Taga a kɔnɔkow lajɛ

Taga a kɔnɔnakow lajɛ

Maana 92nan: Yezu be suuw lakunu

Maana 92nan: Yezu be suuw lakunu

I ƝƐƐ be sungurunin min na yan, a sii ye saan 12 ye. Yezu lo y’a bolo minɛ ani a facɛ n’a bamuso lo lɔnin be a gɛrɛfɛ. I b’a lɔn fɛɛn min kama u ninsɔndiyanin lo ten wa? An k’o lajɛ.

Yezu ye Zayirus denmuso suu lakunu

Sungurunin facɛ ye mɔgɔba ye, a tɔgɔ ko Zayirus (Zayirisi). Loon dɔ, a denmuso banana ka la. A ka bana tun tɛ nɔgɔyara, nka a tun be juguyara ka taga le. O koo ye hami bila Zayirus n’a muso la sabu a tun be komi u denmuso bena sa. Ale kelen lo tun ye u deen ye. O kama, Zayirus tagara Yezu sɛgɛrɛ. A y’a mɛn ko Yezu be kabakow kɛ.

Zayirus tagara Yezu sɔrɔ jamaba cɛma. Nka, a ye jama cɛ ci ka taga a kunbiri gwan Yezu sen kɔrɔ. A ye Yezu deli ko: ‘Ne denmuso man kɛnɛ, a be ɲini ka sa. Sabari ka na a kɛnɛya.’ Yezu ko ale be nana.

Yezu tagatɔ o yɔrɔ la, jama tun b’a digidigi fɔɔ k’a degun. A barila ka lɔ ani ka ɲiningali kɛ ko: ‘Jɔn lo magara ne la?’ A y’a ye ko sebagaya dɔ bɔra ale la. Nka jɔn lo tun magara a la? Muso dɔ tun lo min tun man kɛnɛ fewu kabi saan 12. A tun gwɛrɛla Yezu la ka maga a ka fani na, ani a kɛnɛyara!

O kabako ye Zayirus jaa gwɛlɛyara sabu a y’a ye ko a ka nɔgɔ Yezu fɛ ka mɔgɔ kɛnɛya. Nka, ciden dɔ nana a fɔ Zayirus ye ko: ‘I denmuso sara, kana Yezu sɛgɛn tugun.’ Yezu y’o kuma mɛn minkɛ, a y’a fɔ Zayirus ye ko: ‘Kana siran, i denmuso bena kisi.’

U sera Zayirus ka soo tuma min na, mɔgɔw bɛɛ tun be kasira ka kule. Nka Yezu y’a fɔ u ye ko: “Aw kana kasi, sungurunin ma sa, nka a be sinɔgɔra le.” U yɛlɛla Yezu ma sabu u y’a lɔn ko deen nin sara.

Yezu ye deen faa n’a baa ani a ka kalanden saba minɛ ka don n’u ye deen layɔrɔ la. A y’a minɛ a bolo ma ani k’a fɔ ko: ‘wuli!’ Deen suu kununa i ko i ɲɛɛ b’a la yan cogo min na. A wulila ka to ka tagama! O lo y’a to a baa n’a faa ninsɔndiyanin lo ten.

Deen nin tun tɛ suu fɔlɔ ye Yezu ye min lakunu. A tun ye suu fɔlɔ min lakunu o ye firiya muso dɔ dencɛ ye Nayin dugu kɔnɔ. Kɔfɛ, a nana Mariyamu ni Marita balimacɛ Lazari suu fana lakunu. Yezu ka mara wagati la, a bena suu caaman lakunu. Nin ye kibaro duman ye dɛ, tiɲɛn tɛ?

Luka 8:40-56; 7:11-17; Zan 11:17-44.



Ɲiningaliw

  • Sungurunin min be jaa nin kan, a facɛ ye jɔn lo ye, ani mun na hami be o cɛɛ n’a muso la?
  • Zayirus tagara Yezu sɔrɔ, a ye mun lo kɛ?
  • Yezu tagatɔ Zayirus ka soo, mun lo kɛra, ani k’u to sira kan, ciden dɔ nana mun lo fɔ Zayirus ye?
  • Jama min tun be Zayirus ka soo, mun na u yɛlɛla Yezu ma?
  • Yezu ye deen faa n’a baa ani a ka kalanden saba minɛ ka don n’u ye deen layɔrɔ la, o kɔ a ye mun lo kɛ?
  • Yezu ye mɔgɔ wɛrɛ juman suu kunu, ani o be mun lo yira an na?

Ɲiningali wɛrɛw

  • Luka 8:40-56 kalan.

    Jolibɔn bana tun be muso min na, Yezu sabarila a ma ani ka hinɛ a la cogo di? Diinan mɔgɔkɔrɔw be se ka kalan juman sɔrɔ o koo la bi? (Luka 8:43, 44, 47, 48; Lev. 15:25-27; Mat. 9:12, 13; Kɔl. 3:12-14)

  • Luka 7:11-17 kalan.

    Minw ka mɔgɔ sɔbɛ dɔw sara, olu be se ka dususaloba juman sɔrɔ Yezu ka kumaw la a ye minw fɔ Nayin dugu firiya muso ye? (Luka 7:13; 2 Kor. 1:3, 4; Eburuw 4:15)

  • Zan 11:17-44 kalan.

    Yezu y’a yira cogo di ko kojugu tɛ k’i ka mɔgɔ sɔbɛ suu kasi? (Zan 11:33-36, 38; 2 Sam. 19:1-5)