Taga a kɔnɔkow lajɛ

Taga a kɔnɔnakow lajɛ

Bibulu ka maanaw

Bibulu ka maanaw
Yezu be kumana ni denmisɛnw ye

MAANA minw be gafe nin kɔnɔ, tiɲɛnkow lo. U bɔra Bibulu kɔnɔ, o min ye kitabu ye min ɲɔgɔn tɛ yen. O maanaw be tarikikow lakali k’a ta duniɲa dantuma ma fɔɔ ka na se bi tile ma. U fana b’a yira Ala ye layidu minw ta siniɲasigi kama.

Gafe nin bena i dɛmɛ ka Bibulu kɔnɔnako kunbabaw lɔn. Mɔgɔ minw kofɔra Bibulu kɔnɔ, a bena i dɛmɛ k’olu caaman lɔn ani u ye koo minw kɛ. A fana b’a yira Ala ye jigiya ɲuman min di mɔgɔw ma u ka ɲɛnamaya banbali kɛ alijɛnɛ kɔnɔ dugukolo kan.

Maana 116 lo be sɔrɔ gafe nin kɔnɔ. U tilanna yɔrɔ seegi. O yɔrɔw kelen-kelen bɛɛ daminɛ na, u kɔnɔnakow lakalila ka surunya. Maanaw be tugutugu ɲɔgɔn kɔ ka kɛɲɛ ni tarikikow kɛwagati ye. O bena i dɛmɛ i ka o maanaw ka koow kɛwagati lɔn ka kɛɲɛ ni duniɲa ka tarikikow ye.

Maanaw lakalila cogo nɔgɔman na. O la, u kalan tɛna gwɛlɛya aw denmisɛnw fɛ. Bangebagaw, aw bena a ye ko a bena diya aw ka denmisɛnw ye ko aw ka to ka maana nunu kalan u ye tuma o tuma. Aw bena a ye fana ko gafe nin kɔnɔko caaman ka di denmisɛnw ni mɔgɔkɔrɔbaw ye.

Vɛrise dɔw be sɔrɔ maana kelen kelen bɛɛ laban na. Maana basiginin be o vɛrisew lo kan. An be aw jija aw k’u kalan Bibulu kɔnɔ. N’i tilara maana dɔ la, i k’o maana ka ɲiningaliw lajɛ ani a ɲini k’i hakili jigi u jaabiliw la. Ɲiningaliw be sɔrɔ maana 116nan kɔfɛ.

Bibulusen minw be gafe nin kɔnɔ, u yɛlɛma ka fɔ cogo nɔgɔman na. O la, denmisɛnw be se k’u faamu. Bibulusen minw be maana kelen kelen laban na, u b’a yira o maana bɔra Bibulu yɔrɔ min na.