Taga a kɔnɔkow lajɛ

Taga a kɔnɔnakow lajɛ

 ƝININGALI 3

Ne ka ɲi ka kuma n’ wolobagaw fɛ cogo di?

Ne ka ɲi ka kuma n’ wolobagaw fɛ cogo di?

O ƝININGALI KUUN?

Ni bɛɛn be e n’i wolobagaw cɛ, i ka ɲɛnamaya bena diya.

E TUN BENA MUN LO KƐ DO?

Miiri k’a filɛ: Martɛn be ni saan 17 ye. Arabalon dɔ wulafɛ, a tilara a ka sokɔnɔ baaraw la ani a tun b’a fɛ k’a yɛrɛ ɲɛnagwɛ dɔɔni! A ye telewisɔn mana ani k’a yɛrɛ fili ka ben foteyi kɔnɔ.

O wagati yɛrɛ la, a facɛ donna salɔn kɔnɔ ani a ɲɛɛ sisinin tun lo.

A ko: “Martɛn! Mun na i b’i ka wagati tiɲɛna telewisɔn filɛ la, k’a sɔrɔ i ka ɲi k’i dɔgɔcɛ dɛmɛ a ka lakɔli baara la? E kɔni tɛ mɔgɔ ka kuma mɛn fewu!”

Martɛn kumana a daa jukɔrɔ ko: “A daminɛna tugun.”

A be komi a facɛ y’a mɛn. A y’i jɛngɛ dɔɔni ko: “I ko di?”

Martɛn ye nɛnɛkiriba kɛ ani k’a ɲɛɛ fili yɔrɔ wɛrɛ k’a fɔ ko: “N’ ma foyi fɔ!”

Sisan kɔni, a facɛ dimina yɛrɛ le. A sɔngɔra a kan ko: “N’ b’a fɔ i ye, kana kuma ne fɛ o cogo la dɛ!”

N’i tun be Martɛn nɔɔ na, i tun bena mun lo kɛ walisa i facɛ kana sɔngɔ i kan?

MIIRI FƆLƆ!

N’i be baro kɛra n’i wolobagaw ye, a be komi i be mobili lo bolila. Ni sira datugura, i be sira wɛrɛ ta.

 ƝƐyirali:

Leya ko: “A ka gwɛlɛ ne fɛ ka kuma ni n’ facɛ ye. Tuma dɔw la, ka n’ to kuma na n’a ye, a b’a fɔ ko: ‘I be kumana ne lo fɛ wa?’”

LEYA BE SE KA KOO SABA ƝƆGƆN KƐ:

  1. A be se ka kule a facɛ kan

    Leya be pɛrɛn ko: “I tɛ sabari ka n’ lamɛn wa? Sɔbɛko lo!”

  2. A b’a daa tigɛ a facɛ la

    Leya b’a daa tigɛ a facɛ la. A t’a ɲini k’a ka gwɛlɛyaw ɲɛfɔ a ye tugun.

  3. A be wagati ɲuman ɲini walisa ka kuma a facɛ fɛ tugun

    Leya be wagati ta ka sigi ka kuma n’a facɛ ye wala a b’a ka gwɛlɛyaw ɲɛfɔ lɛtɛrɛ dɔ kɔnɔ k’a d’a ma.

Ele bena a fɔ Leya ye a ka fɛɛrɛ juman lo kɛ?

MIIRI DƆƆNI: Leya facɛ hakili be yɔrɔ wɛrɛ ani a m’a lɔn ko Leya diminin lo. O kama, ni Leya y’a latigɛ ka fɛɛrɛ fɔlɔ kɛ, n’a sɔrɔ a facɛ tɛna a faamu fɛɛn min kama a be pɛrɛnna ale kan. O fɛɛrɛ tɛna a to a facɛ be mɛnni kɛ a fɛ. Leya fana tɛna bonya la a facɛ kan n’a pɛrɛnna a kun na (Efɛzikaw 6:2). Tiɲɛn na, fɛɛrɛ fɔlɔ tɛna u si nafa.

Ni sira datugura, i bena sira wɛrɛ ta. O cogo kelen na, i be se ka fɛɛrɛ ɲini ka kuma n’i wolobagaw ye!

A be komi fɛɛrɛ 2nan ka nɔgɔ, nka hakilitigiyako tɛ. Mun na do? Sabu Leya ka ɲi ka kuma n’a facɛ ye walisa ka se k’a ka gwɛlɛyaw ɲɛnabɔ koɲuman. A facɛ do tɛ se k’a dɛmɛ n’a t’a lɔn gwɛlɛya min b’a kan. O la, k’i daa tigɛ i facɛ la, o tɛ foyi ɲɛ.

Fɛɛrɛ 3nan na, Leya t’a to fɛɛn si k’a bali ka kuma n’a facɛ ye. Nka, a b’a ɲini ka kuma n’a ye wagati wɛrɛ la. N’a fana y’a latigɛ ka lɛtɛrɛ sɛbɛ a facɛ ma, o bena a dusu lafiya.

Lɛtɛrɛ kɔnɔ, a be se k’a kɔnɔnakow lakali koɲuman a facɛ ye. N’a facɛ y’o lɛtɛrɛ kalan, Leya tun b’a fɛ ka min fɔ a ye, a bena o faamu. O bena a dɛmɛ fana k’a lɔn dusukasi min be Leya kan. Tiɲɛn na, fɛɛrɛ 3nan lo ka fisa Leya n’a facɛ ma. Leya ka sigi ka kuma n’a facɛ ye wala a ka lɛtɛrɛ sɛbɛ a ma, o fɛɛrɛ bɛnnin lo ni Bibulu ka ladili nin ye: “An ka banba ka to hɛrɛ la ɲɔgɔn fɛ.”—Ɔrɔmukaw 14:19.

Leya be se ka fɛɛrɛ wɛrɛ jumanw lo kɛ?

N’i be miirila fɛɛrɛ dɔ la, a sɛbɛ jukɔrɔ. A ɲɛfɔ nafa min b’o fɛɛrɛ la.

 I WOLOBAGAW BE SE K’I FAAMU COGO WƐRƐ LA

A to i hakili la ko i be min fɔra i wolobagaw ye, u be se k’o faamu cogo wɛrɛ la.

ƝƐYIRALI FƐ:

I wolobagaw b’i ɲininga ko mun na i ɲɛɛ sisinin lo. E b’u jaabi ko: “N’ t’a fɛ ka kuma o koo la.”

Nka i wolobagaw fɛ, i b’a fɔra le ko: “N’ tɛ se ka n’ kɔnɔnakow fɔ aw ye sabu n’ lanin tɛ aw la. N’ bena n’ ka gwɛlɛya lakali n’ teriw lo ye.”

Miiri k’a filɛ: Gwɛlɛya dɔ b’i kan ani i wolobagaw b’a fɛ k’i dɛmɛ. Nka, e b’a fɔ u ye ko: “Aw kana jɔrɔ, ne yɛrɛ be se k’o ɲɛnabɔ.”

  • I wolobagaw fɛ, i be mun lo fɔra?

  • I be se ka jaabili fisaman juman lo fɔ?