Taga a kɔnɔkow lajɛ

Taga a kɔnɔnakow lajɛ

Maana 98nan: Oliviye yiriw kulu kan

Maana 98nan: Oliviye yiriw kulu kan

YEZU filɛ Oliviye yiriw kulu kan! A ka ciden naani dɔw be n’a ye. Piyɛri n’a dɔgɔcɛ Andere be yen ka fara Zaki n’a dɔgɔcɛ Zan fana kan. I ɲɛɛ be Zeruzalɛmu ka Alabatosoba lo la yɔrɔ jan Yezu kɔfɛ.

Yezu donna Zeruzalɛmu kɔnɔ faliden kan a tile fila ye nin ye. Talatalon sɔgɔmada joona fɛ, a tara Alabatosoba kɔnɔ. O yɔrɔ la, sarakalasebagaw tun be cogo ɲini walisa ka Yezu minɛ k’a faga. Nka, u tun be siran k’o kɛ sabu Yezu koo tun ka di jama ye.

Yezu n’a ka cidenw

Yezu ye o diinan kuntigiw weele ko: ‘Saaw ni fɔnfɔnnidenw.’ Ani a y’a fɔ u ye ko Ala bena u ɲangi u ka koo juguw bɛɛ kosɔn. O kɔ, Yezu yɛlɛla oliviye yiriw kulu kan, ani a ka ciden naani nunu y’a daminɛ k’a ɲininga. I b’a lɔn u y’a ɲininga fɛɛn min koo la wa?

Cidenw y’a ɲininga koo nataw koo la. U b’a lɔn ko Yezu bena koo jugu bɛɛ ban dugukolo kan. Nka, u b’a fɛ k’a lɔn a bena o kɛ tuma min na. Tuma juman Yezu bena segi ka na ani ka kɛ masa ye?

Yezu b’a lɔn ko n’a segira ka na, a ka kalandenw minw be dugukolo kan, u tɛna se k’a ye sabu a bena kɛ sankolo la. O kama, Yezu ye koo dɔw fɔ a ka cidenw ye minw tun bena kɛ dugukolo kan k’a yira ko a sigira masaya la sankolo la. O koo dɔw ye jumanw ye?

Yezu ka kiraya kuma y’a yira ko kɛlɛbaw, banaw, kɔngɔbaw, kojugubaw ani dugukolo yɛrɛyɛrɛbaw bena kɛ. Yezu y’a fɔ fana ko Ala ka masaya kibaro duman bena weleweleda dugukolo yɔrɔ bɛɛ la. Yala an ɲɛɛ lara o koow kan bi tilew la wa? Ɔnhɔn kɛ! O b’a yira ka gwɛ ko Yezu be masaya kɛra sankolo la. Yanni dɔɔni, a bena juguya bɛɛ ban dugukolo kan.

Matiyo 21:46; 23:1-39; 24:1-14; Mariki 13:3-10.



Ɲiningaliw

  • Yezu yira jaa nin kan, ani mɔgɔ jumanw lo be n’a ye?
  • Alabatosoba kɔnɔ, sarakalasebagaw y’a ɲini ka mun lo kɛ Yezu la, ani a ye mun lo fɔ u ye?
  • Yezu ka cidenw y’a ɲininga mun lo la?
  • Mun na Yezu ye koo dɔw fɔ a ka cidenw ye minw tun bena kɛ dugukolo kan tuma min na a be masaya la sankolo la?
  • Yezu ka fɔta la, sanni a ka juguya bɛɛ ban dugukolo kan, mun lo tun bena kɛ fɔlɔ?

Ɲiningali wɛrɛw

  • Matiyo 23:1-39 kalan.

    Bibulu b’a yira ko kojugu tɛ ka bonyali tɔgɔ la mɔgɔ kan. Nka, ka mɔgɔbayatɔgɔ la mɔgɔ kan kafo kɔnɔ, Yezu ye mun lo fɔ o koo la ka kɛɲɛ ni Matiyo 23:8-11 ye? (Kɛw. 26:25; Ɔrɔm. 13:7; 1 Piyɛri 2:13, 14)

    Fariziɲɛw ye mun lo kɛ walisa k’a ɲini ka mɔgɔw bali u ka kɛ kerecɛnw ye? Bi tile la, diinan kuntigiw be o ɲɔgɔn kɛ cogo di fana? (Mat. 23:13; Luka 11:52; Zan 9:22; 12:42; 1 Tes. 2:16)

  • Matiyo 24:1-14 kalan.

    Matiyo 24:13 be sinsin a kan cogo di ko a kɔrɔtanin lo an ka muɲuli kɛ?

    “Laban” min kofɔra Matiyo 24:13 kɔnɔ, o kɔrɔ ko di? (Mat. 16:27; Ɔrɔm. 14:10-12; 2 Kor. 5:10)

  • Mariki 13:3-10 kalan.

    Mariki 13:10 kɔnɔ, kuma jumanw b’a yira ko kɔrɔtɔ b’a la ka kibaro duman waajuli kɛ, ani Yezu ka kumaw ka kan ka nɔɔ juman to an kan? (Ɔrɔm. 13:11, 12; 1 Kor. 7:29-31; 2 Tim. 4:2)