Taga a kɔnɔkow lajɛ

Taga a kɔnɔnakow lajɛ

I be Jehova ka Kitabu jati fɛɛn nafamanba ye wa?

I be Jehova ka Kitabu jati fɛɛn nafamanba ye wa?

“Aw m’o minɛ i n’a fɔ mɔgɔ dalakuma, nga i ko Ala ka kuma yɛrɛ yɛrɛ.”—1 TES. 2:13.

DƆNKILIW: 96, 94

1-3. N’a sɔrɔ mun lo y’a to bɛnbaliya donna Evɔdi ni Sɛtisi cɛ? An be se k’an yɛrɛ tanga o koo ɲɔgɔn ma cogo di? ( Jaa lajɛ, barokun daminɛ na.)

BIBULU ye Jehova ka Kitabu ye ani Ala sagokɛlaw b’a jati fɛɛn nafamanba ye. Komi an bɛɛ ye dafabaliw ye, tuma dɔw la an be ladiliw sɔrɔ ka bɔ Bibulu kɔnɔ. Yala an be sɔn o ladiliw ma wa? An ka Evɔdi ni Sɛtisi ka koo lajɛ. Olu tun ye kerecɛn mɔlenw ye saan kɛmɛ kulu fɔlɔ la. Bɛnbaliya dɔ donna u cɛ. Tiɲɛn lo ko Bibulu t’a fɔ an ye bɛnbaliyako min lo. Nka, an ka miiri k’a filɛ o koo tun be se ka kɛ min ye.

2 A be se ka kɛ ko Evɔdi tun ye balima dɔw weele ka na a ka soo, u ye dumuni kɛ ani ka ninsɔndiya ɲɔgɔn fɛ. Nka, a ma Sɛtisi weele. Kɔfɛ, Sɛtisi bɔra Evɔdi ni balimaw ka ɲɛnagwɛ kala ma. N’a sɔrɔ Sɛtisi y’a fɔ ko: “Evɔdi ye mɔgɔw weele ka na a ka soo ka ne to yen, o tɛ tiɲɛn ye! N’ tun b’a miiri ko an ye teri sɔbɛw ye.” Sɛtisi y’a daminɛ ka Evɔdi filɛ ni ɲɛɛ jugu ye, sabu a b’a miiri ko a y’ale janfa. O kama, Evɔdi tun ye balima minw weele, Sɛtisi fana ye olu weele a fɛ soo. Nka, a ma Evɔdi weele. Bɛnbaliyako min tun be Evɔdi ni Sɛtisi cɛ,  n’a sɔrɔ o tun ye kafo ka hɛɛrɛ nagasi. Bibulu t’a fɔ an ye o koo labanna cogo min na. Nka, Pol ye ladili min di o balimamusow ma ni kanuya ye, n’a sɔrɔ u sɔnna o ma.—Filip. 4:2, 3.

3 Tuma dɔw la, o koo ɲɔgɔn be se k’a to bɛnbaliya be don Jehova Seerew ka kafow kɔnɔ bi. Nka, n’an be Bibulu ka ladiliw sira tagama, an bena se k’o bɛnbaliyako ɲɔgɔn ɲɛnabɔ wala k’an yɛrɛ tanga u ma. N’an be Ala ka Kitabu jati fɛɛn nafamanba ye fana, an bena a ka cikanw sira tagama.—Zab. 27:11.

BIBULU B’AN JIJA KO AN K’AN DUSUKUNNATAW KƆRƆSI

4, 5. Bibulu ka ladili jumanw ɲɛsinna an dusukunnataw ma?

4 N’an b’a miiri ko dɔ y’an hakɛ ta wala k’u ye tilenbaliyako dɔ kɛ an na, a ka gwɛlɛ k’an dusukunnataw kɔrɔsi. Mɔgɔ be se ka tilenbaliyako dɔ kɛ an na koo nunu kosɔn: an siya, an bɔyɔrɔ, an fari kulɛri wala an fari cogoya. N’o ɲɔgɔn kɛra an na, o be se k’an dusu gwan kosɔbɛ. N’an kerecɛnɲɔgɔn dɔ lo y’o kɛ an na, o yɛrɛ ka jugu! Adamaden dafabaliw ka teli k’o koow ɲɔgɔn kɛ. Nka, ladiliw be sɔrɔ Ala ka Kuma kɔnɔ minw be se k’an dɛmɛ wa?

5 Jehova be adamadenw ka koow lajɛra kabi u dantuma na. A b’a janto an dusukunnataw n’an ka kɛwalew la. N’an dimina, an ka miiriyaw be se k’a to an be kuma dɔw fɔ ani ka koo dɔw kɛ an be se ka nimisa minw na. Bibulu b’an ladi ko an k’an yɛrɛ minɛ ani an kana dimi joona. N’an b’o ladili sira tagama, o ye hakilitigiyako ye dɛ! (Talenw 16:32; Waajulikɛla 7:9 kalan). Siga t’a la, an bɛɛ ka ɲi ka jijali kɛ walisa an kana dimi joona ani ka yafa ɲɔgɔn ma. Jehova ni Yezu fɛ, a kɔrɔtanin lo kosɔbɛ an ka yafa ɲɔgɔn ma (Mat. 6:14, 15). Yala i ka ɲi k’i jija ka yafa mɔgɔw ma kosɔbɛ ani k’i dusukunnataw kɔrɔsi wa?

6. Mun na, an man ɲi k’an ɲɛɛ kumu tuma bɛɛ?

6 Mɔgɔ minw tɛ se k’u dusukunnataw kɔrɔsi, olu ɲɛɛ kumunin lo tuma caaman na. O kama, mɔgɔw man teli ka jɛn n’u ye. O ɲɔgɔnna mɔgɔ be se ka nɔɔ jugu to kafomɔgɔw kan. A be se k’a kɛ komi a diminin tɛ, wala ko a tɛ mɔgɔ kɔniya. Nka, miiriya minw b’a dusu la, o bena a to “a ka juguya bena ye jama cɛma.” (Talenw 26:24-26). Diinan mɔgɔkɔrɔw be se k’o ɲɔgɔnna mɔgɔ dɛmɛ a k’a faamu ko Ala ka ɔriganisasiyɔn kɔnɔ, a daganin tɛ ka mɔgɔ kɔniya, ka dimi mara i kɔnɔ wala k’i ɲɛɛ kumu tuma bɛɛ. O koo yirala ka gwɛ Jehova ka Kitabu nafamanba kɔnɔ (Lev. 19:17, 18; Ɔrɔm. 3:11-18). E sɔnna o ma wa?

JEHOVA B’AN ƝƐMINƐ COGO MIN NA

7, 8. a) Jehova ka ɔriganisasiyɔn faan min be dugukolo kan, a b’o ɲɛminɛ cogo di? b) Bibulu ka cikan dɔw ye juman ye ani mun na an ka ɲi k’u labato?

7 Jehova ka ɔriganisasiyɔn faan min be dugukolo kan, Jehova be tɛmɛ “jɔnkɛ dannamɔgɔ hakiliman” fɛ k’o jɛnkuludenw ɲɛminɛ ani k’u kalan. Krista lo ye kafo “kuntigi” ye ani ale lo b’o jɔncɛ ɲɛminɛ (Mat. 24:45-47; Efɛz. 5:23). O jɔncɛ sɔnna Ala ka Kuma ma ani a b’a jati fɛɛn nafamanba ye i n’a fɔ kerecɛn fɔlɔw ka Koow Ɲɛnabɔla Jɛnkulu (1 Tesalonikaw 2:13 kalan). Bibulu ka cikan nafaman dɔw ye juman ye?

8 Bibulu b’a ɲini an fɛ an ka to ka taga lajɛnw na tuma bɛɛ (Eburuw 10:24, 25). A b’an jija ko an ka kɛ kaan kelen ye an ka lannakow la (1 Kor. 1:10).  Ala ka Kuma b’a fɔ an ye ko an ka Ala ka Masaya kɛ an ɲɛnako fɔlɔ ye (Mat. 6:33). Bibulu b’a yira ka gwɛ fana ko an ka kan ka waajuli kɛ soo ni soo, forobayɔrɔw la ani sababu dɔw sen fɛ (Mat. 28:19, 20; Kɛw. 5:42; 17:17; 20:20). Ala ka Kitabu b’a ɲini diinan mɔgɔkɔrɔw fɛ u k’u jija ale ka ɔriganisasiyɔn saniyanin ka to (1 Kor. 5:1-5, 13; 1 Tim. 5:19-21). Jehova y’a latigɛ ko ale ka ɔriganisasiyɔn mɔgɔw bɛɛ ka kan ka saniya farikolo ni Alako ta fan fɛ.—2 Kor. 7:1.

9. Yezu be tɛmɛ jɔn dɔrɔn lo fɛ k’an dɛmɛ ka Ala ka Kuma faamu?

9 Dɔw be se k’a miiri k’u mako t’a la mɔgɔ ka Bibulu kɔnɔkow ɲɛfɔ u ye. Nka, Yezu be tɛmɛ jɔncɛ kantigiman dɔrɔn lo fɛ k’an kalan Alakow la. Kabi saan 1919, Masacɛ Yezu Krista be tɛmɛna o jɔncɛ lo fɛ k’a ka kalandenw dɛmɛ u ka Ala ka Kuma faamu ani k’ale ka cikanw sira tagama. N’an be Bibulu ka cikanw sira tagama, o b’a to an saniyanin be to ani hɛɛrɛ ni bɛɛn be kɛ kafo kɔnɔ. An kelen kelen bɛɛ ka ɲi k’an yɛrɛ ɲininga ko: “Yala n’ be kantigiya kɛ jɔncɛ kantigiman ye wa?”

JEHOVA KA WOTORO BE TAGARA ƝƐ!

10. Jehova ka ɔriganisasiyɔn faan min be sankolo la, Ezekiyɛli ka kitabu be mun lo fɔ o koo la?

10 Jehova sagokɛla minw be sankolo la, Bibulu b’an dɛmɛ k’a faamu k’olu fana labɛnnin lo. Ɲɛyirali fɛ, kira Ezekiyɛli ye yelifɛn dɔ ye. O yelifɛn na, Jehova be wotoro dɔ bolila. A b’a fɛ o wotoro ka taga yɔrɔ o yɔrɔ, a be sin ka taga yen joona joona (Ezek. 1:4-28). Jehova ka ɔriganisasiyɔn faan min be sankolo la, o wotoro ye o lo tagamasiɲɛ ye. A be nɔɔ to Jehova ka ɔriganisasiyɔn faan wɛrɛ kan min be dugukolo kan. Miiri k’a filɛ, yɛlɛmani caaman minw kɛra ɔriganisasiyɔn kɔnɔ saan tan tɛmɛninw na. Siga t’a la Jehova ka wotoro be tagara ɲɛ le! An k’a to an hakili la ko Jehova lo ye o yɛlɛmaniw bɛɛ sababu ye. Yanni dɔɔni, Yezu Krista ni mɛlɛkɛ senumanw bena duniɲa juguman nin halaki. Jehova ka wotoro be teliyara walisa ka Jehova ka Masabaya lafasa ani k’a tɔgɔ senuman saniya!

Mɔgɔ caaman be baaraba kɛ walisa ka boonw lɔ. An b’u fo ani k’u waleɲuman lɔn! (Dakun 11 lajɛ)

11, 12. Jehova ka ɔriganisasiyɔn ye koo minw kɛ, u dɔw ye jumanw ye?

11 An ka miiri k’a filɛ, Ala ka ɔriganisasiyɔn faan min be dugukolo kan, o be baara min kɛra duniɲa nin laban loonw na. Boonlɔ baara. Balima caaman ye baaraba kɛ ka Jehova Seerew ka sigiyɔrɔsoba kura lɔ min be Warwick, Niyɔriki, Etazini jamana na. Duniɲa faan bɛɛ la, mɔgɔ waa caaman b’u yɛrɛ di ka baaraba kɛ walisa ka Masaya Boon kuraw lɔ ani ka Betɛliw labonya. Biro min be boon lɔli baara kuun na, ale lo b’o baara ɲɛminɛ. O boon lɔli baara man nɔgɔ dɛ! Mɔgɔ caaman minw b’u yɛrɛ di  walisa k’o baara kɛ, an b’olu fo ani k’u waleɲuman lɔn. Duniɲa kuru bɛɛ kɔnɔ, weleweledalaw be nili kɛ ka kɛɲɛ n’u seko ye walisa ka dɛmɛ don o baara la. Jehova b’u duga u ka kantigiya n’u ka majigilenya kosɔn.—Luka 21:1-4.

12 Fɔrɔmasɔn. Lakɔli caaman sigira sen kan walisa ka fɔrɔmasɔn di mɔgɔw ma Alako ta fan fɛ (Ezayi 2:2, 3). O lakɔli nunu ye: piyɔniyew ka lakɔli, Masaya waajulikɛlaw ka lakɔli, Gilead lakɔli, Betɛlidenw ka lakɔli, kafokulu kɔrɔsibaga n’u musow ka lakɔli, diinan mɔgɔkɔrɔw ka lakɔli, Masaya cidenyabaara lakɔli ani tɔnbolo ka kɔmite mɔgɔw n’u ka musow ka lakɔli. Tiɲɛn na, a ka di Jehova ye k’a sagokɛlaw kalan! An ka site web kan fana, Bibulu ni gafe caaman be sɔrɔ kaan caaman na (kaan 700 ni kɔ). Yɔrɔ dɔw labɛnna o site kan denmisɛnw ni denbayaw kama. Fɛɛn kuraw yira yɔrɔ be yen fana. E be baara kɛ ni jw.org ye waajuli baara la ani i ka gwa kɔnɔ batoli la wa?

KANTIGIYA KƐ JEHOVA N’A KA ƆRIGANISASIYƆN YE

13. Komi an ye Jehova sagokɛla kantigimanw ye, an ka ɲi ka mun lo kɛ?

13 Nɛɛmaba lo ka kɛ Jehova ka ɔriganisasiyɔn kɔnɔ! An be Jehova ka cikanw ani a ka sariyaw lɔn. O kama, an ka ɲi ka koo tilennin kɛ ani ka Ala ka Masabaya lafasa. Komi duniɲa mɔgɔw sɔɔn be tiɲɛna ka taga, an ka ɲi ka “ko jugu koniya” i ko Jehova b’a kɔniya cogo min na (Zab. 97:10, Bible senuma). Minw b’a miiri ko “kojugu ye koɲuman ye, ko koɲuman ye kojugu ye,” an t’a fɛ ka kɛ olu bɔɲɔgɔnkow ye fewu (Ezayi 5:20). An b’a fɛ k’an koo diya Jehova ye. O kama, an b’an jija tuma bɛɛ ka saniya farikolo, tagamacogo ani Alako ta fan fɛ (1 Kor. 6:9-11). An be Jehova kanu ani an jigi lanin b’a kan. Ala ka sariya minw yirala ka gwɛ a ka Kitabu kɔnɔ, an b’a latigɛ k’u sira tagama walisa k’a yira ko an be kantigiya kɛ a ye. O lo kama, an b’o sariyaw sira tagama yɔrɔ bɛɛ: an ka soo, kafo kɔnɔ, baarakɛyɔrɔ la ani lakɔliso la (Talenw 15:3). An k’a filɛ cogo wɛrɛ minw na an be se k’an ka kantigiya yira Ala la.

14. Wolobaga minw ye kerecɛnw ye, olu b’a yira cogo di k’u be kantigiya kɛ Ala ye?

14 Deenw kolocogo. Ni kerecɛnw b’u deenw lamɔ ka kɛɲɛ ni Ala ka Kuma ye, u b’a yira o fɛ k’u be kantigiya kɛ Jehova ye. Wolobaga minw be Jehova bato, olu t’a to u ka landaw k’a nɔɔ to u deenw lamɔcogo kan. Kerecɛn denbaya man kan ka kɛ ni duniɲa mɔgɔw ka miiriya ɲɔgɔn ye (Efɛz. 2:2). Balimacɛ man ɲi k’a fɔ ko: “Anw fɛ, musow lo ka ɲi ka deenw lamɔ.” Bibulu be min fɔ o koo la, o gwɛnin lo. A ko: “Faw . . . aw ka u lamɔ ni Matigi ka kololi ni a ka laadili ye.” (Efɛz. 6:4, Bible senuma). Wolobaga minw be siran Ala ɲɛ, olu b’a fɛ u deenw ka kɛ i n’a fɔ Samuyɛli. A fɔra Samuyɛli koo la ko a bonyatɔ, Jehova tun be n’a ye.—1 Sam. 3:19.

15. N’an b’a fɛ ka kooba dɔw latigɛ, an be se k’a yira cogo di ko an be kantigiya kɛ Jehova ye?

15 N’an be koow latigɛ. N’an b’a fɛ ka kooba dɔw latigɛ, an b’a ɲini k’a lɔn fɔlɔ Jehova ka miiriya ye min ye Bibulu kɔnɔ, ani a ka ɔriganisasiyɔn be min fɔ o koo la. O la, an b’a yira ko an be kantigiya kɛ Ala ye. Mun na a kɔrɔtanin lo ka koow kɛ o cogo la? An ka ɲɛyirali dɔ lajɛ min ɲɛsinna bangebaga caaman ma. A fɔ man di, nka dɔw b’u deenw bila ka taga u faso la walisa olu yɛrɛ bangebagaw k’u lamɔ. U b’o kɛ walisa ka baara kɛ ani ka wari caaman sɔrɔ. Tiɲɛn  lo k’o tɛ mɔgɔ ka sira la, nka an k’a to an hakili la ko an be desizɔn minw ta, Ala bena an ɲininga o la (Ɔrɔmukaw 14:12 kalan). Yala hakilitigiyako lo ka kooba dɔw latigɛ an ka denbaya n’an ka baara koo la, n’an ma kɔn ka Bibulu lajɛ wa? Ayi! An mako be an sankolola Faa ka dɛmɛ na sabu see t’an ye k’an yɛrɛ ka koow latigɛ.—Zer. 10:23.

16. Muso dɔ jiginin kɔ, a tun ka kan ka mun lo latigɛ? Mun lo y’a dɛmɛ ka desizɔn ɲuman ta?

16 Muso dɔ ye cɛdennin wolo ani a tun labɛnnin lo k’a bila ka taga a faso la walisa deen mamacɛ n’a mamamuso k’a lamɔ. O wagati kelen na, Jehova Seere dɔ y’a daminɛ ka bibulukalan kɛ n’o muso ye. A ye ɲɛtaga kɛ ani a y’a faamu ko Ala b’a ɲini ale yɛrɛ lo fɛ a k’a deen lamɔ ka kɛ Jehova batobaga dɔ ye (Zab. 127:3; Talenw 22:6). O muso y’a kɔnɔ gwɛ Jehova ye delili la i ko Bibulu b’a ɲini an fɛ cogo min na (Zab. 62:8, 9). Mɔgɔ min tun be bibulukalan kɛra n’a ye, a y’a kɔnɔkow fɔ ale ni balima wɛrɛw ye. A teriw n’a somɔgɔw y’a waajibiya ko a k’a deen bila ka taga a mamacɛ n’a mamamuso fɛ. Nka, a y’a faamu k’o tun bɛnnin tɛ. Kafodenw y’o muso n’a deen dɛmɛ kosɔbɛ. O y’a cɛɛ kabakoya fɔɔ a sɔnna ka bibulukalan kɛ. A yɛrɛ y’a daminɛ ka taga lajɛnw na n’a muso n’a deen ye. O muso tun y’a kɔnɔ gwɛ Jehova ye delili la. Ele fɛ, o muso y’a miiri ko Jehova y’o delili lamɛn wa? Siga si t’o la.

17. Cikan jumanw lo tun dira an ma Bibulu kalandenw koo la?

17 Cikanw sira tagama. Jehova ka ɔriganisasiyɔn be cikan minw di an ma, n’an b’u sira tagama, an b’a yira o fɛ ko an be kantigiya kɛ Ala ye. Ɲɛyirali fɛ, an k’a filɛ cikan minw tun dira an ma an ka Bibulu kalandenw koo la. An be se ka bibulukalan daminɛ ni mɔgɔ dɔ ye, gafe nin kɔnɔ: Kalan tigitigi juman be Bibulu kɔnɔ? A tun fɔra ko kalan juu siginin kɔ, an ka to ka kalanden dɛmɛ a ka Jehova ka ɔriganisasiyɔn lɔn. O be kɛ miniti damanin, kalan kelen kelen bɛɛ bannin kɔ. An be se k’o kɛ nin videwo nin ye Mun lo be kɛ an ka Masaya boonw kɔnɔ? ani kitabunin Jɔn lo be Jehova sago kɛra bi? Ni kalanden be ɲɛtaga kɛra, n’an tilara gafe Bibulu ka kalan na, a tun fɔra an ye ko hali ni kalanden batizera, an ka kalan kɛ n’a ye gafe nin kɔnɔ: A’ ye to Ala ka kanuya la.” O kuun ye ka Yezu ka kalanden kuraw dɛmɛ u ka “sabati dannaya la.” (Kɔlɔs. 2:7, Bible senuma). Jehova ka ɔriganisasiyɔn y’o cikan minw di an ma, i b’u sira tagamana wa?

18, 19. Mun na an ka ɲi ka Jehova waleɲuman lɔn?

18 An ka ɲi ka Jehova waleɲuman lɔn koo caaman kosɔn. Ale lo y’an dan ani n’ale tɛ, an tun tɛna kɛ niin na (Kɛw. 17:27, 28). A ye nilifɛn nafamanba dɔ di an ma fana: A ka Kitabu, o min ye Bibulu ye. I ko Tesaloniki kerecɛnw, an be Bibulu jati nilifɛn nafamanba ye sabu Ala ka Kuma lo.—1 Tes. 2:13.

19 Bibulu sababu fɛ, an be se k’an magwɛrɛ Jehova la ani ale fana b’a magwɛrɛ an na (Zaki 4:8). An sankolola Faa ye nɛɛma kɛ an ye k’a to an kɛra a ka ɔriganisasiyɔn mɔgɔ dɔ ye. O ye dugaba ye dɛ! An ka miiriya ni zaburu sɛbɛbaga taw ye kelen ye. Ale ko: “Aw ka Masaba tanu, bari a ka ɲi, a ka ɲumanya te ban abada.” (Zab. 136:1). Zaburu 136nan ka vɛrise kelen kelen bɛɛ kɔnɔ, a fɔra ko Jehova ka “ɲumanya te ban abada.” An ka kantigiya kɛ Jehova n’a ka ɔriganisasiyɔn ye. N’an y’o kɛ, an bena a faamu k’o kuma ye tiɲɛn ye sabu an bena ɲɛnamaya kɛ fɔɔ abada!