Taga a kɔnɔkow lajɛ

Taga a kɔnɔnakow lajɛ

Maana 100nan: Zɛtisemane nankɔ kɔnɔ

Maana 100nan: Zɛtisemane nankɔ kɔnɔ

YEZU n’a ka cidenw bɔra sangaso boon kɔnɔ ka taga Zɛtisemane nankɔ kɔnɔ. U delila ka na yan siɲɛ caaman. Yezu y’a fɔ a ka cidenw ye ko u ka to ɲɛɛ na ka Ala deli. O kɔ, a tagara ɲɛfɛ dɔɔni k’a ɲɛɛ biri duguma ani ka Ala deli.’

O kɔ, Yesu kɔsegira a ka cidenw yɔrɔ. E ka miiri la u tun be mun lo kɛra? U tun be sinɔgɔra! Yezu y’a fɔ u ye siɲɛ saba k’u ka kan ka to ɲɛɛ na, nka o siɲɛ kelen kelen bɛɛ la, a nana u sɔrɔ u be sinɔgɔra. A segira ka na siɲɛ laban na k’a fɔ u ye ko: ‘Wagati nin ɲɔgɔn na, aw be sinɔgɔra wa? Ayiwa wagati surunyana. U bena ne don ne juguw bolo.

O wagati yɛrɛ la, u ye jamaba seenw mankan mɛn. A filɛ! Mɔgɔw be nana ni murujanjanw ni berew ye u bolo! Kala mananinw tun be u bolo ka yeelen bɔ u ye. U surunyana tuma min na, mɔgɔ dɔ bɔra u cɛma ka sin Yezu ma. A ye Yezu daa susu i n’a fɔ i ɲɛɛ b’a la cogo min na jaa kan. O tigi tun ye Zuda Isikariyɔti lo ye! Mun na a ye Yezu daa susu do?

Zuda be Yezu janfara

Yezu y’a ɲininga ko: ‘Zuda, i be ne daa susu ka ne janfa wa?’ O tun ye tagamasiɲɛ ye Zuda fɛ. O tun b’a to Zuda nɔfɛmɔgɔw ka Yezu lɔn. O la, Yezu juguw gwɛrɛla a la k’a minɛ. Nka, Piyɛri tun t’a fɛ u k’a minɛ ni kɛlɛ ma kɛ. Murujan min tun b’a fɛ, a y’o bɔ. Cɛɛ min tun lɔnnin be a gɛrɛfɛ, a fɔnna ale kungolo la ka taga a kinibolo tulo caron. Nka, Yezu magara cɛɛ tulo la k’a kɛnɛya.

Yezu y’a fɔ Piyɛri ye ko: ‘I ka murujan don a nɔɔ na. E m’a lɔn ko ne be se k’a fɔ n Faa ye ko a ka mɛlɛkɛ waa caaman ci ka na n kisi wa?’ Tiɲɛn na, a be se k’o kɛ! Nka Yezu m’o kɛ, sabu a y’a lɔn ko a minɛ wagati tun sera a juguw fɛ. O la, a y’a to u k’ale minɛ ka taga n’a ye. Sisan an k’a filɛ u bena min kɛ Yezu la.

Matiyo 26:36-56; Luka 22:39-53; Zan 18:1-12.



Ɲiningaliw

  • Yezu n’a ka cidenw bɔnin kɔ sangaso boon kɔnɔ u tagara min, ani a ko u ka mun lo kɛ?
  • Yesu tun mana kɔsegi a ka cidenw yɔrɔ, a tun b’u sɔrɔ u be mun lo kɛra, ani o kɛra siɲɛ joli?
  • Jɔn lo nana Zɛtisemane nankɔ kɔnɔ, ani Zuda Isikariyɔti ye mun lo kɛ i ko i ɲɛɛ b’a la jaa nin kan?
  • Mun na Zuda ye Yezu daa susu, ani Piyɛri ye mun lo kɛ?
  • Yezu ye mun lo fɔ Piyɛri ye, nka mun na Yezu m’a fɔ Ala ye a ka mɛlɛkɛ dɔ ci ka na ale dɛmɛ?

Ɲiningali wɛrɛw

  • Matiyo 26:36-56 kalan.

    Yezu ye a ka kalandenw ladi cogo min na, cogo di o ye ɲɛyirali ɲuman ye kerecɛn diinan mɔgɔkɔrɔw fɛ bi? (Mat. 20:25-28; 26:40, 41; Gal. 5:17; Efɛz. 4:29, 31, 32)

    Ka kɛlɛkɛminanw ta i mɔgɔɲɔgɔn kama, Yezu b’o koo jati cogo di? (Mat. 26:52; Luka 6:27, 28; Zan 18:36)

  • Luka 22:39-53 kalan.

    Mɛlɛkɛ dɔ nana barika don Yezu la Zɛtisemane nankɔ kɔnɔ. Yala o b’a yira ko Yezu ka limaniya barika tun dɔgɔyara wa? A ɲɛfɔ. (Luka 22:41-43; Ezayi 49:8; Mat. 4:10, 11; Eburuw 5:7)

  • Zan 18:1-12 kalan.

    Cogo juman na Yezu ye a ka kalandenw tanga a juguw ma, ani an be kalan juman sɔrɔ o koo la? (Zan 10:11, 12; 18:1, 6-9; Eburuw 13:6; Zaki 2:25)