1, 2. a) Mun na duniɲa nin be i n’a fɔ u be tagara ni kasoden min ye fagayɔrɔ la? (Jaa lajɛ, barokun daminɛ na.) b) Ni duniɲa jugu nin halakira ka ban, Ala ka danfɛnw bɛɛ bena mun lo miiri o koo la?

MIIRI k’a filɛ, garadiw be bɔra ni kojugukɛlaba dɔ ye kasobon kɔnɔ ani u be kulera a kan ko: “E kɔni ta banna!” Mun na u b’o fɔra? O cɛɛ bele be niin na ani a ka kɛnɛ. Nka, a ta banna sabu u be tagara a fagayɔrɔ le. Saya jalaki benna o cɛɛ kan minkɛ, an be se k’a fɔ ko ale ta banna. *

² O cogo kelen na, duniɲa nin be i n’a fɔ u be tagara ni kasoden min ye fagayɔrɔ la. Jalaki benna duniɲa jugu nin kan kabi wagatijan ani a halakituma surunyana. Bibulu b’a fɔ ko nin “diɲɛ . . . ye banta le ye.” (1 Zan 2:17). Siga t’a la, duniɲa nin bena ban. Nka, faranfasiba be yen duniɲa nin bancogo n’o kasoden ta cɛ. Saya jalaki min benna kasoden kan, dɔw be se k’o desizɔn sɔsɔ ani k’a fɔ k’o ye tilenbaliyako lo ye. N’a sɔrɔ u jigi b’a la k’o jalaki bena bɔ a kan. Nka, Jehova ye kiti min ben duniɲa jugu nin kan, o tɛna bila ka suma. O kiti tilennin lo ani mɔgɔ tɛna o sɔsɔ. Mun na do?  Sabu Jehova ye duniɲa kuru bɛɛ ka Masaba ye ani a be kiti tigɛ cogo dafanin na (Deter. 32:4). Duniɲa nin halakinin kɔ, Ala ka danfɛnw bɛɛ bena sɔn a ma ko Jehova ka kiti tilennin lo. O bena kɛ lafiya ye dɛ!

3. An bena koo naani jumanw lo lajɛ minw tɛna kɛ yen tugun ni Ala ka Masaya nana?

³ Nka, n’u ko “diɲɛ” nin ye “banta le ye,” o kɔrɔ ko di? Bi, mɔgɔw b’a miiri ko fɛɛn dɔw bena to kudayi, k’a sɔrɔ u caaman bena halaki. Yala o ye kibaro goman ye wa? Ayi, o tɛ kibaro goman ye fewu! O yɛrɛ ye “Ala ka [Masaya] kibaru diman” dɔ ye min kɔrɔtanin lo kosɔbɛ (Mat. 24:14). Nka, mun lo tɛna kɛ yen ni Ala ka Masaya nana? An ka koo naani lajɛ: Mɔgɔjuguw, jɛnkulu nanbaratɔw, kɛwale juguw ani dusukasikow. An bena a filɛ o koo kelen kelen bɛɛ be 1) nɔɔ min to an kan bi 2) Jehova bena min kɛ o koo la ani 3) a bena mun lo sigi u nɔɔ na.

4. Mɔgɔjuguw be nɔɔ to an kan cogo di?

⁴ Bi, mɔgɔjuguw be nɔɔ juman lo to an kan? Ciden Pol y’a fɔ ko laban loonw na, “waati bena gwɛlɛya.” O kɔ, a y’a fɔ ko: “Mɔgɔ minw ka jugu ani namaramɔgɔw, olu bena juguya ka taga ɲa.” (2 Tim. 3:1-5, 13). Yala i b’a yera k’o kiraya kumaw be dafara wa? Benkannikow, kɔniya, fariyakow n’a ɲɔgɔnnaw delila ka kɛ an caaman na. Kojugukɛla caaman t’u ka kɛwalew dogo yɛrɛ. Dɔ wɛrɛw b’a kɛ i n’a fɔ u b’a fɛ ka mɔgɔw dɛmɛ, k’a sɔrɔ u b’a fɛ ka koo jugu lo kɛ u la. Hali ni mɔgɔjuguw tɛ koo jugu kɛ an yɛrɛ lo la, u ka kɛwale juguw be nɔɔ to an kan. N’an y’u ka kɛwale juguw koo mɛn, o b’an dusu kasi. U be denmisɛnw, mɔgɔkɔrɔbaw ani dɛsɛbagatɔw tɔɔrɔ cogo min na, n’an y’o mɛn, o fana b’an dusu kasi. Mɔgɔjuguw ka kɛwalew be i n’a fɔ bɛgɛnw ni kongosogow wala jinaw (Zaki 3:15). Nka, kibaro diiman dɔ be sɔrɔ Jehova ka Kuma kɔnɔ min b’an ninsɔndiya kosɔbɛ!

5. a) Sababu juman lo dira mɔgɔjuguw ma? b) Mɔgɔjugu minw be ban k’u sɔɔn yɛlɛma mun lo bena olu sɔrɔ?

⁵ Jehova bena mun lo kɛ do? Bi, Jehova be sababu di mɔgɔjuguw ma u k’u sɔɔn yɛlɛma (Ezayi 55:7). Hali ni duniɲa jugu nin bena halaki yanni dɔɔni, kiti ma tigɛ mɔgɔjugu kelen kelen bɛɛ kan fɔlɔ. Nka, mɔgɔ dɔw be ban k’u sɔɔn yɛlɛma ani u be duniɲa jugu nin ka koow lafasa. Ni tɔɔrɔba wagati sera k’a sɔrɔ u m’u sɔɔn yɛlɛma, mun lo bena u sɔrɔ? Jehova ye layidu ta ko a bena mɔgɔjuguw bɛɛ halaki pewu ka bɔ dugukolo kan (Zaburuw 37:10 kalan). Mɔgɔjuguw be se k’a miiri ko foyi tɛna olu sɔrɔ. Mɔgɔ caaman b’u ka koo jugu dogo ani tuma caaman na, u t’u ɲangi (Zɔbu 21:7, 9). Nka, Bibulu b’a fɔ ko: “Ala ɲaa be bɛɛ taamacogo la, a be bɛɛ ka tɛmɛsiraw filɛra. Dibi si te yen, kojugukɛlaw be se ka dogo min na.” (Zɔbu 34:21, 22). Foyi tɛ se ka dogo Jehova Ala la. Ngalontigɛla si tɛ se k’a lafili. Koo jugu minw be kɛ dibi la, Jehova ɲɛɛ b’u bɛɛ la, o dibi mana kɛ cogo o cogo. Arimagedɔn kɛlɛ bannin kɔ, an bena mɔgɔjuguw sigiyɔrɔ filɛ, an tɛna u ye. U bena halaki pewu!—Zab. 37:12-15.

6. Ni mɔgɔjuguw bɛɛ halakira, jɔn lo bena to u nɔɔ na? Mun na o ye kibaro diiman ye?

⁶ Ni mɔgɔjuguw bɛɛ halakira, jɔn lo bena to u nɔɔ na? Jehova ye layidu ta ko: “Mɔgɔmajigininw bena jamana  nin tigiya kɛ, u bena hɛrɛ dafanin sɔrɔ.” O kɔ, a y’a fɔ ko: “Mɔgɔtilenninw le bena jamana nin tigiya kɛ, u bena to yen kudayi.” (Zab. 37:11, 29). “Mɔgɔmajigininw” ani “mɔgɔtilenninw” ye jɔn lo ye? Mɔgɔ minw b’a ɲini ka Jehova lɔn ani k’a ka ladiliw sira tagama, olu lo ye mɔgɔ majigininw ye. Jehova be fɛɛn min jati tilenninyako ye, mɔgɔ minw b’o kɛ n’u dusu bɛɛ ye, olu lo ye mɔgɔ tilenninw ye. Duniɲa nin kɔnɔ, mɔgɔjuguw ka ca ka tɛmɛ mɔgɔ tilenninw kan. Nka, duniɲa kura kɔnɔ, mɔgɔ majigininw ni mɔgɔ tilenninw dɔrɔn lo bena kɛ yen. Tiɲɛn na, olu lo bena dugukolo kɛ alijɛnɛ ye!

7. Jɛnkulu nanbaratɔw be nɔɔ juman lo to an kan bi?

⁷ Jɛnkulu nanbaratɔw be nɔɔ jugu juman lo to an kan bi? Koo jugu minw be kɛ duniɲa kɔnɔ, u fanba tɛ mɔgɔ kelen nɔɔ ye, nka jɛnkuluw nɔɔ lo. Miiri k’a filɛ, diinan jɛnkuluw ye mɔgɔ miliyɔn caaman lafili cogo min na. U tɛ tiɲɛn fɔ mɔgɔw ye Ala ani Bibulu koo la. Ala bena min kɛ adamadenw ye ani dugukolo bena kɛ min ye, u tɛ tiɲɛn fɔ o koow la fana. U be ngalon tigɛ mɔgɔw ye koo caaman na fana. Ka fara o kan, gofɛrɛnɛman dɔw be mɔgɔw jija ka kɛlɛ kɛ ani u be jamanadenw lasun u ka wuli ɲɔgɔn kama. U be fantanw ni barikantanw tɔɲɔ. U be nanbarakow kɛ ani ka mɔgɔ dɔw fisaya dɔ wɛrɛw ye. Wasabaliya kosɔn, baarada dɔw be yɔrɔw nɔgɔ ani ka dugukolo ka nafolofɛnw tiɲɛ. U be nanbarakow kɛ fana walisa ka wari caaman sɔrɔ k’a sɔrɔ mɔgɔw fanba be fantanya la. Siga t’a la, fantanya min be duniɲa kɔnɔ bi, o ye jɛnkulu nanbaratɔw lo nɔɔ ye.

8. Hali ni mɔgɔ caaman b’a miiri ko jɛnkulu dɔw juu siginin lo ka ɲɛ, Bibulu b’a yira ko mun lo bena u sɔrɔ?

⁸ Jehova bena mun lo kɛ do? Tɔɔrɔba bena daminɛ tuma min na politiki jɛnkuluw bena wuli Babilonɛba kama k’a kɛlɛ. Bibulu kɔnɔ, Babilonɛba ye duniɲa kuru bɛɛ ka ngalon diinanw jɛnkuluw lo ye. A be weele fana ko jatɔmuso (Yir. 17:1, 2, 16; 18:1-4). O diinanw jɛnkuluw bena halaki pewu. Nka, mun lo bena jɛnkulu nanbaratɔ tɔɔw sɔrɔ? Bibulu b’a fɔ ko mɔgɔw ɲɛɛ na, o jɛnkuluw sabatinin lo i n’a fɔ kuluw wala guunw (Yirali 6:14 kalan). Nka, a b’a fɔ fana ko gofɛrɛnɛmanw n’u ka jɛnkulu nanbaratɔw bena halakili tɔɔrɔba laban na. Mɔgɔ minw b’u dɛmɛ ka Ala ka Masaya kɛlɛ, olu bɛɛ bena halaki fana (Zer. 25:31-33). O kɔ, jɛnkulu nanbaratɔ si tɛna kɛ yen tugun!

9. Mun na i be se ka la a la ko koo ferekenin si tɛna kɛ duniɲa kura kɔnɔ?

⁹ Mun lo bena sigi jɛnkulu nanbaratɔw nɔɔ na? Arimagedɔn kɛlɛ bannin kɔ, yala jɛnkulu dɔ bena kɛ dugukolo kan tugun wa? Bibulu b’a fɔ an ye ko: “A y’a daa di sankolokura ni dugukolokura min koo la, an be olu makɔnɔna. Tilenninyako dama le bena kɛ o yɔrɔ la.” (2 Piyɛri 3:13). O la, sankolokɔrɔ ye gofɛrɛnɛman nanbaratɔw lo ye. Dugukolokɔrɔ ye mɔgɔjuguw lo ye, o gofɛrɛnɛmanw be kuntigiya kɛra minw kan. Olu bɛɛ bena halaki. Mun lo bena sigi u nɔɔ na do? “Sankolokura ni dugukolokura” lo bena sigi u nɔɔ na. “Sankolokura” ye gofɛrɛnɛman kura lo ye, o kɔrɔ, Ala ka Masaya. Yezu Krista n’a ka marakɛɲɔgɔnw, mɔgɔ 144000 lo bena kɛ o gofɛrɛnɛman kun na. “Dugukolokura” ye mɔgɔ tilenninw ye, Ala ka Masaya  bena kuntigiya kɛ minw kun na. Jehova Ala tɛ koo ferekenin Ala ye. Yezu Krista min be Ala ka Masaya kun na, ale bena Ala ladegi cogo dafanin na (1 Kor. 14:33). “Dugukolokura” fana bena labɛn koɲuman. Mɔgɔ tilennin dɔw lo bena koow labɛn (Zab. 45:17). Yezu ni mɔgɔ 144000 lo bena u ɲɛminɛ. Miiri k’a filɛ, jɛnkulu nanbaratɔ si tɛ yen tugun! Nka, jɛnkulu kelenpe lo bena sigi u nɔɔ na: Bɛɛn b’o jɛnkulu mɔgɔw cɛ, ani nanbarako si tɛ kɛ!

10. I be yɔrɔ min na, mɔgɔw ka teli ka koo jugu jumanw lo kɛ yen? U be nɔɔ juman lo to ele n’i somɔgɔw kan?

¹⁰ Kɛwale juguw be nɔɔ juman lo to an kan bi? Koo juguw fanin be duniɲa nin kɔnɔ: Kakalayakow, nanbarakow ani fariyakow. Wolobagaw ka ɲi ka bondori kɛ walisa k’u deenw tanga o kɛwale juguw ma. Mɔgɔ minw be ɲɛnagwɛkow labɛn, olu be koow yira cogo wɛrɛ la. U be koo haramulenw kɛ koo ɲumanw ye. O cogo la, Jehova ye sariya minw sigi ɲuman ni juguman koo la, u b’o mafiɲɛya (Ezayi 5:20). Nka, kerecɛn sɔbɛw be banba walisa k’u yɛrɛ tanga duniɲa ka miiriya juguw ma. Mɔgɔw be Jehova ka sariyaw mafiɲɛya yɔrɔ bɛɛ. O kama, kerecɛnw ka ɲi ka bondori kɛ walisa ka to kantigiya la.

11. Jehova ye Sodɔmu ni Gɔmɔri halaki. An be kalan juman lo sɔrɔ o koo la?

¹¹ Koo jugu minw be kɛra bi, Jehova bena mun lo kɛ u koo la? Koo jugu minw tun be kɛra Sodɔmu ni Gɔmɔri duguw la, miiri k’a filɛ Jehova ye min kɛ u koo la (2 Piyɛri 2:6-8 kalan). Lɔti tun ye mɔgɔ tilennin ye. Nka, ale n’a ka denbaya tun tɔɔrɔnin lo o dugumɔgɔw ka kɛwale juguw kosɔn. Jehova y’o duguw halaki walisa ka koo jugu ban pewu o yɔrɔ la. A y’o kɛ fana walisa “k’a yira ko Alaɲasiranbaliw bena kɛ ten le.” Koo jugu minw bɛɛ tun be kɛra o yɔrɔ la, Jehova y’o bɛɛ ban. Bi fana, a bena kɛwale juguw bɛɛ ban, tuma min na a bena duniɲa jugu nin halaki.

12. E kɔrɔtɔnin lo ka baara jumanw lo kɛ, duniɲa juguman nin halakinin kɔ?

¹² Mun lo bena kɛ kɛwale juguw nɔɔ na? Alijɛnɛ kɔnɔ, an bena baara minw bɛɛ kɛ, u bena an ninsɔndiya. Miiri k’a filɛ, an bena baara minw kɛ walisa ka dugukolo yɛlɛma k’a kɛ alijɛnɛ ye. An bena soow lɔ an yɛrɛ ye ani an ka mɔgɔ sɔbɛw ye. O bena kɛ ninsɔndiya baara ye dɛ! Miiri k’a filɛ fana, mɔgɔ miliyɔn caaman minw bena kunu ka bɔ suuw cɛma, an bena se k’olu bisimila. O kɔ, an bena u kalan Jehova koo la. A ye fɛɛn minw bɛɛ kɛ adamadenw ye, an bena u kalan o la fana (Ezayi 65:21, 22; Kɛw. 24:15). Baara minw b’an ninsɔndiya ani minw be Jehova tando, an bena o baaraw lo kɛ!

13. Murutili min kɛra Edɛn nankɔ kɔnɔ, a nɔfɛkow ye mun lo ye?

¹³ Dusukasikow be mun lo kɛ an na bi? Mɔgɔjuguw, jɛnkulu nanbaratɔw ani kɛwale juguw kosɔn dusukasikow be mɔgɔw kan. Jɔn lo be se k’a fɔ ko koo nunu dɔ m’ale tɔɔrɔ ka ye: marifakɛlɛw, fantanya, siyawoloma, bana ani saya? O koow b’a to an bɛɛ be tɔɔrɔ. O koow b’an sɔrɔ sabu mɔgɔjugu saba nunu murutira Jehova ma: Sutana, Adama ani Awa. K’an to duniɲa jugu nin kɔnɔ, an si tɛ se k’an yɛrɛ tanga u ka murutili nɔfɛkow ma.

14. Jehova bena mun lo kɛ ka ɲɛsin dusukasikow ma? Ɲɛyirali dɔ fɔ.

¹⁴ Jehova bena mun lo kɛ ka ɲɛsin  dusukasikow ma? An k’a filɛ a bena min kɛ marifakɛlɛw koo la. Jehova ye layidu ta ko a bena marifakɛlɛw ban pewu! (Zaburuw 46:9, 10 kalan). Bana do? A bena banaw fana ban pewu! (Ezayi 33:24). Saya fana tɛna kɛ yen tugun! (Ezayi 25:8). Jehova bena fantanya fana ban pewu! (Zab. 72:12-16). Koo o koo be adamadenw tɔɔrɔ bi, a bena o bɛɛ ban. Sutana n’a ka jinɛw be nɔɔ jugu min to adamadenw kan, Jehova bena daan sigi o la fana.—Efɛz. 2:2.

15. Koo jumanw lo tɛna kɛ yen tugun abada Arimagedɔn kɛlɛ bannin kɔ?

¹⁵ Miiri k’a filɛ ɲɛnamaya bena kɛ cogo min na ni marifakɛlɛ, bana ani saya tɛ yen tugun! Sɔrɔdasiw, bato ni awiyɔn minw dilanna kɛlɛ kama, marifaw ani fɛɛn minw be mɔgɔ hakili jigi kɛlɛw la, olu bɛɛ bena tunu pewu! An mako tɛna kɛ dɔgɔtɔrɔsow, dɔgɔtɔrɔw, subilayɔrɔw ani kaburutuw la tugun. Fariyakow tɛna kɛ tugun. O kama, an mako tɛna kɛ garadiw, polisiw, alarmuw ani sɔgɔnanw na tugun. Koo minw bɛɛ b’an hakili ɲagami ani ka hami bila an na, olu bɛɛ bena ban!

16, 17. a) Minw bena kisi Arimagedɔn kɛlɛ la, olu bena lafiya juman lo sɔrɔ? Ɲɛyirali dɔ fɔ. b) An be se ka la a la cogo di ko an bena kisi duniɲa nin halakituma na?

¹⁶ Ni dusukasikow bɛɛ banna, ɲɛnamaya bena kɛ cogo di? A man nɔgɔ ka miiri o la. An mɛɛnna duniɲa juguman nin kɔnɔ, fɔɔ n’a sɔrɔ an yɛrɛ t’a lɔn ko dusukasikow be nɔɔba tora an kan. Ɲɛyirali fɛ, mɔgɔ minw ka soo be tɛrɛn gari gɛrɛfɛ, a mɛɛn o mɛɛn, a be kɛ komi tɛrɛn mankan t’u tɔɔrɔ tugun. Minw ka soo be ɲamanton gɛrɛfɛ, a laban, a be kɛ komi u tɛ ɲamaɲamaw kasa mɛn tugun. Nka, ni tɛrɛn mankan ani o ɲamanton tɛ yen tugun, o ye lafiya dan lo ye!

¹⁷ Dusukasiko minw b’an kan sisan, n’olu tɛ yen tugun, mun lo bena kɛ olu nɔɔ na? Zaburuw 37:11 b’a fɔ ko: “Mɔgɔmajigininw bena jamana nin tigiya kɛ, u bena hɛrɛ dafanin sɔrɔ.” Yala o kumaw tɛ i dusu diya wa? Jehova b’a fɛ k’o lo kɛ i ye. O kama, laban loon gwɛlɛman nunu na, i seko bɛɛ kɛ ka to Jehova gɛrɛfɛ ani ka to a ka ɔriganisasiyɔn kɔnɔ! I be ni jigiya min ye, o jati fɛɛn nafamanba ye. Miiri a la koɲuman ani a to i hakili n’i dusukun na k’o ye sɔbɛko lo ye. O jigiya kofɔ mɔgɔ wɛrɛw ye (1 Tim. 4:15, 16; 1 Piyɛri 3:15). N’i y’o kɛ, siga t’a la, i tɛna halaki duniɲa jugu nin halakituma na. Nka, i bena kisi ani i bena ɲɛnamaya kɛ ninsɔndiya la fɔɔ abada!