Taga a kɔnɔkow lajɛ

Taga a kɔnɔnakow lajɛ

Jɔn lo be Ala ka mɔgɔw ɲɛminɛna bi?

Jɔn lo be Ala ka mɔgɔw ɲɛminɛna bi?

“A’ ye aw hakili to aw ɲɛminɛbaaw la.”—EBURUW 13:7, ABM.

DƆNKILIW: 123, 126

1, 2. Yezu yɛlɛnin kɔ sankolo la, n’a sɔrɔ a ka cidenw y’u yɛrɛ ɲininga mun lo la?

YEZU ka kalandenw lɔnin be oliviye yiriw kulu kan ka to ka sankabaw filɛ. U y’u ka Matigi, u teri Yezu yɛlɛtɔ ye sanfɛ ani sankaba dɔ y’a datugu (Kɛw. 1:9, 10). Saan fila ɲɔgɔn kɔnɔ, Yezu y’u kalan, k’u jija ani k’u ɲɛminɛ. Sisan a tagara. U bena mun lo kɛ do?

2 Yezu ye cii di a ka kalandenw ma k’u bena ale ka “koow fɔ Zeruzalɛmu, ni Zude mara bɛɛ la, ani Samari mara la, fɔɔ ka taga se diɲɛ faan bɛɛ la.” (Kɛw. 1:8). U tun bena se k’o cii dafa cogo di? Tiɲɛn lo ko Yezu tun y’u hakili sigi ko yanni dɔɔni u bena hakili senu sɔrɔ (Kɛw. 1:5). Nka, walisa u ka se ka waajuli kɛ duniɲa kuru bɛɛ kɔnɔ fɔɔ mɔgɔ dɔw tun k’o baara ɲɛminɛ ani k’a labɛn. Galen, Jehova tɛmɛna a ka lasigidenw fɛ dugukolo kan walisa k’a ka jama labɛn. Nka, n’a sɔrɔ Yezu ka cidenw tun b’u yɛrɛ ɲiningara ko: “Yala Jehova bena ɲɛminɛbaga kura sigi sisan wa?”

3. a) Yezu yɛlɛnin kɔ sankolo la, a ka kalanden kantigimanw ye desizɔnba juman lo ta? b) An bena mun lo lajɛ barokun nin na?

 3 Yezu yɛlɛla sankolo la. Yanni lɔgɔkun fila ka se, a ka kalandenw ye Ala ka Kuma sɛgɛsɛgɛ ani ka Ala deli a k’u ɲɛminɛ. O kɔ, u ye Matiyasi sugandi walisa a ka kɛ ciden 12 nunu dɔ ye Zuda Isikariyɔti nɔɔ na (Kɛw. 1:15-26). Mun na o tun kɔrɔtanin lo Jehova ni cidenw fɛ? Cidenw y’a faamu ko ka kɛɲɛ ni Ala ka labɛnw ye, u tun ka ɲi ka kɛ mɔgɔ tan ni fila ye. * Yezu m’a ka cidenw sugandi walisa u ka tugu ale kɔ a ka waajuli baara la dɔrɔn! Nka, a y’u sugandi walisa u ka kunkanbaaraba dɔ dafa Ala ka mɔgɔw cɛma. O tun ye kunkanbaara juman lo ye? Yezu sababu fɛ, Jehova ye see d’u ma cogo di walisa u k’o dafa? O labɛn ɲɔgɔn juman lo kɛra Jehova sagokɛlaw cɛma bi tilew la? An be se k’an ‘hakili to an ɲɛminɛbagaw la’ cogo di sanko “jɔnkɛ dannamɔgɔ hakiliman”?—Eburuw 13:7; Mat. 24:45, ABM.

YEZU LO BE KOOW ƝƐNABƆLA JƐNKULU ƝƐMINƐ

4. Saan kɛmɛkulu fɔlɔ la, cidenw ani Zeruzalɛmu ka diinan mɔgɔkɔrɔ dɔw ka kunkanbaara tun ye juman lo ye?

4 Saan 33 Pantekɔte loon na, cidenw y’a daminɛ ka kerecɛn kafo ɲɛminɛ. O loon na, “Piyɛri tor’a tɔɲɔgɔn tan ni kelen nunu cɛma” ani a ye kisili kuma dɔw fɔ jama ye (Kɛw. 2:14, 15). U caaman kɛra kerecɛnw ye. O kɔ, u “tun be taga cidenw ka kalan lamɛn tuma bɛɛ.” (Kɛw. 2:42). Mɔgɔw tun be nili minw kɛ, cidenw tun b’o wari koo ɲɛnabɔ (Kɛw. 4:34, 35). U tun be Ala ka jama mako wasa Alako ta fan fɛ. U y’a fɔ ko: “Anw kɔni bena to ka Ala ka kuma fɔ, ani ka bila Ala daaliko ɲafɛ.” (Kɛw. 6:4). U ye kerecɛn kolɔnbagaw ci walisa u ka taga kibaro diiman jɛnsɛn dugu wɛrɛw la (Kɛw. 8:14, 15). Kɔfɛ, u ye diinan mɔgɔkɔrɔ dɔw sugandi kerecɛn mɔlenw cɛma ka fara u yɛrɛ kan walisa ka kafo ka koow ɲɛnabɔ. Olu lo kɛra Koow Ɲɛnabɔla Jɛnkulu ye min tun be kafow bɛɛ ɲɛminɛ.—Kɛw. 15:2.

5, 6. a) Mun b’a yira ko hakili senu tun be koow ɲɛnabɔla jɛnkulu kan? (Jaa lajɛ, barokun daminɛ na.) b) Mɛlɛkɛw y’u dɛmɛ cogo di? c) Ala ka Kuma y’u ɲɛminɛ cogo di?

5 Saan kɛmɛkulu fɔlɔ la, kerecɛnw tun b’a lɔn ko Yezu lo ye u Kuntigi ye ani ko Jehova be tɛmɛ ale lo fɛ ka koow ɲɛnabɔla jɛnkulu ɲɛminɛ. U tun y’o lɔn cogo di? A fɔlɔ, hakili senu tun be koow ɲɛnabɔla jɛnkulu kan (Zan 16:13). Hakili senu tun be kerecɛn mɔlenw bɛɛ kan. A ye cidenw ni Zeruzalɛmu ka diinan mɔgɔkɔrɔw yɛrɛ lo dɛmɛ kosɔbɛ k’u ka kunkanbaara dafa. Ɲɛyirali fɛ, saan 49 la, hakili senu ye koow ɲɛnabɔla jɛnkulu ɲɛminɛ ka desizɔn dɔw ta ka ɲɛsin kɛnɛkɛnɛli koo ma. Kafow y’o cikanw sira tagama ani “Krista ka jama jigi tun be sabatira ka taga ɲa. Loon o loon, dɔ tun be fara u kan.” (Kɛw. 16:4, 5). Lɛtɛrɛ min cira kafow ma ka ɲɛsin kɛnɛkɛnɛli koo ma, a kɔnɔkow b’a yira ko hakili senu tun be koow ɲɛnabɔla jɛnkulu kan. A tun b’a yira fana k’u tun be ni kanuya ani limaniya ye.—Kɛw. 15:11, 25-29; Gal. 5:22, 23.

6 A filanan, mɛlɛkɛw ye koow ɲɛnabɔla jɛnkulu dɛmɛ. Mɔgɔ fɔlɔ min batizera ka bɔ siya wɛrɛw la, o tun ye Kɔrinɛyi ye. Sanni a ka batize, mɛlɛkɛ dɔ y’a fɔ a ye ko a ka mɔgɔ ci ka taga  ciden Piyɛri weele. Piyɛri ye Kɔrinɛyi n’a somɔgɔw waaju. O kɔ, hakili senu jigira u kan k’a sɔrɔ u tun ma kɛnɛkɛnɛ. O ye cidenw ani balima tɔɔw lasun ka sɔn Ala sago ma ani ka sɔn fana ko siya wɛrɛ mɔgɔ minw ma kɛnɛkɛnɛ, olu be se ka kɛ kafoden dɔw ye (Kɛw. 11:13-18). Ka fara o kan, koow ɲɛnabɔla jɛnkulu tun be waajuli baara min ɲɛminɛna, mɛlɛkɛw ye dɛmɛ don o baara la kosɔbɛ (Kɛw. 5:19, 20). A sabanan, Ala ka Kuma ye koow ɲɛnabɔla jɛnkulu ɲɛminɛ. U tun be basigi Ala ka Kuma kan walisa ka desizɔnw ta ka ɲɛsin kerecɛnw ka lannakow ma ani ka kafo ɲɛminɛ.—Kɛw. 1:20-22; 15:15-20.

7. Mun na an be se k’a fɔ ko Yezu lo tun be kerecɛn fɔlɔw ɲɛminɛna?

7 Saan kɛmɛkulu fɔlɔ la, koow ɲɛnabɔla jɛnkulu lo tun be kafow ɲɛminɛ. Nka, u tun b’a lɔn ko Yezu lo y’u Ɲɛminɛbaga ye. Ciden Pol y’a sɛbɛ ko: “Ale Krista . . . le ye mɔgɔw boɲa ka seko d’u ma, dɔw ka kɛ cidenw ye . . . N’an be tiɲɛ fɔ kanuya la, an bena se ka taga ɲa fɔɔ ka se ka jɛn ni Krista ye kosɔbɛ, ale min ye Kuntigi ye.” (Efɛz. 4:11, 15). Ciden minw tɔgɔ bɔra kosɔbɛ, sanni u ka olu dɔ tɔgɔ la u yɛrɛ kan, Yezu ‘ka kalandenw weelela kerecɛnw.’ (Kɛw. 11:26). Cidenw ni diinan mɔgɔkɔrɔ dɔw lo tun ye ɲɛminɛbagaw ye. Ciden Pol y’a faamu k’o cɛɛw be basigi Ala Kuma kan ka “koo minw bɛɛ fɔ,” a kɔrɔtanin lo balimaw k’o “bato ka ɲa.” Nka, a y’a fɔ fana ko: ‘Ne b’a fɛ aw ka nin faamu kosɔbɛ: cɛɛ kelen kelen bɛɛ [koow ɲɛnabɔla jɛnkulu mɔgɔw fana] kuntigi, ye Krista ye, . . . Krista kuntigi ye Ala ye fana.’ (1 Kor. 11:2, 3). Tiɲɛn na, Jehova ye Yezu Krista sugandi ka kafow ɲɛminɛ.

“AN BE BAARA MIN KƐRA, O TƐ MƆGƆ KA BAARA YE”

8, 9. Saan 1870 daminɛ na, balimacɛ Russell ye mun lo kɛ min kɔrɔtanin lo?

8 Saan 1870 daminɛ na, Charles Taze Russell n’a ka baarakɛɲɔgɔn dɔw y’u seko kɛ ka tiɲɛn batoli sigi sen kan. Walisa ka se ka Bibulu ka kalanw jɛnsɛn kaan caaman na, saan 1884 la, u ye tɔɔn nin sigi sen kan: Zion’s Watch Tower Tract Society. Balimacɛ Russell lo tun y’o peresidan ye. * A tun ye Bibulu kalankɛla ŋana ye. Dɔw b’a fɔ ko Ala ye saba ye ani ko niin tɛ sa. Balimacɛ Russell tun tɛ siran k’a yira k’o kalanw ye ngalon ye. A y’a faamu ko mɔgɔw tɛna Krista natɔ ye ani ko “siyaw ka waati” bena dafa saan 1914 la (Luka 21:24). Balimacɛ Russell y’a ka wari, a ka fanga ani a ka wagati kɛ ka kibaro diiman fɔ mɔgɔw ye. Tiɲɛn na, o wagati la, Jehova ni Yezu tɛmɛna balimacɛ Russell fɛ k’u ka mɔgɔw ɲɛminɛ.

9 Balimacɛ Russell ma tɔgɔba ɲini adamadenw fɛ. Saan 1896 la, a y’a sɛbɛ ko: “An t’a fɛ mɔgɔw k’an tando ani ka bonya la an kan wala an ka sɛbɛw kan. An t’a fɛ u k’an weele pastɛri wala karamɔgɔ. An t’a fɛ fana u k’an tɔgɔ la mɔgɔ wala jɛnkulu dɔ kan.” Kɔfɛ, a y’a fɔ ko: “An be baara min kɛra, o tɛ mɔgɔ ka baara ye.”

10. a) Yezu ye “Jɔnkɛ dannamɔgɔ hakiliman” sigi sen kan tuma juman? b) A yirala cogo di ko Koow Ɲɛnabɔla Jɛnkulu n’an ka tɔɔn Watch Tower tɛ kelen ye?

10 Balimacɛ Russell sara saan 1916. Saan saba o kɔ (saan 1919), Yezu ye “Jɔnkɛ dannamɔgɔ hakiliman” sigi sen kan. Mun na do? Walisa u k’ale ka jɔɔnw ka “dumuni ko ɲɛnabɔ a waati latigɛlen na.” (Mat. 24:45, ABM). O wagati la, kerecɛn mɔlenw jɛnkulu dennin dɔ  tun be baara kɛ an ka sigiyɔrɔsoba la Brooklyn, Niyɔriki. U tun be dumuni labɛn Alako ta fan fɛ ka Yezu ka kalandenw balo. Saan 1940 wagati la, kumaden “koow ɲɛnabɔla jɛnkulu” y’a daminɛ ka bɔ an ka sɛbɛw kɔnɔ. O wagati la, balimaw tun b’a miiri ko an ka tɔɔn (Watch Tower Bible and Tract Society) lo tun ye koow ɲɛnabɔla jɛnkulu ye. Nka, saan 1971 la, u y’a faamu ko Koow Ɲɛnabɔla Jɛnkulu be dan na n’an ka tɔɔn ye. O tɔɔn sigikun tun ye k’an ka koow ɲɛnabɔ sariya ɲɛɛ kɔrɔ dɔrɔn. O kama, kerecɛn mɔlen tun be se ka kɛ Koow Ɲɛnabɔla Jɛnkulu mɔgɔ dɔ ye hali n’a t’o tɔɔn ɲɛmɔgɔ dɔ ye. A ma mɛɛn, balima minw be “saga wɛrɛw” cɛma, olu dɔw kɛra o tɔɔn ani an ka tɔɔn wɛrɛw ɲɛmɔgɔw ye. O cogo la, Koow Ɲɛnabɔla Jɛnkulu mɔgɔw tun be se k’u hakili bɛɛ sigi ka Ala ka mɔgɔw mako wasa Alako ta fan fɛ ani k’u ɲɛminɛ (Zan 10:16; Kɛw. 6:4). Saan 2013, zuwekalo tile 15nan ka Kɔrɔsili Sangaso y’a ɲɛfɔ ko: “Jɔnkɛ dannamɔgɔ hakiliman” ye kerecɛn mɔlenw jɛnkulu dennin dɔ ye. Olu lo ye Koow Ɲɛnabɔla jɛnkulu ye.

Koow ɲɛnabɔla jɛnkulu, saan 1950 wagati la

11. Koow Ɲɛnabɔla Jɛnkulu mɔgɔw be desizɔnw ta cogo di?

11 Koow Ɲɛnabɔla Jɛnkulu mɔgɔw be desizɔnbaw ta ɲɔgɔn fɛ. U be ɲɔgɔn lajɛn lɔgɔkun o lɔgɔkun. O b’a to kumaɲɔgɔnya ɲuman ni bɛn b’u ni ɲɔgɔn cɛ (Talenw 20:18). O jɛnkulu mɔgɔw bɛɛ be ni lɔyɔrɔ kelen ye. Saan o saan, u be mɔgɔ wɛrɛ lo sugandi u cɛma a b’u ka lajɛnw ɲɛminɛ (1 Piyɛri 5:1). Koow Ɲɛnabɔla Jɛnkulu be ni kɔmite wɔɔrɔ ye. Saan o saan, mɔgɔ wɛrɛ lo b’o kɔmite kelen kelen bɛɛ ka lajɛnw ɲɛminɛ fana. Koow Ɲɛnabɔla Jɛnkulu mɔgɔ si t’a jati ko ale ye balima tɔɔw ɲɛmɔgɔ ye. Nka, u kelen kelen bɛɛ b’a yɛrɛ jati ‘jɔɔn’ ye ani ko jɔncɛ kantigiman lo be dumuni di u ma Alako ta fan fɛ. U be sɔn k’o jɔncɛ ka cikanw sira tagama.

Kabi saan 1919 la, jɔncɛ kantigiman be dumuni labɛnna Ala ka mɔgɔw ye, Alako ta fan fɛ (Dakun 10, 11 lajɛ)

JƆNKƐ DANNAMƆGƆ HAKILIMAN YE JƆN YE?

12. An bena ɲiningali jumanw lo lajɛ?

12 Koow Ɲɛnabɔla Jɛnkulu mɔgɔw t’a fɔ k’u be min fɔra, hakili senu lo y’o don u daa la wala k’u ye mɔgɔ dafaninw ye. U be se ka fili n’u be Bibulu ka kalanw ɲɛfɔra wala n’u be Jehova ka jɛnkulu ɲɛminɛna. Kabi saan 1870, an ye faamuyali kura sɔrɔ Bibulu ka kalan dɔw koo la. U be sɔrɔ gafe Index des publications Watch Tower kɔnɔ cɛtigɛ nin jukɔrɔ: “Compréhensions affinées.” Yezu m’a fɔ ko jɔncɛ kantigiman bena Alakow ɲɛfɔ cogo dafanin na. An do be se ka Yezu ka ɲiningali nin jaabi cogo di: ‘Jɔnkɛ dannamɔgɔ hakiliman . . . ye jɔn ye?’ (Mat. 24:45. ABM). Mun lo b’a yira ko Koow Ɲɛnabɔla Jɛnkulu lo b’o kunkanbaara dafara? An ka koo saba lajɛ minw b’o jɛnkulu ɲɛminɛ bi i n’a fɔ saan kɛmɛkulu fɔlɔ la.

13. Hakili senu ye Koow Ɲɛnabɔla Jɛnkulu dɛmɛ cogo di?

13 Hakili senu b’u kan. Bibulu ka kalan minw tun ma faamu, hakili senu ye Koow Ɲɛnabɔla Jɛnkulu dɛmɛ ka faamuyali sɔrɔ u koo la. Ɲɛyirali fɛ, a fɔra dakun tɛmɛnin na ko an ye faamuyali kura sɔrɔ kalan dɔw koo la. Miiri u la. Mɔgɔ si tɛ se k’a fɔ ko ale lo y’o “koo dogoninw” faamu ani k’u ɲɛfɔ a yɛrɛ ma (1 Korɛntikaw 2:10 kalan). Koow Ɲɛnabɔla Jɛnkulu ka miiriya ye kelen ye ni ciden Pol taw ye. Ale y’a sɛbɛ ko: “An tɛ kuma ka kɛɲɛ ni adamaden ka lɔnniya ye, an be fɛɛn min fɔra, o ye Ala ka koo ye Nii Senuman ye min yira.” (1 Kor. 2:13). Mɔgɔw ye saan caaman kɛ dibiba la  Alako ta fan fɛ. Kabi saan 1919, siga t’a la, hakili senu lo y’an dɛmɛ ka koo caaman faamu Alako ta fan fɛ.

14. Ka kɛɲɛ ni Yirali 14:6, 7 ye, mɛlɛkɛw be Ala sagokɛlaw dɛmɛ cogo di bi?

14 Mɛlɛkɛw b’u dɛmɛ. Koow Ɲɛnabɔla Jɛnkulu be ni kunkanbaaraba ye bi tilew la. O ye ka waajulikɛla miliyɔn seegi ni kɔ ka waajulibaara ɲɛminɛ duniɲa kuru bɛɛ kɔnɔ. Mun lo y’a to o baara ɲɛna u bolo? A ɲɛna u bolo sabu mɛlɛkɛw niin b’o baara la (Yirali 14:6, 7 kalan). Tuma caaman na, k’a to mɔgɔ dɔw tun be dɛmɛ ɲinina Ala fɛ delili la, balimaw tagara bɔ u ye! * Jamana dɔw la, kɔrɔbɔliba be balimaw kan. O bɛɛ n’a ta, waajuli be tagara ɲɛ sabu mɛlɛkɛw be dɛmɛ don o baara la.

15. Faranfasi juman lo be Koow Ɲɛnabɔla Jɛnkulu ni kerecɛn tɔgɔtigiw ka kuntigiw cɛ? Ɲɛyirali dɔ di.

15 U b’a to Ala ka Kuma b’u ɲɛminɛ (Zan 17:17 kalan). An k’a lajɛ min kɛra saan 1973 la. O saan na, sɛtanburukalo tile fɔlɔ ka Kɔrɔsili Sangaso kɔnɔ, u tun ye ɲiningali kɛ ko: “Mɔgɔ minw ma sigarɛtimin dabila, yala u be se ka batize wa?” Jaabili dira a kɔnɔ ko: “Ka kɛɲɛ ni Bibulu ka fɔta ye, u tɛ se ka batize.” Bibulusen caaman kofɔra o Kɔrɔsili Sangaso kɔnɔ. O kɔ, a tun ɲɛfɔra a kɔnɔ fɛɛn min kama mɔgɔ min ma sigarɛtimin dabila, o tigi ka kan ka gwɛn  ka bɔ kafo kɔnɔ (1 Kor. 5:7; 2 Kor. 7:1). A tun fɔra ko: “An t’a fɛ ka mɔgɔw waajibiya ka koow kɛ wala k’an fanga digi u kan. Ala yɛrɛ lo y’o sariya sigi ani o be sɔrɔ a ka Kuma kɔnɔ.” Yala diinan dɔ be yen min b’a to Ala ka Kuma k’u ɲɛminɛ hali n’o be gwɛlɛya lase a ka diinan mɔgɔ dɔw ma wa? Etazini ka gafe dɔ be kuma diinanw koo la, a fɔra a kɔnɔ ko: “Kerecɛn diinan kuntigiw b’u ka kalanw yɛlɛma ka bɛn n’u ka diinandenw ani mɔgɔ caaman ka lannakow n’u ka miiriyaw ye walisa k’u ka dɛmɛ sɔrɔ.” Nka, Koow Ɲɛnabɔla Jɛnkulu b’a to Ala ka Kuma lo k’u ɲɛminɛ. O kama, an be se k’a fɔ ko Jehova yɛrɛ lo b’a ka mɔgɔw ɲɛminɛna bi tilew la.

“A’ YE AW HAKILI TO AW ƝƐMINƐBAAW LA”

16. An be se k’an hakili to Koow Ɲɛnabɔla Jɛnkulu la cogo di?

16 Bibulu b’a fɔ ko: “A’ ye aw hakili to aw ɲɛminɛbaaw la” (Eburuw 13:7, ABM). N’u ko k’an “hakili to,” o be se ka bayɛlɛma fana ko: k’u “kofɔ.” An be se k’an “hakili to” an ɲɛminɛbagaw la cogo min na, o ye ka Koow Ɲɛnabɔla Jɛnkulu kofɔ an ka deliliw la (Efɛz. 6:18). Miiri u ka kunkanbaaraw bɛɛ la. U be dumuni labɛn an ye Alako ta fan fɛ, u be waajuli baara ɲɛminɛ duniɲa kuru bɛɛ kɔnɔ ani nili minw be kɛ, u b’o wari koo ɲɛnabɔ. Tiɲɛn na, u mako b’a la an ka delili kɛ u ye kosɔbɛ!

17, 18. a) An be sɔn Koow Ɲɛnabɔla Jɛnkulu ka ɲɛminɛli ma cogo di? b) An be jɔncɛ kantigiman ni Yezu dɛmɛ cogo di an ka waajulibaara sababu fɛ?

17 K’an hakili to Koow Ɲɛnabɔla Jɛnkulu la, o tɛ dalakuma dɔrɔn ye. An ka ɲi ka sɔn a ka ɲɛminɛli ma fana. A be cikanw di an ma an ka gafew, lajɛnw ani lajɛnbaw sababu fɛ. A fana be kafokulu kɔrɔsibagaw sigi. Olu lo be diinan mɔgɔkɔrɔw sigi kafo kɔnɔ. Kafokulu kɔrɔsibagaw ni diinan mɔgɔkɔrɔw be Koow Ɲɛnabɔla Jɛnkulu ka cikanw sira tagama koɲuman. U b’a yira o cogo la k’u b’u hakili to a la. An Ɲɛminɛbaga Yezu be tɛmɛ olu lo fɛ k’an ɲɛminɛ bi. An bɛɛ b’a yira ko an be bonya la Yezu kan, n’an be mɛnni kɛ o cɛɛw fɛ ani ka kolo u ye.—Eburuw 13:17.

18 An b’a yira fana ko an b’an hakili to Koow Ɲɛnabɔla Jɛnkulu la, n’an b’an seko kɛ waajuli baara la. Ciden Pol ye kerecɛnw jija ko u ka u ɲɛminɛbagaw ka limaniya ladegi. Jɔncɛ kantigiman b’a jija ka Masaya kibaro diiman fɔ ani ka tɔɔw jija o la. A b’a yira o cogo la ko a ka limaniya barika ka bon. O baara kɔrɔtanin lo kosɔbɛ. Yala an b’u dɛmɛna o baara la wa? N’o lo, an dusu bena diya kosɔbɛ tuma min na an Ɲɛminɛbaga Yezu bena a fɔ ko: “Aw y’o koo nunu kɛ ne balima o balima ye, aw y’o kɛ ne le ye.”—Mat. 25:34-40.

19. Mun na i cɛsirinin lo ka tugu an Ɲɛminɛbaga Yezu kɔ?

19 Yezu kɔsegira sankolo la, nka a ma ɲinɛ a ka kalandenw kɔ (Mat. 28:20). A tun b’a lɔn ko tuma min na a tun be dugukolo kan, hakili senu, mɛlɛkɛw ani Ala ka Kuma y’a dɛmɛ ka Ala sagokɛlaw ɲɛminɛ. O kama, a b’o dɛmɛ ɲɔgɔn lase jɔncɛ kantigiman ma bi. An be se k’a fɔ jɔncɛ kantigiman mɔgɔw koo la ko: “Ni Sagaden tagara yɔrɔ o yɔrɔ, u be tugu a kɔ.” (Yir. 14:4). N’an be tugu u ka cikanw kɔ, an be tugura an Ɲɛminɛbaga Yezu lo kɔ. Yanni dɔɔni, a bena an ɲɛminɛ walisa an ka ɲɛnamaya banbali sɔrɔ (Yir. 7:14-17). Adamadenw ɲɛminɛbaga si tɛ se k’o di an ma!

^ dakun 3 Zeruzalɛmu kura ‘juu bena sigi kabakuru tan ni fila le kan.’ A gwɛnin lo ko Jehova tun y’a latigɛ ko ciden 12 lo bena kɛ o kabakuru 12 tagamasiɲɛ ye (Yir. 21:14). O kama, ciden kantigi dɔ tun mana sa, kuun tun t’a la ka mɔgɔ wɛrɛ bila a nɔɔ na.

^ dakun 8 Kabi saan 1955, o tɔɔn be weele ko: Watch Tower Bible and Tract Society of Pennsylvania.

^ dakun 14 Gafe nin lajɛ: Rends pleinement témoignage” Au sujet du Royaume de Dieu, ɲɛɛ 58-59.