Taga a kɔnɔkow lajɛ

Taga a kɔnɔnakow lajɛ

Maana 76nan: Zeruzalɛmu halakira

Maana 76nan: Zeruzalɛmu halakira

A SAAN 10 ni kɔ ye nin ye, Israɛlden minw tun kalannin lo kosɔbɛ, Nabukodonozɔri ye olu cɛ ka taga n’u ye Babilɔni. Sisan, a filɛ min be kɛra! Zeruzalɛmu dugu be jɛnina. Israɛlden minw ma faga, u be tagara n’olu ye jɔnya la Babilɔni.

I hakili b’a la, Jehova ka kiraw tun y’a fɔ ko o lo tun bena kɛ ni Israɛldenw m’u ka tagamacogo jugu dabila. Nka, Israɛldenw ma sɔn ka mɛnni kɛ kiraw fɛ. U tora ka ngalon alaw bato sanni ka Jehova bato. O kama, u tun ka kan ni ɲangili ye. U tun be koo jugu minw kɛ, Ala ka kira Ezekiyɛli y’o lakali.

Ezekiyɛli ye jɔn lo ye? Nabukodonozɔri ye kanbele minw cɛ ka taga n’u ye Babilɔni saan 10 ni kɔ ka kɔn Zeruzalɛmu kuturu bɛɛ halakili ɲɛ, Ezekiyɛli tun ye olu dɔ ye. O wagati kelen lo la Daniyɛli n’a teriw, Sadiraki, Mesaki ani Abɛdenego fana minɛna ka taga Babilɔni.

Ka Ezekiyɛli to Babilɔni, koo jugu minw bɛɛ tun be kɛra Alabatosoba kɔnɔ Zeruzalɛmu, Jehova y’u yira a la kabako dɔ sen fɛ. Ezekiyɛli yɛrɛ tun be Babilɔni, nka koo minw bɛɛ tun be kɛra Alabatosoba kɔnɔ, Jehova y’u yira a la hakili senu barika la. Ezekiyɛli ye min ye o tun be mɔgɔ kɔnɔ gwan!

Jehova y’a fɔ Ezekiyɛli ye ko: ‘A filɛ jama be koo nɔgɔnin minw kɛra yan Alabatosoba kɔnɔ. Saaw ni bɛgɛn wɛrɛw jaaw filɛ kogow kan. Ani a filɛ Israɛldenw b’u batora!’ Ezekiyɛli sera k’o koow ye ani k’o sɛbɛ.

Minw bɔra Zerezalɛmu ka taga jɔnya la

Jehova ye Ezekiyɛli ɲininga ko: ‘Israɛl cɛkɔrɔbaw be dogo ka min kɛ, i y’o ye wa?’ Ezekiyɛli y’o koo ye fana. Cɛɛ 70 tun be yen, ani u bɛɛ tun be ngalon alaw batora. U tun b’a fɔra ko: ‘Jehova ɲɛɛ tɛ an na. A ye jamana nin bila.’

O kɔ, Jehova ye muso dɔw yira Ezekiyɛli la Alabatosoba donda la saheli fan fɛ. U siginin tun be yen ka to ka ngalon ala Tamuzi bato. Ani cɛɛ nunu filɛ Jehova batosoba donda la! Ezekiyɛli ye cɛɛ 25 ɲɔgɔn ye yen. U tun be birila k’u ɲɛsin kɔrɔn fan fɛ ka tile bato.

Jehova ko: ‘Jama nin tɛ ne bonya fewu. U be koo juguw kɛ, nka u tɛ dan o ma, u be na ne batosoba yɛrɛ kɔnɔ k’u kɛ!’ O kama, Jehova y’a latigɛ ko: ‘Ne dimininba le bena u sara. Ani, ne tɛna makari u la fewu u halakili tuma na.’

Jehova y’o koow yira Ezekiyɛli la, saan saba ɲɔgɔn dɔrɔn o kɔ, Israɛldenw murutira masacɛ Nabukodonozɔri kama. Ayiwa, masacɛ Nabukodonozɔri tagara u kɛlɛ. Saan kelen ni tilan tɛmɛnin kɔ, Babilɔnikaw ye Zeruzalɛmu kogow sɔgɔ ani ka dugu jɛni. Dugumɔgɔw fanba fagara wala u cɛra ka taga jɔnya la Babilɔni.

Mun na Jehova y’a to Israɛldenw halakira nin cogo la? Sabu u ma mɛnni kɛ Jehova fɛ ani u m’a ka sariyaw labato. Koo nunu b’a yira ko Jehova mana koo o koo ɲini an fɛ a kɔrɔtanin lo an k’o kɛ.

Babilɔnikaw ye mɔgɔ damanin dɔrɔn to Israɛl jamana kɔnɔ. Nabukodonozɔri ye Yahutu dɔ sigi o mɔgɔw kun na min tɔgɔ ko Gedaliya. Nka o kɔ, Israɛlden dɔw ye Gedaliya faga. Ayiwa, sisan jama siranna ko Babilɔnikaw bena na u bɛɛ halaki sabu u y’o koo jugu kɛ. O kama, u ye Zeremi waajibiya ka tugu u kɔ, ani u bolila ka taga Misira jamana na.

O cogo la, Israɛl jamana lakolon tora. Saan 70 kɔnɔ, mɔgɔ si ma sigi o jamana na. A lakolonyara pewu pewu. Nka, Jehova ye layidu ta ko a bena a to a ka mɔgɔw ka kɔsegi ka na jamana kɔnɔ saan 70 tɛmɛnin kɔ. O saan 70 kɔnɔ, mun lo kɛra Ala ka mɔgɔw la Babilɔni jamana na, u cɛra ka taga yɔrɔ min na? An bena o ye kɔfɛ.

2 Masacɛw 25:1-26; Zeremi 29:10; Ezekiyɛli 1:1-3; 8:1-18.



Ɲiningaliw

  • Jaa nin kan, mun lo be kɛra Zeruzalɛmu la ani Israɛldenw na?
  • Ezekiyɛli tun ye jɔn lo ye, ani Jehova ye koo jumanw yira a la minw be mɔgɔ kɔnɔ gwan?
  • Komi Israɛldenw ma bonya la Jehova kan, a ye mun lo latigɛ u kama?
  • Israɛldenw murutinin kɔ Nabukodonozɔri kama, a ye mun lo kɛ u la?
  • Mun na Jehova y’a to Israɛldenw halakiko juguyara ten?
  • Israɛl jamana lakolonyara cogo di, ani a tora ten fɔɔ saan joli?

Ɲiningali wɛrɛw

  • An ka 2 Masacɛw 25:1-26 kalan.

    Zedesiyasi tun ye jɔn lo ye, mun lo kɛra a la, ani o ye kiraya kuma dafa cogo di? (2 Mas. 25:5-7; Ezek. 12:13-15)

    Israɛldenw tun be koo jugu minw bɛɛ kɛra, Jehova ye jɔn lo jalaki o kosɔn? (2 Mas. 25:9, 11, 12, 18, 19; 2 Til. Kib. 36:14, 17)

  • Ezekiyɛli 8:1-18 kalan.

    Israɛlden murutinin dɔw tun be tile bato, kerecɛn tɔgɔtigiw be olu ladegi cogo di? (Ezek. 8:16; Ezayi 5:20, 21; Zan 3:19-21; 2 Tim. 4:3)