A FILƐ min kɛra sisan. Adama ni Awa gwɛnna ka bɔ Edɛn nankɔtu cɛɲumanba kɔnɔ. I b’a lɔn fɛɛn min kama wa?

U ye kojuguba dɔ lo kɛ. O kama, Jehova y’u ɲangi. I b’a lɔn u ye kojuguba min kɛ wa?

Ala tun ko u kana koo min kɛ, u y’o lo kɛ. Ala tun y’a fɔ u ye ko u be se ka nankɔ kɔnɔ yiridenw dumu. Nka, yiri kelen tun be yen Ala ko u kana ale deen dumu, n’o tɛ u bena sa. Ala tun y’o yiri kɛ a yɛrɛ dɔrɔn ta ye. An do b’a lɔn ko ka mɔgɔ wɛrɛ ka fɛɛn ta, o ye kojugu ye. Tiɲɛn tɛ? Ayiwa, mun lo kɛra do?

Loon dɔ la Awa tun b’a kelen na nankɔtu la ani saa dɔ kumana a fɛ. Nin tun ye kabako ye dɛ! Ala tun ko u kana yiri min deen dumu, saa y’a fɔ Awa ye ko a k’o dumu. K’a sɔrɔ tuma min na Jehova ye saaw dan a ma see di u ma u ka kuma. O kɔrɔ ko mɔgɔ wɛrɛ lo tun b’a kɛra saa ka kuma. O tun ye jɔn lo ye?

Adama tun tɛ. O la, Jehova tun ye mɔgɔ minw dan ka kɔn dugukolo ɲɛ, a tun tɛ se ka kɛ mɔgɔ wɛrɛ ye olu dɔ kɔ. O mɔgɔw ye mɛlɛkɛw lo ye ani an tɛ se k’u ye. O mɛlɛkɛw la kelen yadara kosɔbɛ. A nege donna a la ka kuntigiya kɛ i ko Ala. A tun b’a fɛ mɔgɔw ka ale kaan minɛ sanni u ka Jehova kaan minɛ. O mɛlɛkɛ lo tun y’a kɛ saa kumana.

O mɛlɛkɛ sera ka Awa lafili. A y’a fɔ Awa ye ko n’a ye o yiriden dumu, a bena kɛ i ko Ala. Awa fana lara a la. O kama, Awa y’a dumu, ani Adama fana y’a dumu. Adama ni Awa ye Ala kaan bila. O lo y’a to u gwɛnna ka bɔ u ka nankɔtu cɛɲumanba kɔnɔ.

Nka loon dɔ, Ala bena a kɛ dugukolo kuru bɛɛ ka kɛ yɔrɔ ɲuman ye i ko Edɛn nankɔtu. An bena a ye kɔfɛ cogo min na i be se k’i seen don o baara la. Nka sisan, an k’a filɛ koo min ye Adama ni Awa sɔrɔ.

Zɛnɛzi 2:16, 17; 3:1-13, 24; Yirali 12:9.