔrɔ wɛrɛ walisa ka baara kɛ Jehova ye. Nka, balima dɔw be se k’o kɛ. U be ni kira Ezayi ka miiriya ɲɔgɔn ye. Tuma min na Jehova ye ɲiningali kɛ ko: “Ne bena jɔn ci? Jɔn le bena taga an ka cira la?” Ezayi y’a fɔ ko: “Ne filɛ nin ye. Ne ci.” (Ezayi 6:8). Yala i be se ani i b’a fɛ ka Jehova ka ɔriganisasiyɔn dɛmɛ wa? I be se k’o kɛ cogo jumanw na?

15 An be waajuli kɛ ani ka mɔgɔw dɛmɛ u ka kɛ Krista ka kalandenw ye. Ka ɲɛsin o koo ma, Yezu y’a fɔ ko: “Suman tigɛta ka ca, nga baarakɛlaw man ca. Aw ka forotigi daali a ka baarakɛlaw ci ka ta’a ka suman tigɛ.” (Mat. 9:37, 38). Yala i be se ka kɛ piyɔniye ye yɔrɔ min na waajulikɛlaw man ca wa? I be se ka mɔgɔ wɛrɛ dɛmɛ k’o kɛ wa? Balima caaman b’a latigɛ ka kɛ piyɔniyew ye yɔrɔ minw na waajulikɛlaw man ca. Mun na do? Sabu u b’a jati k’o ye fɛɛrɛ ɲuman ye k’a yira k’u be Jehova n’u mɔgɔɲɔgɔnw kanu. Yala i be se ka dɔ fara i ka waajuli baara kan cogo wɛrɛ la wa? N’i y’o kɛ i bena ninsɔndiyaba sɔrɔ o la.

16, 17. I be se ka baara kɛ bɛrɛbɛrɛ Jehova ye cogo wɛrɛ jumanw na?

16 Yala a bena diya i ye ka baara kɛ Betɛli la wala ka dɛmɛ don bonlɔbaara dɔ la Jehova ka ɔriganisasiyɔn kɔnɔ wa? I be se k’o kɛ tile kelen, tile damanin lɔgɔkun o lɔgɔkun wala wagati dɔ la. Tuma o tuma, Jehova ka ɔriganisasiyɔn mako be mɔgɔ sifa nunu lo la: minw be sɔn ka baara kɛ yɔrɔ minw na u mako be dɛmɛ na ani u be sɔn ka baara sifa bɛɛ kɛ, hali ni lɔnniya b’u fɛ koo tigitigi dɔ la. Mɔgɔ o mɔgɔ be ni yɛrɛsaraka hakili ye ani a be sɔn ka baara kɛ yɔrɔ min na u mako be dɛmɛ na, o mɔgɔ sifaw koo ka gwɛlɛ Jehova ma.—Zab. 110:3.

17 Yala i b’a fɛ ka fɔrɔmasɔn wɛrɛ sɔrɔ walisa ka baara kɛ Jehova ye bɛrɛbɛrɛ wa? N’o lo, i be se ka sɛbɛ dɔ dafa walisa ka taga Masaya waajulikɛlaw ka lakɔli kɛ. Balima minw be jɛnɲɔgɔnya ɲuman kɛra ni Jehova ye ani u be kudayi cidenya baara la, olu lo be weele o lakɔli la. U be fɔrɔmasɔn sɔrɔ o lakɔli la walisa ka se ka baara kɛ bɛrɛbɛrɛ Jehova ka ɔriganisasiyɔn kɔnɔ. Minw be sɛbɛ dafa walisa k’o lakɔli kɛ, lakɔli bannin kɔ, u mana u ci yɔrɔ o yɔrɔ, u ka ɲi ka sɔn ka taga. Yala a bena diya i ye ka fɔrɔmasɔn sɔrɔ o lakɔli sababu fɛ walisa ka baara kɛ bɛrɛbɛrɛ Jehova ye wa?—1 Kor. 9:23.

18. N’an be baara kɛ ni Jehova ye loon o loon, nafa juman b’o la?

18 Komi an ye Jehova sagokɛlaw ye, an b’an tɛgɛ labila ka mɔgɔw sɔn, an be ɲumanya kɛ u ye ani an b’u kanu. An b’an janto mɔgɔw la loon o loon. O b’a to an be hɛɛrɛ la, an ninsɔn ka di ani an dusukun lafiyanin lo (Gal. 5:22, 23). Jehova b’a tɛgɛ labila ka mɔgɔw sɔn. An ka koow cogoya mana kɛ min o min ye, an be se k’a ladegi ani ka ninsɔndiya sɔrɔ. An be se fana ka kɛ Jehova baarakɛɲɔgɔn ɲumanw ye!—Talenw 3:9, 10.