Taga a kɔnɔkow lajɛ

Taga a kɔnɔnakow lajɛ

Maana 67nan: Zozafati b’a jigi la Jehova kan

Maana 67nan: Zozafati b’a jigi la Jehova kan

I B’A lɔn cɛɛ nunu ye jɔn lo ye, ani u be min kɛra wa? U be tagara kɛlɛ lo la, ani cɛɛ minw b’u ɲɛfɛ olu be dɔnkili lara. N’a sɔrɔ i bena i yɛrɛ ɲininga ko: ‘Mun na murujanw ni tamanw tɛ dɔnkililalaw bolo?’ An k’o lajɛ.

Israɛldenw be tagara kɛlɛ la

Zozafati lo tun be Israɛl siya fila ka masaya kun na. O wagati kelen na Akabu n’a ka muso Zezabɛli tun be siya 10 ka masaya kun na saheli fan fɛ. Zozafati kɔni tun ye masacɛ ɲuman ye i ko a faa Aza. O la, a ka masaya mɔgɔw tora hɛɛrɛ la saan caaman kɔnɔ.

Nka loon dɔ, koo dɔ kɛra min ye a ka mɔgɔw lasiran. Ciraden dɔw nana a fɔ Zozafati ye ko: ‘Kɛlɛden caaman be nana i kɛlɛyɔrɔ dɛ! U bɔra Mowabu, Amoni ani Seyiri kuluyɔrɔ la.’ Israɛlden caamanba lajɛnna Zeruzalɛmu walisa ka dɛmɛ ɲini Jehova fɛ. U tagara Alabatosoba kɔnɔ, ani Zozafati ye delili kɛ ko: ‘E Jehova, an ka Ala, an t’a lɔn an bena min kɛ. Fanga t’an na ka lɔ kɛlɛden caaman nunu ɲɛ. An ɲɛɛ be ele lo kan.’

Jehova ye Zozafati lamɛn, ani a y’a to a ka kira dɔ y’a fɔ jama ye ko: ‘Aw ka kɛlɛ tɛ, nka Ala ta lo. Aw tɛna kɛlɛ kɛ. Aw ka lɔ k’a filɛ Jehova bena min kɛ k’aw kisi.’

O loon dugusagwɛ sɔgɔma, Zozafati y’a fɔ jama ye ko: ‘Aw k’aw jigi la Jehova kan!’ O kɔ, a ye dɔnkililalaw bila kɛlɛdenw ɲɛ, u tora ka tagama ani ka dɔnkili la ka Jehova tando. I b’a lɔn koo min kɛra tuma min na u surunyana kɛlɛyɔrɔ la wa? Jehova ye ɲagamini don Mowabu, Amoni ani Seyiri kuluyɔrɔ kɛlɛdenw cɛ, u ye ɲɔgɔn kɛlɛ. Israɛldenw sera tuma min na, u ye suuw dama le ye!

Yala a ma kɛ hakilitigiyako ye Zozafati fɛ k’a jigi la Jehova kan wa? N’an fana b’an jigi la Jehova kan, o bena kɛ hakilitigiyako ye an fɛ.

1 Masacɛw 22:41-54; 2 Tilew Kibaru 20:1-30.


Ɲiningaliw

  • Zozafati tun ye jɔn lo ye, ani a ye ɲɛnamaya kɛ wagati juman na?
  • Mun na Israɛldenw siranna, ani u caaman ye mun lo kɛ?
  • Zozafati ka delili kɔ, Jehova ye mun lo fɔ ka jama jaa gwɛlɛya?
  • Sanni kɛlɛ yɛrɛ ka daminɛ Israɛldenw n’u juguw cɛ, Jehova ye mun lo kɛ?
  • An be se ka kalan juman sɔrɔ Zozafati ka koo la?

Ɲiningali wɛrɛw

  • An ka 2 Tilew Kibaru 20:1-30 kalan.

    Zozafati y’a yira cogo di Ala sagokɛla kantigimanw ka kan ka min kɛ ni faratiw b’u seen kɔrɔ? (2 Til. Kib. 20:12; Zab. 25:15; 62:2)

    Sanga ni wagati bɛɛ, Jehova tɛmɛna fɛɛrɛ dɔ fɛ ka kumaɲɔgɔnya kɛ n’a ka mɔgɔw ye. Bi do, a be tɛmɛ fɛɛrɛ juman lo fɛ? (2 Til. Kib. 20:14, 15; Mat. 24:45-47; Zan 15:15)

    Ala mana na kɛlɛ wuli “Setigi Ala ka lonba loon na,” an ka koow cogo bena bɔ Zozafati ta ma cogo di? (2 Til. Kib. 20:15, 17; 32:8; Yir. 16:14, 16)

    Piyɔniyew ni misɔndenw be Levitiw ladegi cogo di ka dɛmɛ don duniɲa kuru bɛɛ waajuli baara la bi? (2 Til. Kib. 20:19, 21; Ɔrɔm. 10:13-15; 2 Tim. 4:2)