Taga a kɔnɔkow lajɛ

Taga a kɔnɔnakow lajɛ

 BAROKUN KALANTA KAFO KƆNƆ 3

I koo ka gwɛlɛ Jehova ma!

I koo ka gwɛlɛ Jehova ma!

“Tuma min na an dusu tun kasinin lo, a y’a hakili to an na.”​—ZAB. 136:23, NW.

DƆNKILI 33 “Jette ton fardeau sur Jéhovah” (“E k’i ka koow to Masaba bolo”)

BAROKUN KƆNƆNAKOW *

1-2. Gwɛlɛya jumanw lo be Jehova sagokɛla caaman kan? O be se ka nɔɔ juman lo to u kan?

AN KA koo saba nunu lajɛ: Dɔgɔtɔrɔ y’a fɔ balima kanbele dɔ ye ko bana jugu dɔ b’a la ani ko a barika bena to ka dɔgɔya ka taga o bana kosɔn. Balimacɛ dɔ be ni saan 50 ni kɔ ye ani a ka baara tiɲɛna. A ka jijaliw bɛɛ n’a ta, a ma baara wɛrɛ sɔrɔ. Balima musokɔrɔba kantigi dɔ tɛ sera ka bɛrɛ kɛ tugun Jehova ka baara la.

2 N’o gwɛlɛyaw ɲɔgɔn dɔ b’i kan, i be se k’a miiri ko nafa t’i la tugun. O be se k’a to fana i ka ninsɔndiya be nagasi, i tɛ kɛ ni miiriya ɲuman ye i yɛrɛ koo la ani k’a to i be jɛnɲɔgɔnya min kɛra ni tɔɔw ye, o be nagasi.

3. Sutana ani a be minw ɲɛminɛna, olu be adamaden niin jati cogo di?

3 Duniɲamɔgɔw be adamaden niin jati i ko Sutana b’a jati cogo min na. Sutana b’a jati tuma bɛɛ ko nafa foyi tɛ adamadenw na. A y’a fɔ Awa ye ko a bena hɔɔrɔnya n’a ye Ala kaan bila, a do tun b’a lɔn k’o nɔfɛko ye saya lo ye. O ye kɔnɔnajuguya yɛrɛ lo ye! Sutana lo be duniɲa nin ka jagokow, politikikow ani diinankow ɲɛminɛna. O la, a tɛ bari an na k’a ye ko jagokɛlaw ni politikimɔgɔ caaman ani diinan kuntigiw fanba tɛ bonya la adamaden niin kan. U tɛ danbe la mɔgɔw kan fana.

4. An bena mun lo lajɛ barokun nin na?

4 Nka, Jehova b’a fɛ an ka kɛ ni miiriya ɲuman ye an yɛrɛ koo la. Ni koo dɔw y’an sɔrɔ minw be se k’a to  an b’a miiri ko nafa foyi t’an na, a b’an dɛmɛ (Zab. 136:23; Ɔrɔm. 12:3). Barokun nin bena an dɛmɛ k’a faamu cogo min na Jehova b’an dɛmɛ koo nunu na: 1) Ni bana dɔ b’an tɔɔrɔla, 2) ni fantanya b’an na ani 3) ni kɔrɔya b’a to an b’a miiri ko an tɛ se ka bɛrɛ kɛ tugun Jehova ka baara la. An k’a filɛ fɔlɔ fɛɛn min kama an be se ka la a la ko an kelen kelen bɛɛ koo ka gwɛlɛ Jehova ma.

AN KOO KA GWƐLƐ JEHOVA MA

5. Mun lo b’a yira ko adamadenw koo ka gwɛlɛ Jehova ma?

5 An danna ni bɔgɔ ye. Nka, an nafa ka bon ni bɔgɔ ye fɔɔ ka taga ka na (Zɛnɛzi 2:7). An b’a lɔn cogo di ko an koo ka gwɛlɛ Jehova ma? An ka koo damanin lajɛ. Jehova ye adamaden dan ka see di a ma a k’ale ka jogow ladegi (Zɛnɛzi 1:27). O cogo la, a y’a kɛ an lɔyɔrɔ ka bon ni danfɛn tɔɔw bɛɛ ta ye dugukolo kan. A y’an sigi dugukolo ani bɛgɛnw kuun na.​—Zab. 8:5-9.

6. Koo wɛrɛ juman b’a to an lanin b’a la ko adamaden dafabaliw koo ka gwɛlɛ Ala ma?

6 Jehova tora ka adamadenw kanu hali Adama ni Awa ka jurumu kɛnin kɔ. An koo ka gwɛlɛ a ma fɔɔ a y’a Dencɛ kanulen di k’a kɛ kunmabɔsara ye an ka jurumuw kosɔn (1 Zan 4:9, 10). Jehova bena kunmabɔsara nafaw lase adamadenw ma. Minw sara Adama ka jurumu kosɔn, a bena olu lakunu. Jehova bena “mɔgɔ tilennenw ni mɔgɔ tilenbaliw” lakunu (Kɛw. 24:15, Bible senuma). Bibulu b’a yira ko an koo ka gwɛlɛ Ala ma hali n’an man kɛnɛ, an kɔrɔla wala fantanya b’an na.​—Kɛw. 10:34, 35.

7. Koo wɛrɛ jumanw b’a to an lanin b’a la ko an koo ka gwɛlɛ Jehova ma?

7 Koo wɛrɛw b’a to an lanin b’a la ko an koo ka gwɛlɛ Jehova ma. A y’an dɛmɛ an y’an magwɛrɛ a la ani an tun be kibaro diiman jati cogo min na, a y’o kɔrɔsi (Zan 6:44). Tuma min na an y’a daminɛ k’an magwɛrɛ a la, ale fana y’a magwɛrɛ an na (Zaki 4:8). A be wagati ta ani ka jijaliw kɛ k’an kalan fana. A b’a yira o cogo la ko an koo ka gwɛlɛ a ma. A b’a lɔn an ye mɔgɔ sifa min ye sisan ani an be se k’an ka jogow fisaya cogo min na. A b’an kolo sabu a b’an kanu (Talenw 3:11, 12). O dalilu barikamanw b’a yira ko an koo ka gwɛlɛ Jehova ma!

8. Zaburuw 18:28-30 kɔnɔnakumaw b’an dɛmɛ cogo di an k’an ka gwɛlɛyaw filɛ ni ɲɛɛ ɲuman ye?

8 Dɔw tun b’a jati ko nafa foyi tɛ masacɛ Dawuda la. Nka, ale tun b’a lɔn ko a koo ka di Jehova ye ani ko a b’a dɛmɛna. O y’a dɛmɛ k’a ka gwɛlɛyaw filɛ ni ɲɛɛ ɲuman ye (2 Sam. 16:5-7). N’an dusu kasinin lo wala ni gwɛlɛyaw b’an kan, Jehova be se k’an dɛmɛ an ka koow filɛ ni ɲɛɛ ɲuman ye. An ka gwɛlɛya mana kɛ min o min ye, a be se k’an dɛmɛ ka see sɔrɔ a kan (Zaburuw 18:28-30 kalan). N’an be ni Jehova ka dɛmɛ ye, foyi tɛ se k’an bali k’a ka baara kɛ ninsɔndiya la (Ɔrɔm. 8:31). An ka koo saba lajɛ o minw na an ka ɲi k’a to an hakili la ko an koo ka gwɛlɛ Jehova.

N’AN MAN KƐNƐ

Bana be se k’a to an be kɛ ni miiriya jugu minw ye, n’an be Jehova ka Kuma kalan, o bena an dɛmɛ ka see sɔrɔ u kan (Dakun 9-12nan lajɛ)

9. Bana be se k’a to an be kɛ ni miiriya sifa jumanw lo ye an yɛrɛ koo la?

9 Bana be se k’a to an be kɛ ni miiriya juguw ye ani k’a to an b’a jati ko nafa t’an na tugun. Ni mɔgɔw y’a kɔrɔsi ko an tɛ se ka koo dɔw kɛ wala n’an ka ɲi ka  dɛmɛ ɲini u fɛ, o be se ka maloya bila an na. Hali ni tɔɔw t’an ka bana kala ma, an be se ka maloya sabu an tɛ sera ka koow kɛ i ko fɔlɔ la. Jehova b’an barika bonya o wagati la. Cogo di do?

10. Ka kɛɲɛ ni Talenw 12:25 ye, mun lo be se k’an dɛmɛ n’an man kɛnɛ?

10 N’an man kɛnɛ, “kumaɲuman” be se k’an barika bonya (Talenw 12:25 kalan). Jehova y’a kɛ u ye kuma ɲuman caaman sɛbɛ Bibulu kɔnɔ minw b’an hakili jigi ko hali n’an man kɛnɛ, an koo ka gwɛlɛ a ma (Zab. 31:20; 41:4). An ka to ka Ala ka Kuma kalan ani ka segi vɛrisew kan. O la, bana y’a to an be ni miiri jugu minw ye, Jehova bena an dɛmɛ ka see sɔrɔ u kan.

11. Jehova ye balimacɛ dɔ dɛmɛ cogo di?

11 An ka Jorge ka koo lajɛ. Kanbele lo ani bana jugu dɔ y’a minɛ. O bana tora ka juguya joona joona. O y’a to a tun b’a miiri ko nafa foyi t’ale la. A ko: “N’ ka bana tun b’a to mɔgɔw be to ka n’ filɛ ani o tun be maloya bila n’ na. N’ tun ma labɛn o kama. Tuma min na n’ ka bana tora ka juguya, n’ tora ka miiri o tun bena n’ ka ɲɛnamaya yɛlɛma cogo min na. O ye n’ hakili ɲagami pewu. N’ ye Jehova deli a ka n’ dɛmɛ.” Jehova y’a dɛmɛ cogo di? Jorge ko: “N’ tun tɛ se ka kalan kɛ wagatijan kɔnɔ. O kama, u ye n’ jija ko n’ ka vɛrise damanin kalan Zaburuw kɔnɔ, minw b’a yira ko Jehova b’a janto a sagokɛlaw la. N’ tun be segi o vɛrisew kan loon o loon. O ye n’ dusu saalo ani ka n’ hakili sigi. Wagati damanin o kɔ, mɔgɔw y’a kɔrɔsi ko n’ be yɛlɛmisɛn kɛ ka tɛmɛ fɔlɔ kan. U yɛrɛ ko n’ be koow filɛ ni ɲɛɛ ɲuman ye minkɛ, o y’u jija.  N’ y’a faamu ko Jehova ye n’ ka deliliw jaabi! N’ tun be min miiri n’ yɛrɛ koo la, a ye n’ dɛmɛ k’o yɛlɛma. Jehova be n’ jati cogo min na n’ ka bana bɛɛ n’a ta, Bibulu be min fɔ o koo la, n’ y’a daminɛ ka sinsin o lo kan.”

12. N’i man kɛnɛ, i be se ka Jehova ka dɛmɛ sɔrɔ cogo di?

12 N’i man kɛnɛ, la a la ko Jehova b’a lɔn min b’i kan. A deli a k’i dɛmɛ walisa i k’i ka koo filɛ ni ɲɛɛ ɲuman ye. Dususalo kumaw ɲini Bibulu kɔnɔ minw ɲɛsinna i ma. Sinsin vɛrisew kan minw b’a yira Jehova b’a sagokɛlaw kanu cogo min na. N’i y’o kɛ, i bena a ye ko Jehova be ɲumanya kɛ a sagokɛla kantigiw bɛɛ ye.​—Zab. 84:12.

NI FANTANYA B’AN NA

Jehova ye layidu ta ko a bena an mako wasa. N’an b’o layidu to an hakili la, o bena an dɛmɛ n’an be baara ɲinina ka dɛsɛ (Dakun 13-15nan lajɛ)

13. Ni sotigi dɔ ka baara tiɲɛna, a be se ka mun lo miiri a yɛrɛ koo la?

13 Sotigi kelen kelen bɛɛ b’a fɛ ka se k’a ka denbaya makoya jɔnjɔnw wasa. Nka, miiri k’a filɛ ko balimacɛ dɔ ka baara tiɲɛna k’a sɔrɔ a ma koo jugu si kɛ. A ye baara wɛrɛ ɲini ka dɛsɛ. O koo be se k’a to a b’a miiri ko nafa t’ale la. N’a be to ka miiri Jehova ka layiduw koo la, o be se k’a dɛmɛ cogo di?

14. Mun na Jehova b’a ka layiduw dafa?

14 Jehova b’a ka layiduw dafa tuma bɛɛ (Zozuwe 21:45; 23:14). A b’o kɛ kuun caaman kosɔn. A fɔlɔ, a b’o kɛ a tɔgɔ kosɔn. Jehova y’a daa di ko a bena a janto a sagokɛla kantigiw la ani a b’a jati ko waajibi lo a fɛ k’o layidu dafa (Zab. 31:2-4). Ka fara o kan, komi an y’a ka denbayamɔgɔw ye, a b’a lɔn ko n’a m’a janto an na, an dusu bena kasi kosɔbɛ. A ye layidu ta ko a bena a janto an na bololafɛnw ani Alako ta fan fɛ.  Foyi tɛna a bali k’o layidu dafa!​—Mat. 6:30-33; 24:45.

15. a) Gwɛlɛya juman lo tun be saan kɛmɛkulu fɔlɔ kerecɛnw kan? b) Zaburuw 37:18, 19 b’an hakili sigi mun lo koo la?

15 Jehova b’a ka layiduw dafa kuun minw kama, an k’o to an hakili la. O bena a to an be la a la ko a bena an dɛmɛ n’an tɛ sera k’an makoya jɔnjɔnw wasa. An ka saan kɛmɛkulu fɔlɔ kerecɛnw ka koo lajɛ. Tuma min na mɔgɔw y’a daminɛ ka Zeruzalɛmu kafodenw tɔɔrɔ, “u bɛɛ ye dugu bila jagoya la . . . fɔɔ cidenw dɔrɔn.” (Kɛw. 8:1). Miiri k’a filɛ o ye gwɛlɛyaba min lase balimaw ma wariko ta fan fɛ! N’a sɔrɔ u bɔnɛna u ka baaraw n’u ka boonw na. Nka, Jehova m’u to yen ani u ka ninsɔndiya ma nagasi (Kɛw. 8:4; Eburuw 13:5, 6; Zaki 1:2, 3). Jehova y’o kerecɛn kantigiw dɛmɛ ani a bena an fana dɛmɛ.​—Zaburuw 37:18, 19 kalan.

NI GWƐLƐYAW B’AN KAN KƆRƆYA KOSƆN

An be se ka min kɛ hali n’an kɔrɔla, n’an be sinsin o kan, o bena a to an be la a la ko an koo ka gwɛlɛ Jehova ma ani ko an be baara min kɛra a ye kantigiya la, o ka di a ye (Dakun 16-18nan lajɛ)

16. Koo juman lo be se k’a to an b’an yɛrɛ ɲininga n’an ka batoli ka di Jehova ye?

16 N’an be kɔrɔla, an be se k’a miiri ko an tɛ se ka bɛrɛ kɛ Jehova ka baara la. N’a sɔrɔ masacɛ Dawuda tun be n’o miiriya ɲɔgɔn ye tuma min na a kɔrɔla (Zaburuw 71:9). Jehova be se k’an dɛmɛ cogo di?

17. An be kalan juman lo sɔrɔ balimamuso Jheri ka koo la?

17 An ka balimamuso Jheri ka koo lajɛ. A weelela lajɛn dɔ la Masaya Boon na. Mɔgɔw tun bena fɔrɔmasɔn sɔrɔ walisa ka Masaya Boonw n’a ɲɔgɔnnaw ladon. Nka, Jheri tun t’a fɛ ka taga. A ko: “N’ kɔrɔla, n’ ye firiyamuso ye ani n’ tɛ foyi lɔn o baara la. Nafa foyi tɛ n’ na.” Suu min kɔnna o fɔrɔmasɔn ɲɛ, a y’a  dusukunnakow fɔ Jehova ye delili la. O loon dugusagwɛ, a sera Masaya Boon na tuma min na, a bele tun b’a yɛrɛ ɲiningara n’a tun ka ɲi ka na tiɲɛn na. Lajɛn tuma na, kalankɛla dɔ y’a yira ka gwɛ ko n’an be sɔn Jehova k’an kalan, o setigiya lo ɲɔgɔn tɛ yen. Jheri ko: “N’ y’a fɔ n’ yɛrɛ ye ko: ‘N’ kɔni be n’o setigiya ye!’ Tuma min na n’ y’a faamu ko Jehova be n’ ka delili jaabira, n’ y’a daminɛ ka kasi. A tun be n’ hakili sigira ko fɛɛn nafaman dɔ be n’ fɛ k’a di ale ma ani ko a labɛnnin lo ka n’ kalan!” Jheri y’a fɔ tugun ko: “N’ sera o lajɛn na tuma min na, n’ tun sirannin lo, n’ dusu tun kasinin lo ani n’ fari tun fagara. Nka, n’ bɔtɔ o lajɛn na, n’ hakili sigira, n’ ye jijali sɔrɔ ani n’ y’a ye ko nafa be n’ na!”

18. Bibulu b’a yira cogo di ko hali n’an kɔrɔla, an be baara min kɛ Jehova ye, o bele ka di a ye?

18 Hali n’an kɔrɔla, an ka la a la ko an bele be se ka dɔ kɛ Jehova ka baara la (Zab. 92:13-16). Yezu y’a yira ko an be se ka fɛɛn o fɛɛn kɛ Jehova ka baara la, hali n’a b’an ɲɛɛ na k’o tɛ bɛrɛ ye, o ka di a ye kosɔbɛ (Luka 21:2-4). O la, i be se ka min kɛ, sinsin o kan. Ɲɛyirali fɛ, i be se ka Jehova kofɔ mɔgɔw ye, k’a deli i balimaw ye ani ka tɔɔw jija u ka to kantigiya la. I be se ka min kɛ Jehova ka baara la, o lo t’a to a b’i jati a ka baarakɛɲɔgɔn ye. A b’i jati o cogo la sabu i be sɔn ka mɛnni kɛ a fɛ.​—1 Kor. 3:5-9.

19. Ɔrɔmukaw 8:38, 39 b’an hakili sigi mun lo koo la?

19 Jehova sagokɛlaw koo ka gwɛlɛ a ma. An ninsɔn ka di yɛrɛ le k’o Ala sugu bato! A y’an dan walisa an k’a sago kɛ ani tiɲɛn batoli lo b’a to an be kuun sɔrɔ an ka ɲɛnamaya la bɛrɛbɛrɛ (Yir. 4:11). Duniɲamɔgɔw be se k’a jati ko nafa foyi t’an na. Nka Jehova t’an jati o cogo la (Eburuw 11:16, 38). An fari be se ka faga bana, fantanya wala kɔrɔya kosɔn. Nka, an k’a to an hakili la ko foyi tɛ se k’an faran ka bɔ an sankolola Faa ka kanuya la.​—Ɔrɔmukaw 8:38, 39 kalan.

^ dakun 5 Yala koo dɔw y’i sɔrɔ minw y’a to i b’a miiri ko nafa t’i la wa? Barokun nin bena i hakili jigi ko i koo ka gwɛlɛ Jehova ma kosɔbɛ. A bena i dɛmɛ fana k’a faamu cogo min na i be se ka kɛ ni miiriya ɲuman ye i yɛrɛ koo la, koo o koo mana i sɔrɔ.

DƆNKILI 30 Mon Ami, mon Dieu, mon Père (N’ teri, n’ ka Ala, n’ Faa)