Taga a kɔnɔkow lajɛ

Taga a kɔnɔnakow lajɛ

Maana 109nan: Piyɛri tagara bɔ Kɔrinɛyi ye

Maana 109nan: Piyɛri tagara bɔ Kɔrinɛyi ye

PIYƐRI lo lɔnin be yan, ani a teri dɔw lo be a kɔfɛ. Nka, mun na cɛɛ nin y’a kunbiri gwan Piyɛri ɲɛɛ kɔrɔ? A ka kan k’o kɛ wa? I b’o cɛɛ nin lɔn wa?

Piyɛri nana bɔ Kɔrinɛyi ye

O cɛɛ nin ye Kɔrinɛyi lo ye. Ɔrɔmukaw ka sɔrɔdasiw kuntigi dɔ lo. Kɔrinɛyi tun tɛ Piyɛri lɔn, nka a fɔra a ye ko a k’a weele ka na a ka soo. An k’a filɛ o koo kɛra cogo min na.

Yezu ka kalanden fɔlɔw tun ye Yahutuw lo ye, Kɔrinɛyi kɔni tun tɛ Yahutu ye. Nka a tun be Ala kanu, a tun b’a deli ani a tun be koɲuman caaman kɛ mɔgɔw ye. O kama, loon dɔ wulada fɛ mɛlɛkɛ dɔ y’a yɛrɛ yira a la k’a fɔ a ye ko: ‘I be Ala bato minkɛ, o diyara a ye ani a bena i ka delili jaabi. I ka mɔgɔw ci Zope, ka taga cɛɛ dɔ weele, a tɔgɔ ko Piyɛri. A ka jatigicɛ tɔgɔ ko Simɔn, a ka soo be kɔgɔji daa la.’

O yɔrɔnin bɛɛ, Kɔrinɛyi ye mɔgɔ dɔw ci ka taga Piyɛri weele. O dugusagwɛ, k’a to o mɔgɔw yɔrɔ tun man jan Zope la, Piyɛri tun be Simɔn ka sanbon kan. O yɔrɔ la, yeli fɛ, Ala y’a kɛ Piyɛri ye minanba dɔ jigitɔ ye ka bɔ sankolo la. Kongosogo ni bɛgɛn sifaw bɛɛ be o minan kɔnɔ. Ka kɛɲɛ ni Ala ka sariya ye, o kongosogow ni bɛgɛnw tun ye fɛɛn nɔgɔninw ye minw man kan ka dumu. Nka, kumakan dɔ y’a fɔ ko: “Piyɛri, wili ka nunu dɔ faga ka ɲimi.”

Piyɛri y’a jaabi ko: ‘Abada! Ne ma deli ka fɛɛn nɔgɔnin si don n daa la ka ye.’ Nka, kaan nin y’a fɔ a ye tugun ko: ‘Ala ye fɛɛn min saniya, kana a fɔ ko o nɔgɔnin lo.’ O koo kɛra fɔɔ siɲɛ saba. Piyɛri tun b’a yɛrɛ ɲiningara o koow kɔrɔ la. K’a to o la, Kɔrinɛyi ka cidenw sera luda la ani ka Piyɛri koo ɲininga.

Piyɛri jigira ka taga ani k’a fɔ ko: “Aw be mɔgɔ min yɔrɔ ɲinina, ne lo. Aw ye dɔ di.” O cɛɛw y’a ɲɛfɔ ko mɛlɛkɛ dɔ lo y’a fɔ Kɔrinɛyi ye ko a ka Piyɛri weele ka na a ka soo. Piyɛri sɔnna, ani o dugusagwɛ, a n’a teriw tagara bɔ Kɔrinɛyi ye Sezare.

Kɔrinɛyi tun y’a somɔgɔw n’a teri sɔbɛw lajɛn ka Piyɛri makɔnɔ. Piyɛri dontɔ soo kɔnɔ, Kɔrinɛyi tagara a kunbɛn, ka ben a seen kɔrɔ ani k’a kunbiri gwan i ko i ɲɛɛ b’a la jaa kan. Nka Piyɛri y’a fɔ ko: ‘Wuli, bari ne fana ye i bɔɲɔgɔnko adamaden lo ye.’ Tiɲɛn na, Bibulu b’a yira ko a daganin tɛ ka biri adamaden ɲɛɛ kɔrɔ k’a bato. An ka kan ka Jehova kelenpe dɔrɔn lo bato.

Mɔgɔ minw bɛɛ lajɛnnin tun be Kɔrinɛyi ka soo kɔnɔ, Piyɛri ye u waaju. A ko: ‘Ne y’a lɔn sisan ko mɔgɔ minw b’a fɛ ka baara kɛ Ala ye, a be sɔn u bɛɛ ma.’ K’a to kuma na, Ala y’a ka hakili senu jigi o mɔgɔw kan ani u y’a daminɛ ka kaan wɛrɛw fɔ. Kalanden minw tun nana ni Piyɛri ye, o koo ye u kabakoya sabu u tun b’a miiri ko Ala be olu Yahutuw dɔrɔn lo fɛ. O koo y’u dɛmɛ u k’a faamu ko Ala tɛ siya si fisaya dɔ wɛrɛ ye. Nin tɛ koo ɲuman ye an bɛɛ ka kan k’an hakili to min na wa?

Kɛwaliw 10:1-48; 11:1-18; Yirali 19:10.



Ɲiningaliw

  • Jaa nin kan, cɛɛ min y’a kunbiri gwan, jɔn lo?
  • Mɛlɛkɛ dɔ ye mun lo fɔ Kɔrinɛyi ye?
  • Ka Piyɛri to Simɔn ka sanbon kan Zope dugu la, Ala ye mun lo yira a la?
  • Mun na Piyɛri y’a fɔ Kɔrinɛyi ye ko a man kan ka biri ale seen kɔrɔ ani k’a bato?
  • Kalanden minw tun nana ni Piyɛri ye, olu tun ye Yahutuw ye. Mun lo ye u kabakoya?
  • An be kalanba juman sɔrɔ Piyɛri taganin koo la Kɔrinɛyi fɛ?

Ɲiningali wɛrɛw

  • Kɛwaliw 10:1-48 kalan.

    Piyɛri ka kuma minw be sɔrɔ Kɛwaliw 10:42 kɔnɔ, u be mun yira Masaya kibaro duman waajuli baara koo la? (Mat. 28:19; Mariki 13:10; Kɛw. 1:8)

  • Kɛwaliw 11:1-18 kalan.

    Tuma min na Jehova y’a yira ka gwɛ ale sagonata ye min ye siya wɛrɛw koo la, Piyɛri ye o koo ta cogo di, ani an be se k’a ladegi cogo di? (Kɛw. 11:17, 18; 2 Kor. 10:5; Efɛz. 5:17)