Taga a kɔnɔkow lajɛ

Taga a kɔnɔnakow lajɛ

Maana 10nan: Sanjiba, duniɲa bɛɛ kɔnɔ

Maana 10nan: Sanjiba, duniɲa bɛɛ kɔnɔ

MINW tun tɛ kurun kɔnɔ, olu tora k’u ka koow kɛ i ko fɔlɔ la. U lanin tun t’a la fewu ko sanjiba bena na. N’a sɔrɔ u yɛrɛ tora ka Nuhun lɔgɔbɔ ka tɛmɛ fɔlɔ kan. Nka a ma mɛɛn, u y’u ka yɛlɛ dabila.

Mɔgɔw ni bɛgɛnw jatigɛnin lo sanjiba kosɔn

Sanji barila k’a daminɛ ka ben. Sanji tun be benna fanga la i n’a fɔ u be jii bɔnna ni soon ye. Nuhun tun ye tiɲɛn fɔ! Nka mɔgɔ si tun tɛ se ka don kurun kɔnɔ tugun. Jehova tun y’a datugu kosɔbɛ.

A ma mɛɛn, jii ye kɛnɛbaw bɛɛ datugu. Jii cayara ka kɛ i ko kɔɔbaw. A tun be yiriw laben, ka kabakurubaw kolonkolon ani ka mankanba kɛ. Mɔgɔw jaa tigɛra. U yɛlɛla tintinw kan. Ee! N’u tun sɔnna ka mɛnni kɛ Nuhun fɛ ani ka don kurun kɔnɔ sanni a ka datugu sa! Nka o tun tɛ se ka kɛ tugun.

Jii tun be cayara ka taga dɔrɔn. Tile 40 ani suu 40, jii tun be bɔnna ka bɔ sanfɛ. A tora ka yɛlɛ kuluw kan, ani a ma mɛɛn, hali kulu jamanjanbaw datugura. O cogo la, mɔgɔw ni bɛgɛn minw tun tɛ kurun kɔnɔ, u bɛɛ sara i n’a fɔ Ala tun y’a fɔ cogo min na. Nka minw bɛɛ tun be kurun kɔnɔ, olu kisira.

Nuhun n’a dencɛw tun ye kurun dilan ka ɲɛ. Tuma min na jii y’a kɔrɔta, a fogonna jii sanfɛ. Loon dɔ, sanji tigɛra ani tile bɔra. Nin tun ye kabako ye dɛ! Dugukolo bɛɛ tun fara i ko kɔgɔjiba. Kurun dɔrɔn lo tun be yera jii sanfɛ.

Kurun be fogonna jii sanfɛ

Mɔgɔ jamanjanbaw tun tɛ yen tugun. U tun tɛna mɔgɔ si niin tɔɔrɔ tugun. U bɛɛ tun sara ka fara u bamusow ni mɔgɔ jugu tɔɔw kan. Nka u facɛw do?

U facɛw tun tɛ adamadenw ye i n’a fɔ anw. U tun ye mɛlɛkɛw lo ye. Nka, u tun nana ɲɛnamaya kɛ dugukolo kan i ko adamadenw. O kama, tuma min na sanjiba nana, olu ma sa i n’a fɔ mɔgɔ tɔɔw. U ye adamadenw cogoya to yen ani u yɛlɛmana ka kɛ mɛlɛkɛw ye tugun ka yɛlɛ sanfɛ. Nka, Ala ma sɔn u ka kɛ ale ka mɛlɛkɛw cɛma tugun a ka denbaya kɔnɔ sankolo la. O la, u kɛra Sutana ka mɛlɛkɛw ye Bibulu be minw weele ko jinaw.

O kɔ, Ala ye fɔɲɔ dɔ fiyɛ dugukolo kan ani jii y’a daminɛ ka jigi. Kalo duuru tɛmɛnin kɔ, kurun tagara lɔ kulu dɔ sanfɛ. Loon caaman tɛmɛna tugun, ani minw tun be kurun kɔnɔ olu tun be se ka kuluw kuun ye. Jii tora ka jigi dɔrɔn.

Nuhun ye kɔnɔ finman dɔ bila ka bɔ kurun kɔnɔ, a tɔgɔ ko kaankaan. A panna wagati dɔɔni, ani a kɔsegira ka na sabu a ma sigiyɔrɔ sɔrɔ. O kɔnɔ tora ka taga ka na ani ka sigi kurun kan.

Jɛnɛtugan

Nuhun tun b’a fɛ k’a lɔn ni jii jara dugukolo kan. O kama, a ye jɛnɛtugan fana bila ka bɔ kurun kɔnɔ. Nka ale fana kɔsegira ka na sabu a ma sigiyɔrɔ sɔrɔ. Nuhun y’a bila ka taga kokura, ani a kɔsegira ka na ni yiri furaburu dɔ ye a daa la. O la, Nuhun y’a lɔn ko jii jigira. Nuhun ye jɛnɛtugan bila ka taga siɲɛ sabanan na, nka a ma kɔsegi ka na tugun sabu a y’a ye ko yɔrɔ jara.

Sisan, Ala kumana Nuhun fɛ ko: ‘Aw ka bɔ kurun kɔnɔ, e n’i denbaya ani bɛgɛnw ni kongosogow.’ U tun ye saan kelen ni kɔ kɛ kurun kɔnɔ. O la, an ka miiri k’a filɛ u ninsɔndiyara cogo min na ka bɔ kurun kɔnɔ ani k’a ye k’u kisira!

Zɛnɛzi 7:10-24; 8:1-17; 1 Piyɛri 3:19, 20.



Ɲiningaliw

  • Mun na mɔgɔ si tun tɛ se ka don kurun kɔnɔ sanji daminɛnin kɔ?
  • Jehova y’a to sanji benna suu ni tile joli, ani jii cayara fɔɔ ka se hakɛ juman ma?
  • Tuma min na jii y’a daminɛ ka dugukolo datugu, kurun kɛra di?
  • Yala mɔgɔ jamanjanbaw kisira sanjiba ma wa? Ani u facɛw kɛra cogo di?
  • Kalo duuru tɛmɛnin kɔ, kurun kɛra di?
  • Mun na Nuhun ye kaankaan bila ka bɔ kurun kɔnɔ?
  • Nuhun y’a lɔn cogo di ko jii jigira dugukolo kan?
  • Nuhun n’a ka denbaya ye saan kelen ni kɔ kɛ kurun kɔnɔ, o kɔ Ala ye mun lo fɔ a ye?

Ɲiningali wɛrɛw

  • Zɛnɛzi 7:10-24 kalan.

    Halakili sera hakɛ juman ma dugukolo kan? (Zɛnɛzi 7:23)

    Sanjiba jiiw ye wagati juman kɛ ka sɔrɔ ka ja? (Zɛnɛzi 7:24)

  • Zɛnɛzi 8:1-17 kalan.

    Zɛnɛzi 8:17 b’a yira cogo di ko Jehova sagonata ma yɛlɛma dugukolo ta fan fɛ? (Zɛnɛzi 1:22)

  • An ka 1 Piyɛri 3:19, 20 kalan.

    Tuma min na mɛlɛkɛ murutininw yɛlɛla sankolo la, kiti juman tigɛra u kan? (Zude 6)

    See min be Jehova ye k’a ka mɔgɔw kisi, Nuhun n’a ka denbaya ka koo be an ka lanaya sabati o la cogo di? (2 Piyɛri 2:9)