Taga a kɔnɔkow lajɛ

Taga a kɔnɔnakow lajɛ

Maana 6nan: Kayɛn ni Abɛli

Maana 6nan: Kayɛn ni Abɛli

KAYƐN ni Abɛli filɛ sisan. U fila bɛɛ bonyana. Kayɛn kɛra sɛnɛkɛla ye. A be sumanw ni nankɔfɛnw sɛnɛ, ani a be yiriw turu minw be den.

Kayɛn ni Abɛli be nilifɛnw dira Ala ma

Abɛli kɛra sagamarala ye. A ka di a ye ka sagadenw ladon. A ka sagadenw be bonya ka kɛ saga belebelebaw ye. Yanni dɔɔni, Abɛli be ni sagakuluba ye a be min dɛndɛ.

Loon dɔ, Kayɛn ni Abɛli ye nilifɛn dɔw di Ala ma. Kayɛn nana ni a ka sɛnɛfɛn dɔw ye. Abɛli nana ni a ka sagaw bɛɛ la fisaman dɔw ye. Abɛli ni a ka nilifɛn koo diyara Jehova ye. Nka, Kayɛn ni a ka nilifɛn koo ma diya Jehova ye. I b’a lɔn fɛɛn min kama wa?

Abɛli ka nilifɛn ka fisa Kayɛn ta ye, nka o dɔrɔn tɛ dɛ. Abɛli ye mɔgɔ ɲuman ye. A be Jehova n’a kɔrɔcɛ Kayɛn kanu. Nka Kayɛn ka jugu, a dɔgɔcɛ Abɛli koo man di a ye.

O kama, Ala y’a fɔ Kayɛn ye ko a k’a sɔɔn yɛlɛma. Nka Kayɛn ma mɛnni kɛ. A dimina kosɔbɛ sabu Abɛli koo ka di Ala ye ka tɛmɛ ale kan. O kama Kayɛn y’a fɔ Abɛli ye ko, ‘An ka taga kongo la.’ K’u fila dɔrɔn to kongo la, Kayɛn y’a dɔgɔcɛ Abɛli gosi. A y’a gosi fanga la fɔɔ k’a faga. Kayɛn ye koo juguba kɛ dɛ!

Kayɛn y’a dɔgɔcɛ faga ani a be boli

Abɛli sara, nka Ala hakili bele b’a la. Abɛli tun ye mɔgɔ ɲuman ye, Ala tɛ ɲinɛ o ɲɔgɔnna mɔgɔw kɔ abada. Loon dɔ, Jehova Ala bena Abɛli lakunu ka bɔ saya la. O la, Abɛli tɛna sa tugun abada. A bena ɲɛnamaya kɛ yan dugukolo kan fɔɔ abada. Yala a tɛna kɛ ninsɔndiyako ye ka Abɛli ɲɔgɔnna mɔgɔw lɔn wa?

Nka mɔgɔ minw ka jugu i ko Kayɛn, olu koo man di Ala ye. O lo kosɔn, Ala ye Kayɛn ɲangi a dɔgɔcɛ fagali kosɔn ani a y’a gwɛn ka bɔ a somɔgɔw gɛrɛfɛ. Kayɛn tagara sigi dugukolo faan dɔ la. A tagatɔ, a y’a dɔgɔmuso dɔ minɛ, ani ale lo nana kɛ a muso ye.

Kayɛn n’a muso nana deenw sɔrɔ. Adama ni Awa ka dencɛw n’u ka denmuso tɔɔw furula ani olu fana ye deenw sɔrɔ. A ma mɛɛn, mɔgɔw cayara dugukolo kan. An ka olu dɔw ka maana filɛ.

Zɛnɛzi 4:2-26; 1 Zan 3:11, 12; Zan 11:25.



Ɲiningaliw

  • Kayɛn ni Abɛli be baara jumanw lo kɛ?
  • Kayɛn ni Abɛli ye nilifɛn jumanw di Jehova ma?
  • Mun na Jehova sɔnna Abɛli ka nilifɛn la ani mun na a banna Kayɛn ta la?
  • Kayɛn ye mɔgɔ sifa juman ye ani cogo di Jehova y’a ɲini k’a sɔɔn yɛlɛma?
  • K’u fila dɔrɔn to kongo la, Kayɛn ye mun lo kɛ a dɔgɔnin na?
  • Min kɛra Kayɛn na a dɔgɔnin fagari kɔ, i k’o ɲɛfɔ.

Ɲiningali wɛrɛw

  • Zɛnɛzi 4:2-26 kalan.

    Cogo di Jehova y’a yira Kayɛn na ko farati b’a seen kɔrɔ? (Zɛnɛzi 4:7)

    Kayɛn y’a dusukun cogoya yira cogo di? (Zɛnɛzi 4:9)

    Ka mɔgɔ jalakibali joli bɔn, Jehova be mun miiri o koo la? (Zɛnɛzi 4:10; Ezayi 26:21)

  • An ka 1 Zan 3:11, 12 kalan.

    Mun kama Kayɛn dimina kosɔbɛ, ani o be lasɔmini juman di an ma bi? (Zɛnɛzi 4:4, 5; Tal. 14:30; 28:22)

    Bibulu b’a yira cogo di ko an be se k’an ka kantigiya mara hali n’an somɔgɔw bɛɛ banna Jehova la? (Zab. 27:10; Mat. 10:21, 22)

  • Zan 11:25 kalan.

    Mɔgɔ minw bɛɛ be faga tilennenya kosɔn, Jehova be jigisigi juman di an ma o koo la? (Zan 5:24)