Taga a kɔnɔkow lajɛ

Taga a kɔnɔnakow lajɛ

Maana 79nan: Daniyɛli filila jaraw fɛ

Maana 79nan: Daniyɛli filila jaraw fɛ

A FILƐ, a filɛ! A be komi Daniyɛli be farati la dɛ! Nka jaraw tɛ foyi kɛra a la. I b’a lɔn mun kama wa? Jɔn lo ye Daniyɛli fili yan jara nunu fɛ? An k’o lajɛ.

Dariyusi lo tun kɛra Babilɔni masacɛ ye sisan. Daniyɛli ka ɲumanya n’a ka hakilitigiya kosɔn, a koo tun ka di Dariyusi ye kosɔbɛ. A ye Daniyɛli kɛ a ka masaya ɲɛmɔgɔ dɔ ye. O koo y’a to Daniyɛli ɲangoya ye masaya ɲɛmɔgɔ dɔw minɛ. An k’a filɛ u y’a ɲini ka min kɛ.

Dariyusi

U tagara Dariyusi fɛ ani u y’a fɔ a ye ko: ‘Masacɛ, an bɛnna a la ko e ka sariya dɔ sigi ko tile 30 kɔnɔ, mɔgɔ kana batofɛn wala mɔgɔ si bato e kelenpe kɔ, n’o tɛ o tigi ka fili jaraw fɛ.’ Dariyusi tun tɛ o cɛɛw ka kɔnɔko lɔn. A y’a ye ko miiriya ɲuman lo. O kama a y’a fɔ ko o sariya ka sigi sen kan. Ayiwa sisan, o sariya tɛ se ka wuli abada.

Daniyɛli bɔra a kala ma tuma min na k’o sariya sigira, a tagara a ka soo ka Ala deli i ko a tun be deli k’a kɛ cogo min na. A juguw tun b’a lɔn ko a tɛna Jehova delili dabila. U ninsɔn diyara sabu a be u ɲɛɛ na ko u ye nanbara min kɛ Daniyɛli kama, o bena ɲɛ u bolo.

O cɛɛw y’a ɲini masacɛ Dariyusi fɛ a ka sariya sigi kuun min kama, a bɔra o kala ma tuma min na, a dusu kasira kosɔbɛ. Nka komi a tun tɛ se k’o sariya yɛlɛma, a ye cii di ko u ka Daniyɛli fili jaraw fɛ dingɛ kɔnɔ. Nka, a y’a fɔ Daniyɛli ye ko: ‘Ne jigi b’a la ko i be baara kɛ i ka Ala min ye tuma bɛɛ, ale bena i kisi.’

Dariyusi ka dusukasi bonyana fɔɔ a ma se ka sinɔgɔ o suu la. O dugusagwɛ sɔgɔma, a teliyara ka taga jaraw ka dingɛda la. I ɲɛɛ b’a la dingɛda la kɛ. A pɛrɛnna ko: ‘Ala ɲɛnama ka baarakɛla Daniyɛli! I be baara kɛ i ka Ala min ye, yala a sera k’i tanga jaraw ma wa?’

Daniyɛli filila jaraw fɛ dingɛ kɔnɔ

Daniyɛli y’a jaabi ko: “Ala y’a ka mɛlɛkɛ ci ka na jara nunu daa siri, u ma foyi kɛ ne la.”

Masacɛ ninsɔn diyara kosɔbɛ. A y’a fɔ k’u ka Daniyɛli bɔ dingɛ kɔnɔ ani u k’a jalakibagaw fili yen jaraw fɛ. Sanni u yɛrɛ ka se dingɛ daan na, jaraw girinna u kan k’u kolow bɛɛ karikari.

O kɔ, masacɛ Dariyusi ye sɛbɛ ci siyaw bɛɛ ma a ka mara kɔnɔ ko: ‘Ne be cii di ko bɛɛ ka bonya la Daniyɛli ka Ala kan. A be kabakow kɛ. A ye Daniyɛli tanga jaraw ma.’

Daniyɛli 6:2-29.



Ɲiningaliw

  • Dariyusi tun ye jɔn lo ye ani a tun be Daniyɛli jati cogo di?
  • Ɲangoya kosɔn, mɔgɔ dɔw ye Dariyusi lasun a ka mun lo kɛ?
  • Daniyɛli y’a mɛn tuma min na ko sariya kura sigira sen kan, a ye mun lo kɛ?
  • Mun lo ye Dariyusi dusu kasi fɔɔ a ma se ka sinɔgɔ, ani a ye mun lo kɛ o dugusagwɛ sɔgɔma?
  • Daniyɛli ye Dariyusi jaabi cogo di?
  • Mɔgɔ minw tun b’a fɛ ka Daniyɛli faga, mun lo kɛra olu la, ani Dariyusi ye sɛbɛ juman ci siyaw bɛɛ ma a ka mara kɔnɔ?

Ɲiningali wɛrɛw

  • Daniyɛli 6:2-29 kalan.

    Jɛn min sirila Daniyɛli kama, o b’an hakili jigi koo jumanw na Jehova Seerew ka juguw y’a ɲini ka minw kɛ walisa k’u ka baara lasa bi tilew la? (Dan. 6:8; Zab. 94:20; Ezayi 10:1; Ɔrɔm. 8:31)

    Ka kolo “faamaw” ye, Ala sagokɛlaw be se ka Daniyɛli ladegi o koo la cogo di bi? (Dan. 6:6, 11; Ɔrɔm. 13:1; Kɛw. 5:29)

    Daniyɛli tun be baara kɛ Jehova ye “tuma bɛɛ.” An be se k’a ladegi o koo la cogo di? (Dan. 6:17, 21; Fil. 3:16; Yir. 7:15)